Ta Kɛ Je ɔ Mi Nɛ Ngɛ La Dɔe ɔ Ha Nɛ Niye Ní He Jua Wa Ngɛ Je Kɛ Wɛ​—Mɛni Baiblo ɔ De?

Ta nɛ a ngɛ hwue ngɛ Ukraine, kɛ kɔɔhiɔ mi la dɔmi ha nɛ niye ní nɛ nihi a nine suɔ nɔ ɔ nɔ gbɔ kulaa ngɛ je ɔ mi tsuo. Enɛ ɔ ngɛ nɔ yae wawɛɛ titli ɔ, ngɛ mahi nɛ a ngɛ hɛ mi yae nɛ́ e he waa ha nihi babauu kaa a maa na niye ní nɛ maa su mɛ ɔ a mi.

• “Basabasa peemi, kɔɔhiɔ mi nɛ e dɔɔ la, petrol kɛ ní kpahi a he jua nɛ ngɛ hiɔwe yae ɔ ha we nɛ a nyɛ nɛ a pee niye ní babauu, nɛ e haa nɛ e he waa kaa nihi a nine maa su niye ní nɔ.”​—António Guterres, UN secretary-general, July 17, 2023.

• “Ma nikɔtɔmahi tsɔɔ kaa akɛnɛ Russia ma a je e he kɛ je somi nɛ e ngɛ e kɛ ma kpahi a kpɛti kaa a maa ngɔ ngma kɛ e henɔ ɔmɛ kɛ ya ma kpahi a nɔ ɔ he je ɔ, e ma ha nɛ niye ní he jua maa wa ngɛ je kɛ wɛ, nɛ ngɛ mahi nɛ a be sika tsɔ ɔ a blɔ fa mi, kaa North Africa kɛ Middle East a nɔ ɔ lɛɛ niye ní he jua maa wa wawɛɛ nitsɛ.”​—Atalayar.com, July 23, 2023.

Moo hyɛ nɔ́ nɛ Baiblo ɔ de kɛ kɔ niye ní nɛ he jua ngɛ wae ngɛ je ɔ mi tsuo, kɛ nɔ́ nɛ maa ba hwɔɔ se ɔ he.

Baiblo ɔ gba kɛ fɔ si kaa hwɔ maa ba

• Yesu gba kɛ fɔ si kaa: “Ma maa te si ngɔ wo ma nɛ matsɛ yemi maa te si ngɔ wo matsɛ yemi, nɛ hwɔ maa ba.”​—Mateo 24:7.

• Kpo Jemi womi ɔ tu okadi peemi okpɔngɔ nɔ hili eywiɛ komɛ a he munyu. Okpɔngɔ nɔ hili ɔmɛ a kpɛti nɔ kake daa si kɛ ha ta. Nɔ nɛ nyɛɛ e se ɔ hu daa si kɛ ha hwɔ nɛ nya wa, nɛ́ ji be nɛ niye ní be he pɔe nɛ́ e he jua hu maa wa wawɛɛ. “I na okpɔngɔ yumu ko, nɛ nɔ nɛ e hii si ngɛ nɔ ɔ hɛɛ sɛni ko ngɛ e dɛ mi. I nu pɛmi ko nɛ ngɛ kaa gbi . . . E de ke, ‘Ngma kwat kake ɔ maa pee ligbi kake hiɔwo! Akoko kwat etɛ ɔ hu maa pee ligbi kake hiɔwo.’”​—Kpo Jemi 6:5, 6, Contemporary English Version.

Gbamihi nɛ kɔɔ hwɔ nɛ maa ba a he ɔ ngɛ mi bae amlɔ nɛ ɔ ngɛ be nɛ Baiblo ɔ tsɛɛ ke “nyagbe ligbi ɔmɛ” a mi. (2 Timoteo 3:1) Ke o suɔ nɛ o kase babauu kɛ kɔ “nyagbe ligbi ɔmɛ” a he kɛ okpɔngɔ nɔ hili eywiɛ ɔmɛ nɛ Kpo Jemi womi ɔ tu a he munyu ɔ he ɔ, hyɛ video nɛ ji Níhi Tsake Kulaa Ngɛ Je ɔ Mi Kɛ Je Jeha 1914 ɔ nɛ o kane munyu nɛ ji “Okpɔngɔ Nɔ Hili Eywiɛ Ɔmɛ​—Mɛnɔmɛ Ji Mɛ?”

Bɔ nɛ Baiblo ɔ ma nyɛ maa ye bua mo ha

• Ga womi kpakpahi ngɛ Baiblo ɔ mi nɛ ma nyɛ maa ye bua wɔ kɛ da si fɔfɔɛhi nɛ a nya wa, nɛ́ niye ní nɛ he jua ngɛ wae kɛ niye ní nɛ e be hu piɛɛ he ɔ nya. Hyɛ enɛ ɔ he nɔ hyɛmi ní komɛ ngɛ munyu nɛ ji “How to Live on Less” ɔ mi.

• Jehanɛ se hu, Baiblo ɔ ha wɔ hɛ kɛ nɔ fɔmi kaa níhi ma ba hi. E wo si kaa be maa su nɛ ‘zugba a maa ba ní saminya,’ nɛ nɔ fɛɛ nɔ maa na niye ní babauu maa ye. (La 72:16) Ke o ngɛ hláe nɛ o kase babauu kɛ kɔ hwɔɔ se he hɛ kɛ nɔ fɔmi nɛ ɔ kɛ nɔ́ he je nɛ e sa nɛ o he ye ɔ he ní ɔ, kane munyu nɛ ji “A Real Hope for a Better Tomorrow.”