Nyu Nɛ Baa Wawɛɛ Nɛ Puɛɔ Ní—Mɛni Baiblo ɔ De?

Ngɛ je ɔ mi tsuo ɔ, nyu nɛ baa wawɛɛ nɛ puɛɔ ní ɔ ngɔɔ haomi kɛ baa nihi fuu a nɔ. Mo kadi amaniɛ bɔmi nɛ ɔmɛ:

• “Ngɛ ligbi bɔɔ komɛ nɛ be ɔ mi ɔ, hiɔmi ngua ko nɛ ngɛ China ma ngua a mi nɛ́ eko nɛ́ hyɛ maa pee jeha 140 ji nɛ ɔ. Kɛ je Hɔ kɛ ya si Sɔ ɔ, hiɔmi ɔ nɛ wawɛɛ nɛ e hiɔwe yami maa su intsisi 29.3.”​—AP News, August 2, 2023.

• “So ligbi ɔ ji ligbi enyɔne nɛ kɔɔhiɔ ko nɛ a tsɛɛ ke Typhoon Khanun ɔ fia, nɛ lɔ ɔ ha nɛ ahumi nɛ nya wa ko fia nɛ hiɔmi hu nɛ wawɛɛ ngɛ Japan woyi je, nɛ e gbe nihi enyɔ. . . . Jinɛ a ngɛ blɔ hyɛe kaa kɔɔhiɔ ɔ ma ha nɛ hiɔmi maa nɛ, nɛ́ e hiɔwe yami maa su nanewɛɛ enyɔ ngɛ central Taiwan ma nɛ ngɛ yoku nɔ ɔ nɔ.”​—Deutsche Welle, August 3, 2023.

• “Hiɔmi ngua nɛ́ e nɛ ngɛ Canada ma nɛ ngɛ Atlantic wo ɔ nya a ha nɛ nyu babauu ba [ngɛ Nova Scotia], nɛ jeha 50 ji nɛ ɔ, enɛ ɔ ji hiɔmi nɛ́ nɛ wawɛɛ.”​—BBC News, July 24, 2023.

Mɛni Baiblo ɔ de kɛ kɔ níhi nɛ ngɛ nɔ yae nɛ ɔmɛ a he?

Okadi nɛ tsɔɔ kaa wa ngɛ “nyagbe ligbi ɔmɛ” a mi

Baiblo ha nɛ wa le kaa wa ngɛ be nɛ a tsɛɛ ke “nyagbe ligbi ɔmɛ” a mi. (2 Timoteo 3:1) Yesu gba kɛ fɔ si kaa ngɛ wa be nɛ ɔ mi ɔ, wa maa na “gbeye níhi,” loo níhi nɛ woɔ nɔ he gbeye. (Luka 21:11) Bɔ nɛ kɔɔhiɔ mi si fɔfɔɛ ngɛ tsakee ha a ji nɔ́ titli nɛ ha nɛ wa naa gbeye ní komɛ kaa nyu nɛ baa wawɛɛ nɛ puɛɔ ní kɛ pu nɛ tsoo wawɛɛ ɔ nɛ.

Nɔ́ he je nɛ wa ngɛ hɛ kɛ nɔ fɔmi

Baiblo ɔ ha nɛ wa na kaa níhi nɛ a ngɛ gbeye nɛ a ngɛ nɔ yae ɔ ma ha nɛ wa ná hɛ kɛ nɔ fɔmi. Mɛni he je? Yesu de ke: “Ke nyɛ hu nyɛ na kaa ní nɛ ɔmɛ ngɛ nɔ yae ɔ, nyɛ ná nɛ nyɛɛ le kaa Mawu Matsɛ Yemi ɔ su si ta.”​—Luka 21:31; Mateo 24:3.

Níhi nɛ wa naa mwɔnɛ ɔ maa nɔ mi kaa e be kɛe nɛ Mawu Matsɛ Yemi ɔ ma kudɔ adebɔ níhi tsuo, nɛ́ nyu he blɔ nya tomi hu piɛɛ he ɔ.​—Hiob 36:27, 28; La 107:29.

Ke o ngɛ hlae nɛ o kase babauu kɛ kɔ blɔ nɔ nɛ Mawu Matsɛ Yemi ɔ maa gu kɛ dla níhi ngɛ zugba a nɔ ɔ, hyɛ munyu nɛ ji “Who Will Save the Earth?”