Níhi A He Jua Nɛ́ Ngɛ Wae Wawɛɛ​—Mɛni Nɛ Baiblo ɔ De?

World Bank Group nɔkɔtɔma a de ngɛ June 2022 amaniɛ bɔmi ko mi ke, “Je ɔ sika he blɔ nya tomi ɔ ngɛ puɛe kulaa. Níhi a he jua ngɛ wae mlamlaamla, nɛ jamɛ a be ɔ mi nɔuu ɔ, sika nɛ nihi náa kɛ hyɛɔ a he ɔ sui nɔ́ ko kulaa.”

International Monetary Fund ɔ de ke, “Niye ní kɛ pɛtloo, kɛ nu kpahi nɛ a kɛ woɔ lɔlehi kɛ klama kpahi a mi ɔ he jua ya hɛ mi mlamlaamla, nɛ enɛ ɔ sa mahi nɛ a be sika tsɔ ɔ a he wawɛɛ.”

Baiblo ɔ yeɔ bua wɔ konɛ waa nu nɔ́ he je nɛ waa kɛ sika he nyagbahi ngɛ kpee, kɛ blɔ nɔ nɛ wa maa gu kɛ da nya a sisi, nɛ e haa wɔ hɛ nɔ kami kaa nyagba nɛ ɔmɛ a se maa po kulaa.

Níhi a he jua nɛ ngɛ wae ngɛ “nyagbe ligbi ɔmɛ” a mi

• Baiblo ɔ tsɛɛ be nɛ wa ngɛ mi nɛ ɔ ke “nyagbe ligbi ɔmɛ.”​—2 Timoteo 3:1.

• Yesu de ke, “gbeye níhi,” aloo níhi nɛ a woɔ nɔ he gbeye ɔ maa ya nɔ ngɛ wa be nɛ ɔ mi. (Luka 21:11) Níhi a he jua nɛ ngɛ wae ɔ ngɛ nihi fuu a he gbeye woe. Nihi haoɔ ngɛ a hwɔɔ se he, nɛ a susuɔ he ke ji a ma nyɛ maa hyɛ a weku ɔmɛ a nɔ.

• Kpo Jemi womi ɔ tu níhi a he jua nɛ maa wa ngɛ wa be nɛ ɔ mi ɔ he munyu. “I nu nɛ nɔ́ ko pɛ kaa adesa gbi. . . . Gbi ɔ de ke, ‘Ngma susumi nɔ́ kake ligbi kake hiɔwo, blɛfo susumi nɔ́ etɛ ligbi kake hiɔwo.’”​—Kpo Jemi 6:6, Ngmami Klɔuklɔu.

Ke o suɔ nɛ o kase babauu kɛ kɔ “nyagbe ligbi ɔmɛ,” kɛ gbami nɛ ngɛ Kpo Jemi womi ɔ mi ɔ he ɔ, hyɛ video nɛ ji The World Has Changed Since 1914, nɛ o kane munyu nɛ ji “Okpɔngɔ Nɔ Hili Eywiɛ Ɔmɛ​—Mɛnɔmɛ Ji Mɛ?”

Nɔ́ nɛ maa po sika he nyagbahi tsuo a se

• “A maa po wehi, nɛ mɛ nitsɛmɛ a maa hi mi; a maa pee wai ngmɔhi, nɛ mɛ nitsɛmɛ a maa ye a mi yiblii. A be wehi poe nɛ ni kpahi ba hi mi, nɛ a be ngmɔ pee nɛ ni kpahi ba ye e mi ní.”​—Yesaya 65:21, 22.

• ‘Zugba a maa ba ní saminya, nɛ a ma na blɛfo babauu ngɛ yo ɔmɛ tsuo pɛpɛɛpɛ a nɔ.’​—La 72:16.

• ‘Yehowa ke, “Akɛnɛ a ngɛ ohiatsɛmɛ yi mi wae, nɛ dɛgutsɛmɛ ngɛ kɛmɛe he je ɔ, jehanɛ lɛɛ ma te si, nɛ ma ha mɛ he jɔmi nɛ a ngɛ hlae ɔ.”’​—La 12:5.a

E be kɛe nɛ Mawu ma je sika he nyagbahi tsuo kɛ je. Pi ma kake mi pɛ nɛ e maa pee jã ngɛ, se e maa pee jã ngɛ je ɔ mi tsuo. Ke o suɔ nɛ o le blɔ nɔ nɛ e maa gu kɛ pee jã a, moo kane munyu nɛ ji “Is a Fair Economic System Possible?”

Se amlɔ nɛ ɔ po ɔ, Baiblo ɔ ma nyɛ maa ye bua mo konɛ o nyɛ nɛ o da níhi a he jua nɛ ngɛ wae ɔ nya. Ngɛ mɛni blɔ nɔ? E kɛ ga womi kpakpahi ha wɔ ngɛ bɔ nɛ waa kɛ sika ma tsu ní saminya ha a he. (Abɛ 23:4, 5; Fiɛlɔ 7:12) Ke o suɔ nɛ o kase babauu ɔ, moo kane munyuhi nɛ ji “Protect Your Livelihood” kɛ “How to Live on Less.”