Bɔ nɛ ngmami nɛ ɔ kale suɔmi nitsɛnitsɛ ha a sa kadimi wawɛɛ! E mi munyu ɔmɛ ma nyɛ maa wo nihi nɛ a sɛ gba si himi mi ɔ he wami wawɛɛ. E tsɔɔ wɔ kaa nihi nɛ a sɛ gba si himi mi ɔ ma nyɛ ma je suɔmi nɛ se pui kpo kɛ tsɔɔ a sibi. E biɔ mɔde bɔmi wawɛɛ loko nihi nɛ a sɛ gba si himi mi ɔ ma nyɛ ma je suɔmi nɛ se pui kpo kɛ tsɔɔ a sibi a wami be tsuo. Mo susu nɔ́ he tomi nɔ́ nɛ ɔ he nɛ o hyɛ: Ke a slɛ la a, ja a ngɔ lɛ kɛ ngɛ mi woe loko e maa tso be kɛkɛɛ nɛ e be gboe. Ke a pee we jã a, bɔɔbɔɔbɔɔ ɔ, la a ma gbo kulaa. Jã kɛ̃ nɛ loko suɔmi nɛ ngɛ nɔ kɛ e yo a kpɛti ɔ mi maa wa a, e sa nɛ a pee níhi nɛ ma ha nɛ e mi maa wa wawɛɛ. Be komɛ ɔ, a ma nyɛ maa nu he kaa suɔmi nɛ ngɛ a kpɛti ɔ ngɛ si bae, titli ɔ, ke a kɛ sika, hiɔ loo bimɛ a tsɔsemi he nyagbahi ngɛ kpee. Enɛ ɔ he ɔ, bɔ nɛ pee nɛ “Yah la lilɛ ɔ” nɛ ya nɔ nɛ e tso be fɛɛ be ɔ, e sa nɛ huno ɔ kɛ e yo ɔ nɛ a ha nɛ huɛ bɔmi kpakpa nɛ hi a kɛ Yehowa a kpɛti. w23.05 20-21 ¶1-3

Mɛni e sa nɛ waa pee konɛ wa nyɛ nɛ waa pee kã? Wa fɔli ma nyɛ maa wo wɔ he wami kaa waa pee kã. Se ke wa fɔli ji kãtsɛmɛ kaa mɛni po ɔ, lɔ ɔ tsɔɔ we kaa bɔ fɛɛ bɔ nɛ ji ɔ, wɔ hu wa maa pee kã. Wa ma nyɛ maa ngɔ nɔ ko nɛ e ngɛ kã peemi kasee ɔ kɛ to nɔ ko nɛ e ngɛ ní tsumi ehe ko kasee ɔ he. Loko nɔ ko ma nyɛ maa le ní tsumi ehe ko saminya a, e ma bi nɛ e hyɛ bɔ nɛ nɔ nɛ ngɛ lɛ ní tsumi ɔ tsɔɔe ɔ tsuɔ ní ɔ ha nɛ e kase lɛ. Jã kɛ̃ nɛ loko wɔ hu wa ma nyɛ maa pee kã a, e sa nɛ waa kase bɔ nɛ ni kpahi jeɔ su nɛ ɔ kpo ha nɛ waa pee jã pɛpɛɛpɛ. Kaa bɔ nɛ Daniel pee ɔ, e sa nɛ waa le Mawu Munyu ɔ saminya. E sa nɛ waa je wa tsui mi nɛ waa kɛ Yehowa nɛ sɛɛ ní konɛ huɛ bɔmi nɛ ngɛ waa kɛ lɛ wa kpɛti ɔ mi nɛ wa. Jehanɛ hu ɔ, e sa nɛ wa ná hɛ kɛ nɔ fɔmi ngɛ e mi, nɛ wa ná nɔ mi mami kaa e piɛɛ wa he. Kɛkɛ ɔ, ke waa kɛ wa hemi kɛ yemi ɔ he ka ko kpe ɔ, wa ma nyɛ maa pee kã. Ke wa pee kã a, behi fuu ɔ, nihi jeɔ bumi kpo kɛ tsɔɔ wɔ. Jehanɛ hu ɔ, e ma nyɛ ma ha nɛ tsui kpakpatsɛmɛ nɛ a ba le Yehowa. E ngɛ heii kaa wa ngɛ yi mi tomi kpakpahi a he je nɛ e sa nɛ waa pee kã. w23.08 2 ¶2; 4 ¶8-9

A ngɔ Hela munyungu nɛ a tsɔɔ sisi ke “ná níhi tsuo a nɔ mi mami” ɔ kɛ kale bɔ nɛ nihi plɛɔ kɛ leɔ kaa adiagba ko nɛ he jua wa a ji sika tsu nitsɛnitsɛ loo sika hiɔ. Enɛ ɔ he ɔ, loko wa maa kane munyu ko loo waa maa bu nɔ́ ko tue ɔ, e sa nɛ wa ‘ná nɔ mi mami’ kaa e hi loo e hí. Enɛ ɔ maa ye bua wɔ wawɛɛ ejakaa e be kɛe nɛ amanehlu ngua a maa ba. E sɛ nɛ wa he nɔ́ fɛɛ nɔ́ nɛ waa ye kɛkɛ, mohu ɔ, e sa nɛ waa ngɔ níhi nɛ wa kaneɔ loo wa nuɔ ɔ kɛ to nɔ́ nɛ Baiblo ɔ kɛ Yehowa asafo ɔ tsɔɔ ɔ he. Ke wa pee jã a, e be hae nɛ lakpa munyuhi nɛ a je daimoniohi a ngɔ ɔ nɛ ná wa nɔ he wami. (Abɛ 14:15; 1 Tim. 4:1) Wa le kaa a maa baa Mawu we bi a yi ngɛ amanehlu ngua a mi. Kaa ni kakaakahi ɔ, wa li nɔ́ nɛ maa ba hwɔɔ se. (Yak. 4:14) Se ke wa ngɛ wami mi loko amanehlu ngua a ba jio, wa gbo loko e ba jio, wa ma ná neneene wami ke wa ye anɔkuale kɛ ya si nyagbe. Enɛ ɔ he ɔ, nyɛ ha nɛ wɔ tsuo waa ngɔ wa juɛmi kɛ ma wa hɛ kɛ nɔ fɔmi ɔ nɔ, nɛ waa pee klaalo kɛ ha Yehowa ligbi ɔ! w23.06 13 ¶15-16