November

Ke o ji fɔlɔ ɔ, moo wo o bimɛ ɔmɛ he wami konɛ a ha sane heto ngɛ a jeha nya. Be komɛ ɔ, wa susuɔ níhi nɛ kɔɔ gba si himi loo sanehi nɛ kɔɔ je mi bami he ɔ a he. Se eko ɔ, kuku kake loo enyɔ ko ngɛ nɛ o bi ɔ ma nyɛ maa tu munyu ke a su lejɛ ɔ. Jehanɛ hu ɔ, moo ye bua o bimɛ ɔmɛ nɛ a le nɔ́ he je nɛ tsa pi be fɛɛ be nɛ ke a wo a nine nɔ ɔ, a ma tsɛ mɛ. Ke o pee jã a, e ma ha nɛ a kɔni mi be jɔ̃e ke a tsɛ we mɛ, nɛ a ya tsɛ ni kpahi ɔ. (1 Tim. 6:18) Wɔ tsuo wa ma nyɛ ma dla wa he konɛ wa ha heto nɛ woɔ Yehowa hɛ mi nyami nɛ maa fia wa nyɛmimɛ ɔmɛ kɛ ma si hulɔ. (Abɛ 25:11) E ngɛ mi kaa be komɛ ɔ, wa ma nyɛ maa tu wɔ nitsɛmɛ wa níhi a si kpami he munyu mohu lɛɛ, se e sɛ nɛ wa de níhi fuu kɛ kɔ wa he. (Abɛ 27:2; 2 Kor. 10:18) Mohu ɔ, wa suɔ nɛ waa ngɔ wa juɛmi kɛ ma Yehowa, e Munyu ɔ, kɛ e we bi a nɔ.—Kpoj. 4:11. w23.04 24-25 ¶17-18

Suɔmi ji nɔ́ ko nɛ he hia wawɛɛ nɛ maa ye bua wɔ nɛ waa hwɔɔ nɛ wa hɛ nɛ hi wa he nɔ. (Mat. 22:​37-39) Suɔmi nɛ wa ngɛ kɛ ha Mawu ɔ yeɔ bua wɔ nɛ wa fĩɔ si ngɛ fiɛɛmi ní tsumi ɔ mi ngɛ haomi nɛ waa kɛ maa kpe ɔ tsuo se. (2 Tim. 1:​7, 8) Akɛnɛ e he hia nɛ wa je suɔmi kpo kɛ tsɔɔ nihi nɛ a sɔmɔ we Yehowa a he je ɔ, wa yaa nɔ nɛ wa fiɛɛɔ nɛ wa yeɔ nihi odase kɛ guɔ tɛlifoo kɛ sɛ womi ngmami nɔ. Wa blɔ hyɛmi ji kaa ligbi ko ɔ, a ma tsake nɛ a ma ba pee nɔ́ nɛ da. (Eze. 18:​27, 28) Wa suɔ wa nyɛmimɛ ɔmɛ hulɔ. Wa ‘woɔ wa sibi he wami nɛ wa fiaa wa sibi kɛ maa si’ kɛ tsɔɔ kaa wa suɔ mɛ. (1 Tɛs. 5:11) Kaa bɔ nɛ ta buli yeɔ bua a sibi ngɛ ta mi ɔ, jã kɛ̃ nɛ wɔ hu wa woɔ wa sibi he wami. Wɔ hu wa be blɔ jee kaa wa maa pee wa nyɛmimɛ ɔmɛ nɔ́ ko nɛ maa dɔ mɛ, loo waa pee mɛ nɔ́ ko kɛ to nane mi ke a tɔ̃ wa nɔ. (1 Tɛs. 5:​13, 15) Jehanɛ hu ɔ, wa jeɔ bumi kpo kɛ tsɔɔ nihi nɛ a ngɛ asafo ɔ hɛ mi nyɛɛe ɔ kɛ tsɔɔ kaa wa suɔ mɛ.—1 Tɛs. 5:12. w23.06 10 ¶6; 11 ¶10-11

Nɔ́ kake nɛ wa ma nyɛ maa pee konɛ wa hemi kɛ yemi ɔ mi nɛ wa ji kaa wa ma pue wa yi mi tɛ ngɛ kpɔmi nɔ́ ɔ he. Kpɔmi nɔ́ ɔ nɛ Yehowa kɛ ha wɔ ɔ he je ɔ, wa ngɛ nɔ mi mami kaa e si womi ɔmɛ tsuo maa ba mi niinɛ. Ke wa pue wa yi mi tɛ saminya ngɛ bɔ nɛ kpɔmi nɔ́ ɔ he jua wa ha, kɛ nɔ́ he je nɛ Yehowa ha wɔ kpɔmi nɔ́ ɔ he ɔ, e ma ha nɛ wa ma ná nɔ mi mami kaa si nɛ Mawu wo kaa wa maa hi si kɛ ya neneene ngɛ je ehe ɔ mi ɔ maa ba mi kokooko. Mɛni he je nɛ wa ma nyɛ ma de jã a? Mɛni nɛ e sa kadimi ngɛ kpɔmi nɔ́ ɔ he? Yehowa tsɔ e Bitɛte nɛ e suɔ lɛ wawɛɛ, nɛ nyu bi ngɛ e kɛ lɛ a kpɛti ɔ kɛ je hiɔwe konɛ a ba fɔ lɛ kaa adesa nɛ e ye mluku ngɛ zugba a nɔ. Benɛ Yesu ba zugba a nɔ ɔ, e kɛ haomihi fuu kpe. Jehanɛ hu ɔ, e na nɔ́, nɛ e gbo gbenɔ yeyee. Enɛ ɔ tsɔɔ kaa kpɔmi nɔ́ ɔ nɛ Yehowa kɛ ha wɔ ɔ he jua wa wawɛɛ. Enɛ ɔ he ɔ, ke e sume nɛ waa hi si kɛ ya neneene ɔ, jinɛ e be hae nɛ e Bi ɔ nɛ ba na nɔ́ nɛ e gbo kɛ ha wɔ. (Yoh. 3:16; 1 Pet. 1:​18, 19) Akɛnɛ Yehowa ngɔ e Bi nɛ e suɔ lɛ wawɛɛ ɔ kɛ ha wɔ he je ɔ, e ma ha nɛ waa hi si kɛ ya neneene ngɛ je ehe ɔ mi kokooko. w23.04 27 ¶8-9

Anɛ Yehowa suɔ kaa e ma tle nihi nɛ a gbo ɔ si niinɛ lo? Ngɛ anɔkuale mi ɔ, e suɔ wawɛɛ. E ngɔ e mumi klɔuklɔu ɔ kɛ wo Baiblo ngmali fuu he wami nɛ a ngma si nɛ e wo kɛ kɔ gbogboehi a tlemi ɔ he ɔ ngɛ Baiblo ɔ mi. (Yes. 26:19; Kpoj. 20:​11-13) Ke Yehowa wo si ko ɔ, e yeɔ nɔ be fɛɛ be. (Yosh. 23:14) Ngɛ anɔkuale mi ɔ, Yehowa pee klaalo kaa e ma tle nihi nɛ a gbo ɔ si kɛ ba wami mi ekohu. Mo susu nɔ́ nɛ Hiob nɛ e hi si blema a de ɔ he nɛ o hyɛ. Hiob ngɛ nɔ mi mami kaa ke e gbo po ɔ, Yehowa pee klaalo kaa e ma tle lɛ si. (Hiob 14:​14, 15) Jã nɔuu kɛ̃ nɛ Yehowa nuɔ he ngɛ e sɔmɔli anɔkualetsɛmɛ tsuo nɛ a gbo ɔ he. E pee klaalo kaa e ma tle mɛ si kɛ ba wami mi, nɛ a ma ná nɔmlɔ tso mi he wami kɛ bua jɔmi. Se nihi ayɔ akpehi abɔ nɛ a gbo nɛ a ná we he blɔ kɛ kase anɔkualehi nɛ kɔɔ Yehowa he ɔ hu nɛɛ? Wa Mawu nɛ ngɛ suɔmi ɔ suɔ kaa e ma tle mɛ hu si kɛ ba wami mi. (Níts. 24:15) E suɔ nɛ e ha mɛ he blɔ nɛ a ba kase e he ní konɛ a kɛ lɛ nɛ pee huɛ, nɛ a hi si kɛ ya neneene.—Yoh. 3:16. w23.04 9 ¶5-6

Mɛni o ma nyɛ maa pee konɛ hɛ kɛ nɔ fɔmi nɛ o ngɛ ngɛ hwɔɔ se he ɔ mi nɛ wa? Kaa nɔ hyɛmi nɔ́ ɔ, ke o hɛ nɔ kami ji kaa o maa hi si kɛ ya neneene ngɛ zugba a nɔ hwɔɔ se ɔ, lɛɛ moo kane Baiblo mi sanehi nɛ kɔɔ Paradeiso ɔ kɛ gbogboehi a si tlemi ɔ he nɛ o pue o yi mi tɛ ngɛ he. (Yes. 25:8; 32:​16-18) Mo pue o yi mi tɛ ngɛ bɔ nɛ si himi maa hi ha ngɛ je ehe ɔ mi ɔ he. Moo po he foni kaa o ngɛ lejɛ ɔ. Ke wa poɔ je ehe ɔ he foni be fɛɛ be ɔ, lɔ ɔ ma ha nɛ wa maa na kaa haomihi nɛ waa kɛ ngɛ kpee ɔ “se be kɛe nɛ e mi jiɔ we.” (2 Kor. 4:17) Hɛ kɛ nɔ fɔmi nɛ Yehowa ha mo ɔ, ma nyɛ maa ye bua mo nɛ o fĩ si ngɛ kahi a mi. Yehowa to nɔ́ fɛɛ nɔ́ nɛ wa hia a he blɔ nya momo konɛ wa nine nɛ su he wami womi nɔ. Enɛ ɔ he ɔ, ke e he ba hia nɛ o tsu ní tsumi ko nɛ a kɛ wo o dɛ, loo o da ka ko nya, loo o ya nɔ nɛ o kɛ bua jɔmi nɛ sɔmɔ Yehowa a, moo je o tsui mi nɛ o sɔle kɛ ha lɛ nɛ o hla e blɔ tsɔɔmi se blɔ kɛ gu dɛ he ní kasemi nɛ o maa pee ɔ nɔ. Moo kplɛɛ yemi kɛ buami nɛ nyɛmimɛ ɔmɛ ma kɛ ha mo ɔ nɔ, nɛ o pue o yi mi tɛ be fɛɛ be ngɛ hwɔɔ se he hɛ nɔ kami nɛ o ngɛ ɔ he. Ke o pee jã a, Mawu maa ‘ngɔ he wami tsuo kɛ waje mo ngɛ e he wami ngua a nɛ hɛ mi ngɛ nyami ɔ he je, konɛ o kɛ tsui si tomi kɛ bua jɔmi nɛ fĩ si saminya.’—Kol. 1:11. w23.10 17 ¶19-20

Wa ngɛ yi mi tomihi fuu a he je nɛ e sa kaa waa na Yehowa si. Wa ma nyɛ maa na Yehowa si ngɛ ní kpakpahi tsuo nɛ wa ngɛ ɔ he, ejakaa e ngɔ nɛ ní nɛ ɔmɛ tsuo je. (Yak. 1:17) Kaa nɔ hyɛmi nɔ́ ɔ, wa ma nyɛ maa na lɛ si ngɛ zugba nɛ ngɛ fɛu kɛ ní kpahi nɛ a ngɛ nyakpɛ nɛ e bɔ ɔ he. Jehanɛ hu ɔ, wa ma nyɛ maa pee níhi kɛ tsɔɔ kaa wa bua jɔ wami kɛ huɛmɛ kɛ weku li kɛ hɛ nɔ kami nɛ e ha wɔ ɔ he. Nɔ́ nɛ pe kulaa a, wa ma nyɛ maa na Yehowa si kaa e ngmɛ wɔ blɔ konɛ huɛ bɔmi kpakpa nɛ hi waa kɛ lɛ wa kpɛti. E sa nɛ waa bɔ mɔde wawɛɛ nɛ wa susu nɔ́ he je nɛ e he hia nɛ wa ti nɔ fɛɛ nɔ nɛ je hɛsa kpo ngɛ níhi nɛ Yehowa peeɔ kɛ haa wɔ ɔ he. Mwɔnɛ ɔ, nihi babauu li sina. Behi fuu ɔ, nihi ngɔɔ a juɛmi kɛ maa nɔ́ nɛ a ma ná a pɛ nɔ, mohu pe nɛ a maa pee níhi kɛ tsɔɔ kaa a bua jɔ níhi nɛ a ngɛ ɔ he. Ke wa bɔni jamɛ a su ɔ kpo jemi ɔ, wa sɔlemi maa pee ní bimi sɔuu. Bɔ nɛ pee nɛ wa ko pee jã a, e sa nɛ waa ya nɔ nɛ wa je hɛsa kpo ngɛ níhi tsuo nɛ Yehowa peeɔ ha wɔ ɔ he.—Luka 6:45. w23.05 4 ¶8-9

Yehowa ji wa Tsɛ nɛ ngɛ suɔmi, enɛ ɔ he ɔ, e sume nɛ e maa na kaa wa ngɛ nɔ́ nae. (Yes. 63:9) Se kɛ̃ ɔ, e tsi we kahi tsuo nɛ waa kɛ kpeɔ, nɛ a ngɛ kaa pa loo la a nya. (Yes. 43:2) Se e wo si kaa e ‘maa piɛɛ wa he,’ nɛ e be hae nɛ kahi nɛ waa kɛ kpeɔ ɔ nɛ a ná wa nɔ he wami nɛ wa kpa lɛ sɔmɔmi. Jehanɛ hu ɔ, Yehowa haa wɔ e mumi klɔuklɔu ɔ nɛ ngɛ he wami ɔ konɛ wa nyɛ nɛ wa fĩ si. (Luka 11:13; Filip. 4:13) Enɛ ɔ he ɔ, wa ma nyɛ ma ná nɔ mi mami kaa wa nine maa su nɔ́ tutuutu nɛ wa hia a nɔ, konɛ wa nyɛ nɛ wa fĩ si nɛ waa ya nɔ nɛ waa ye lɛ anɔkuale. Yehowa suɔ kaa waa ngɔ wa hɛ kɛ fɔ e nɔ. (Heb. 11:6) Be komɛ ɔ, wa ma nyɛ maa nu he kaa wa haomi ɔmɛ a nya wa tsɔ nɛ wa be nyɛe maa da nya. Wa ma nyɛ maa nu he po kaa Yehowa be wɔ ye buae. Se Baiblo ɔ ha wɔ nɔ mi mami kaa ngɛ Mawu he wami nya a, wa ‘ma nyɛ maa tu gbogbo’ po. (La 18:29) Enɛ ɔ he ɔ, e sɛ nɛ wa susu kaa Yehowa be wɔ ye buae, mohu ɔ, e sa nɛ waa sɔle wawɛɛ nɛ wa ná hemi kɛ yemi nɛ mi wa kaa Yehowa ma ha wa sɔlemi ɔmɛ a heto.—Yak. 1:​6, 7. w23.11 22 ¶8-9

Bɔ nɛ ngmami nɛ ɔ kale suɔmi nitsɛnitsɛ ha a sa kadimi wawɛɛ! E mi munyu ɔmɛ ma nyɛ maa wo nihi nɛ a sɛ gba si himi mi ɔ he wami wawɛɛ. E tsɔɔ wɔ kaa nihi nɛ a sɛ gba si himi mi ɔ ma nyɛ ma je suɔmi nɛ se pui kpo kɛ tsɔɔ a sibi. E biɔ mɔde bɔmi wawɛɛ loko nihi nɛ a sɛ gba si himi mi ɔ ma nyɛ ma je suɔmi nɛ se pui kpo kɛ tsɔɔ a sibi a wami be tsuo. Mo susu nɔ́ he tomi nɔ́ nɛ ɔ he nɛ o hyɛ: Ke a slɛ la a, ja a ngɔ lɛ kɛ ngɛ mi woe loko e maa tso be kɛkɛɛ nɛ e be gboe. Ke a pee we jã a, bɔɔbɔɔbɔɔ ɔ, la a ma gbo kulaa. Jã kɛ̃ nɛ loko suɔmi nɛ ngɛ nɔ kɛ e yo a kpɛti ɔ mi maa wa a, e sa nɛ a pee níhi nɛ ma ha nɛ e mi maa wa wawɛɛ. Be komɛ ɔ, a ma nyɛ maa nu he kaa suɔmi nɛ ngɛ a kpɛti ɔ ngɛ si bae, titli ɔ, ke a kɛ sika, hiɔ loo bimɛ a tsɔsemi he nyagbahi ngɛ kpee. Enɛ ɔ he ɔ, bɔ nɛ pee nɛ “Yah la lilɛ ɔ” nɛ ya nɔ nɛ e tso be fɛɛ be ɔ, e sa nɛ huno ɔ kɛ e yo ɔ nɛ a ha nɛ huɛ bɔmi kpakpa nɛ hi a kɛ Yehowa a kpɛti. w23.05 20-21 ¶1-3

Mɛni e sa nɛ waa pee konɛ wa nyɛ nɛ waa pee kã? Wa fɔli ma nyɛ maa wo wɔ he wami kaa waa pee kã. Se ke wa fɔli ji kãtsɛmɛ kaa mɛni po ɔ, lɔ ɔ tsɔɔ we kaa bɔ fɛɛ bɔ nɛ ji ɔ, wɔ hu wa maa pee kã. Wa ma nyɛ maa ngɔ nɔ ko nɛ e ngɛ kã peemi kasee ɔ kɛ to nɔ ko nɛ e ngɛ ní tsumi ehe ko kasee ɔ he. Loko nɔ ko ma nyɛ maa le ní tsumi ehe ko saminya a, e ma bi nɛ e hyɛ bɔ nɛ nɔ nɛ ngɛ lɛ ní tsumi ɔ tsɔɔe ɔ tsuɔ ní ɔ ha nɛ e kase lɛ. Jã kɛ̃ nɛ loko wɔ hu wa ma nyɛ maa pee kã a, e sa nɛ waa kase bɔ nɛ ni kpahi jeɔ su nɛ ɔ kpo ha nɛ waa pee jã pɛpɛɛpɛ. Kaa bɔ nɛ Daniel pee ɔ, e sa nɛ waa le Mawu Munyu ɔ saminya. E sa nɛ waa je wa tsui mi nɛ waa kɛ Yehowa nɛ sɛɛ ní konɛ huɛ bɔmi nɛ ngɛ waa kɛ lɛ wa kpɛti ɔ mi nɛ wa. Jehanɛ hu ɔ, e sa nɛ wa ná hɛ kɛ nɔ fɔmi ngɛ e mi, nɛ wa ná nɔ mi mami kaa e piɛɛ wa he. Kɛkɛ ɔ, ke waa kɛ wa hemi kɛ yemi ɔ he ka ko kpe ɔ, wa ma nyɛ maa pee kã. Ke wa pee kã a, behi fuu ɔ, nihi jeɔ bumi kpo kɛ tsɔɔ wɔ. Jehanɛ hu ɔ, e ma nyɛ ma ha nɛ tsui kpakpatsɛmɛ nɛ a ba le Yehowa. E ngɛ heii kaa wa ngɛ yi mi tomi kpakpahi a he je nɛ e sa nɛ waa pee kã. w23.08 2 ¶2; 4 ¶8-9

A ngɔ Hela munyungu nɛ a tsɔɔ sisi ke “ná níhi tsuo a nɔ mi mami” ɔ kɛ kale bɔ nɛ nihi plɛɔ kɛ leɔ kaa adiagba ko nɛ he jua wa a ji sika tsu nitsɛnitsɛ loo sika hiɔ. Enɛ ɔ he ɔ, loko wa maa kane munyu ko loo waa maa bu nɔ́ ko tue ɔ, e sa nɛ wa ‘ná nɔ mi mami’ kaa e hi loo e hí. Enɛ ɔ maa ye bua wɔ wawɛɛ ejakaa e be kɛe nɛ amanehlu ngua a maa ba. E sɛ nɛ wa he nɔ́ fɛɛ nɔ́ nɛ waa ye kɛkɛ, mohu ɔ, e sa nɛ waa ngɔ níhi nɛ wa kaneɔ loo wa nuɔ ɔ kɛ to nɔ́ nɛ Baiblo ɔ kɛ Yehowa asafo ɔ tsɔɔ ɔ he. Ke wa pee jã a, e be hae nɛ lakpa munyuhi nɛ a je daimoniohi a ngɔ ɔ nɛ ná wa nɔ he wami. (Abɛ 14:15; 1 Tim. 4:1) Wa le kaa a maa baa Mawu we bi a yi ngɛ amanehlu ngua a mi. Kaa ni kakaakahi ɔ, wa li nɔ́ nɛ maa ba hwɔɔ se. (Yak. 4:14) Se ke wa ngɛ wami mi loko amanehlu ngua a ba jio, wa gbo loko e ba jio, wa ma ná neneene wami ke wa ye anɔkuale kɛ ya si nyagbe. Enɛ ɔ he ɔ, nyɛ ha nɛ wɔ tsuo waa ngɔ wa juɛmi kɛ ma wa hɛ kɛ nɔ fɔmi ɔ nɔ, nɛ waa pee klaalo kɛ ha Yehowa ligbi ɔ! w23.06 13 ¶15-16

Ngɛ anɔkuale mi ɔ, wa li bɔ nɛ Baiblo gbami komɛ ma plɛ kɛ ba mi ha. (Dan. 12:​8, 9) Se ke wa li blɔ nɔ nɛ gbami ko ma plɛ kɛ ba mi ha po ɔ, lɔ ɔ tsɔɔ we kaa e be mi bae. Ngɛ anɔkuale mi ɔ, wa ma nyɛ ma ná nɔ mi mami kaa ngɛ be nɛ sa mi ɔ, Yehowa ma ha nɛ waa le níhi nɛ e sa kaa waa le, kaa bɔ nɛ e pee blema a pɛpɛɛpɛ. E be kɛe nɛ nihi maa hi dee ke “tue mi jɔmi kɛ slɔkee si himi ba.” (1 Tɛs. 5:3) Lɔ ɔ se ɔ, je ɔ mi nɔ yeli ɔmɛ tsuo ma tua lakpa jami nɛ a ma kpata e hɛ mi kulaa. (Kpoj. 17:​16, 17) Ngɛ lɔ ɔ se ɔ, a ma ba tua Mawu we bi. (Eze. 38:​18, 19) Ní nɛ ɔmɛ nɛ maa ya nɔ ɔ, maa ngɔ nyagbe ta nɛ ji Hamagedɔn ɔ kɛ ba. (Kpoj. 16:​14, 16) Wa ma nyɛ ma ná nɔ mi mami kaa e be kɛe nɛ ní nɛ ɔmɛ maa ya nɔ. Se kɛ yaa si jamɛ a be ɔ, nyɛ ha nɛ wa hɛ nɛ hi Baiblo gbamihi a nɔ, nɛ waa ye bua ni kpahi konɛ mɛ hu a pee jã. Ke wa pee jã a, lɔ ɔ maa tsɔɔ kaa wa bua jɔ níhi nɛ wa hiɔwe Tsɛ nɛ ngɛ suɔmi ɔ pee kɛ ha wɔ ɔ he. w23.08 13 ¶19-20

Benɛ bɔfo Paulo ngɛ hemi kɛ yemi, hɛ kɛ nɔ fɔmi kɛ suɔmi he munyu tue ɔ, e de ke: ‘Nɔ́ nɛ pe kulaa ngɛ a kpɛti ɔ ji suɔmi.’ (1 Kor. 13:13) Mɛni he je nɛ Paulo de jã a? Ejakaa hwɔɔ se ɔ, Mawu si womihi nɛ kɔɔ je ehe ɔ he ɔ maa ba mi, enɛ ɔ he ɔ, e he be hiae nɛ wa ná hemi kɛ yemi ngɛ si womi nɛ ɔmɛ a mi hu. Se ngɛ jamɛ a be ɔ mi ɔ, e he maa hia nɛ waa ya nɔ nɛ waa suɔ Yehowa kɛ adesahi tsuo. Ngɛ anɔkuale mi ɔ, suɔmi nɛ wa ngɛ kɛ ha Yehowa kɛ adesahi ɔ mi maa wa be fɛɛ be. Jehanɛ hu ɔ, suɔmi haa nɛ nihi naa kaa anɔkuale Kristofohi ji wɔ. Yesu de e bɔfo ɔmɛ ke: “Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa nyɛ ji ye kaseli.” (Yoh. 13:35) Jehanɛ hu ɔ, ke wa suɔ wa sibi ɔ, e haa nɛ kake peemi nɛ ngɛ wa kpɛti ɔ mi waa. Paulo tsɔɔ kaa suɔmi “haa nɛ kake peemi nɛ ye mluku baa.” (Kol. 3:14) Bɔfo Yohane ngma kɛ ha e nyɛmimɛ Kristofo ɔmɛ ke: “Nɔ fɛɛ nɔ nɛ e suɔ Mawu ɔ, e sa nɛ e suɔ e nyɛmi hulɔ.” (1 Yoh. 4:21) Ke wa suɔ wa nyɛmimɛ ɔmɛ ɔ, lɔ ɔ tsɔɔ kaa wa suɔ Mawu. w23.11 8 ¶1, 3

Baiblo ɔ ngɔ Kristofohi a si himi kɛ to fo tumi he. Nihi nɛ a maa tu fo ɔ kɛ ya si nyagbe ɔ, a nine maa su neneene wami nɔ. (2 Tim. 4:​7, 8) E sa nɛ waa pee nɔ́ fɛɛ nɔ́ nɛ wa ma nyɛ nɛ waa ya nɔ nɛ waa tu fo ɔ, ejakaa e be kɛe nɛ a maa gbe fo tumi nɛ ɔ nya. Bɔfo Paulo tsɔɔ nɔ́ nɛ maa ye bua wɔ konɛ wa nyɛ nɛ waa tu fo ɔ kɛ gbe nya. E tsɔɔ kaa e sa nɛ ‘wa sake nɔ́ fɛɛ nɔ́ nɛ jiɔ kɛ fɔ he, nɛ waa kɛ hɛ mi miami nɛ tu fo ɔ nɛ e fɔɔ si ngɛ wa hɛ mi ɔ.’ Anɛ Paulo ngɛ tsɔɔe kaa tlomi ko be Kristofohi a kuɛ nɔ nɛ e sa nɛ a tloo lo? Dɛbi, pi jã ji sane ɔ kulaa. Nɔ́ nɛ e ngɛ tsɔɔe ji kaa e sa nɛ wa sake nɔ́ fɛɛ nɔ́ nɛ e he hia we ɔ kɛ fɔ he. Ní nɛ ɔmɛ be hae nɛ wa sɔmɔ Yehowa saminya, nɛ e ma nyɛ ma ha nɛ wa kɔni mi nɛ jɔ̃. Bɔ nɛ pee nɛ wa nyɛ nɛ wa fĩ si ɔ, e sa nɛ waa kɛ oya yemi nɛ yɔse níhi nɛ ma nyɛ maa gbla wɔ se ɔ, nɛ́ wa sake mɛ kɛ fɔ he. Se ngɛ jamɛ a be ɔ mi nɔuu ɔ, ní komɛ ngɛ nɛ a he hia nɛ e sɛ nɛ wa sake mɛ ngɔ fɔ he, ke pi jã a, wa be nyɛe maa tu wami he fo ɔ kɛ gbe nya.—2 Tim. 2:5. w23.08 26 ¶1-2

Ke wa nuɔ nɔ́ sisi ɔ, e yeɔ bua wɔ nɛ wa kplɛɛɔ ni kpahi a susumi nɔ. Kaa nɔ hyɛmi nɔ́ ɔ, wa nyɛmiyi ɔmɛ ekomɛ suɔ nɛ a maa wo lipolipo loo makeup, se ni komɛ hu sume kulaa. Kristofohi komɛ a bua jɔ he kaa a maa nu dã bɔɔ, nɛ ni komɛ hu mwɔ a yi mi kpɔ kaa a be dã nue kulaa. Kristofohi tsuo suɔ nɛ a ná nɔmlɔ tso mi he wami kpakpa. Se e slo yi mi kpɔhi nɛ nɔ fɛɛ nɔ mwɔɔ ngɛ hiɔ tsami he. Ke wa susuɔ kaa wa nɔ́ da be fɛɛ be, nɛ wa nyɛɔ ni kpahi a nɔ kaa a pee nɔ́ nɛ wa suɔ ɔ, lɔ ɔ ma nyɛ maa tɔ̃tɔ̃ a nane, nɛ e ma puɛ kake peemi nɛ ngɛ asafo ɔ mi ɔ. (1 Kor. 8:9; 10:​23, 24) Kaa nɔ hyɛmi nɔ́ ɔ, Yehowa tsɔɔ we wɔ tade pɔtɛɛ nɛ e sa nɛ waa wo, mohu ɔ, e ha wɔ sisi tomi mlaahi nɛ e sa kaa wa kɛ tsu ní. Mawu suɔ nɛ wa dla wa he bɔ nɛ sa konɛ e wo e hɛ mi nyami. E sa nɛ bɔ nɛ wa dlaa wa he ha a nɛ tsɔɔ kaa wa susuɔ nɔ́ he, wa peeɔ wa he humi, nɛ wa ‘juɛmi mi hu tsɔ.’ (1 Tim. 2:​9, 10) Enɛ ɔ he ɔ, e sɛ nɛ wa he dlami nɛ gbla nihi a juɛmi kɛ ba wa nɔ. Jehanɛ hu ɔ, Baiblo sisi tomi mlaahi maa ye bua asafo mi nikɔtɔmahi nɛ a ko wo mɛ nitsɛmɛ a mlaahi ngɛ tade womi, kɛ yi nɛ nɔ ko maa pee loo e maa sɛ ɔ he. w23.07 23-24 ¶13-14

Yehowa tsɔɔ wɔ nɔ́ nɛ e sa nɛ waa pee konɛ wa ná bua jɔmi. Nihi nɛ a kplɛɛɔ “yo kuasia” a nine fɔmi ɔ nɔ ɔ bɔɔ mɔde kaa a kɛ a he maa wo ajuama bɔmi mi konɛ a ná bua jɔmi. A ní peepee ɔ maa ngɔ mɛ kɛ ya gbenɔ mi. (Abɛ 9:​13, 17, 18) Se nihi nɛ a kplɛɛɔ ‘nile nitsɛnitsɛ’ nine fɔmi ɔ nɔ lɛɛ, a si himi maa pee kpakpa hwɔɔ se. (Abɛ 9:1) Wa na kaa e sa nɛ waa suɔ níhi nɛ Yehowa suɔ, nɛ waa hiɔ níhi nɛ e hiɔ. (La 97:10) Jehanɛ se hu ɔ, wa ngɛ bua jɔmi ejakaa wa ma nyɛ maa fɔ ni kpahi nine konɛ mɛ hu a ba ná ‘nile nitsɛnitsɛ’ ɔ he se. E ngɛ kaa nɔ́ nɛ a tsɔ wɔ kaa wa ‘ya da ma a mi he nɛ ya hiɔwe pe kulaa a, nɛ wa kpa ngmlaa ke, “Nyɛ nihi tsuo nɛ nyɛ be juɛmi ɔ, nyɛ gba hiɛmɛ nɛ ɔ!”’ Ke wa pee jã a, waa kɛ nihi nɛ a maa bu wɔ tue ɔ ma ná he se amlɔ nɛ ɔ kɛ hwɔɔ se hulɔ. Jehanɛ hu ɔ, e ma ha nɛ wa ma “ná wami” kɛ ya neneene, nɛ wa ma “hla nile se blɔ.”—Abɛ 9:​3, 4, 6. w23.06 24 ¶17-18

Ke nɔ ko nɛ o kɛ lɛ yaa sukuu loo nɔ ko nɛ o kɛ lɛ tsuɔ ní ɔ bi mo nɔ́ ko kɛ kɔ o hemi kɛ yemi ɔ he ɔ, kɛ o nuɔ he ha kɛɛ? Anɛ o yeɔ gbeye lo? Wa kpɛti nihi fuu nuɔ he jã. Se sane bimi kaa jã a maa ye bua wɔ konɛ waa le nɔ ɔ susumi, loo nɔ́ nɛ e heɔ yeɔ, nɛ lɔ ɔ ma ha nɛ e he be wae ha wɔ kaa wa maa fiɛɛ sane kpakpa a kɛ tsɔɔ lɛ. Be komɛ hu ɔ, nɔ ko ma nyɛ ma bi wɔ sane akɛnɛ e kɛ wɔ kpa we gbi loo e suɔ nɛ e kɛ wɔ nɛ sã nya a he je. Se e pee we wɔ nyakpɛ. Behi fuu ɔ, e nyɛɔ baa jã, ejakaa nihi fuu nu lakpa munyuhi nɛ nihi tu kɛ kɔ nɔ́ nɛ wa heɔ yeɔ ɔ he. (Níts. 28:22) Jehanɛ hu ɔ, akɛnɛ wa “ngɛ nyagbe ligbi ɔmɛ a mi” he je ɔ, nihi maa pee a he “nihi nɛ a hí kɛ somi ko somi,” kɛ “nihi nɛ a hɛ mi jɔɛ.” (2 Tim. 3:​1, 3) Eko ɔ, o ma bi o he ke, ‘Ke nɔ ko ngɛ hlae nɛ e kɛ mi nɛ sã nya ngɛ nɔ́ nɛ i heɔ yeɔ ɔ he ɔ, mɛni maa ye bua mi nɛ ma pee kpoo nɛ i kɛ hɛ si kami nɛ tsu ní?’ Nɔ́ nɛ maa ye bua mo ji kaa e sa nɛ o he nɛ jɔ. Nɔ nɛ e he jɔ ɔ mi mi fu we mla. Ke nɔ ko wo e mi mi la nɛ e li nɔ́ nɛ e maa pee ɔ, e yeɔ e he nɔ. w23.09 14 ¶1-2

Be komɛ ɔ, wa nine suɔ ga womi nɔ kɛ jeɔ Yehowa asafo ɔ ngɔ, nɛ lɔ ɔ poɔ wa he piɛ kɛ jeɔ he lo nya níhi a se dimi kɛ níhi nɛ ma nyɛ ma ha nɛ wa tɔ̃ Mawu mlaa amɛ a nɔ ɔ he. Ke wa ngɔ Yehowa blɔ tsɔɔmi ngɛ ní nɛ ɔmɛ a he ɔ kɛ tsu ní ɔ, wa ma ná he se. (Yes. 48:​17, 18; 1 Tim. 6:​9, 10) Ngɛ anɔkuale mi ɔ, Yehowa maa ya nɔ maa gu adesahi a nɔ kɛ ha wɔ blɔ tsɔɔmihi ngɛ amanehlu ngua a mi hluu kɛ ya su Jeha Akpe Nɔ Yemi ɔ mi. Anɛ wa maa ya nɔ nɛ waa kɛ blɔ tsɔɔmi nɛ a kɛ ma ha wɔ ngɛ jamɛ a be ɔ mi ɔ ma tsu ní lo? Bɔ nɛ wa maa pee wa ní ha ngɛ blɔ tsɔɔmi nɛ Yehowa kɛ haa wɔ amlɔ nɛ ɔ he ɔ lɛ maa tsɔɔ bɔ nɛ wa maa pee wa ní ha ngɛ jamɛ a be ɔ mi. Enɛ ɔ he ɔ, nyɛ ha nɛ waa kɛ blɔ tsɔɔmihi nɛ Yehowa kɛ haa wɔ kɛ guɔ nyumuhi nɛ a hla mɛ ɔ a nɔ ɔ nɛ tsu ní be fɛɛ be, ejakaa mɛ lɛ a hyɛɛ wa nɔ. (Yes. 32:​1, 2; Heb. 13:17) Wa ngɛ yi mi tomi kpakpahi a he je nɛ e sa nɛ waa ngɔ wa hɛ kɛ fɔ Yehowa nɛ ji wa Blɔ Tsɔɔlɔ ɔ nɔ, ejakaa e poɔ wa he piɛ kɛ jeɔ níhi nɛ ma nyɛ ma puɛ huɛ bɔmi nɛ ngɛ waa kɛ lɛ wa kpɛti ɔ he konɛ wa nyɛ nɛ wa ná neneene wami. w24.02 25 ¶17-18

Bɔfo Paulo ná bua jɔmi ngɛ e sɔmɔmi ní tsumi ɔ mi, se e kɛ nyagbahi fuu kpe. Paulo pɔɔ blɔ gagaa hiami, nɛ ngɛ jamɛ a be ɔ mi hu ɔ, e be gbɔjɔɔ kaa nɔ ko maa hia blɔ. Ke Paulo ngɛ blɔ hiae ɔ, be komɛ ɔ, e kɛ oslaahi kpeɔ ngɛ ‘pa nɔ’ kɛ “juli a dɛ mi.” Nɛ ngɛ be komɛ a mi po ɔ, he nyɛli ya poɔ lɛ nɛ a kongoɔ lɛ. (2 Kor. 11:​23-27) Jehanɛ hu ɔ, pi be fɛɛ be nɛ nyɛmimɛ ɔmɛ jeɔ hɛsa kpo ngɛ mɔde nɛ bɔfo Paulo bɔɔ kaa e maa ye bua mɛ ɔ he. (2 Kor. 10:10; Filip. 4:15) Mɛni ye bua Paulo nɛ e ya nɔ nɛ e sɔmɔ Yehowa? Paulo kase suhi nɛ Yehowa ngɛ ɔ he ní fuu ngɛ Ngmami ɔ mi, nɛ e kase babauu kɛ je lɛ nitsɛ e níhi a si kpamihi a mi hulɔ. Enɛ ɔ ha nɛ e ná nɔ mi mami kaa Yehowa Mawu suɔ lɛ wawɛɛ. (Rom. 8:​38, 39; Efe. 2:​4, 5) Enɛ ɔ he ɔ, e ba suɔ Yehowa wawɛɛ. Paulo ‘sɔmɔ ni klɔuklɔu ɔmɛ, nɛ e ya nɔ nɛ e sɔmɔ mɛ’ kɛ tsɔɔ kaa e suɔ Yehowa.—Heb. 6:10. w23.07 9 ¶5-6

Nihi fuu kplɛɛ nɔ kaa wa hia ma nɔ yeli. A tsɔɔ hu kaa ke ‘nihi nɛ a ngɛ blɔ nyahi nɛ a nɔ kuɔ’ ɔ wo mlaahi ɔ, e sa nɛ waa kɛ ekomɛ nɛ tsu ní. Se ke amlaalo ɔ wo mlaa ko nɛ nimli nɛ ɔmɛ a bua jɔɛ he ɔ, a sume nɛ a yeɔ nɔ, ejakaa a nuɔ he kaa amlaalo ɔ yi dami sane. Baiblo ɔ tsɔɔ kaa e be kɛe nɛ a ma kpata adesa nɔ yemihi nɛ ha nɛ wa ngɛ nɔ́ nae ngɛ Satan kudɔmi sisi ɔ hɛ mi. (La 110:​5, 6; Fiɛɛ. 8:9; Luka 4:​5, 6) Jehanɛ hu ɔ, Baiblo ɔ tsɔɔ kaa “nɔ fɛɛ nɔ nɛ e teɔ si kɛ woɔ blɔ nya a, e teɔ si kɛ siɔ Mawu blɔ nya tomi ɔ.” Amlɔ nɛ ɔ, Yehowa ngmɛ nɔ yeli ɔmɛ blɔ konɛ a ye nɔ kɛ ya si be ko, bɔ nɛ pee nɛ a to níhi a blɔ nya, nɛ e hyɛɔ blɔ kaa wa maa bu mɛ tue. Enɛ ɔ he ɔ, e sa nɛ waa ba wa he si kɛ ha mɛ, nɛ ‘nɔ́ nɛ sa mɛ tsuo ɔ, waa ngɔ kɛ ha mɛ.’ E sa nɛ waa wo tohi, waa bu mɛ, nɛ waa kɛ a blɔ tsɔɔmi nɛ tsu ní. (Rom. 13:​1-7) Ke nɔ yeli ɔmɛ wo mlaa ko ɔ, wa ma nyɛ maa nu he kaa mlaa a he wa tsɔ, a yi wɔ dami sane, loo a ngɛ hlae nɛ waa wo sika ngua ko kɛ ha mɛ. Se ke mlaahi nɛ nɔ yeli ɔmɛ wo ɔ ti si kɛ wui Yehowa mlaahi ɔ, wa buɔ mɛ tue ejakaa Yehowa lɛ de wɔ kaa waa pee jã.—Níts. 5:29. w23.10 8 ¶9-10

Benɛ a fɔ Samson ɔ, jamɛ a be ɔ mi ɔ, Filistibi ɔmɛ ji nihi nɛ a ngɛ Israel ma a nɔ yee, nɛ a ngɛ mɛ yi mi wae wawɛɛ. (Many. 13:1) Akɛnɛ Filistibi ɔmɛ wa Israelbi ɔmɛ yi mi he je ɔ, a na nɔ́ wawɛɛ. Yehowa hla Samson kaa lɛ ji nɔ nɛ e ‘maa nyɛɛ hɛ mi kɛ kpɔ̃ Israelbi ɔmɛ kɛ je Filistibi ɔmɛ a dɛ mi.’ (Many. 13:5) Loko Samson ma nyɛ ma tsu ní tsumi nɛ he wa nɛ ɔ, ja e ngɔ e hɛ kɛ fɔ Yehowa nɔ. Ligbi ko ɔ, Filisti tabuli ɔmɛ ba konɛ a ba nu Samson ngɛ Lehi. Eko ɔ, Lehi ngɛ Yuda. Yudabi ɔmɛ a tsui po, enɛ ɔ he ɔ, a ma a juɛmi nya si kaa a maa ngɔ Samson kɛ ha Filistibi ɔmɛ. Samson nitsɛ e ma mi bi ɔmɛ ngɔ kpã ehe enyɔ kɛ fi lɛ, nɛ a ngɔ lɛ kɛ ya ha Filistibi ɔmɛ. (Many. 15:​9-13) Se ‘Yehowa mumi ɔ ba e nɔ wawɛɛ nitsɛ’ nɛ e tsɔ kpã amɛ, kɛkɛ nɛ e ‘na teji ku ko nɛ e gbo kɛ we tsitsa mi wu,’ nɛ e kɛ gbe Filisti nyumuhi 1,000!—Many. 15:​14-16. w23.09 2 ¶3-4

Yehowa jé “neneene yi mi nɛ e to” ɔ kpo kɛ tsɔɔ wɔ bɔɔbɔɔbɔɔ ngɛ Baiblo ɔ mi. Yehowa ma nyɛ maa gu blɔ slɔɔtohi a nɔ kɛ tsu e yi mi tomi ɔ he ní, ejakaa e ‘haa nɛ nɔ́ fɛɛ nɔ́ tsuɔ e yi mi tomi ɔ he ní.’ (Abɛ 16:4) Enɛ ɔ he ɔ, níhi nɛ Yehowa pee ɔ maa hi si kɛ maa ya neneene. Mɛni ji Yehowa yi mi tomi, nɛ mɛni tsakemihi e pee konɛ e kɛ tsu e yi mi tomi ɔ he ní? Mawu ha nɛ Adam kɛ Hawa le yi mi nɛ e to kɛ ha mɛ. Lɔ ɔ ji kaa ‘a fɔ nɛ a he nɛ hiɛ, nɛ a hyi zugba a nɔ tɔ, nɛ a hyɛ adebɔ níhi tsuo nɛ wami ngɛ a mi nɛ a nyɛɛɔ ngɛ zugba a nɔ ɔ a nɔ.’ (1 Mose 1:28) Benɛ Adam kɛ Hawa gbo Yehowa nɔ tue nɛ a ngɔ yayami kɛ gbenɔ kɛ sã adesahi tsuo po ɔ, Yehowa yi mi tomi ɔ tsakee we. Yehowa pee tsakemi konɛ e kɛ tsu e yi mi tomi ɔ he ní. Oya nɔuu nɛ Yehowa to e yi mi kaa e maa to Matsɛ Yemi ko sisi ngɛ hiɔwe konɛ e kɛ tsu yi mi nɛ e to ngɛ adesahi kɛ zugba a he ɔ he ní.—Mat. 25:34. w23.10 20 ¶6-7

Yehowa ma nyɛ maa ye bua wɔ konɛ waa ya nɔ nɛ waa ye lɛ anɔkuale. Ngɛ anɔkuale mi ɔ, pi be fɛɛ be nɛ e ngɛ gbɔjɔɔ kaa wa maa ya nɔ maa ye anɔkuale, titli ke wa ngɛ mɔde bɔe kaa wa maa hwu kɛ si wa gbɔjɔmi ko be kɛkɛɛ ji nɛ ɔ. Be komɛ ɔ, wa ma nyɛ maa nu he kaa wa gbɔjɔmi ɔmɛ a nya wa pe nɔ́ nɛ bɔfo Petro kɛ kpe ɔ. Ke jã ji sane ɔ po ɔ, Yehowa ma nyɛ ma ha wɔ he wami nɛ wa hia a konɛ wa kɔni mi nɛ ko jɔ̃. (La 94:​18, 19) Kaa nɔ hyɛmi nɔ́ ɔ, nyɛminyumu ko kɛ e he wo nyumu kɛ nyumu a bɔmi nami mi jehahi babauu loko e ba kase anɔkuale ɔ. E tsake e je mi bami kulaa nɛ e kɛ Baiblo mlaahi bɔni ní tsumi ngɛ e si himi mi. Se loloolo ɔ, be komɛ ɔ, e biɔ nɛ e hwu kɛ si akɔnɔ yayahi. Mɛni ye bua lɛ nɛ e nyɛ nɛ e fĩ si? E de ke: “Yehowa wo mi he wami. E kɛ mumi klɔuklɔu ɔ ye bua mi . . . , nɛ i ba na kaa Yehowa sɔmɔli tsuo ma nyɛ maa [ya nɔ] nɛ a ba a je mi saminya kaa bɔ nɛ Yehowa ngɛ hlae ɔ . . . Ngɛ ye gbɔjɔmi ɔmɛ tsuo se ɔ, Yehowa kɛ mi tsuɔ ní, nɛ e yaa nɔ nɛ e woɔ mi he wami.” w23.09 23 ¶12

Nihewi, e biɔ mɔde bɔmi wawɛɛ loko nyɛ ma nyɛ maa pee Kristofohi nɛ a nane pi si. Bɔ nɛ pee nɛ nyɛ nyɛ nɛ nyɛɛ pee jã a, e sa nɛ nyɛɛ kɛ nihi nɛ a peeɔ nɔ hyɛmi nɔ́ kpakpa nɛ bɔ, nɛ nyɛɛ kase mɛ, nyɛ susu níhi a he saminya, nyɛɛ pee nyɛ he nihi nɛ a ma nyɛ maa ngɔ hɛ kɛ fɔ a nɔ, nyɛɛ kase ní komɛ nɛ ma nyɛ maa ye bua nyɛ ngɛ si himi mi, nɛ nyɛ dla nyɛ he kɛ ha blɔ nya ní tsumihi nɛ a kɛ maa wo nyɛ dɛ hwɔɔ se ɔ. Ke nyɛ susu níhi nɛ e sa kaa nyɛ tsu he ní ɔ a he ɔ, eko ɔ, nyɛ ma susu kaa nyɛ be nyɛe maa pee. Se nyɛ kɔni mi nɛ ko jɔ̃, nyɛ ma nyɛ maa pee. Nyɛ kai kaa Yehowa suɔ kaa e maa ye bua nyɛ. (Yes. 41:​10, 13) Ngɛ anɔkuale mi ɔ, nyɛmimɛ nɛ a ngɛ asafo ɔ mi ɔ hu maa ye bua nyɛ. Ke nyɛ bɔ mɔde nɛ nyɛ pee Kristofohi nɛ a nane pi si ɔ, nyɛ tsui maa nɔ nyɛ mi. Nihewi, wa suɔ nyɛ wawɛɛ! Ke nyɛ bɔ mɔde kaa nyɛ maa pee Kristofohi nɛ a nane pi si ɔ, Yehowa maa jɔɔ nyɛ wawɛɛ. w23.12 29 ¶19-20

Ngɔɔ lɛ kaa o kɛ nyɛmimɛ fuu ya he nya buami ko sisi, nɛ nyɛ tsuo nyɛ ngɛ nyɛ hɛja jee nɛ nyɛ bua jɔ, nɛ nyɛ po foto. Lɔ ɔ se ɔ, nyɛ kpale po enyɔ kɛ piɛɛ he ejakaa nyɛ le kaa ke kekle nɔ́ ɔ hí ɔ, ekpa amɛ maa hi. Amlɔ nɛ ɔ, nyɛ sa fotohi etɛ. Se ngɛ foto ɔ kake mi ɔ, o na kaa nyɛmimɛ ɔmɛ a kpɛti nɔ kake tu e hɛ mi. Enɛ ɔ he ɔ, o delete loo o je kɛ je o fon ɔ nɔ, ejakaa o le kaa foto enyɔ ɔmɛ nɛ piɛ ɔ lɛɛ, nɔ fɛɛ nɔ ngɛ muɔe ngɛ mi, nɛ nyɛminyumu ɔ hu ngɛ muɔe. Behi fuu ɔ, wa kaiɔ behi nɛ waa kɛ wa nyɛmimɛ ɔmɛ je wa hɛja nɛ wa bua jɔ ɔ. Se ngɔɔ lɛ kaa o kai kaa be ko nɛ nyɛ ya je nyɛ hɛja a, nyɛmi ko de nɔ́ ko loo e pee nɔ́ ko nɛ hao mo. Ke e ba jã a, mɛni e sa nɛ o pee ngɛ he? E sa nɛ waa bɔ mɔde nɛ wa je jamɛ a susumi ɔ ngɛ wa yi mi kaa bɔ nɛ wa maa delete loo wa ma je foto ko nɛ wa sume ngɛ wa fon ɔ nɔ ɔ. (Efe. 4:32) Ke wa nyɛmimɛ ɔmɛ tɔ̃ wa nɔ ɔ, wa ma nyɛ maa ngmɛɛ he, ejakaa wa le kaa waa kɛ mɛ pee ní kpakpahi fuu nɛ ha nɛ wa bua jɔ. Níhi nɛ a pee nɛ ha nɛ wa bua jɔ ɔ, ji níhi nɛ waa kɛ ma nyɛ maa to ngɛ wa juɛmi mi. w23.11 12-13 ¶16-17

Hela munyunguhi nɛ a kɛ tsu ní ngɛ ngmami nɛ ɔ mi ɔ tsɔɔ kaa e sa nɛ yihi nɛ a dla a he bɔ nɛ sa, nɛ a susu bɔ nɛ a he dlami ma nyɛ ma ná nihi a nɔ he wami ha a he. Wa suɔ nyɛ wa nyɛmimɛ yihi nɛ nyɛ bɔɔ mɔde kaa nyɛ ma dla nyɛ he saminya a! Su kpa ko nɛ he hia wawɛɛ nɛ e sa kaa yihi nɛ a ji Kristofohi nɛ a nane pi si ɔ nɛ a je kpo ji nɔ́ se kɔmi. Mɛni ji nɔ́ se kɔmi? Lɔ ɔ ji nyɛmi nɛ nɔ ko kɛ leɔ slɔɔto nɛ ngɛ nɔ́ nɛ da kɛ nɔ́ nɛ dɛ a kpɛti, kɛkɛ ɔ, nɔ ɔ maa e juɛmi nya si kaa e maa pee nɔ́ nɛ da. Mo susu Abigail nɔ hyɛmi nɔ́ ɔ he nɛ o hyɛ. E huno ɔ mwɔ yi mi kpɔ ko nɛ ma nyɛ maa ngɔ e weku ɔ kɛ wo oslaa mi. Oya nɔuu nɛ Abigail pee nɔ́ ko ngɛ sane ɔ he. Akɛnɛ e kɔ nɔ́ se he je ɔ, e he nihi babauu a yi wami. (1 Sam. 25:​14-23, 32-35) Ke wa kɔɔ nɔ́ se ɔ, e maa ye bua wɔ nɛ waa le be nɛ e sa kaa waa tu munyu kɛ be nɛ e sa kaa waa pee dii. Jehanɛ hu ɔ, e yeɔ buaa wɔ nɛ wa susuɔ ni kpahi a he, nɛ a tsui nɔɔ a mi.—1 Tɛs. 4:11. w23.12 20 ¶8-9

Bɔfo Paulo ngma munyu nɛ ɔmɛ kɛ ya ha asafo nɛ ngɛ Roma a. Nyɛmimɛ ɔmɛ nɛ a ngɛ jamɛ a asafo ɔ mi ɔ kase Yehowa kɛ Yesu he ní, nɛ a ná hemi kɛ yemi nɛ a ba pee Kristofohi. Enɛ ɔ he je nɛ Mawu “gu hemi kɛ yemi nɔ kɛ bu [mɛ] dali,” nɛ e ngɔ mumi klɔuklɔu ɔ kɛ pɔ mɛ nu ɔ nɛ. (Rom. 5:1) Enɛ ɔ ha nɛ a ba ná hɛ kɛ nɔ fɔmi nɛ e se be, nɛ a le hu kaa e maa ba mi kokooko. Pee se ɔ, Paulo ngma sɛ womi kɛ ya ha Kristofohi nɛ a pɔ mɛ nu nɛ a ngɛ Efeso ɔ. Ngɛ jamɛ a sɛ womi ɔ mi ɔ, e tu hɛ kɛ nɔ fɔmi nɛ Mawu kɛ ha mɛ ɔ he munyu. E tsɔɔ kaa a nine maa su ‘gbosi ní nɛ ngɛ kɛ ha ni klɔuklɔu ɔmɛ’ ɔ nɔ. (Efe. 1:18) Jehanɛ hu ɔ, Paulo tsɔɔ Kolose bi ɔmɛ he nɛ a nine maa su a hiɔwo ɔ nɔ ngɛ. E tsɔɔ kaa e ji “hɛ kɛ nɔ fɔmi nɛ a kɛ to ha [mɛ] ngɛ hiɔwe.” (Kol. 1:​4, 5) Kristofohi nɛ a pɔ mɛ nu ɔ ngɛ hɛ kɛ nɔ fɔmi kaa a ma ná neneene wami ngɛ hiɔwe nɛ a kɛ Kristo maa ye matsɛ.—1 Tɛs. 4:​13-17; Kpoj. 20:6. w23.12 9 ¶4-5

Munyungu nɛ ji “bu” nɛ a kɛ tsu ní ngɛ ngmami ɔ mi ɔ, tsɔɔ bɔ nɛ ta buli poɔ ma ko he piɛ ha konɛ he nyɛli nɛ a ko ba tua ma a. Nihi nɛ a ngɛ ma kaa jã a mi ɔ hwɔɔ mahe fuaa, ejakaa a le kaa ta buli ngɛ ma a agbo ɔmɛ a he bue. Jã nɔuu kɛ̃ nɛ ke Mawu tue mi jɔmi ɔ ngɛ wa tsui kɛ wa juɛmi he bue ɔ, wa peeɔ kpoo, ejakaa wa le kaa wa ngɛ slɔkee. (La 4:8) Kaa bɔ nɛ e ji ngɛ Hana blɔ fa mi ɔ, ke wa nyagba amɛ ji amlɔ nɔuu po ɔ, wa ma nyɛ maa ya nɔ ma ná tue mi jɔmi. (1 Sam. 1:​16-18) Nɛ ke wa pee kpoo ɔ, behi fuu ɔ, e yeɔ buaa wɔ nɛ wa nyɛɔ nɛ wa susuɔ níhi a he saminya nɛ wa mwɔɔ yi mi kpɔhi nɛ da. Mɛni wa ma nyɛ maa pee? Ke o ngɛ haoe ɔ, mo bi yemi kɛ buami kɛ je o he bulɔ ɔ ngɔ. Ngɛ mɛni blɔ nɔ? Moo sɔle ha Yehowa hluu kɛ ya si benɛ o maa nu he kaa o ná Mawu tue mi jɔmi ɔ. (Luka 11:9; 1 Tɛs. 5:17) Ke o kɛ haomi ko ngɛ kpee ɔ, moo ya nɔ nɛ o sɔle, nɛ Yehowa tue mi jɔmi ɔ maa bu o tsui kɛ o juɛmi he.—Rom. 12:12. w24.01 21 ¶5-6

A pee Yesu nɔ́ yeyee, a jɛ lɛ, nɛ a gbe e he guɛ wawɛɛ, se e da nya konɛ e nyɛ nɛ e tsɔ e Tsɛ ɔ biɛ ɔ he ɔ. E le kaa e buɔ e Tsɛ ɔ tue ngɛ nɔ́ fɛɛ nɔ́ mi, enɛ ɔ he ɔ, e yi gbeye kulaa. (Heb. 12:2) Jehanɛ hu ɔ, e le kaa Satan nitsɛ lɛ ngɛ lɛ tuae ngɛ haomi be nɛ ɔ mi. (Luka 22:​2-4; 23:​33, 34) E ngɛ heii kaa Satan ma e juɛmi nya si kaa e ma ha nɛ Yesu nɛ kpa Yehowa anɔkuale yemi, se e yi manye kulaa! Yesu ha nɛ e pee heii kaa Satan ji lakpatsɛ kpanaku, nɛ jehanɛ hu ɔ, Yehowa ngɛ sɔmɔli nɛ a yeɔ anɔkuale ke a kɛ kahi nɛ a mi wa ngɛ kpee po. Anɛ o suɔ nɛ o ha nɛ wa Matsɛ nɛ ngɛ nɔ yee ɔ bua nɛ jɔ lo? Ke jã a, lɛɛ yaa nɔ nɛ o je Yehowa biɛ ɔ yi, nɛ o ye bua ni kpahi nɛ a ba le wa Mawu ɔ su kpakpa amɛ tsuo. Ke o pee jã a, lɔ ɔ tsɔɔ kaa o ngɛ Yesu kasee. (1 Pet. 2:21) Kaa bɔ nɛ Yesu pee ɔ, mo hu o ma nyɛ ma ha nɛ Yehowa bua maa jɔ nɛ o ma ha nɛ e he nyɛlɔ nɛ ji Satan ɔ maa pee lakpatsɛ, nɛ e hɛ mi ma pue si! w24.02 11-12 ¶11-13

Jeha enuɔ nɛ be ɔ, a baptisi nihi ayɔ kake kɛ se nɛ a ba pee Yehowa Odasefohi. Ke o jɔɔ o he nɔ kɛ ha Yehowa a, lɔ ɔ tsɔɔ kaa o hla kaa o maa pee Yesu Kristo kaselɔ, nɛ o kɛ Mawu suɔmi nya ní peemi maa pee nɔ́ titli ngɛ o si himi mi. Ke Kristofo no ko jɔɔ e he nɔ kɛ ha Mawu ɔ, mɛni nɛ e biɔ nɛ e pee? Yesu de ke: “Ke nɔ ko suɔ kaa e maa nyɛɛ ye se ɔ, e kua e he.” (Mat. 16:24) Hela munyu nɛ a tsɔɔ sisi ke “e kua e he” ɔ, ma nyɛ maa tsɔɔ hu kaa “e ko pee lɛ nitsɛ e suɔmi nya ní.” Ke o jɔɔ o he nɔ kɛ ha Yehowa a, e sa nɛ o kua nɔ́ fɛɛ nɔ́ nɛ Yehowa bua jɔɛ he ɔ. (2 Kor. 5:​14, 15) Enɛ ɔ ma bi nɛ o kua “he lo ɔ ní tsumi ɔmɛ.” Eko ji ajuama bɔmi. (Gal. 5:​19-21; 1 Kor. 6:18) Ke o kua ní nɛ ɔmɛ ɔ, anɛ e ma ha nɛ si himi ɔ mi nɛ wa ha mo lo? Ke o suɔ Yehowa nɛ o ngɛ nɔ mi mami kaa e mlaa amɛ a nɔ nɛ o maa ye ɔ maa po o he piɛ ɔ, lɛɛ e be bae jã.—La 119:97; Yes. 48:​17, 18. w24.03 2 ¶1; 3 ¶4

Yehowa ngɔɔ e mumi klɔuklɔu ɔ kɛ haa nihi nɛ e bua jɔ a he ɔ. (Mat. 12:18) Wa ma nyɛ ma bi wa he ke, ‘Anɛ i nyɛɔ nɛ i jeɔ Mawu mumi ɔ yiblii ɔ eko kpo ngɛ ye si himi mi lo?’ Anɛ o yɔse kaa o toɔ o tsui si wawɛɛ amlɔ nɛ ɔ pe benɛ o ba li Yehowa a lo? Ngɛ anɔkuale mi ɔ, ke o yaa nɔ nɛ o jeɔ Mawu mumi ɔ yiblii ɔ kpo ɔ, e haa nɛ o naa heii kaa Yehowa bua jɔ o he! Nihi nɛ Yehowa haa nɛ a náa kpɔmi nɔ́ ɔ he se ji nihi nɛ e bua jɔ a he. (1 Tim. 2:​5, 6) Ke wa ngɛ hemi kɛ yemi ngɛ kpɔmi nɔ́ ɔ mi nɛ a baptisi wɔ, se loloolo ɔ, wa nuɔ he kaa Yehowa bua jɔɛ wa he hu nɛɛ? Mo kai kaa be komɛ ɔ, wa he numi ma nyɛ maa sisi wɔ, se wa ma nyɛ ma ná hemi kɛ yemi ngɛ Yehowa mi be fɛɛ be. E naa nihi nɛ a ngɛ hemi kɛ yemi ngɛ kpɔmi nɔ́ ɔ mi ɔ kaa a ji dali, nɛ e wo si kaa e maa jɔɔ mɛ.—La 5:12; Rom. 3:26. w24.03 30 ¶15; 31 ¶17