October

Anɛ be komɛ ɔ, e he waa ha mo kaa o maa bu tue lo? Jã nɛ e ji ngɛ Matsɛ David blɔ fa mi. Enɛ ɔ he je ɔ, e sɔle nɛ e de Mawu ke: “Ha nɛ ma bu mo tue daa.” (La 51:12) David suɔ Yehowa. Se be komɛ ɔ, e he waa kɛ haa lɛ kaa e maa bu lɛ tue, nɛ jã nɛ e ji ngɛ wɔ hu wa blɔ fa mi. Mɛni he je? Kekleekle ɔ, Adam ngɔ yayami kɛ sã wɔ, enɛ ɔ he ɔ, e he waa kɛ haa wɔ kaa wa maa bu Mawu tue. Enyɔne, Satan ngɛ mɔde bɔe be fɛɛ be kaa e ma ha nɛ wa tsɔ atua kaa bɔ nɛ lɛ hu e pee ɔ. (2 Kor. 11:3) Etɛne, “mumi ɔ nɛ amlɔ nɛ ɔ, e ngɛ ní tsue ngɛ tue gbomi bimɛ ɔmɛ a mi ɔ,” haa nɛ nihi nɛ a bɔle wɔ ɔ tsɔɔ atua be fɛɛ be. (Efe. 2:2) Enɛ ɔ he ɔ, e sa nɛ waa bɔ mɔde wawɛɛ nɛ waa hwu kɛ si wa gbɔjɔmihi, nɛ wa ko ha nɛ Abosiami kɛ je nɛ ɔ nɛ ha nɛ wa gbo Yehowa nɔ tue. E sa nɛ waa bɔ mɔde nɛ waa bu Yehowa kɛ nihi nɛ e hla nɛ e ngɔ he blɔ kɛ wo a dɛ ɔ tue. w23.10 6 ¶1

Mɛni wa ma nyɛ maa kase ngɛ nyu nɛ Yesu plɛ kɛ pee wai ɔ mi? Lɔ ɔ ji he si bami. Yesu fĩɛ ngɛ nyakpɛ ní nɛ e pee ɔ he. Ngɛ anɔkuale mi ɔ, Yesu ngɔɛ níhi nɛ e pee ɔ kɛ fĩa kɔkɔɔkɔ. Mohu ɔ, be fɛɛ be nɛ e maa pee nɔ́ ko ɔ, e jeɔ he si bami mi nɛ e ngɔɔ yi jemi ɔ kɛ hɛ mi nyami ɔ kɛ haa e Tsɛ ɔ. (Yohane 5:​19, 30; 8:28) Ke wa kase Yesu nɛ wa ba wa he si, nɛ wa ngɔɛ wa he kɛ to ni kpahi a he ɔ, wa be fĩae ngɛ níhi nɛ wa peeɔ ɔ a he. E sɛ nɛ waa fĩa ngɛ níhi nɛ wa nyɛɔ peeɔ ɔ he, mohu ɔ, e sa nɛ waa ngɔ yi jemi ɔ kɛ ha Mawu nɛ wa ngɛ lɛ sɔmɔe ɔ. (Yer. 9:​23, 24) Nyɛ ha nɛ waa ngɔ yi jemi nɛ sa Yehowa a kɛ ha lɛ be fɛɛ be, ejakaa ke pi e he ɔ, wa be nyɛe maa pee nɔ́ ko kɔkɔɔkɔ. (1 Kor. 1:​26-31) Ke wa baa wa he si ɔ, wa be hɛ mi nyami hlae kɛ ha wa he ke wa pee ní kpakpahi kɛ ha nihi. Akɛnɛ wa le kaa Yehowa naa ní kpakpahi nɛ wa peeɔ nɛ e bua jɔɔ he he je ɔ, e haa nɛ wa tsui nɔɔ wa mi. (Kɛ to Mateo 6:​2-4 ɔ he; Heb. 13:16) Ngɛ anɔkuale mi ɔ, ke wa kase Yesu he si bami ɔ, e ma ha nɛ wa maa sa Yehowa hɛ mi wawɛɛ.—1 Pet. 5:6. w23.04 4 ¶9; 5 ¶11-12

Mumi klɔuklɔu ɔ wo bɔfo Paulo he wami nɛ e wo Kristofo ɔmɛ he wami kaa a susu ni kpahi a he. Mɛni blɔ nɔ nɛ ga womi nɛ ɔ ma nyɛ maa ye bua wɔ ngɛ asafo mi kpehi a sisi? E maa ye bua wɔ nɛ wa kai kaa ni kpahi hu suɔ nɛ a ha sane heto kaa wɔ nɔuu. Mo susu he nɛ o hyɛ. Ngɔɔ lɛ kaa o kɛ o huɛmɛ ngɛ ní sɛɛe, anɛ o maa suɔ nɛ o tu munyu fuu konɛ mɛɛ a ko ná he blɔ kɛ tu munyu lo? E ngɛ heii kaa o be jã pee! O maa suɔ nɛ mɛ hu a ngɔ a he kɛ wo ní sɛɛmi ɔ mi. Jã nɔuu kɛ̃ nɛ e ji ngɛ wa kpe ɔmɛ hu a blɔ fa mi. Wa suɔ nɛ wa ha wa nyɛmimɛ ɔmɛ he blɔ nɛ mɛ hu a ha sanehi fuu a heto. Ngɛ anɔkuale mi ɔ, blɔ nɛ hi pe kulaa nɛ wa ma nyɛ maa gu nɔ kɛ wo wa nyɛmimɛ ɔmɛ he wami ji kaa wa ma ha mɛ he blɔ nɛ a ha sane heto ngɛ asafo mi kpehi a sisi. (1 Kor. 10:24) Enɛ ɔ he ɔ, nyɛ ha nɛ wa hetohi nɛ a pee kpiti bɔ nɛ pee nɛ ni kpahi nɛ a ná he blɔ kɛ tu munyu. Ke o ha nɛ o heto ɔmɛ pee kpiti po ɔ, koo bɔ mɔde kaa o maa tu otihi fuu a he munyu. Ke o tu otihi tsuo nɛ ngɛ kuku ɔ mi ɔ he munyu ɔ, ni kpahi be nɔ́ ko nae nɛ a ma de. w23.04 22-23 ¶11-13

E sa nɛ wa kai kaa e he hia wawɛɛ nɛ waa ya nɔ nɛ waa ye bua ni kpahi, titli ɔ, kɛ gu fiɛɛmi ní tsumi ɔ nɔ. Ke wa ngɛ fiɛɛmi ní tsumi ɔ tsue ɔ, e sɛ nɛ waa pee kpɛii. E slo hehi nɛ nihi nɛ wa fiɛɛ kɛ haa mɛ ɔ je, a kusumihi, kɛ níhi nɛ a le ngɛ Mawu he. Bɔfo Paulo ji nɔ ko nɛ e pee we kpɛii, nɛ wa ma nyɛ maa kase e nɔ hyɛmi nɔ́ ɔ. Yesu hla Paulo kaa e sɔmɔ kaa “bɔfo kɛ ha je ma amɛ.” (Rom. 11:13) Enɛ ɔ he ɔ, Paulo fiɛɛ kɛ ha Yuda bi, Hela bi, nihi nɛ a ya sukuu kɛ ya tsitsaa, nimli guhi, kɛ nɔ yeli. Akɛnɛ Paulo suɔ nɛ e su nimli munomuno nɛ ɔmɛ a tsui he he je ɔ, e “plɛ níhi tsuo kɛ ha nimli slɔɔtoslɔɔtohi tsuo.” (1 Kor. 9:​19-22) E susu ni ɔmɛ a kusumi, he nɛ a je, kɛ níhi nɛ a heɔ yeɔ ɔ he saminya, nɛ e tsake e munyu ɔ hɛ mi konɛ e tue buli ɔmɛ a ti nɔ fɛɛ nɔ bua nɛ jɔ e sɛ gbi ɔ he. Wɔ hu wa ma nyɛ ma tsu wa fiɛɛmi ní tsumi ɔ kɛ pi si ke wa pee we kpɛii nɛ wa tsakeɔ wa he kɛ woɔ ni ɔmɛ a si fɔfɔɛhi a mi. w23.07 23 ¶11-12

Ke nɔ ko he jɔ ɔ, lɔ ɔ tsɔɔ we kaa e gbɔjɔ. Ke nɔ ko kɛ si fɔfɔɛ ko nɛ mi wa ngɛ kpee ɔ, e biɔ mɔde bɔmi loko e ma nyɛ maa pee kpoo nɛ e da nya. He jɔmi piɛɛ “mumi ɔ yiblii ɔ he.” (Gal. 5:​22, 23) A kɛ Hela munyungu nɛ a tsɔɔ sisi ke “he jɔmi” ɔ tsuɔ ní be komɛ kɛ kaleɔ okpɔngɔ nɛ e hɛ mi jɔɛ nɛ a tsɔse lɛ nɛ e he jɔ. Moo po okpɔngɔ nɛ e hɛ mi jɔɛ nɛ a tsɔse lɛ nɛ e he jɔ ɔ he foni nɛ o hyɛ. E ngɛ mi kaa a tsɔse lɛ nɛ e he jɔ mohu lɛɛ, se lɔ ɔ tsɔɔ we kaa e he wɛ. Mɛni blɔ nɔ wa ma nyɛ maa gu kɛ je he jɔmi su kpo, nɛ ngɛ jamɛ a be ɔ mi nɔuu ɔ waa pee kã? Wa be nyɛe maa pee enɛ ɔ ngɛ wa dɛ he. E sa nɛ waa sɔle kɛ bi Mawu mumi klɔuklɔu ɔ konɛ e ye bua wɔ nɛ wa je su kpakpa nɛ ɔ kpo. Níhi a si kpamihi fuu maa enɛ ɔ nɔ mi. Kaa nɔ hyɛmi nɔ́ ɔ, ke ni komɛ suɔ kaa a kɛ wa nyɛmimɛ ɔmɛ nɛ sã nya loo a wo a mi mi la a, wa nyɛmimɛ ɔmɛ jeɔ mi mi jɔmi mi kɛ haa mɛ heto. Jã nɛ a peeɔ ɔ yeɔ bua ni kpahi nɛ a náa juɛmi nɛ da ngɛ Yehowa Odasefohi a he.—2 Tim. 2:​24, 25. w23.09 15 ¶3

Ngɛ nina ko nɛ ngɛ nyakpɛ nɛ a je kɛ tsɔɔ bɔfo Yohane ɔ mi ɔ, e na nikɔtɔmahi 24 nɛ a ngɛ hiɔwe nɛ a ngɛ Yehowa jae. A je Mawu yi, nɛ a tsɔɔ kaa lɛ ji nɔ nɛ e sa kaa a “ngɔ hɛ mi nyami, bumi, kɛ he wami” kɛ ha. (Kpoj. 4:​10, 11) Ngɛ anɔkuale mi ɔ, bɔfo anɔkualetsɛmɛ ngɛ yi mi tomihi fuu a he je nɛ e sa nɛ a je Yehowa yi nɛ a wo e hɛ mi nyami. A kɛ Yehowa lɛ ngɛ hiɔwe, enɛ ɔ he ɔ, a le lɛ saminya. A naa e su kpakpa amɛ ngɛ níhi nɛ e pee ɔ a mi. Ke Yehowa pee nɔ́ ko nɛ a na a, lɔ ɔ woɔ mɛ he wami nɛ a jeɔ e yi. (Hiob 38:​4-7) E sa nɛ wɔ hu wa je Yehowa yi ke wa ngɛ sɔlee. Wa ma nyɛ maa pee jã ke wa de lɛ níhi nɛ wa suɔ ngɛ e he, kɛ níhi nɛ wa bua jɔ he wawɛɛ ngɛ e he. Ke o ngɛ Baiblo ɔ kasee ɔ, moo bɔ mɔde kaa o ma kadi Yehowa suhi nɛ o bua jɔ he wawɛɛ ɔ. (Hiob 37:23; Rom. 11:33) Mo de Yehowa bɔ nɛ o nuɔ he ngɛ e su nɛ ɔmɛ a he ha. Jehanɛ hu ɔ, wa ma nyɛ ma je Yehowa yi, ejakaa e yeɔ buaa wɔ, nɛ e yeɔ buaa wa nyɛmimɛ Kristofohi tsuo hulɔ.—1 Sam. 2:​1, 2. w23.05 3-4 ¶6-7

Kɛ je jeha 1919 ɔ mi ɔ, Babilon Ngua a ná we Mawu we bi a nɔ he wami hu. Jamɛ a jeha a mi nɛ a hla “tsɔlɔ anɔkualetsɛ kɛ ní lelɔ ɔ” nɛ. “Tsɔlɔ anɔkualetsɛ kɛ ní lelɔ ɔ” tsu ní wawɛɛ konɛ tsui kpakpatsɛmɛ nɛ a bɔni “Blɔ klɔuklɔu” ɔ nɔ nyɛɛmi. (Mat. 24:​45-47; Yes. 35:8) Ní tsumi nɛ anɔkualetsɛmɛ tsu kɛ be ngɛ blɔ nɛ ɔ nɔ ɔ ye bua nɛ nihi ba ngɛ blɔ ngua a nɔ nyɛɛe, nɛ a ngɛ Yehowa kɛ e yi mi tomi ɔmɛ a he ní kasee. (Abɛ 4:18) Jehanɛ hu ɔ, a ma nyɛ maa ba a je mi ngɛ Yehowa mlaa amɛ a nya. Yehowa hyɛ we blɔ kaa e sɔmɔli nɛ a pee tsakemihi nɛ he hia a tsuo si kake, mohu ɔ, e tsuɔ e we bi a he bɔɔbɔɔbɔɔ. Hyɛ bɔ nɛ wa bua maa jɔ ha ke wa nyɛ nɛ wa pee níhi nɛ maa sa Yehowa hɛ mi ɔ! Ke a pee blɔ ko ɔ, e he hia nɛ a tsu he ní be fɛɛ be. Kɛ je jeha 1919 ɔ, a ngɛ “Blɔ klɔuklɔu” ɔ he ní tsue kɛ yi mi tomi ɔ kaa nihi ma nyɛ maa je Babilon Ngua a mi nɛ a ba nyɛɛ nɔ. w23.05 17 ¶15; 19 ¶16

Blɔ Tsɔɔmi Ajla Toli ɔmɛ tsɔseɔ a yemi kɛ buali ɔmɛ kɛ haa a ní tsumi slɔɔtoslɔɔto ɔmɛ. Nyɛmimɛ nyumuhi nɛ a yeɔ buaa Blɔ Tsɔɔmi Ajla Toli ɔmɛ ɔ kɛ anɔkuale yemi ngɛ ní tsumi ngua nɛ a kɛ wo a dɛ ɔ he ní tsue. A pee klaalo kaa a maa ya nɔ ma tsu ní kɛ hyɛ Kristo jijɔ kpa amɛ a nɔ. Ke e piɛ bɔɔ nɛ amanehlu ngua a maa ba nyagbe nɛ a ngɔ nihi nɛ a pɔ mɛ nu nɛ a piɛ ngɛ zugba a nɔ tsuo kɛ ho hiɔwe ya a, Yehowa sɔmɔli nɛ a ngɛ zugba a nɔ ɔ maa ya nɔ ma ja lɛ ngɛ anɔkuale mi, ejakaa Yesu Kristo ji a hɛ mi nyɛɛlɔ. E ngɛ heii kaa jamɛ a be ɔ mi ɔ, Gog nɛ je Magog nɛ ji je mahi nɛ a maa pee kake ɔ ma ba tua wɔ. (Eze. 38:​18-20) Tuami nɛ ɔ maa pee be kpiti, nɛ a nine maa nyɛ si. A be nyɛe maa tsi Mawu we bi a nya nɛ a kpa lɛ jami. Yehowa ma kpɔ̃ e we bi kokooko! Bɔfo Yohane na “asafo kuu ngua ko” nɛ a piɛɛ Kristo jijɔ kpa amɛ a he ɔ ngɛ nina mi. A de Yohane kaa “asafo kuu ngua” nɛ ɔ je “amanehlu ngua a” mi. (Kpoj. 7:​9, 14) Ngɛ anɔkuale mi ɔ, Yehowa ma kpɔ̃ mɛ! w24.02 5-6 ¶13-14

Mɛni wa ma nyɛ maa pee konɛ Mawu nɛ e ha wɔ e mumi klɔuklɔu ɔ? E sa nɛ waa sɔle kɛ bi, nɛ waa kase Mawu Munyu ɔ, nɛ waa kɛ Yehowa asafo ɔ nɛ e mumi ɔ ngɛ lɛ kudɔe ɔ nɛ bɔ. Ke wa pee jã a, e maa ye bua wɔ nɛ wa ma je “mumi ɔ yiblii ɔ” kpo. (Gal. 5:​22, 23) Mawu ngɔɔ e mumi klɔuklɔu ɔ kɛ haa nihi nɛ a susuɔ ní kpakpahi a he, nɛ a je mi bami he tsɔ ɔ pɛ. Ke wa susuɔ ní yayahi a he, nɛ wa peeɔ jamɛ a ní ɔmɛ ɔ, Yehowa ma je e mumi klɔuklɔu ɔ ngɛ wa nɔ. (1 Tɛs. 4:​7, 8) Jehanɛ hu ɔ, e sɛ nɛ waa “gbe gbamihi a he guɛ” bɔ nɛ pee nɛ waa ya nɔ nɛ wa ná mumi klɔuklɔu ɔ. (1 Tɛs. 5:20) “Gbamihi” nɛ a kɛ tsu ní ngɛ hiɛ ɔ daa si kɛ ha sɛ gbihi nɛ Yehowa kɛ haa wɔ kɛ guɔ e mumi klɔuklɔu ɔ nɔ ɔ. Jehanɛ hu ɔ, e kɔɔ Yehowa ligbi ɔ he, kɛ bɔ nɛ e sa nɛ waa kɛ oya yemi nɛ tsu níhi a he ní ngɛ wa be nɛ ɔ mi ɔ he. Wa susuu we kaa Yehowa ligbi ɔ loo Harmagedon be bae ngɛ wa be nɛ ɔ mi, mohu ɔ, waa kɛ wa ní peepee tsɔɔ kaa wa ngɛ jamɛ a ligbi ɔ blɔ hyɛe nɛ wa hɛ ngɛ nɔ. Enɛ ɔ he ɔ, waa kɛ wa he woɔ “Mawu jami mi ní peepeehi a mi” nɛ wa haa nɛ wa je mi bami he tsɔɔ.—2 Pet. 3:​11, 12. w23.06 12 ¶13-14

Mɛni e sa kaa Kristofohi nɛ a pee ke a na bɔmi nami he foni loo video ngɛ a fon loo a tablɛti nɔ? E sa nɛ waa kɛ oya yemi nɛ kua. Wa ma nyɛ maa pee jã ke wa kai kaa huɛ bɔmi nɛ ngɛ waa kɛ Yehowa wa kpɛti ɔ he hia wɔ pe nɔ́ fɛɛ nɔ́. E ngɛ heii kaa fonihi nɛ a be kaa bɔmi nami he fonihi tutuutu po ma nyɛ ma tle wa we akɔnɔ si. Enɛ ɔ he ɔ, e sa nɛ wa kua foni nɛ ɔmɛ. Mɛni he je? Ejakaa wa sume nɛ waa pee nɔ́ nyafii ko po nɛ ma ha nɛ waa bɔ ajuama. (Mat. 5:​28, 29) Asafo mi nɔkɔtɔma ko nɛ e ngɛ Thailand nɛ a tsɛɛ lɛ ke David ɔ de ke: “I biɔ ye he ke: ‘Ke tsa pi bɔmi nami he foni tutuutu nɛ i ngɛ hyɛe po ɔ, ke i ya nɔ nɛ i hyɛ ɔ, anɛ e maa sa Yehowa hɛ mi lo?’ Sane nɛ ɔ nɛ i biɔ ye he ɔ, yeɔ bua mi nɛ i kɛ nile tsuɔ ní.” Ke wa sume kaa wa maa pee nɔ́ ko nɛ maa dɔ Yehowa a, lɔ ɔ yeɔ bua wɔ nɛ waa kɛ nile tsuɔ ní. “Loko o ma ná nile ɔ” ja o ye Mawu gbeye. w23.06 23 ¶12-13

“Nyɛ we ɔmɛ a mi” nɛ a kɛ tsu ní ngɛ hiɛ ɔ ma nyɛ maa tsɔɔ asafohi nɛ wa ngɛ mi ɔ. Ngɛ amanehlu ngua a mi ɔ, Yehowa wo wɔ si kaa e maa po wa he piɛ ke wa ya nɔ nɛ waa kɛ wa nyɛmimɛ ɔmɛ pee kake kɛ sɔmɔ lɛ. Enɛ ɔ he ɔ, amlɔ nɛ ɔ ji be nɛ e sa nɛ waa suɔ wa nyɛmimɛ ɔmɛ wawɛɛ, ejakaa wa yi wami hemi daa si ngɛ lɔ ɔ nɔ! Yehowa “ligbi ngua a” maa ngɔ haomihi kɛ ba adesahi a nɔ. (Zef. 1:​14, 15) Yehowa we bi hu kɛ si himi nɛ mi wa maa kpe. Se ke wa dla wa he amlɔ nɛ ɔ, e ma ha nɛ waa pee kpoo nɛ waa ye bua ni kpahi, nɛ wa ma fĩ si ngɛ haomihi tsuo nɛ waa kɛ maa kpe ɔ a mi. Jehanɛ hu ɔ, ke wa nyɛmimɛ ɔmɛ ngɛ nɔ́ nae ɔ, wa maa bɔ mɔde kaa wa maa ye bua mɛ kɛ gu mi mi sami kpo nɛ wa ma je kɛ tsɔɔ mɛ ɔ nɔ, nɛ wa ha mɛ a hiami níhi. Ke wa kase bɔ nɛ wa ma je suɔmi kpo kɛ tsɔɔ wa nyɛmimɛ ɔmɛ ha mwɔnɛ ɔ, e maa ye bua wɔ nɛ wa je suɔmi kpo kɛ tsɔɔ mɛ hwɔɔ se. Yehowa ma ha wɔ neneene wami nɛ e maa po oslaahi kɛ haomihi tsuo a se, nɛ wa be kaie hu.—Yes. 65:17. w23.07 7 ¶16-17

Mawu munyu ɔ pɔɔ nyumuhi anɔkualetsɛmɛ kalemi kaa nihi nɛ a ngɛ kã. Se pi be fɛɛ be nɛ a nyɛɔ n ɛ a peeɔ kã. Kaa nɔ hyɛmi nɔ́ ɔ, be komɛ ɔ, Matsɛ David nuɔ he kaa e ji katsɛ, nɛ ‘e he wa kaa yoku.’ Se ngɛ be kpahi a mi hu ɔ, e nuɔ he kaa e gbɔjɔ, nɛ ‘e yeɔ gbeye.’ (La 30:7) Mawu mumi ɔ ha Samson he wami wawɛɛ. Se e yɔse kaa ke Mawu yi bua lɛ kɛ e mumi ɔ, jinɛ e ‘maa hi kaa bɔ nɛ nɔmlɔ adesa fɛɛ nɔmlɔ adesa ngɛ ɔ.’ (Many. 14:​5, 6; 16:17) Ngɛ anɔkuale mi ɔ, Yehowa ji nɔ nɛ ha nɛ nyumuhi anɔkualetsɛmɛ nɛ ɔmɛ ná he wami kaa jã a nɛ. Bɔfo Paulo kplɛɛ nɔ kaa lɛ hu e hia he wami nɛ je Yehowa ngɔ. (2 Kor. 12:​9, 10) Hiɔ hao Paulo hu wawɛɛ. (Gal. 4:​13, 14) Be komɛ hu ɔ, e he wa ha lɛ kaa e maa pee nɔ́ nɛ da. (Rom. 7:​18, 19) Be komɛ a mi hu ɔ, e haoɔ ngɛ nɔ́ nɛ ma nyɛ maa ba e nɔ ɔ he. (2 Kor. 1:​8, 9) Se ngɛ enɛ ɔmɛ tsuo se ɔ, ke Paulo gbɔjɔ ɔ, e náa he wami. Ngɛ mɛni blɔ nɔ? Yehowa ha lɛ he wami nɛ e hia a, konɛ e nyɛ nɛ e da nyagbahi nɛ e kɛ kpeɔ ɔ a nya. w23.10 12 ¶1-2

Ke wa nuɔ he be komɛ kaa wa he be se nami ɔ, e sa nɛ wa kai kaa Yehowa nitsɛ lɛ gbla wɔ kɛ ba e ngɔ. (Yoh. 6:44) E naa ni kpakpahi ngɛ wa mi nɛ eko ɔ, wɔ nitsɛmɛ po wa nɛ, nɛ e le nɔ́ nɛ ngɛ wa tsui mi. (2 Kron. 6:30) Enɛ ɔ he ɔ, ke Yehowa de ke wa he jua wa kɛ ha lɛ ɔ, e sa nɛ wa he ye. (1 Yoh. 3:​19, 20) Loko wa ma ba kase anɔkuale ɔ, wa kpɛti ni komɛ pee ní komɛ nɛ eko ɔ, e haa nɛ wa he nile buɔ wɔ fɔ loloolo. (1 Pet. 4:3) Ngɛ anɔkuale mi ɔ, e he waa kɛ haa Kristofohi anɔkualetsɛmɛ po kaa a maa hwu kɛ si a gbɔjɔmihi. Anɛ mo hu o he nile buɔ mo fɔ lo? Ke jã a, lɛɛ o bua nɛ jɔ ejakaa Yehowa sɔmɔli anɔkualetsɛmɛ komɛ po nu he jã be komɛ. Kaa nɔ hyɛmi nɔ́ ɔ, ke bɔfo Paulo susu e gbɔjɔmi ɔmɛ a he ɔ, e haa nɛ e nuɔ he kaa e ní ngɛ mɔbɔ. (Rom. 7:24) Ngɛ anɔkuale mi ɔ, Paulo pia e he ngɛ e yayami ɔmɛ a he, nɛ e ha nɛ a baptisi lɛ. Se kɛ̃ ɔ, e tsɔɔ kaa lɛ ji “bɔfo ɔmɛ a kpɛti nɔ nyafii pe kulaa,” nɛ e ji yayami peelɔ “kpanaku” hulɔ.—1 Kor. 15:9; 1 Tim. 1:15. w24.03 27 ¶5-6

Nɔ́ kake nɛ wa ma nyɛ maa kase kɛ je yi mi kpɔ nɛ dɛ nɛ Matsɛ Yoash mwɔ ɔ mi ji kaa e sa nɛ waa kɛ nihi nɛ a suɔ Yehowa, nɛ a suɔ kaa a ma ha nɛ e bua nɛ jɔ ɔ nɛ bɔ. Huɛmɛ nɛ ɔmɛ maa ye bua wɔ nɛ́ waa pee ní kpakpahi. Tsa pi wa juami bimɛ pɛ nɛ e sa nɛ waa kɛ mɛ nɛ bɔ, mohu ɔ, e sa nɛ waa kɛ nihi nɛ a wa pe wɔ loo wa wa pe mɛ ɔ hu nɛ bɔ. Mo kai kaa Yehoyada wa pe e huɛ Yoash kulaa. Ke o suɔ nɛ o le ke ji nihi nɛ o kɛ bɔɔ ɔ ji huɛmɛ kpakpahi loo huɛmɛ yayahi ɔ, mo bi o he ke: ‘Anɛ huɛmɛ nɛ ɔmɛ maa ye bua mi konɛ hemi kɛ yemi nɛ i ngɛ ngɛ Yehowa mi ɔ mi nɛ wa lo? Anɛ a woɔ mi he wami kaa ma ye Mawu mlaa amɛ a nɔ lo? Anɛ a tuɔ Yehowa kɛ níhi nɛ a kase ngɛ Baiblo ɔ mi ɔ a he munyu lo? Anɛ a deɔ mi níhi nɛ i suɔ nɛ ma nu pɛ lo, aloo ke i pee nɔ́ ko nɛ dɛ ɔ, a nyɛɔ nɛ a deɔ mi?’ (Abɛ 27:​5, 6, 17) Ngɛ anɔkuale mi ɔ, ke o huɛmɛ sume Yehowa a, lɛɛ e sa nɛ o kɛ mɛ nɛ kpa bɔmi. Se ke o ngɛ huɛmɛ nɛ a suɔ Yehowa a, lɛɛ yaa nɔ nɛ o kɛ mɛ nɛ bɔ, ejakaa a maa ye bua mo!—Abɛ 13:20. w23.09 9-10 ¶6-7

Alfa ji biɛ nɛ a kɛ tsɛɔ kekleekle ningma okadi ngɛ Hela gbi mi, nɛ omega hu ji biɛ nɛ a kɛ tsɛɔ nyagbe ningma okadi ngɛ Hela gbi mi. Enɛ ɔ he ɔ, ke Yehowa kale e he kaa lɛ ji “Alfa a kɛ Omega a,” nɔ́ nɛ e ngɛ tsɔɔe ji kaa, ke e je nɔ́ ko peemi sisi ɔ, e maa gbe nya pɛpɛɛpɛ. Benɛ Yehowa bɔ Adam kɛ Hawa se ɔ, e de mɛ ke: “Nyɛ fɔ nɛ nyɛ he nɛ hiɛ, nɛ nyɛ hyi zugba a nɔ tɔ, nɛ nyɛɛ hyɛ zugba a nɔ.” (1 Mose 1:28) Benɛ Yehowa tu munyu nɛ ɔ, ngɛ blɔ ko nɔ ɔ, e ngɛ kaa nɔ́ nɛ e de ke “Alfa.” Yehowa yi mi tomi ji kaa e maa su be ko nɛ Adam kɛ Hawa a sisi bimɛ nɛ a ye mluku ɔ ma hyi zugba a nɔ tɔ, nɛ a ma dla zugba a tsuo nɔ kɛ pee paradeiso. Ke yi mi tomi nɛ ɔ ba mi ɔ, ngɛ blɔ ko nɔ ɔ, Yehowa ma de ke “Omega.” Benɛ Yehowa bɔ “hiɔwe kɛ zugba a kɛ nɔ́ fɛɛ nɔ́” ta a, e de nɔ́ ko nɛ tsɔɔ kaa e yi mi tomihi tsuo maa ba mi kokooko. Enɛ ɔ tsɔɔ kaa Yehowa ma tsu e yi mi tomi nɛ e ngɛ kɛ ha adesahi kɛ zugba a he ní kokooko. E ma tsu he ní kɛ pi si ngɛ ligbi kpaagone ɔ nyagbe.—1 Mose 2:​1-3. w23.11 5 ¶13-14

Blɔ nɛ Israelbi ɔmɛ maa hia kɛ je Babilon kɛ ya Israel ɔ ma nyɛ ma he mɛ nyɔhiɔ eywiɛ. Enɛ ɔ tsɔɔ kaa a be lɛ nae gbɔjɔɔ. Se Yehowa wo si kaa e ma je nyagbahi tsuo nɛ ma nyɛ maa tsi mɛ blɔ ɔ kɛ je blɔ ɔ nɔ. Yudabi nɛ a yeɔ anɔkuale ɔ le kaa ke a kpale kɛ ho Israel ya a, a ma ná he se wawɛɛ pe nɔ́ kpa ko nɛ a kɛ maa sã afɔle. Jɔɔmi nɛ pe kulaa nɛ a ma ná ji kaa a maa to anɔkuale jami sisi ekohu. Sɔlemi we kake po be kɛ ha Yehowa ngɛ Babilon ma a mi. Afɔle sami la tɛ ko be nɛ Israelbi ɔmɛ kɛ maa sã afɔle kaa bɔ nɛ e biɔ nɛ a pee ngɛ Mose Mlaa a nya a, nɛ osɔfo ko hu be nɛ e maa sã afɔle nɛ ɔmɛ kɛ ha mɛ. Jehanɛ hu ɔ, nihi nɛ a jaa lakpa mawuhi nɛ a kɛ Yehowa mlaa amɛ tsu we ní ɔ hiɛ pe nihi nɛ a jaa Yehowa nɛ a kɛ e mlaa a tsuɔ ní ɔ. Enɛ ɔ he ɔ, Yudabi akpehi abɔ nɛ a suɔ Yehowa a ngɛ blɔ hyɛe kaa a maa kpale kɛ ho a ma a mi ya konɛ a ya to anɔkuale jami sisi ekohu. w23.05 14-15 ¶3-4

Wa hia Mawu mumi klɔuklɔu ɔ yemi kɛ buami bɔ nɛ pee nɛ waa ya nɔ nɛ waa ba wa je mi “kaa la bimɛ.” Mɛni he je? Ejakaa e be gbɔjɔɔ kaa wa ma ha nɛ wa he nɛ tsɔ ngɛ je nɛ puɛ nɛ ɔ mi. (1 Tɛs. 4:​3-5, 7, 8) Mumi klɔuklɔu ɔ ma nyɛ maa ye bua wɔ nɛ wa kua susumi nɛ je ɔ hɛɛ ɔ, nɛ je mi nile kɛ susumi nɛ dɛ nɛ nihi hɛɛ kaa Yehowa blɔ ɔmɛ dɛ ɔ hu piɛɛ he. Jehanɛ hu ɔ, mumi klɔuklɔu ɔ maa ye bua wɔ konɛ waa wo yiblii nɛ ji “kpakpa peemi slɔɔtohi tsuo kɛ dami” ní peepee. (Efe. 5:9) Blɔ kake nɛ wa ma nyɛ maa gu nɔ kɛ ná mumi klɔuklɔu ɔ ji kaa wa maa sɔle kɛ bi. Yesu tsɔɔ kaa Yehowa “maa ngɔ mumi klɔuklɔu ɔ kɛ ha nihi nɛ a biɔ lɛ ɔ.” (Luka 11:13) Jehanɛ hu ɔ, ke waa kɛ wa nyɛmimɛ ɔmɛ pee kake kɛ je Yehowa yi ngɛ asafo mi kpehi a sisi ɔ, wa náa mumi klɔuklɔu ɔ. (Efe. 5:​19, 20) Mawu mumi klɔuklɔu ɔ maa ye bua wɔ konɛ waa pee níhi nɛ maa sa Mawu hɛ mi. w24.03 23-24 ¶13-15

Anɛ o hia tsui si tomi fuu lo? Ke jã a lɛɛ moo sɔle kɛ bi. Tsui si tomi piɛɛ mumi ɔ yiblii ɔ he. (Gal. 5:​22, 23) Enɛ ɔ he ɔ, wa ma nyɛ maa sɔle kɛ bi Yehowa konɛ e ngɔ e mumi klɔuklɔu ɔ kɛ ye bua wɔ nɛ wa nyɛ nɛ waa wo mumi ɔ yiblii ɔ. Ke waa kɛ si fɔfɔɛ ko kpe nɛ e he wa ha wɔ kaa wa maa to wa tsui si ɔ, e sa nɛ ‘waa ya nɔ nɛ wa bi’ Yehowa konɛ e ye bua wɔ kɛ e mumi klɔuklɔu ɔ nɛ wa nyɛ nɛ waa pee jã. (Luka 11: 13) Jehanɛ hu ɔ, wa ma nyɛ ma de Yehowa nɛ e ye bua wɔ nɛ waa le e susumi ngɛ níhi a he. Ke wa sɔle nɛ wa de Yehowa konɛ e ye bua wɔ nɛ waa to wa tsui si ɔ, e he hia nɛ waa pee nɔ́ fɛɛ nɔ́ nɛ wa ma nyɛ konɛ waa to wa tsui si daa ligbi. Ke wa yaa nɔ nɛ wa peeɔ jã a, Yehowa maa ye bua wɔ nɛ waa to wa tsui si wawɛɛ, ke be ko nɛ be ɔ, wa nyɛ we nɛ waa pee jã po. Jehanɛ hu ɔ, e maa ye bua mo konɛ o pue o yi mi tɛ ngɛ Baiblo mi nɔ hyɛmi níhi a he. Baiblo ɔ tu nihi fuu nɛ a to a tsui si ɔ a he munyu. Ke wa pue wa yi mi tɛ ngɛ Baiblo mi nɔ hyɛmi ní nɛ ɔmɛ a he ɔ, e maa ye bua wɔ konɛ waa na blɔhi a nɔ nɛ wa maa gu kɛ to wa tsui si. w23.08 22 ¶10-11

Yesu ha nɛ bɔfo Petro ná nɔ mi mami kaa Yehowa ma ha lɛ e hiami níhi tsuo. Benɛ a tle Yesu si ɔ, e gu nyakpɛ blɔ nɔ kɛ ha nɛ Petro kɛ bɔfo kpa amɛ gbe lo babauu ekohu. (Yoh. 21:​4-6) Nyakpɛ nɔ́ nɛ ɔ ha nɛ Petro ná nɔ mi mami kaa e he be wae ha Yehowa kaa e ma ha lɛ e hiami níhi. Eko ɔ, Petro kai munyu nɛ Yesu tu kaa ke nɔ ko ‘hla Matsɛ Yemi ɔ kekle ɔ,’ Yehowa ma ha nɔ ɔ e hiami níhi ɔ. (Mat. 6:33) Ní nɛ ɔmɛ tsuo ye bua Petro nɛ e ngɔ fiɛɛmi ní tsumi ɔ kɛ ye kekle blɔ he ngɛ e si himi mi, mohu pe wo hɛmi ní tsumi ɔ. Ngɛ jeha 33 ɔ mi ngɛ Pentekoste ligbi ɔ nɔ ɔ, Petro kɛ kã fiɛɛ sane kpakpa a, nɛ lɔ ɔ ha nɛ nihi akpehi abɔ ba kplɛɛ sane kpakpa a nɔ. (Níts. 2:​14, 37-41) Lɔ ɔ se ɔ, e ye bua Samaria bi kɛ Ma Je Li tsuo nɛ a ba kase Kristo he ní nɛ a ba pee Kristofohi. (Níts. 8:​14-17; 10:​44-48) Ngɛ anɔkuale mi ɔ, Yehowa kɛ Petro tsu ní ngɛ blɔ klɛdɛɛ nɔ, konɛ e kɛ ye bua nimli slɔɔtohi tsuo nɛ a ba pee Kristofohi. w23.09 20 ¶1; 23 ¶11

Maa pee jeha enyɔ se benɛ Babilonbi ɔmɛ kpata Yerusalem ma a hɛ mi ɔ, Matsɛ Nebukadnezar nla nlami ko nɛ ngɛ gbeye nɛ kɔɔ amaga ngua ko he. Lɔ ɔ he ɔ, e de ke e ma ha nɛ a gbe e ní leli ɔmɛ tsuo nɛ Daniel hu piɛɛ he ɔ, ke a nyɛ we nyɛ we nɛ a de lɛ nlami ɔ nɛ a tsɔɔ lɛ sisi hulɔ. (Dan. 2:​3-5) Enɛ ɔ he ɔ, e sa nɛ Daniel kɛ oya yemi nɛ pee si fɔfɔɛ ɔ he nɔ́ ko, ke pi jã a, nihi babauu ma gbo. Daniel “ho ya kpa matsɛ ɔ pɛɛ nɛ e de lɛ ke e ha lɛ be bɔɔ, konɛ e ba tsɔɔ lɛ nlami nɛ e nla a sisi.” (Dan. 2:16) Nɔ́ nɛ Daniel pee nɛ ɔ tsɔɔ kaa e ngɛ kã nɛ e ngɛ hemi kɛ yemi. Mɛni he je? Ejakaa Baiblo ɔ de we kaa Daniel tsɔɔ nlami ko sisi hyɛ. E de e huɛmɛ ɔmɛ kaa, “a fa kue ha Mawu nɛ ngɛ hiɔwe, konɛ e na mɛ mɔbɔ nɛ e je laami sane nɛ ɔ kpo ngɔ tsɔɔ mɛ.” (Dan. 2:18) Ngɛ anɔkuale mi ɔ, Yehowa ha jamɛ a sɔlemi ɔ heto. Ngɛ Mawu yemi kɛ buami nya a, Daniel nyɛ nɛ e tsɔɔ Nebukadnezar nlami ɔ sisi. Enɛ ɔ he ɔ, a gbi Daniel kɛ e huɛmɛ ɔmɛ. w23.08 3 ¶4

Mo susu se nami nɛ ngɛ tsui si tomi he ɔ he. Ke wa toɔ wa tsui si ɔ, lɔ ɔ haa nɛ wa bua jɔɔ nɛ wa peeɔ kpoo. Jehanɛ hu ɔ, ke wa toɔ wa tsui si ɔ, wa ma ná nɔmlɔ tso mi he wami kpakpa nɛ wa ma ná tue mi jɔmi hulɔ. Ke wa toɔ wa tsui si kɛ haa ni kpahi ɔ, waa kɛ mɛ maa hi si saminya, nɛ kake peemi hu maa hi asafo ɔ mi. Ke nɔ ko wo wa mi mi la po, se wa mi mi fu we mla a, lɔ ɔ maa ye bua konɛ si fɔfɔɛ ɔ nɛ ko puɛ kulaa. (La 37:​8, sisi ningma; Abɛ 14:29) Nɔ́ nɛ pe kulaa a, lɔ ɔ tsɔɔ kaa wa ngɛ wa hiɔwe Tsɛ ɔ kasee, nɛ e maa ye bua wɔ nɛ waa hɛ kɛ su e he wawɛɛ. Tsui si tomi ji su ko nɛ he hia nɛ wɔ tsuo wa náa he se. E ngɛ mi kaa pi be fɛɛ be nɛ e ngɛ gbɔjɔɔ kaa wa maa to wa tsui si mohu lɛɛ, se Yehowa ma nyɛ maa ye bua wɔ nɛ waa ya nɔ nɛ wa je su nɛ ɔ kpo. Be mi nɛ waa kɛ tsui si tomi ngɛ je ehe ɔ mlɛe ɔ, wa ma nyɛ ma ná nɔ mi mami kaa “Yehowa hɛngmɛ hyɛɛ nihi nɛ yeɔ lɛ gbeye ɔ, nihi nɛ hyɛɛ e suɔmi nɛ se pui ɔ blɔ ɔ.” (La 33:18) Enɛ ɔ he ɔ, nyɛ ha nɛ wɔ tsuo waa fia wa pɛɛ si kaa wa maa ya nɔ maa to wa tsui si. w23.08 22 ¶7; 25 ¶16-17

Yakobo tsɔɔ heii kaa nyumu ko ma de ke e ngɛ hemi kɛ yemi, se anɛ e ní peepee tsɔɔ jã lo? (Yak. 2:​1-5, 9) Jehanɛ hu ɔ, Yakobo tu nɔ ko nɛ e na e nyɛmi ko nɛ e ‘be heha nɔ́ loo niye ní’ se e yi bua lɛ ɔ he munyu. Ke jamɛ a nɔ ɔ de kaa e ngɛ hemi kɛ yemi po ɔ, e ní peepee tsɔɔ we jã. (Yak. 2:​14-16) Yakobo tu Rahab he munyu kaa e ji nɔ ko nɛ e ngɔ e ní peepee kɛ tsɔɔ kaa e ngɛ hemi kɛ yemi. E nu nyakpɛ níhi nɛ Yehowa pee, kɛ bɔ nɛ e ngɛ Israelbi ɔmɛ ye buae ha a he. (Yosh. 2:​9-11) Enɛ ɔ he ɔ, e ngɔ e ní peepee kɛ tsɔɔ kaa e ngɛ hemi kɛ yemi. E laa Israelbi nɛ a ba a ma a mi ɔ nɔ, konɛ a wami nɛ ko ya je oslaa mi. Enɛ ɔ he ɔ, Yehowa bu Rahab nɛ tsa pi Israelno ji lɛ ɔ dalɔ kaa bɔ nɛ e bu Abraham dalɔ ɔ. Rahab nɔ hyɛmi nɔ́ ɔ ha nɛ wa na kaa e he hia nɛ waa ngɔ wa ní peepee kɛ tsɔɔ kaa wa ngɛ hemi kɛ yemi. w23.12 5-6 ¶12-13

Tsa pi Baiblo ɔ mi sisije tsɔɔmi ɔmɛ pɛ nɛ e sa kaa waa kase. E sa nɛ waa kase “Mawu níhi nɛ a mi kuɔ ɔ tete po.” Mawu mumi ɔ ma nyɛ maa ye bua wɔ nɛ waa pee jã. (1 Kor. 2:​9, 10) O ma nyɛ ma kɛ pee oti kaa o ma hla níhi a mi saminya bɔ nɛ pee nɛ o nyɛ nɛ o hɛ kɛ su Yehowa he wawɛɛ. Kaa nɔ hyɛmi nɔ́ ɔ, o ma nyɛ ma hla níhi a mi kɛ kɔ bɔ nɛ Yehowa je suɔmi kpo kɛ tsɔɔ e sɔmɔli nɛ a hi si blema ha a he, kɛ bɔ nɛ lɔ ɔ maa nɔ mi kaa Yehowa suɔ mo. Jehanɛ hu ɔ, o ma nyɛ ma hla níhi a mi kɛ kɔ bɔ nɛ Yehowa tsɔɔ kaa Israelbi ɔmɛ nɛ a ja lɛ ha a he, nɛ o kɛ to bɔ nɛ e suɔ kaa Kristofohi nɛ a ja lɛ ha mwɔnɛ ɔ he. Benɛ Yesu ngɛ zugba a nɔ ɔ, gbamihi fuu ba mi ngɛ e blɔ fa mi nɛ kɔɔ e si himi kɛ e sɔmɔmi ní tsumi ɔ he. O ma nyɛ maa kase bɔ nɛ gbami nɛ ɔmɛ ba mi ha a he ní fitsofitso. Ke o kase munyu nɛ ɔmɛ ekomɛ a he ní ngɛ Watch Tower Publications Index loo Research Guide for Jehovah’s Witnesses ɔ mi ɔ, o bua maa jɔ wawɛɛ. Ke o kase níhi nɛ a mi kuɔ nɛ a ngɛ Baiblo ɔ mi ɔ, e maa wo o hemi kɛ yemi ɔ mi he wami wawɛɛ nɛ “o ma ná Mawu he nile.”—Abɛ 2:​4, 5 w23.10 18-19 ¶3-5

Munyu nɛ ji “wawɛɛ nitsɛ” nɛ bɔfo Petro kɛ tsu ní ɔ tsɔɔ kaa “e sa nɛ waa bɔ mɔde wawɛɛ.” Kuku 8 nyagbe fã a tsɔɔ nɔ́ nɛ wa maa pee ke wa suɔ nihi wawɛɛ nitsɛ. Suɔmi ma ha nɛ waa ha wa nyɛmimɛ ɔmɛ a gbɔjɔmihi a nɔ. Kaa nɔ hyɛmi nɔ́ ɔ, moo po okplɔɔ ko nɛ níhi ngmla nɔ nɛ e nɔ pee basabasa a he foni nɛ o hyɛ. Ke e ba jã a, wa ma nyɛ maa ngɔ bo kɛ ha okplɔɔ ɔ nɔ konɛ e nɔ tsuo nɛ laa. Jã kɛ̃ nɛ ke wa suɔ wa nyɛmimɛ ɔmɛ wawɛɛ nitsɛ ɔ, pi yayami kake loo enyɔ nɛ a pee kɛ si wɔ ɔ pɛ nɛ wa maa ngmɛɛ he, mohu ɔ, wa maa ha a “yayami babauu nɔ.” E sa nɛ suɔmi nɛ wa ngɛ ha wa nyɛmimɛ ɔmɛ ɔ nɛ wo wɔ he wami nɛ waa ngɔ a tɔmihi kɛ ke mɛ, ke e he wa ha wɔ kaa wa maa pee jã po. (Kol. 3:13) Ke waa kɛ nihi a tɔmihi keɔ mɛ ɔ, lɔ ɔ tsɔɔ kaa wa suɔ mɛ wawɛɛ, nɛ wa suɔ nɛ Yehowa bua nɛ jɔ wa he. w23.11 11-12 ¶13-15

Benɛ Matsɛ Yosia ye jeha 26, e ha nɛ a bɔni Yehowa we ɔ dlami. Benɛ a ngɛ sɔlemi we ɔ dlae ɔ, a na ‘Yehowa Mlaa womi ɔ nɛ Mawu ngɔ kɛ ha Mose ɔ.’ Benɛ matsɛ ɔ nu munyuhi nɛ ngɛ mlaa womi ɔ mi ɔ, oya nɔuu nɛ e pee tsakemihi konɛ e ngɔ níhi nɛ a ngma ngɛ mi ɔ kɛ tsu ní. (2 Kron. 34:​14, 19-21) Anɛ o maa suɔ kaa o maa kane Baiblo ɔ be fɛɛ be lo? Ke o ngɛ mɔde bɔe nɛ o ngɛ jã pee momo po ɔ, anɛ o bua jɔɔ e kanemi he lo? Ke o ngɛ Baiblo ɔ kanee ɔ, anɛ o kadiɔ ngmami komɛ nɛ ma nyɛ maa ye bua mo nitsɛ lo? Benɛ Yosia ye maa pee jeha 39 ɔ, e tɔ̃ tɔmi ko nɛ ha nɛ e wami je e dɛ. E ngɔ e hɛ kɛ fɔ lɛ nitsɛ e nɔ mohu pe nɛ e kɛ e hɛ maa fɔ Yehowa nɔ. (2 Kron. 35:​20-25) Wa ma nyɛ maa kase nɔ́ ko ngɛ sane nɛ ɔ mi. Ke wa wa ngɛ jeha mi aloo wa ngɛ Baiblo ɔ kasee jeha babauu ji nɛ ɔ po ɔ, e sa nɛ waa ya nɔ nɛ wa hla Yehowa se blɔ. Nɔ́ nɛ maa ye bua wɔ nɛ waa pee jã ji kaa wa maa sɔle be fɛɛ be kɛ bi Yehowa blɔ tsɔɔmi, waa kase e Munyu ɔ, nɛ waa kɛ ga womi nɛ Kristofohi nɛ a wa ngɛ mumi mi ɔ ma ha wɔ ɔ nɛ tsu ní. Ke wa pee jã a, e maa ye bua wɔ konɛ wa ko tɔ̃ tɔmihi nɛ hɛdɔ ngɛ he, nɛ wa bua maa jɔ hulɔ.—Yak. 1:25. w23.09 12 ¶15-16

Baiblo ɔ tu yihi fuu nɛ a sɔmɔ Yehowa nɛ a suɔ lɛ wawɛɛ ɔ a he munyu. Yi nɛ ɔmɛ ‘pee a ní bɔ nɛ sa, nɛ a ye anɔkuale ngɛ níhi tsuo a mi.’ (1 Tim. 3:11) Yihewi nɛ a ngɛ mwɔnɛ ɔ ma nyɛ maa kase babauu kɛ je yihi nɛ a nane pi si nɛ a ngɛ a we asafo ɔmɛ a mi ɔ a ngɔ hulɔ. Yihewi, anɛ nyɛ le nyɛmimɛ yi komɛ nɛ a peeɔ nɔ hyɛmi nɔ́ kpakpa nɛ nyɛ ma nyɛ maa kase nɔ́ ko kɛ je a ngɔ lo? Ke jã a, nyɛ kadi su kpakpahi nɛ a ngɛ ɔ, nɛ nyɛ susu bɔ nɛ nyɛ ma plɛ kɛ je jamɛ a su ɔmɛ kpo ha a he. He si bami ji su ko nɛ he hia wawɛɛ nɛ maa ye bua Kristofono konɛ e nane nɛ pi si. Ke nyɛmiyo ko baa e he si ɔ, lɔ ɔ ma ha nɛ huɛ bɔmi kpakpa maa hi e kɛ Yehowa kɛ ni kpahi a kpɛti. Kaa nɔ hyɛmi nɔ́ ɔ, nyɛmiyo nɛ e suɔ Yehowa wawɛɛ ɔ ngɔɔ ga womi nɛ ngɛ 1 Korinto Bi 11:3 ɔ kɛ tsuɔ ní. Ngɛ lejɛ ɔ, Yehowa tsɔɔ nɔ nɛ e sa kaa e nyɛɛ asafo ɔ hɛ mi, kɛ nɔ nɛ e sa kaa e nyɛɛ weku ɔ hɛ mi. w23.12 18-19 ¶3-5

Yehowa hyɛɛ blɔ kaa nyumu nɛ́ e suɔ e yo, nɛ e ha lɛ e he lo nya hiami níhi, nɛ e kɛ lɛ nɛ pee e huɛ, nɛ e ye bua lɛ konɛ huɛ bɔmi nɛ ngɛ e kɛ Yehowa a kpɛti ɔ mi nɛ wa. Ke o susuɔ níhi a he saminya, nɛ o buɔ yihi, nɛ o pee o he nɔ nɛ a ma nyɛ maa ngɔ hɛ kɛ fɔ e nɔ ɔ, e ma ha nɛ o pee huno kpakpa. Ke o sɛ gba si himi mi se ɔ, o ma nyɛ ma ba pee bitsɛ. Mɛni maa ye bua mo konɛ o pee tsɛ kpakpa kaa bɔ nɛ Yehowa ji ɔ? (Efe. 6:4) Yehowa de e bi Yesu ke e suɔ lɛ nɛ e bua jɔ e he. (Mat. 3:17) Ke o ba pee bitsɛ ɔ, moo bɔ mɔde kaa o ma de o bimɛ ɔmɛ be fɛɛ be kaa o suɔ mɛ. Moo pɔ a yi jemi ngɛ ní kpakpahi nɛ a peeɔ ɔ he. Bitsɛmɛ nɛ a kaseɔ Yehowa nɔ hyɛmi nɔ́ ɔ, yeɔ buaa a bimɛ ɔmɛ nɛ a ba peeɔ Kristofohi nɛ a nane pi si. Ke o ngɛ hlae nɛ o pee bitsɛ kpakpa a, moo je sisi amlɔ nɛ ɔ nɛ o je suɔmi kpo kɛ tsɔɔ nihi nɛ a ngɛ a asafo ɔ kɛ o weku ɔ mi ɔ, nɛ o hyɛ a nɔ saminya. Mo de mɛ kaa o suɔ mɛ, nɛ o ha nɛ a na kaa a he jua wa ha mo wawɛɛ.—Yoh. 15:9. w23.12 28-29 ¶17-18

E ngɛ mi kaa waa kɛ anɔkuale yemi sɔmɔɔ Yehowa mohu lɛɛ, se níhi a mi waa ha wɔ, nɛ wa nuɔ hiɔ kaa ni kpahi nɔuu. Jehanɛ hu ɔ, eko ɔ, Mawu he nyɛli maa wa wɔ yi mi aloo a maa te si kɛ wo wɔ. E ngɛ mi kaa Yehowa tsi we nyagba nɛ ɔmɛ a nya mohu lɛɛ, se e wo si kaa e maa ye bua wɔ. (Yes. 41:10) Yehowa maa ye bua wɔ konɛ waa ya nɔ nɛ wa ná bua jɔmi, waa mwɔ yi mi kpɔhi nɛ da, nɛ waa ya nɔ nɛ waa ye lɛ anɔkuale ngɛ haomi behi a mi. Yehowa wo si kaa e ma ha wɔ nɔ́ nɛ Baiblo ɔ tsɛɔ ke “Mawu tue mi jɔmi ɔ.” (Filip. 4:​6, 7) Tue mi jɔmi nɛ ɔ tsɔɔ bɔ nɛ wa peeɔ kpoo ha akɛnɛ huɛ bɔmi kpakpa ngɛ waa kɛ Yehowa wa kpɛti ɔ he je. Tue mi jɔmi nɛ ɔ “pã níhi a sisi numi tsuo.” Enɛ ɔ tsɔɔ kaa tue mi jɔmi nɛ ɔ se be kulaa. Kaa nɔ hyɛmi nɔ́ ɔ, anɛ o je o tsui mi kɛ sɔle ha Yehowa hyɛ, nɛ lɔ ɔ se ɔ, o nu he kaa o tue mi jɔ mo wawɛɛ lo? Jamɛ a he numi ɔ ji “Mawu tue mi jɔmi ɔ” nɛ. w24.01 20 ¶2; 21 ¶4

Nihi tsuo nɛ a suɔ Yehowa a suɔ kaa a ma je e biɛ ɔ yi kɛ a tsui tsuo. Matsɛ David le kaa ke wa je Yehowa biɛ ɔ yi ɔ, e tsɔɔ kaa wa ngɛ Yehowa yi jee. Ke wa nu Yehowa biɛ ɔ, e haa nɛ wa susuɔ bɔ nɛ e ngɛ ha tutuutu, e su kpakpa amɛ, kɛ nyakpɛ níhi nɛ e pee ɔ a he. David suɔ kaa e fã e Tsɛ ɔ biɛ klɔuklɔu ɔ he nɛ e je e yi, nɛ e suɔ nɛ e pee jã kɛ e “tsui tsuo.” Jã nɔuu kɛ̃ nɛ Levi bi ɔmɛ nyɛɛ hɛ mi nɛ a kɛ Israel bi kpa amɛ je Yehowa yi. Akɛnɛ a baa a he si he je ɔ, a yɔse po kaa a be nyɛe ma je Yehowa biɛ klɔuklɔu ɔ yi bɔ nɛ sa lɛ. (Neh. 9:5) Ngɛ anɔkuale mi ɔ, akɛnɛ a je a tsui mi kɛ je Yehowa biɛ ɔ yi he je ɔ, lɔ ɔ ha nɛ e bua jɔ wawɛɛ. w24.02 9 ¶6

Ke o kɛ oti ko ma o hɛ mi, se pee se ɔ, o ba na kaa o be nyɛe maa o su he ɔ, Yehowa be mo nae kaa o yi manye. (2 Kor. 8:12) O hɛ nɛ hi níhi nɛ o nyɛ tsu momo ɔ a nɔ. Baiblo ɔ de ke, “Mawu ɔ, pi nɔ nɛ e dɛ ji lɛ nɛ e hɛ maa je nyɛ ní tsumi” ɔ nɔ. (Heb. 6:10) Enɛ ɔ he ɔ, e sɛ nɛ wɔ hu wa hɛ nɛ je níhi nɛ wa nyɛ tsu momo ɔ nɔ. Mo susu níhi nɛ o nyɛ pee ɔ he. Ní nɛ ɔmɛ ekomɛ ji huɛ bɔmi kpakpa nɛ ngɛ o kɛ Yehowa nyɛ kpɛti, e he ní nɛ o kɛ ni kpahi sɛɛɔ, kɛ baptisimi nɛ o ha nɛ a baptisi mo ɔ. Kaa bɔ nɛ o ya o hɛ mi nɛ o su oti nɛ ɔmɛ a he ɔ, jã nɔuu kɛ̃ nɛ o ma nyɛ maa ya o hɛ mi nɛ o su otihi nɛ o kɛ ma o hɛ mi amlɔ nɛ ɔ hu he. Yehowa maa ye bua mo konɛ o nyɛ nɛ o su oti nɛ o kɛ ma o hɛ mi ɔ he. Se ke o ngɛ mɔde bɔe kaa o maa su otihi nɛ o kɛ ma o hɛ mi ɔ he ɔ, o hɛ nɛ ko je nɔ kaa Yehowa ngɛ mo ye buae, nɛ e maa ya nɔ maa pee jã konɛ o kɛ bua jɔmi nɛ su oti nɛ o kɛ ma o hɛ mi ɔ he. (2 Kor. 4:7) Ke o kɔni mi jɔ̃ we ɔ, o nine maa su jɔɔmihi babauu nɔ.—Gal. 6:9. w23.05 31 ¶16-18

Yehowa haa nɛ e we bi naa kaa e suɔ mɛ nɛ e bua jɔ a he. Ngmami ɔ tsɔɔ si fɔfɔɛhi enyɔ a mi nɛ Yehowa de Yesu kaa lɛ ji e Bi nɛ e suɔ, nɛ e bua jɔ e he. (Mat. 3:17; 17:5) Anɛ o maa suɔ nɛ Yehowa nɛ de mo kaa e bua jɔ o he lo? Yehowa kɛ wɔ tui munyu tɛɛ kɛ ji hiɔwe, mohu ɔ, e guɔ Baiblo ɔ nɔ nɛ e kɛ wɔ tuɔ munyu. Ke wa kane Yesu munyuhi nɛ ngɛ Sane Kpakpa amɛ a mi ɔ, e ngɛ kaa nɔ́ nɛ wa ngɛ Yehowa gbi nue nɛ e ngɛ wɔ dee ke e bua jɔ wa he. Yesu kase bɔ nɛ e Tsɛ ɔ ngɛ ha a pɛpɛɛpɛ. Enɛ ɔ he ɔ, ke wa kane ngɛ Baiblo ɔ mi kaa Yesu bua jɔ e kaseli anɔkualetsɛmɛ nɛ a yi mluku ɔ a he ɔ, wa ma nyɛ maa po he foni kaa Yehowa ngɛ wɔ hu dee ke e bua jɔ wa he. (Yoh. 15:​9, 15) Se ke waa kɛ kahi ngɛ kpee ɔ, lɔ ɔ tsɔɔ we kaa Yehowa kplɛɛ we wa nɔ. Mohu ɔ, ka nɛ ɔmɛ haa nɛ wa náa he blɔ kɛ tsɔɔ kaa wa suɔ Mawu nɛ wa heɔ lɛ yeɔ.—Yak. 1:12. w24.03 28 ¶10-11