Nɔ́ Nɛ Mawu Matsɛ Yemi ɔ Maa Pee Ngɛ Ta Hwumi He

Ta hwumi ngɛ nɔ yae ngɛ je ɔ mi tsuo, nɛ enɛ ɔ ha nɛ níhi ngɛ puɛe, nɛ e kɛ haomi babauu ngɛ bae. Mo kadi amaniɛ bɔmihi nɛ nyɛɛ se nɛ ɔmɛ:

• “Ngɛ jeha nɛ be ɔ mi ɔ, nihi babauu gbo ngɛ ta mi, titli ɔ ngɛ Ethiopia kɛ Ukraine, pe jehahi nɛ be kɛ je jeha 1994 ɔ mi kɛ ma a.”​—Peace Research Institute Oslo, June 7, 2023.

• “Ta nɛ a ngɛ hwue ngɛ Ukraine ɔ mi ba wa wawɛɛ ngɛ jeha 2022 ɔ mi. Nɛ enɛ ɔ ji basabasa peemihi nɛ a ngɛ bae wawɛɛ ɔ a kpɛti kake. Basabasa peemi nɛ ma kudɔmi sane kɛ ba a ya hiɔwe lafa mi 27 ngɛ je ɔ mi tsuo jeha nɛ be ɔ pe jeha nɛ sɛ hlami ɔ, nɛ e sa nihi ayɔ akpe 1.7 he wawɛɛ.”​—The Armed Conflict Location & Event Data Project (ACLED), February 8, 2023.

Baiblo ɔ haa nɛ wa náa hɛ kɛ nɔ fɔmi. E de ke: “Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble.” (Daniel 2:44) Ngɛ jamɛ a Matsɛ Yemi ɔ, loo nɔ yemi ɔ sisi ɔ, Mawu ma ha ‘ta se maa po ngɛ je ɔ mi tsuo.’​—La 46:9.