Mɛnɔ Lɛ Ma Kpɔ̃ Ma Bi?​—Mɛni Baiblo ɔ De?

Kuu nɛ ji United Nations ɔ bɔ amaniɛ kaa:

• Kɛ je October 7 kɛ ya si October 23, 2023 ɔ, ta nɛ ngɛ nɔ yae ngɛ Israel kɛ Gaza a kpɛti ɔ, gbe nihi nɛ a he hiɛ pe 6,400, nɛ nihi nɛ a yibɔ maa su 15,200 plaa wawɛɛ. Nimli nɛ ɔmɛ a kpɛti nihi babauu ji ma bi nɛ́ pi ta buli ji mɛ. Jehanɛ hu ɔ, ta nɛ ɔ ha nɛ nihi akpe lafahi abɔ hia kɛ je a wehi a mi.

• Benɛ e ke suu September 24, 2023 ɔ, ta nɛ Russia kɛ Ukraine ngɛ hwue ɔ, gbe ma bi 9,701, nɛ nihi 17,748 plaa wawɛɛ ngɛ Ukraine.

Mɛni hɛ nɔ kami nɛ Baiblo ɔ kɛ ha nihi nɛ ta ha nɛ a ngɛ nɔ́ nae ɔ?

Nɔ́ he je nɛ wa ngɛ hɛ kɛ nɔ fɔmi

Baiblo ɔ gba kɛ fɔ si kaa Mawu ma ‘ha ta se maa po ngɛ je ɔ mi tsuo.’ (La 46:9) E maa ngɔ hiɔwe nɔ yemi ko aloo matsɛ yemi ko kɛ ba da adesa nɔ yemihi a nane mi. (Daniel 2:44) Mawu Matsɛ Yemi ɔ ma ha nɛ adesahi a he maa jɔ mɛ.

Moo hyɛ nɔ́ nɛ Yesu Kristo nɛ ji Mawu Matsɛ Yemi ɔ nya Matsɛ ɔ maa pee:

• ‘Ke ohiatsɛ, loo nɔ nɛ e fi lɛ, loo nɔ nɛ be nɔ ko tsɛ lɛ ɔ, e maa bu lɛ tue. Nihi nɛ gbɔjɔ, kɛ nihi nɛ e fi mɛ ɔ, e maa na mɛ mɔbɔ. Nihi nɛ e fi mɛ ɔ, e ma he a yi wami. E ma he a yi wami kɛ je yi mi wami, kɛ awi yemi mi.’​—La 72:12-14.

Kɛ gu Mawu Matsɛ Yemi ɔ nɔ ɔ, Mawu ma je ta hwumi kɛ yi wu tso ní peepeehi nɛ haa nɛ wa naa nɔ́, nɛ wa yeɔ aywilɛho ɔ kɛ je.

• “Nɛ e ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu. Blema ní ɔmɛ be kɛ ho.”​—Kpo Jemi 21:4.

E be kɛe nɛ Mawu Matsɛ Yemi ɔ ma tsake níhi ngɛ zugba a nɔ. Baiblo ɔ gba kɛ fɔ si kaa, “ta hwumihi kɛ tahi a he amaniɛ bɔmihi” maa pɔ he ngɛ wa be nɛ ɔ mi, nɛ wa ngɛ ní nɛ ɔmɛ nae mwɔnɛ ɔ. (Mateo 24:6) Ní nɛ ɔmɛ kɛ ní kpahi nɛ a ngɛ nɔ yae ɔ maa nɔ mi kaa wa ngɛ adesahi a nɔ yemihi a “nyagbe ligbi ɔmɛ” a mi.​—2 Timoteo 3:1.