Anɛ E Sa Nɛ Kristofohi Kɛ A He Nɛ Wo Ta Hwumi Mi Lo?​—Mɛni Baiblo ɔ De?

Kaa bɔ nɛ wa na ngɛ ta hwumi nɛ ngɛ nɔ yae ngɛ Ukraine ɔ mi ɔ, jami hɛ mi nyɛɛli fuu fĩ ta hwumi ɔ se nɛ a ngɛ nihi he wami woe konɛ a kɛ a he nɛ wo ta a mi. Mo kadi bɔ nɛ jami hɛ mi nyɛɛli nɛ ɔmɛ ekomɛ fĩ kuuhi nɛ a ngɛ ta a hwue ɔ se ha:

• Osɔfo Nɔkɔtɔma nɛ ji Metropolitan Epiphanius nɛ sɛ hlami nɛ ngɛ Kyiv ɔ de ke, “Wa naa nyɛ si, nɛ wa ngɛ nyɛ yi jee ngɛ mɔde nɛ nyɛ ngɛ bɔe kɛ ngɛ wa he piɛ poe ngɛ wa he nyɛɛli ɔmɛ a he ɔ he . . . Wa suɔ nyɛ, wa sɔleɔ ha nyɛ, nɛ wa fĩ nyɛ se wawɛɛ.”​—The Jerusalem Post, March 16, 2022 lɛ bɔ amaniɛ.

• “Hɔgba a, osɔfo nɔkɔtɔma nɛ ngɛ Russia Orthodox Sɔlemi ɔ nya a sɔle ha Russia ta buli ɔmɛ. E wo mɛ he wami kaa a bɔ a he mɔde nɛ a hwu ta kɛ ha a ma a ‘ejakaa Russia bi pɛ lɛ a ma nyɛ maa pee jã’ be mi nɛ Moscow ngɛ Ukraine tuae ɔ.”​—Reuters, April 3, 2022.

Anɛ e sa nɛ Kristofohi kɛ a he nɛ wo ta hwumi mi lo? Mɛni Baiblo ɔ De?

Mɛni Tutuutu Nɛ Baiblo ɔ De?

Baiblo ɔ tsɔɔ kaa nihi nɛ a ji Yesu Kristo se nyɛɛli anɔkualetsɛmɛ kɛ a he wui ta hwumi mi.

• Yesu de ke: “Kpale o klaate ɔ ngɔ to e to he, ejakaa nihi tsuo nɛ a hiaa klaate ɔ, a ma gbo ngɛ klaate nya.”​—Mateo 26:52.

  Ke nɔ ko kɛ e he woɔ ta hwumi mi loo e fĩ se ɔ, anɛ e kɛ nɔ́ nɛ Yesu de ɔ ngɛ ní tsue lo?

• “I ngɛ nyɛ kita ehe woe kaa nyɛɛ suɔ nyɛ sibi; kaa bɔ nɛ i suɔ nyɛ ɔ, nyɛ hu nyɛɛ suɔ nyɛ sibi jã nɔuu. Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa nyɛ ji ye kaseli.”​—Yohane 13:34, 35.

  Ke nɔ ko fĩ ta ko se ɔ, anɛ wa ma nyɛ ma de ke e ngɛ suɔmi nɛ Yesu tsɔɔ kaa a kɛ ma kadi e se nyɛɛli ɔmɛ eko lo?

Ke o suɔ nɛ o le níhi fuu ɔ, moo kane munyuyi nɛ ji “Is War Compatible With Christianity?”

Anɛ e sa nɛ Kristofohi kɛ a he nɛ wo ta hwumi mi lo?

Anɛ nile ngɛ mi kaa e sɛ nɛ Kristofohi kɛ a he nɛ wo ta hwumi mi lo? Ee. Ejakaa Baiblo ɔ gba kɛ fɔ si kaa ngɛ wa be nɛ ɔ nɛ Baiblo ɔ tsɛɛ ke “nyagbe ligbi ɔmɛ” a mi ɔ, nihi maa je ma slɔɔtohi a mi ‘nɛ a be ta hwumi kasee hu.’ Enɛ ɔ kɛ níhi nɛ Yesu tsɔɔ e kaseli ɔmɛ kɔ.​—Yesaya 2:2, 4, NW.

• Ke o suɔ nɛ o le nihi fuu kɛ kɔ enɛ ɔ he ɔ, moo kane Hwɔɔmi Mɔ ɔ mi munyu nɛ yi ji “How Does God View War?”

E be kɛe nɛ Yehowaa nɛ ji, “tue mi jɔmi Mawu ɔ” maa gu e hiɔwe matsɛ yemi ɔ nɔ kɛ he nihi a yi wami ‘kɛ je yi mi wami, kɛ awi yemi mi.’​—Filipi Bi 4:9; La 72:14.

• Ke o suɔ nɛ o le blɔ nɔ nɛ enɛ ɔ maa gu kɛ ba mi ɔ, moo hyɛ video nɛ yi ji Mɛni Ji Mawu Matsɛ Yemi ɔ?