Je ɔ Mi Dɔ La Wawɛɛ Nɛ́ A Nɛ́ Eko Hyɛ Ngɛ Jeha 2023 Mawulɛ Be ɔ Mi​—Mɛni Baiblo ɔ De?

Nihi tsuo nɛ a ngɛ je ɔ mi ɔ ngɛ nɔ́ nae ngɛ kɔɔhiɔ mi nɛ ngɛ la dɔe kɛ oslaahi nɛ lɔ ɔ ngɔ kɛ ngɛ bae ɔ he je. Mo kadi amaniɛ bɔmihi nɛ nyɛɛ se nɛ ɔmɛ:

• “Jeha 174 ji nɛ ɔ nɛ a ngɛ kɔɔhiɔ mi la dɔmi he amaniɛ bɔe, se June nɛ ɔ kɔɔhiɔ mi la dɔmi ɔ nya wa wawɛɛ nɛ́ a nɛ́ eko hyɛ.”​—National Oceanic and Atmospheric Administration, U.S. Department of Commerce, July 13, 2023.

• “Kɔɔhiɔ mi ngɛ la dɔe wawɛɛ nitsɛ ngɛ Italy, Spain, France, Germany kɛ Poland, nɛ ngɛ Sisili kɛ Sardinia zugba kpɔhi nɛ wo bɔle mɛ ɔ nɔ ɔ lɛɛ a ngɛ blɔ hyɛe kaa kɔɔhiɔ mi maa dɔ la wawɛɛ kɛ ya su 48°C aloo [118°F]. Enɛ ɔ ma nyɛ maa pee kɔɔhiɔ mi la dɔmi nɛ ya hiɔwe pe kulaa nɛ a bɔ he amaniɛ ngɛ Yuropa.”​—European Space Agency, July 13, 2023.

• “Be abɔ nɛ kɔɔhiɔ mi ngɛ la dɔe ɔ, wa hyɛɛ blɔ kaa hiɔmi maa nɛ wawɛɛ nɛ enɛ ɔ ma ha nɛ nyu maa ba babauu nɛ e ma je nihi.”​—Stefan Uhlenbrook nɛ e ji nɔkɔtɔma nɛ hyɛɛ nyu kɛ ice he blɔ nya tomi nɔ ngɛ World Meteorological Organization ɔ, lɛ bɔ amaniɛ nɛ ɔ, July 17, 2023.

Anɛ amaniɛ bɔmihi nɛ kɔɔ bɔ nɛ kɔɔhiɔ mi si fɔfɔɛ ngɛ puɛe ha a he ɔ haoɔ mo lo? Moo hyɛ nɔ́ nɛ Baiblo ɔ de kɛ kɔ munyuyi nɛ he hia nɛ ɔ he.

Anɛ kɔɔhiɔ mi nɛ ngɛ la dɔe ɔ ha nɛ Baiblo gbami ngɛ mi bae lo?

Ee. Kɔɔhiɔ mi nɛ dɔɔ la ngɛ je ɔ mi tsuo kɛ kɔɔhiɔ mi tsakemi kpahi nɛ ngɛ bae ɔ piɛɛ níhi nɛ Baiblo ɔ gba kɛ fɔ si kaa a maa ya nɔ ngɛ wa be nɛ ɔ mi ɔ he. Kaa nɔ hyɛmi nɔ́ ɔ, Yesu gba kɛ fɔ si kaa wa maa na “gbeye níhi,” aloo “níhi nɛ a hyɛ we blɔ kɛ níhi nɛ woɔ nɔ he gbeye.” (Luka 21:11; Good News Translation.) Kɔɔhiɔ mi nɛ ngɛ la dɔe wawɛɛ ɔ ha nɛ nihi fuu ngɛ gbeye yee kaa adesahi ma puɛ zugba a.

Anɛ be ko maa su nɛ zugba a nɔ be hie himi lo?

Dabi. Mawu bɔ zugba a konɛ e pee adesahi a we kɛ ya daa; Mawu be adesahi blɔ ngmɛe nɛ́ a kpata zugba a hɛ mi. (La 115:16; Fiɛlɔ 1:4) Ngɛ anɔkuale mi ɔ, e wo si kaa e ma “kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.”​—Kpo Jemi 11:18.

Baiblo ɔ tsɔɔ kaa Mawu ma nyɛ maa po zugba a he piɛ kɛ je níhi nɛ ngɛ puɛe ngɛ zugba a nɔ he, nɛ e maa pee jã hulɔ.

• “[Mawu] tsi ahumi ɔ nya nɛ e kpa fiami; oslɔke ɔmɛ a he jɔ, nɛ wo ɔ ngmɛ dii.” (La 107:29) Mawu ngɛ he wami nɛ e kɛ ma kudɔ adebɔ mi he wamihi. E ngɛ nyɛmi ɔ nɛ e kɛ ma dla níhi nɛ a ngɛ puɛe ngɛ zugba a nɔ nɛ́ e ha nɛ nihi ngɛ nɔ́ nae amlɔ nɛ ɔ akɛnɛ kɔɔhiɔ mi si fɔfɔɛ ngɛ puɛe wawɛɛ ɔ he je.

• ‘O haa zugba a nyu, nɛ e baa ní babauu. Ke o ha pa a hyi kikɛ nɛ ɔ, ngmɔ ɔmɛ baa ní saminya.’ (La 65:9) Mawu ma ha nɛ zugba a maa pee paradeiso.

Ke o suɔ nɛ o kase níhi fuu kɛ kɔ si nɛ Baiblo ɔ wo kaa a ma dla níhi ekohu ngɛ zugba a nɔ ɔ he ɔ, moo kane munyu nɛ ji “Who Will Save the Earth?”