Anɛ Yesu Gbo Ngɛ Klɔɔsu Nɔ Lo?
Nɔ́ Nɛ Baiblo ɔ De
Nihi fuu buu klɔɔsu ɔ kaa e ji nɔ́ ko pɔtɛɛ nɛ kadiɔ Kristofohi a jami. Ngɛ anɔkuale mi ɔ, Baiblo ɔ kale we bɔ nɛ nɔ́ nɛ a gbe Yesu ngɛ nɔ ɔ ngɛ ha pɔtɛɛ. Lɔ ɔ he ɔ, nɔ ko be nyɛe maa tsɔɔ bɔ nɛ e ngɛ ha tutuutu. Se kɛ̃ ɔ, odasehi ngɛ Baiblo ɔ mi nɛ tsɔɔ kaa Yesu gbo we ngɛ klɔɔsu nɔ, mohu ɔ, e gbo ngɛ tso jãi aloo plai nɔ.
Baiblo ɔ kɛ Hela munyungu nɛ ji stau·rosʹ pɔɔ ní tsumi ke e ngɛ nɔ́ nɛ Yesu gbo ngɛ nɔ ɔ he munyu tue. (Mateo 27:40; Yohane 19:17) E ngɛ mi kaa gbi sisi tsɔɔli komɛ tsɔɔ munyungu nɛ ɔ sisi ke “klɔɔsu” mohu lɛɛ, se womi mi leli tsɔɔ kaa, nɔ́ nɛ jamɛ a munyungu ɔ tsɔɔ kɛkɛ ji “tso jãi” aloo “plai.”a Womi nɛ ji Critical Lexicon and Concordance to the English and Greek New Testament ɔ tsɔɔ kaa, stau·rosʹ ɔ, “pi tso enyɔ nɛ a kɛ bia a sibi a mi.”
Be komɛ ɔ, Baiblo ɔ kɛ Hela munyungu nɛ ji xyʹlon tsuɔ ní kɛ daa stau·rosʹ nane mi. (Bɔfo Ɔmɛ A Ní Tsumi 5:30; 1 Petro 2:24) Munyungu nɛ ɔ tsɔɔ “tso,” “tsoku,” loo “sima tso.”b Womi nɛ ji The Companion Bible ɔ de ke: “Nɔ́ ko be Hela gbi nɛ a kɛ ngma [Somi He] ɔ mi nɛ tsɔɔ kaa e ji tso enyɔ.”
Anɛ Mawu kplɛɛ klɔɔsu nɛ a kɛ tsuɔ ní ngɛ jami mi ɔ nɔ lo?
Crux simplex—E ji Latin munyu nɛ tsɔɔ tso jãi nɛ a sɛuɔ awi yelɔ ngɛ nɔ
E ngɛ mi kaa wa li bɔ nɛ nɔ́ nɛ a sɛu Yesu ngɛ nɔ ɔ ngɛ ha pɔtɛɛ mohu lɛɛ, se odase nɛ nyɛɛ se nɛ ɔmɛ, kɛ Baiblo ngmami komɛ tsɔɔ kaa e sɛ nɛ waa ngɔ klɔɔsu kɛ tsu ní ngɛ jami mi.
Mawu sume kaa a ngɔ fonihi kɛ amagahi, nɛ klɔɔsu piɛɛ he ɔ kɛ tsu ní ngɛ jami mi. Mawu fã Israel bi ɔmɛ kaa a ko ngɔ “amaga ko” kɛ tsu ní ngɛ a jami mi, nɛ a bɔ Kristofohi hu kɔkɔ kaa a ‘yu a he kɛ je amaga jami he kulaa’.—5 Mose 4:15-19; 1 Korinto Bi 10:14.
Kekleekle jeha lafa a mi Kristofohi kɛ klɔɔsu tsu ní we ngɛ jami mi.c E sa kaa Kristofohi tsuo nɛ a nyɛɛ Bɔfo ɔmɛ a ní tsɔɔmi ɔmɛ kɛ a nɔ hyɛmi nɔ́ ɔ se.—2 Tesalonika Bi 2:15.
Klɔɔsu nɛ a kɛ tsuɔ ní ngɛ jami mi ɔ je wɔ jami mi.d Jeha lafahi komɛ a se be nɛ Yesu gbo ɔ, jami ɔmɛ gba kɛ je e tsɔɔmi ɔmɛ a he, nɛ a ngmɛ nihi ehehi nɛ a ba jami ɔ mi ɔ “blɔ kaa a ma nyɛ maa ngɔ a wɔ jami mi níhi nɛ a ngɛ, kɛ okadihi kɛ tsu ní,” nɛ klɔɔsu ɔ hu piɛɛ he. (The Expanded Vine’s Expository Dictionary of New Testament Words) Se ngɛ anɔkuale mi ɔ, Baiblo ɔ kplɛɛ we nɔ kaa a ngɔ wɔ jami mi níhi aloo okadi kɛ tsu ní konɛ a nyɛ nɛ a kɛ tsake nihi kɛ ba Kristo jami mi.—2 Korinto Bi 6:17.
a Moo hyɛ womihi nɛ ji New Bible Dictionary, Third Edition nɛ D. R. W. Wood ngma a ba fa 245; Theological Dictionary of the New Testament, Kpo VII, ba fa 572; The International Standard Bible Encyclopedia, Revised Edition, Kpo 1, ba fa 825; kɛ The Imperial Bible-Dictionary, Kpo II, ba fa 84.
b Moo hyɛ womihi nɛ ji The Expanded Vine’s Expository Dictionary of New Testament Words ɔ ba fa 1165; A Greek-English Lexicon, Ninth Edition nɛ Liddell kɛ Scott ngma a ba fa 1191-1192; kɛ Theological Dictionary of the New Testament, Kpo V, ba fa 37.
c Hyɛ munyu nɛ ji “Cross” nɛ ngɛ womihi nɛ ji, Encyclopædia Britannica nɛ a pee ngɛ 2003 ɔ; The Cross—Its History and Symbolism, ba fa 40; kɛ The Companion Bible, Oxford University Press ɔ mi tsɔɔmi munyu 162, ba fa 186 mi ɔ.
d Hyɛ womihi nɛ ji The Encyclopedia of Religion, Kpo 4, ba fa 165; The Encyclopedia Americana, Kpo 8, ba fa 246; kɛ Symbols Around Us, ba fa 205-207.