Kɔɔhiɔ Mi Si Fɔfɔɛ Nɛ Ngɛ Puɛe​—Nɔ́ Nɛ Mawu Matsɛ Yemi ɔ Maa Pee

“Kɔɔhiɔ mi si fɔfɔɛ nɛ ngɛ puɛe wawɛɛ ɔ ngɔ nyagbahi fuu kɛ ba nɔ́ fɛɛ nɔ́ nɛ wami ngɛ mi ɔ nɔ. Ahumi nɛ nya wa nɛ fiaa akɛnɛ kɔɔhiɔ mi ngɛ tsakee ɔ ha nɛ nihi fuu a wehi puɛ nɛ jehanɛ hu ní nɛ a tsuɔ kɛ hyɛɛ a he ɔ hu pee nyagba ngɛ je ɔ mi tsuo. Wo ɔ mi ngɛ la dɔe wawɛɛ nitsɛ, nɛ enɛ ɔ ma nyɛ ma ha nɛ níhi nɛ a ngɛ wo ɔ mi ɔ fuu ma gbo.”​—Inger Andersen, nɛ ji se yelɔ ngɛ United Nations kuu ɔ mi kɛ nɔkɔtɔma ngɛ UN Environment Programme kuu ɔ mi, July 25, 2023.

Anɛ nɔ yeli ɔmɛ ma nyɛ maa pee kake kɛ tsu nyagbahi nɛ ngɛ je ɔ tsuo haoe ɔ he ní lo? Anɛ a ma nyɛ maa po nyagba nɛ ɔmɛ a se kulaa lo?

Baiblo ɔ tu nɔ yemi ko nɛ e ma je adesahi a nyagbahi tsuo kɛ je ɔ he munyu. E de ke, “Mawu nɛ ngɛ hiɔwe ɔ maa to matsɛ yemi [loo nɔ yemi] ko sisi,” nɛ e ma tsu nyagbahi nɛ ngɛ zugba a nɔ ɔ tsuo he ní. (Daniel 2:44) Ngɛ nɔ yemi nɛ ɔ nɛ maa ye je ɔ tsuo nɔ ɔ sisi ɔ, nɔ ko nɔ ko ‘be e nyɛmi awi yee, nɛ nɔ ko nɔ ko be e nyɛmi loo zugba a hɛ mi kpatae.’​—Yesaya 11:9.