2022: Jeha Nɛ Níhi Pee Basaa Ngɛ Je ɔ Mi​—Mɛni Baiblo ɔ De?

Ngɛ jeha 2022 ɔ mi ɔ, wa nu amaniɛ bɔmihi nɛ kɔɔ ta, sika he nyagba, kɛ zugba a nɛ e ngɛ puɛe ɔ he wawɛɛ. Baiblo ɔ pɛ lɛ ha nɛ wa le nɔ́ tutuutu nɛ ní nɛ ɔmɛ nɛ a ngɛ nɔ yae ɔ tsɔɔ.

Nɔ́ tutuutu nɛ níhi nɛ a ya nɔ ngɛ jeha 2022 ɔ mi ɔ tsɔɔ

Níhi nɛ ya nɔ ngɛ jeha nɛ be ɔ mi ɔ ha nɛ e pee heii kaa, wa ngɛ behi nɛ Baiblo ɔ tsɛɛ ke “nyagbe ligbi ɔmɛ” a mi. (2 Timoteo 3:1) Be nɛ ɔ je sisi ngɛ jeha 1914 ɔ mi. Moo hyɛ bɔ nɛ níhi nɛ ngɛ nɔ yae ɔ kɛ nɔ́ nɛ Baiblo ɔ de kaa e maa ba mi ngɛ wa be nɛ ɔ mi ɔ kɔ ha:

“Tahi.”​—Mateo 24:6.

• “Jeha 2022 ɔ Ji Jeha Nɛ Ta Nɛ Puɛ Ní Wawɛɛ ɔ Kpale Ba Ngɛ Yuropa.”a

“Hwɔ.”​—Mateo 24:7.

• “Jeha 2022: Jeha Nɛ Hwɔ Nɛ Nya Wa Ba Je ɔ Mi.”b

“Gbenɔ hiɔhi nɛ sãa nɔ.”​—Luka 21:11.

• “Hiɔ nɛ ji polio ɔ kpale ba, nɛ hiɔ nɛ ji monkeypox ɔ hu ba pee nyagba agbo, nɛ COVID-19 ɔ hu ya nɔ nɛ e ngɛ nihi awi yee wawɛɛ. Ní nɛ ɔmɛ ha nɛ e pee heii kaa hiɔhi nɛ sãa nɔ ɔ ngɛ gbeye wawɛɛ, nɛ a ma nyɛ maa ye adesahi awi.”c

“Gbeye níhi.”​—Luka 21:11.

• “Kɔɔhiɔ mi nɛ ngɛ la dɔe wawɛɛ, hiɔmi nɛ e nɛ́, la nɛ e puɛɔ ní, kɛ nyu nɛ baa nɛ́ e jeɔ nihi ɔ ngɛ nɔ yae wawɛɛ. A maa ya nɔ ma kai jeha 2022 ɔ wawɛɛ, ejakaa ngɛ jeha nɛ ɔ mi ɔ kɔɔhiɔ mi tsakemi nɛ nya wa wawɛɛ ba si abɔ, nɛ lɔ ɔ kpata níhi babauu a hɛ mi, e ha nɛ nihi akpehi abɔ gbo, nɛ nihi ayɔhi abɔ a wehi bɔ mɛ.”d

“Basabasa peemihi.”​—Luka 21:9.

• “Nihi a mi mi fu wawɛɛ ngɛ sika he nyagbahi nɛ ngɛ bae ɔ he, titli ɔ, ngɛ níhi a he jua nɛ ngɛ wae ɔ he je, nɛ lɔ ɔ ha nɛ a te si kɛ si nɔ yemi ɔmɛ ngɛ jeha 2022 ɔ mi.”e

Mɛni maa ya nɔ ngɛ jeha nɛ maa nyɛɛ se ɔ mi?

Nɔ ko be nyɛe maa le nɔ́ nɛ maa ya nɔ ngɛ jeha 2023 ɔ mi. Nɔ́ nɛ wa le ji kaa e be kɛe nɛ Mawu Matsɛ Yemi ɔ, aloo hiɔwe nɔ yemi ɔ maa ngɔ tsakemi ngua kɛ ba zugba a nɔ. (Daniel 2:44) Nɔ yemi nɛ ɔ ma je nɔ́ nɛ ha nɛ adesahi ngɛ nɔ́ nae ɔ kɛ je, nɛ e ma ha nɛ́ a pee Mawu suɔmi nya ní ngɛ zugba a nɔ.​—Mateo 6:9, 10.

Wa ngɛ mo he wami woe nɛ o kɛ Yesu ga womi ɔ nɛ tsu ní nɛ ‘o ya nɔ nɛ o hwɔɔ’ ngɛ bɔ nɛ níhi nɛ ngɛ nɔ yae ngɛ je ɔ mi ɔ ha nɛ Baiblo gbami ngɛ mi bae ha a he. (Maako 13:37) Wa kpa mo pɛɛ nɛ o su wa he konɛ o kase níhi fuu kɛ kɔ bɔ nɛ Baiblo ɔ maa ye bua mo amlɔ nɛ ɔ, kɛ bɔ nɛ e ma nyɛ ma ha o kɛ o weku ɔ nɛ́ ná hwɔɔ se si himi kpakpa he hɛ nɔ kami nitsɛnitsɛ ha a he.