2023: Jeha Nɛ Nihi Hao Wawɛɛ​—Mɛni Baiblo ɔ De?

Ngɛ jeha 2023 ɔ mi ɔ, níhi fuu ya nɔ ngɛ je ɔ mi nɛ tsɔɔ kaa wa ngɛ be nɛ Baiblo ɔ tsɛɛ ke “nyagbe ligbi ɔmɛ” a mi. (2 Timoteo 3:1) Hyɛ bɔ nɛ níhi nɛ ngɛ nɔ yae ngɛ wa be nɛ ɔ mi ɔ kɛ nɔ́ nɛ Baiblo ɔ gba kɛ fɔ si kaa e maa ba a kɔ ha.

Nɔ́ nɛ Baiblo ɔ de kɛ kɔ níhi nɛ ngɛ nɔ yae ngɛ je kɛ wɛ ɔ he

“Ta hwumihi kɛ tahi a he amaniɛ bɔmihi.”​​—Mateo 24:6.

• “Ta hwumi ngɛ nɔ yae wawɛɛ ngɛ je ɔ mi hehi babauu.”a

“Zugba ma mimiɛɛ ngɛ he slɔɔtohi.”​​—Maako 13:8.

• “Kɛ je jeha 2023 ɔ sisije ɔ, zugba mimiɛɛmi 13 nɛ́ a nya wa wawɛɛ ya nɔ ngɛ je kɛ wɛ. Kɛ je benɛ a bɔni zugba mimiɛɛmihi nɛ a baa a he akɔtaa bumi ɔ, enɛ ɔ piɛɛ zugba mimiɛɛmihi nɛ a ya nɔ fuu ngɛ jeha kake mi nɛ́ a bɔ he amaniɛ ɔ he.”b

“Gbeye níhi.”​​—Luka 21:11.

• “Je ɔ mi la dɔmi ɔ ya hɛ mi wawɛɛ; nɛ amlɔ nɛ ɔ, je ɔ mi dɔ la hluu kaa, e la dɔmi ɔ pee kaa nyu nɛ ngɛ fiae.”​​—António Guterres, UN kuu ɔ hɛ mi nyɛɛlɔ ɔ lɛ de.c

“Hwɔ maa ba.”​​—Mateo 24:7.

• “2023: E ji jeha ko nɛ e mi he wa wawɛɛ kɛ ha nihi nɛ e he waa ha mɛ kaa a maa hyɛ a wekuhi a nɔ ɔ.”d

“Behi nɛ a mi wa nɛ a nya dami maa ye.”​​—2 Timoteo 3:1.

• “Ke a gbá nihi nɛ a ngɛ je ɔ mi ɔ mi kpaanyɔ ɔ, e mi kake ngɛ juɛmi mi nyagba.”e

Mɛni maa ya nɔ ngɛ jeha 2024 ɔ mi?

Nɔ ko be nyɛe maa tsɔɔ nɔ́ tutuutu nɛ maa ba ngɛ jeha 2024 ɔ mi. Se níhi nɛ ngɛ nɔ yae ngɛ je ɔ mi ɔ tsɔɔ kaa e be kɛe nɛ Mawu Matsɛ Yemi ɔ, aloo Mawu nɔ yemi ɔ, ma ba je adesa nɔ yemihi tsuo kɛ je, nɛ e ma je níhi nɛ haa nɛ wa naa nɔ kɛ níhi nɛ haa nɛ wa haoɔ kɛ je.​​—Daniel 2:44; Kpo Jemi 21:4.

Loko jamɛ a be ɔ maa su ɔ, ke wa ngɛ haoe ɔ, waa kɛ wa hɛ ma nyɛ maa fɔ Mawu nɔ konɛ e ye kɛ bua wɔ. Baiblo ɔ de ke:

“Ke i ngɛ gbeye yee kikɛ nɛ ɔ, mo Hiɔwe no ɔ pɛ o nɔ i ngɔɔ ye hɛ kɛ fɔɔ.”​​—La 56:3.

Mɛni blɔ nɔ wa maa gu kɛ tsɔɔ kaa waa kɛ wa hɛ fɔ Mawu nɔ? Wa kpa mo pɛɛ nɛ o kase Baiblo mi si womihi nɛ tsɔɔ kaa hwɔɔ se ko ɔ, a ma je nɔ́ nami kɛ je ɔ he ní. Moo ka wa Baiblo mi ní kasemi nɛ a he we nɔ́ ko ɔ nɛ o hyɛ bɔ nɛ o kɛ o weku ɔ ma ná si womihi nɛ a ngɛ Baiblo ɔ mi ɔ he se ha.