YAA NƆ NƐ O HWƆƆ!

Bɔ Nɛ Jami Fĩ Ta Nɛ Ngɛ Nɔ Yae Ngɛ Ukraine ɔ Se Ha—Mɛni Nɛ Baiblo ɔ De?

Moo hyɛ munyuhi nɛ nyɛɛ se nɛ ɔmɛ nɛ tsɔɔ bɔ nɛ jami hɛ mi nyɛɛli nɛ a he biɛ ɔ pee a ní ha ngɛ ta nɛ ngɛ nɔ yae ngɛ Ukraine ɔ he:

“Russia Orthodox Sɔlemi ɔ nya dalɔ nɛ a tsɛɛ lɛ ke Patriarch Kirill ɔ tui munyu kɛ si tuami nɛ Russia ya tua Ukraine ɔ. . . . E Sɔlemi ɔ ya nɔ nɛ e ngɛ Ukraine he lakpa munyuhi gbɛe kɛ ngɛ fĩae, nɛ Putin da lakpa munyu nɛ ɔmɛ a nɔ kɛ ha nɛ a ngɛ Ukraine tuae.”—EUobserver, March 7, 2022.
“Patriarch Kirill . . . tsɔɔ kaa e da blɔ kaa Russia ya tua Ukraine, ejakaa enɛ ɔ piɛɛ mɔde nɛ a ngɛ bɔe kaa a maa hwu kɛ si yayami ɔ he.”—AP News, March 8, 2022.
“Hɔɛgbi ɔ, Ukraine Orthodox Sɔlemi ɔ nya dalɔ nɔkɔtɔma nɛ́ ji Epiphanius I, ngɛ Kyiv ɔ jɔɔ e we bi ɔmɛ nɛ e de mɛ ke ‘a kɛ Russia ta buli ɔmɛ nɛ hwu’ . . . [E] de po kaa ke a gbe Russia ta buli ɔmɛ ɔ, a pee we yayami ko.”—Jerusalem Post, March 16, 2022.
“Wɔ [Ukrainian Council of Churches and Religious Organizations (UCCRO)] ɔ, wa fĩ Ukraine ta buli ɔmɛ kɛ nihi tsuo nɛ a ngɛ ta hwue kɛ ye bua wɔ ɔ a se, wa bi jɔɔmi kɛ ha mɛ tsuo ngɛ mɔde nɛ a ngɛ bɔe kaa a maa fã Ukraine he ɔ he, nɛ wa ngɛ sɔlee ha mɛ.”—UCCROa Statement, February 24, 2022.

Kɛ o susu kɛɛ? Anɛ e sa nɛ jamihi nɛ a deɔ ke a ngɛ Yesu Kristo se nyɛɛe ɔ nɛ a wo a mi bi ɔmɛ he wami kaa a ya ta lo? Mɛni Baiblo ɔ de?

Yi nɔ sane tsɔɔ bɔ nɛ jamihi kɛ a he wo ta hwumi mi ha

Yi nɔ sane tsɔɔ kaa behi fuu ɔ jamihi kplɛɔ ta hwumi nɔ, aloo a fĩɔ se, aloo a woɔ nihi he wami kaa a kɛ a he nɛ womi, bemi nɛ jamɛ a be ɔ mi nɔuu ɔ, a bua peeɔ kaa nɔ́ nɛ a ngɛ ye buae konɛ tue mi jɔmi nɛ ba. Jehahi babauu ji nɛ ɔ, Yehowa Odasefohi ha nɛ nihi fuu na kaa nɔ́ nɛ jamɛ a jami ɔmɛ ngɛ pee ɔ ji osato. Sane nɛ ɔmɛ a he nɔ hyɛmi ní komɛ nɛ ngɛ wa womi ɔmɛ a mi ji nɛ ɔ nɛ.

Munyu nɛ ji “The Crusades—A ‘Tragic Illusion’” ɔ tsɔɔ kaa Roman Catholic Sɔlemi ɔ ha nɛ a gbe nihi fuu, nɛ a tsɔɔ kaa Mawu kɛ Kristo kplɛɛ nɔ́ nɛ a pee ɔ nɔ.
Munyu nɛ ji “The Catholic Church in Africa” ha nɔ hyɛmi nɔ́ ko nɛ tsɔɔ bɔ nɛ jamihi nyɛ we nɛ a tsi wɛtsohi a kpɛti pɛ kɛ wɛtso sisi gumi nya ha.
Munyuhi nɛ ji “Is Religion to Blame?,” “Religion’s Role in Man’s Wars,” kɛ “Religion Takes Sides” ha nɛ wa na kaa, ngɛ tahi fuu nɛ a hwu ɔ mi ɔ, Catholic, Orthodox, kɛ Protestant osɔfo ɔmɛ fĩ kuu ɔmɛ nɛ a kɛ a he hwu ta a eko fɛɛ eko se.

Anɛ e sa kaa Kristofohi a jamihi nɛ́ a fĩ ta hwumi se lo?

Nɔ́ nɛ Yesu tsɔɔ: “E sa nɛ o suɔ o nyɛmi kaa bɔ nɛ o suɔ o he ɔ.” (Mateo 22:39) “Nyɛɛ ya nɔ nɛ nyɛɛ suɔ nyɛ he nyɛli.”—Mateo 5:44-47.

Mo susu he nɛ o hyɛ: Anɛ jami ko ma nyɛ ma de ke e ngɛ fami nɛ Yesu kɛ ha kaa waa suɔ wa sibi ɔ nɔ yee ke ji kaa e woɔ e mi bi ɔmɛ he wami kaa a gbe nihi ngɛ ta mi lo? Ke o ngɛ hlae nɛ o na heto ɔ, moo kane munyuhi nɛ ji “True Christians and War” kɛ “Is It Possible to Love One’s Enemies?”

Nɔ́ nɛ Yesu de: ‘Ye Matsɛ Yemi ɔ, pi je nɛ ɔ mi nɔ́. Kaa ye Matsɛ Yemi ɔ je nɛ ɔ mi nɔ́ ɔ, jinɛ ye sɔmɔli ɔmɛ ko hwu, nɛ a ko ngɔɛ mi kɛ wui a dɛ mi.’ (Yohane 18:36) “Nihi tsuo nɛ a hiaa klaate ɔ, a ma gbo ngɛ klaate nya.”—Mateo 26:47-52.

Mo susu he nɛ o hyɛ: Ke a hyɛ we blɔ kaa Kristofohi nɛ́ a hwu ta kɛ fã Yesu po he ɔ, anɛ e sa nɛ a hwu ta ngɛ yi mi tomi kpa ko he je lo? Moo kane munyu nɛ ji “Is War Compatible With Christianity?” konɛ o na bɔ nɛ Kristofohi nɛ a hi si ngɛ Yesu be ɔ mi ɔ kɛ anɔkuale yemi nyɛɛ Yesu nɔ hyɛmi ní ɔmɛ kɛ e tsɔɔmi ɔmɛ a se ha.

Mɛni maa ba jamihi nɛ a fĩɔ ta hwumi se ɔ a nɔ?

Baiblo ɔ tsɔɔ kaa Mawu bua jɔɛ jamihi nɛ a deɔ ke a daa si ngɛ Yesu nane mi se kɛ̃ ɔ, a kɛ níhi nɛ Yesu tsɔɔ ɔ tsu we ní ɔ a he.—Mateo 7:21-23; Tito 1:16.

Kpo Jemi womi ɔ tsɔɔ kaa Mawu bu jami nɛ ɔmɛ fɔ ngɛ ‘nihi tsuo nɛ a ha nɛ a gbe mɛ ngɛ zugba a nɔ ɔ’ a muɔ ɔ he. (Kpo Jemi 18:21, 24) Ke o suɔ nɛ o le nɔ́ he je ɔ, moo kane munyu nɛ ji “What Is Babylon the Great?”
Yesu de ke a ma kpata jamihi tsuo nɛ Mawu kua mɛ ɔ a hɛ mi ngɛ ní tsumi yayahi nɛ a tsu ɔ he je, kaa bɔ nɛ tso nɛ e sa nɛ e wui yiblii kpakpa a, “a poɔ kɛ fɔɔ si, nɛ a sakeɔ kɛ fɔɔ la mi” ɔ. (Mateo 7:15-20) Moo kane munyu nɛ ji “The End of False Religion Is Near!” konɛ o na bɔ nɛ enɛ ɔ ma plɛ kɛ ba mi ha.

Yehowa Odasefohi Ngɛ Slɔɔto

Kaa bɔ nɛ Yehowa Odasefohi nɛ a ngɛ je ɔ mi he slɔɔtohi ɔ buɔ Yesu fami kaa a kɛ a he ko wo je ɔ ma kudɔmi sanehi kɛ tahi a mi ɔ tue ɔ, jã nɔuu nɛ Yehowa Odasefohi nɛ a ngɛ Russia kɛ Ukraine ɔ hu kɛ a he wui ma kudɔmi sanehi kɛ tahi a mi. Enɛ ɔ he ɔ, waa kɛ wa he wui basabasa peemi nɛ ngɛ nɔ yae nɛ ɔ loo ekpa ko se, nɛ wa fĩ we se hulɔ. Akɛnɛ Yehowa Odasefohi kɛ níhi nɛ Baiblo ɔ tsɔɔ ɔ tsuɔ ní he je ɔ, a waa a ti ni e komɛ yi mi. (Yohane 15:19, 20; 2 Timoteo 3:12) Kaa nɔ hyɛmi nɔ́ ɔ, Russia nɔ yemi ɔ wo Odasefohi fuu tsu, nɛ e wa a ti ni komɛ yi mi wawɛɛ. Nɔ yemi ɔ ngɔ nine kɛ fɔ wa jami he ɔmɛ a nɔ. Ke o suɔ nɛ o le babauu ɔ, yaa www.jw-russia.org.

Hyɛ video nɛ e nya kɛmi ji hɛngmɛfia eywiɛ nɛ e yi ji Jehovah’s Witnesses in Irkutsk Remain Faithful Despite Brutal Home Raids, konɛ o na bɔ nɛ a ngɛ Yehowa Odasefohi nɛ a ngɛ Russia a yi mi wae ngɛ a hemi kɛ yemi ɔ he je ha.
Kɛ je blema nɛ a le Yehowa Odasefohi kaa a kɛ a he wui ma kudɔmi sanehi a mi. Hyɛ video nɛ́ e yi ji Si Fimi Ngɛ Yi Mi Wami Be Mi, konɛ o na bɔ nɛ a fĩ si nɛ a kɛ a he wui ma kudɔmi sanehi a mi ngɛ yi mi wami nɛ́ nya wa nɛ́ Nazi Germany kɛ blema Soviet Union kɛ ba a nɔ ɔ tsuo se ha.

Wa kpa mo pɛɛ nɛ o ya wa wɛbsaiti ɔ nɔ konɛ o kase níhi fuu kɛ kɔ níhi nɛ wa heɔ yeɔ nɛ́ eko ji si nɛ Baiblo ɔ wo kaa hwɔɔ se ɔ ta be si hie hu ɔ he. (Yesaya 2:4; Yeremia 29:11) Ke o suɔ nɛ o le enɛ ɔ he níhi fuɔ, wa kpa mo pɛɛ nɛ o su wa he.

He nɛ foni ɔmɛ je, kɛ je muɔ nɔ kɛ ya hiɔ nɔ: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Orthodox, Greek kɛ Roman Catholic, Protestant, kɛ Kristofohi a jami kpa komɛ kɛ jehanɛ hu Yuda bi kɛ Muslim bi lɛ a peeɔ UCCRO aloo Ukrainian Council of Churches and Religious Organizations ɔ. Jamihi 15 nɛ ngɛ kuu nɛ ɔ mi.