Je ɔ Mi Ngɛ La Dɔe Wawɛɛ Nitsɛ Nɛ A Nɛ́ Eko Hyɛ​—Mɛni Baiblo ɔ De?

Ngɛ July 2022 ɔ, a bɔ amaniɛ kaa kɔɔhiɔ mi ngɛ la dɔe wawɛɛ nitsɛ nɛ a nɛ́ eko hyɛ:

• “Ngɛ nyɔhiɔ nɛ ɔ mi ɔ, ma nikɔtɔmahi nɛ a ngɛ China a bɔ nihi kɔkɔ kaa kɔɔhiɔ mi maa dɔ la wawɛɛ nitsɛ nɛ a nɛ́ eko hyɛ ngɛ ma nguahi 70 a mi ngɛ China. Nɛ enɛ ɔ ji si enyɔne nɛ a kɛ kɔkɔ bɔmi nɛ ɔ ngɛ hae.”​—July 25, 2022, CNN Wire Service.

• “Akɛnɛ kɔɔhiɔ mi ngɛ la dɔe wawɛɛ nitsɛ ngɛ Europe he je ɔ, hue tsohi fuu ngɛ sãe wawɛɛ ngɛ mahi babauu a mi.”​—July 17, 2022, The Guardian.

• “Ngɛ Hɔgba ligbi ɔ nɔ ɔ, kɔɔhiɔ mi dɔ la wawɛɛ ngɛ mahi nɛ a ngɛ United States Puje he blɔ kɛ yaa wo ɔ nya kɛ Woyi Je he komɛ kɛ jehanɛ hu ngɛ Omleyi je he komɛ nɛ a nɛ́ eko hyɛ.”​—July 24, 2022, The New York Times.

Mɛni enɛ ɔ tsuo tsɔɔ? Anɛ be ko maa su nɛ zugba a nɔ be hie himi lo? Mɛni nɛ Baiblo ɔ de?

Anɛ kɔɔhiɔ mi nɛ ngɛ la dɔe ɔ ha nɛ Baiblo gbami ngɛ mi bae lo?

Ee. Kɔɔhiɔ mi nɛ ngɛ la dɔe ɔ kɛ níhi nɛ Baiblo ɔ gba kaa a maa ya nɔ ngɛ wa be nɛ ɔ mi ɔ kɔ. Kaa nɔ hyɛmi nɔ́ ɔ, Yesu gba kaa wa maa na “gbeye níhi,” aloo “nyakpɛ níhi kɛ níhi nɛ woɔ nɔ he gbeye.” (Luka 21:11; Good News Translation) Akɛnɛ kɔɔhiɔ mi ngɛ la dɔe wawɛɛ he je ɔ, nihi fuu ngɛ gbeye yee kaa adesahi a ní peepee ma ha nɛ zugba a nɔ be hie himi.

Anɛ be ko maa su nɛ zugba a nɔ be hie himi lo?

Dabi. Mawu bɔ zugba a konɛ e pee adesahi a we kɛ ya daa. (La 115:16; Fiɛlɔ 1:4) Mawu be adesahi blɔ ngmɛe nɛ́ a kpata zugba a hɛ mi, mohu ɔ, e wo si kaa e ma “kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.”​—Kpo Jemi 11:18.

Moo hyɛ si womi enyɔ komɛ nɛ tsɔɔ nɔ́ kpa ko hu nɛ Mawu maa pee:

• “Nga zugba kpataa nɛ gbli ɔ ma na bua jɔmi; zia zugba a ma nya, nɛ mɔmɔhi maa puɛ ngɛ nɔ.” (Yesaya 35:1) Mawu be blɔ ngmɛe kɔkɔɔkɔ nɛ zugba a nɔ nɛ pee kaa zia zugba nɛ́ e nɔ be hie himi, se mohu e ma dla níhi tsuo nɛ puɛ ngɛ nɔ ɔ.

• ‘O haa zugba a nyu, nɛ e baa ní babauu. Ke o ha pa a hyi kikɛ nɛ ɔ, ngmɔ ɔmɛ baa ní saminya.’ (La 65:9) Mawu ma ha nɛ zugba a maa pee paradeiso.

Ke o suɔ nɛ o le bɔ nɛ kɔɔhiɔ mi nɛ́ ngɛ la dɔe ɔ ha nɛ Baiblo gbami ngɛ mi bae ha a, moo kane munyu nɛ ji, “Climate Change and Our Future​—What the Bible Says.”

Ke o suɔ nɛ o kase níhi fuu kɛ kɔ si nɛ Baiblo wo kaa a ma dla níhi ekohu ngɛ zugba a nɔ ɔ he ní ɔ, moo kane munyu nɛ ji “Who Will Save the Earth?”