Mɛni He Je Nɛ Yehowa Odasefohi Kɛ Klɔɔsu Tsu We Ní?

Nihi babauu susu kaa klɔɔsu ji nɔ́ nɛ a kɛ kadi ɔ Kristofohi. E ngɛ mi kaa Yehowa Odasefohi ji Kristofohi mohu lɛɛ, se waa kɛ klɔɔsu tsu we ní. Mɛni he je?

Nɔ́ kake ji kaa Baiblo ɔ tsɔɔ kaa Yesu gbo ngɛ tso jãi nɔ, se pi klɔɔsu nɔ. Jehanɛ hu, Baiblo ɔ kɛ kɔkɔ bɔmi nɛ hɛdɔ ngɛ he ha Kristofohi kaa ‘a yu a he kɛ je amaga jami he kulaa.’ Enɛ ɔ tsɔɔ kaa e sɛ nɛ Kristofohi kɛ klɔɔsu nɛ tsu ní.​—⁠1 Korinto Bi 10:14; 1 Yohane 5:​21.

Yesu de nɔ́ ko nɛ sa kadimi. E de ke: “Ke nyɛ suɔ nyɛ sibi ɔ, kɛkɛ nɔ tsuaa nɔ maa le kaa ye kaseli ji nyɛ.” (Yohane 13:34, 35) Munyu nɛ Yesu tu nɛ ɔ tsɔɔ kaa suɔmi nɛ haa nɛ nɔ kɛ e he sãa afɔle ɔ ji nɔ́ nɛ a kɛ ma kadi e se nyɛɛli, se pi klɔɔsu aloo nɔ́ kpa ko.