September

Mawu ha Yesu he wami konɛ e kɛ po haomihi tsuo nɛ adesahi kɛ ngɛ kpee ɔ se. Nyakpɛ níhi nɛ Yesu pee ɔ ha nɛ wa na kaa e ngɛ he wami nɛ e kɛ maa po nyagbahi tsuo nɛ waa kɛ ngɛ kpee, nɛ wa be nyɛe maa pee he nɔ́ ko ɔ se. Kaa nɔ hyɛmi nɔ́ ɔ, e ngɛ he wami nɛ e kɛ ma je níhi nɛ ha nɛ adesahi ngɛ nɔ́ nae kaa hiɔ kɛ gbenɔ ɔ kɛ je. (Mat. 9:​1-6; Rom. 5:​12, 18, 19) Nyakpɛ níhi nɛ e pee ɔ maa nɔ́ mi kaa e ma nyɛ ma tsa “hiɔ slɔɔtohi tsuo” nɛ e ma tle nihi nɛ a gbo ɔ si hulɔ. (Mat. 4:23; Yoh. 11:​43, 44) Jehanɛ hu ɔ, e ngɛ he wami nɛ e kɛ ma kudɔ kɔɔhiɔ nɛ nya wa, kɛ mumi yayamihi. (Maak. 4:​37-39; Luka 8:2) Lemi nɛ wa le kaa Yehowa ngɔ he wami kaa jã kɛ ha e Bi ɔ, woɔ wɔ he wami wawɛɛ! Wa ma nyɛ ma ná nɔ mi mami kaa níhi nɛ Yehowa wo si kaa e maa pee ha wɔ ngɛ e Matsɛ Yemi ɔ mi ɔ maa ba mi kokooko. Nyakpɛ níhi nɛ Yesu pee benɛ e ngɛ zugba a nɔ ɔ ha nɛ wa na kaa e maa pee níhi fuu ha wɔ ngɛ Mawu Matsɛ Yemi ɔ mi. w23.04 3 ¶5-7

Ke nyɛ he hiɛ ngɛ o we asafo ɔ mi, nɛ lɔ ɔ haa nɛ o nuɔ he kaa a pɔɛ mo tsɛ mi ɔ, eko ɔ, e maa pee mo kaa o ko ha sane heto hu, nɛ o hi si nɛ o bu tue kɛkɛ. Se moo bɔ mɔde nɛ o ha sane heto. Ke o dla o he kaa o ma ha sane heto fuu ɔ, e maa ye bua mo wawɛɛ. Ke a tsɛ we mo ngɛ ní kasemi ɔ sisije po ɔ, eko ɔ, a ma tsɛ mo be mi nɛ ní kasemi ɔ ngɛ nɔ yae ɔ. Ke o ngɛ o he dlae kɛ ha Hwɔɔmi Mɔ ɔ Mi Ní Kasemi ɔ, mo susu bɔ nɛ kuku ɔmɛ eko fɛɛ eko kɛ ngmami nɛ a ngɔ ní kasemi ɔ kɛ da nɔ ɔ ngɛ tsakpa ha. Ke o pee jã a, o ma nyɛ maa na nɔ́ ko nɛ o maa tu he munyu ngɛ ní kasemi ɔ mi. Jehanɛ hu ɔ, o ma nyɛ maa tu anɔkualehi nɛ a mi kuɔ, nɛ a nya tsɔɔmi yee ɔ he munyu ngɛ kuku ɔmɛ a mi. Mɛni he je? Ejakaa ke a su jamɛ a kuku ɔmɛ a nɔ ɔ, eko ɔ, nihi bɔɔ pɛ lɛ a ma wo a nine nɔ. Se ke o kɛ ga womi nɛ ɔmɛ tsuo tsu ní, nɛ loloolo ɔ, o ná we he blɔ nɛ o ha heto ngɛ asafo mi kpe sisi hu nɛɛ? Loko a maa je asafo mi kpe ɔ sisi ɔ, mo de nɔ nɛ maa hyɛ ní kasemi ɔ nɔ ɔ sane bimi nɛ o maa suɔ kaa o ha heto. w23.04 21-22 ¶9-10

Yosef je e tsui mi nɛ e kɛ Yehowa blɔ tsɔɔmi tsu ní. Enɛ ɔ ha nɛ e pee huno kpakpa. Ke e hí kulaa a, Mawu kɛ blɔ tsɔɔmihi ha Yosef si etɛ sɔuu kɛ kɔ e weku ɔ he. Ngɛ si fɔfɔɛ nɛ ɔmɛ tsuo a mi ɔ, Yosef kɛ oya yemi bu tue ke lɔ ɔ ma bi nɛ e pee tsakemi nguahi po. (Mat. 1:20; 2:​13-15, 19-21) Akɛnɛ Yosef kɛ Mawu blɔ tsɔɔmi tsu ní he je ɔ, e po Maria he piɛ, nɛ e hyɛ e nɔ. Mo susu he nɛ o hyɛ: Nɔ́ nɛ Yosef pee ɔ ma ha nɛ suɔmi kɛ bumi nɛ Maria ngɛ kɛ ha lɛ ɔ mi maa wa wawɛɛ! Hunomɛ, ke nyɛɛ kɛ Baiblo ga womi nɛ tsɔɔ bɔ nɛ e sa kaa nyɛɛ hyɛ nyɛ weku ɔ nɔ ha a tsu ní ɔ, lɔ ɔ tsɔɔ kaa nyɛ ngɛ Yosef nɔ hyɛmi nɔ́ ɔ kasee. Ke nyɛ bɔ mɔde nɛ nyɛ pee jã, nɛ e ma bi nɛ nyɛɛ pee tsakemi komɛ nɛ a he hia po ɔ, lɔ ɔ tsɔɔ kaa nyɛ suɔ nyɛ yi ɔmɛ nɛ nyɛ suɔ nɛ huɛ bɔmi nɛ ngɛ nyɛ kpɛti ɔ mi nɛ wa wawɛɛ. Nyɛmiyo ko nɛ e je Vanuatu nɛ e sɛ gba si himi mi jeha 20 kɛ se ji nɛ ɔ de ke: “Ke ye huno ɔ hla Yehowa blɔ tsɔɔmi se blɔ nɛ e kɛ tsu ní ɔ, e haa nɛ i buɔ lɛ wawɛɛ. Lɔ ɔ haa nɛ i nuɔ he kaa i ngɛ slɔkee nɛ i náa nɔ mi mami kaa yi mi kpɔhi nɛ e mwɔɔ ɔ da.” w23.05 21 ¶5

Yudabi nɛ a maa kpale kɛ je Babilon kɛ ho Israel ya a ma ba pee ‘ma klɔuklɔu’ kɛ ha a Mawu ɔ. (5 Mose 7:6) Se kɛ̃ ɔ, e he maa hia nɛ a pee tsakemihi konɛ a sa Yehowa hɛ mi. a fɔ Yudabi ɔmɛ a kpɛti nihi fuu ngɛ Babilon. Enɛ ɔ ha nɛ a kpɛti nihi fuu peeɔ a ní kaa Babilonbi ɔmɛ, nɛ a kɛ a mlaa amɛ hu tsuɔ ní. Benɛ Yudabi ɔmɛ a kpɛti ni komɛ sɛ hlami kɛ ho Israel ya jeha babauu se ɔ, Amlaalo Nehemia na kaa bimɛ nɛ a kɛ yi nɛ ɔmɛ fɔ ngɛ Israel ɔ kase we Yudabi ɔmɛ a gbi ɔ kulaa, nɛ enɛ ɔ ha nɛ e nya kpɛ e he wawɛɛ. (5 Mose 6:​6, 7; Neh. 13:​23, 24) Kɛ bimɛ nɛ ɔmɛ nɛ a fɔ ɔ ma plɛ kɛ suɔ Yehowa nɛ a sɔmɔ lɛ ha kɛɛ ke a nui Hebri gbi nɛ ji gbi pɔtɛɛ nɛ a ngma Mawu Munyu ɔ ngɛ mi ɔ? (Ezra 10:​3, 44) Enɛ ɔ he ɔ, e sa nɛ Yudabi nɛ ɔmɛ nɛ a pee tsakemi wawɛɛ. Se e he be wae ha mɛ kaa a maa pee tsakemi nɛ ɔmɛ ngɛ Israel nɛ ji he nɛ bɔɔbɔɔbɔɔ ɔ, a maa to anɔkuale jami sisi ngɛ ekohu ɔ.—Neh. 8:​8, 9. w23.05 15 ¶6-7

E ngɛ mi kaa wa maa suɔ kaa wa maa su oti ko he mohu lɛɛ, se ní komɛ ma nyɛ maa tsi wɔ blɔ. Kaa nɔ hyɛmi nɔ́ ɔ, “níhi nɛ a hyɛ we blɔ” ɔ ma nyɛ maa ngɔ wa be nɛ e sa nɛ wa kɛ tsu oti ko nɛ waa kɛ ma wa hɛ mi ɔ he ní. (Fiɛɛ. 9:11) Eko ɔ, waa kɛ haomi ko maa kpe nɛ ma ha nɛ wa kɔni mi nɛ jɔ̃, nɛ wa maa nu he kaa wa he wami ta. (Abɛ 24:10) Akɛnɛ wa yi mluku he je ɔ, wa ma nyɛ ma tɔ̃ tɔmi komɛ nɛ be hae nɛ waa su oti ko nɛ waa kɛ ma wa hɛ mi ɔ he. (Rom. 7:23) Aloo eko ɔ, wa maa nu he kaa pɔ tɔ wa he. (Mat. 26:43) Ke wa kɔni mi jɔ̃ ɔ, mɛni ma nyɛ maa ye bua wɔ? Ke o kɔni mi jɔ̃ ɔ, lɔ ɔ tsɔɔ we kaa o be nyɛe maa su oti nɛ o kɛ ma o hɛ mi ɔ he. Baiblo ɔ tsɔɔ kaa waa kɛ haomihi ma nyɛ maa kpe si abɔ. Se kɛ̃ ɔ, e ha nɛ wa ná nɔ mi mami kaa Yehowa maa ye bua wɔ kɛ da nya. Ngɛ anɔkuale mi ɔ, ke níhi a mi wa, se o bɔ mɔde kaa o maa su otihi nɛ o kɛ ma o hɛ mi ɔ he ɔ, e tsɔɔ kaa o suɔ nɛ o sa Yehowa hɛ mi. Hyɛ bɔ nɛ Yehowa bua maa jɔ wawɛɛ ha ke e na kaa o ngɛ mɔde nɛ o su oti nɛ o kɛ ma o hɛ mi ɔ he! w23.05 30 ¶14-15

Blɔ gbami ní tsumi ɔ yeɔ buaa nihewi nɛ a leɔ bɔ nɛ a kɛ nihi slɔɔtoslɔɔtohi maa hi si ha. Jehanɛ hu ɔ, e yeɔ buaa mɛ nɛ a nyɛɔ nɛ a toɔ a sika he blɔ nya saminya. (Filip. 4:​11-13) Ke o ngɛ hlae nɛ o kɛ o he nɛ wo be tsuo sɔmɔmi ní tsumi ɔ mi ɔ, o ma nyɛ maa je sisi nɛ o kɛ o he nɛ wo blɔ gbali a wami ní tsumi ɔ mi. Enɛ ɔ maa ye bua mo konɛ o dla o he kɛ ha daa blɔ gbami ní tsumi ɔ. Ke o kɛ o he wo blɔ gbami ní tsumi ɔ mi ɔ, e ma nyɛ ma bli blɔ kɛ ha mo konɛ o ya ye bua kɛ ma asafo ɔ tsuhi loo o ya sɔmɔ ngɛ Betel. E sa nɛ nyumuhi nɛ a ji Kristofohi ɔ nɛ a bɔ mɔde nɛ a he nɛ su konɛ a nyɛ nɛ a sɔmɔ kaa asafo mi nikɔtɔmahi konɛ a sɔmɔ a nyɛmimɛ ɔmɛ. Baiblo ɔ tsɔɔ kaa ke nyumu ko ngɛ mɔde bɔe kaa e maa su oti nɛ ɔ he ɔ, lɔ ɔ tsɔɔ kaa e “suɔ wawɛɛ nitsɛ kaa e ma tsu ní tsumi kpakpa.” (1 Tim. 3:1) Kekleekle ɔ, e sa nɛ nyumu ko he nɛ su nɛ e sɔmɔ kaa asafo mi sɔmɔlɔ. Asafo mi sɔmɔli yeɔ buaa asafo mi nikɔtɔma amɛ ngɛ blɔhi fuu a nɔ. Asafo mi sɔmɔli kɛ asafo mi nikɔtɔma amɛ tsuo baa a he si nɛ a yaa nɔ nɛ a sɔmɔɔ a nyɛmimɛ ɔmɛ nɛ a kɛ kã tsuɔ fiɛɛmi ní tsumi ɔ hulɔ. w23.12 28 ¶14-16

Benɛ Matsɛ Yosia ye jeha 16, e bɔni Yehowa se blɔ hlami. E suɔ kaa e maa kase Yehowa he ní konɛ e pee e suɔmi nya ní. Se kɛ̃ ɔ, Yosia nɛ lɛ gbɔjɔɔ kulaa. Ngɛ jamɛ a be ɔ mi ɔ, nihi babauu jaa amagahi, lɔ ɔ he ɔ, jã e pee kã loko e ma nyɛ ma ha nɛ ni ɔmɛ nɛ a kpa amaga jami. Yosia nyɛ nɛ e pee jã niinɛ! E bɔni lakpa jami gumi ngɛ ma a mi loko e ye jeha 20. (2 Kron. 34:​1, 2) Ke o wɛ po ɔ, o ma nyɛ maa kase Yosia nɔ hyɛmi nɔ́ ɔ kɛ gu Yehowa kɛ e su kpakpa amɛ a he ní nɛ o maa kase ɔ nɔ. Jã nɛ o maa pee ɔ maa ye bua mo konɛ o jɔɔ o he nɔ kɛ ha Yehowa. Ke o jɔɔ o he nɔ kɛ ha Yehowa a, kɛ lɔ ɔ maa ye bua mo ha kɛɛ ngɛ o si himi mi? Luke nɛ a baptisi lɛ benɛ e ye jeha 14 ɔ de ke, “Kɛ je amlɔ nɛ ɔ kɛ yaa a, ma ngɔ Yehowa sɔmɔmi kɛ pee nɔ́ titli ngɛ ye si himi mi, nɛ ma bɔ mɔde kaa ma ha nɛ e bua nɛ jɔ.” (Maak. 12:30) Ke o bɔ mɔde kaa mo hu o maa jɔɔ o wami nɔ kɛ ha Yehowa a, e maa jɔɔ mo wawɛɛ! w23.09 11 ¶12-13

Benɛ bɔfo Paulo ngma sɛ womi nɛ ɔ kɛ ya ha asafo nɛ ngɛ Tɛsalonika a, jamɛ a be ɔ mi ɔ, asafo ɔ yi jeha kake lolo. Enɛ ɔ he ɔ, eko ɔ, asafo mi nikɔtɔma amɛ be níhi a si kpami tsɔ, nɛ e ma nyɛ maa ba kaa a tɔ̃ tɔmi komɛ. Se loloolo ɔ, asafo mi bi ɔmɛ je bumi kpo kɛ tsɔɔ mɛ. E be kɛe nɛ amanehlu ngua a maa ba, nɛ eko ɔ, asafo mi nikɔtɔma amɛ maa ngɔ blɔ tsɔɔmihi fuu kɛ ha wɔ ngɛ jamɛ a be ɔ mi pe bɔ nɛ a peeɔ mwɔnɛ ɔ po. Jamɛ a be ɔ mi ɔ, eko ɔ, wa nine be nyɛe maa su blɔ tsɔɔmi nɔ kɛ je asafo ɔ ní tsumi yi ɔ kɛ asafo ɔ ní tsumi kɔni ɔmɛ a ngɔ. Enɛ ɔ he ɔ, amlɔ nɛ ɔ ji be nɛ e he hia nɛ waa suɔ asafo mi nikɔtɔma amɛ nɛ waa bu mɛ. Ngɛ si fɔfɔɛhi nɛ waa kɛ maa kpe ɔ tsuo se ɔ, e sa nɛ wa hɛ nɛ hi wa he nɔ. E sɛ nɛ waa ngɔ wa juɛmi kɛ ma mluku nɛ a yi ɔ nɔ. mohu ɔ, e sa nɛ e hi wa juɛmi mi kaa Yehowa guɔ Kristo nɔ kɛ tsɔɔ nyumu anɔkualetsɛmɛ nɛ ɔmɛ blɔ. Kaa bɔ nɛ dade pɛɛ buɔ ta bulɔ yi he konɛ e ko plaa a, jã kɛ̃ nɛ wa yi wami hemi he hɛ kɛ nɔ fɔmi ɔ hu poɔ wa juɛmi he piɛ nɛ e yeɔ buaa wɔ nɛ wa susuɔ níhi a he saminya. Wa le kaa se nami be níhi nɛ a ngɛ je ɔ mi ɔ a he. (Filip. 3:8) Wa hɛ kɛ nɔ fɔmi ɔ yeɔ buaa wɔ nɛ wa yaa nɔ nɛ wa peeɔ kpoo nɛ wa peeɔ klaalo. w23.06 11-12 ¶11-12

Nihi nɛ a buɔ “yo kuasia” a tue ɔ ngɛ yi mi kpɔ ko nɛ e sa kaa a mwɔ. E sa nɛ a mwɔ a yi mi kpɔ kaa a maa kplɛɛ e nine fɔmi ɔ nɔ loo a be nɔ kplɛɛe. Wa ngɛ yi mi tomi kpakpahi fuu a he je nɛ e sa nɛ waa yu wa he ngɛ ajuama bɔmi he. Ngmami ɔ tsɔɔ kaa “yo kuasia” a ngɛ dee ke: “Nyu jujui ngɔɔ.” (Abɛ 9:17) Mɛni ji jamɛ a “nyu jujui” ɔ? Baiblo ɔ ngɔ bɔmi nami mi ní peepeehi nɛ nihi nɛ a sɛ gba si himi mi ɔ kɛ a he woɔ mi ɔ kɛ to nyu nɛ haa nɔ bua jɔmi ɔ he. (Abɛ 5:​15-18) Nyumu kɛ yo nɛ a sɛ gba si himi mi ɔ ngɛ he blɔ nɛ a kɛ a he náa bɔmi. Ngɛ anɔkuale mi ɔ, enɛ ɔ ngɛ slɔɔto kulaa ngɛ “nyu jujui” he. Nyu jujui tsɔɔ bɔmi nami nɛ Yehowa kplɛɛ we nɔ. Nihi nɛ a kɛ a he woɔ jamɛ a ní peepee ɔ mi ɔ peeɔ jã ngɛ laami mi kaa bɔ nɛ julɔ juɔ ngɛ laami mi ɔ. E ma nyɛ maa pee kaa nɔ́ nɛ “nyu jujui” nɛ ɔ ngɔɔ ke ji kaa nihi nɛ a pee jã a susu kaa a ye a he nɛ nɔ ko nɔ ko be lee. Se e ji susumi nɛ dɛ! Yehowa naa níhi tsuo. Ngɛ anɔkuale mi ɔ, ke Yehowa kua nɔ ko ɔ, e ngɛ dɔmi wawɛɛ, nɛ e pi nɔ́ ko nɛ e “ngɔɔ” kulaa, mohu ɔ, e duɔ wawɛɛ.—1 Kor. 6:​9, 10. w23.06 22 ¶7-9

Ke o susu kaa o nyɛ we nɛ o je o tsui mi nɛ o sɔle ha Yehowa, aloo o nyɛ we nɛ o tsu fiɛɛmi ní tsumi ɔ kaa bɔ nɛ o pee be ko nɛ be ɔ, mɛni o ma nyɛ maa pee? Koo ma nya si kaa Yehowa mumi ɔ je o nɔ. Akɛnɛ o yi mluku he je ɔ, bɔ nɛ o nuɔ he ha ngɛ níhi a he ɔ ma nyɛ ma tsake. Ke kã nɛ o ngɛ ɔ nya ngɛ si bae ɔ, mo susu bɔfo Paulo nɔ hyɛmi nɔ́ ɔ he. E ngɛ mi kaa e bɔ mɔde kaa e maa kase Yesu mohu lɛɛ, se tsa pi be fɛɛ be nɛ e nyɛɔ peeɔ nɔ́ nɛ e suɔ kaa e maa pee. Ngɛ bɔ nɛ Paulo ngɛ he nue ha a tsuo se ɔ, e mwɔ e yi mi kpɔ kaa e maa gbe e sɔmɔmi ní tsumi ɔ nya. Jã nɔuu kɛ̃ nɛ e sɛ nɛ waa da bɔ nɛ wa nuɔ he ha a nɔ pɛ kɛ mwɔ yi mi kpɔ. Moo bɔ mɔde kaa bɔ fɛɛ bɔ nɛ ji ɔ, o maa pee nɔ́ nɛ da ngɛ bɔ nɛ o ngɛ he nue ha a tsuo se. Ke o ya nɔ nɛ o pee nɔ́ nɛ da a, bɔɔbɔɔbɔɔ ɔ, e ma nyɛ ma tsake bɔ nɛ o nuɔ he ha ngɛ níhi a he.—1 Kor. 9:16. w24.03 11-12 ¶12-13

Wa ma nyɛ ma je suɔmi kpo kɛ tsɔɔ wa nyɛmimɛ ɔmɛ ke ji kaa waa kɛ mɛ bɔ nɛ wa ná be kɛ ha mɛ. (2 Kor. 6:​11-13) Ke wa bɔ mɔde kaa wa maa na ni kpahi kaa bɔ nɛ Yehowa naa mɛ ɔ, lɔ ɔ tsɔɔ kaa wa suɔ mɛ. Suɔmi he maa hia wawɛɛ ngɛ amanehlu ngua a mi. Ke amanehlu ngua a je sisi ɔ, jije wa ma ná he piɛ pomi kɛ je? Mo susu nɔ́ nɛ Yehowa de e we bi kaa a pee benɛ a ba tua blema Babilon ma a he nɛ o hyɛ. E de mɛ ke: “Ye ma, nyɛ ya sɛ nyɛ we ɔmɛ a mi, nɛ nyɛɛ ngmɛ sinya amɛ a mi ngɔ wo nyɛ yi. Nyɛɛ laa nyɛ he be kpiti ko kɛ yaa si Mawu mi mi fumi ɔ nya maa be.” (Yes. 26:20) Eko ɔ, e he maa hia nɛ waa kɛ blɔ tsɔɔmi nɛ ɔ nɛ tsu ní ke amanehlu ngua a je sisi. w23.07 6-7 ¶14-16

E sa nɛ waa pee nihi nɛ ni kpahi le wɔ kaa wa nuɔ nɔ́ sisi. Mo bi o he ke: ‘Anɛ nihi naa mi kaa i nuɔ nɔ́ sisi, i pee we kpɛii, nɛ i toɔ ye tsui si lo? Aloo nihi naa mi kaa ye sane he wa, nɛ i ngɛ kpɛii lo? Anɛ i buɔ ni kpahi tue, nɛ i kplɛɛɔ a susumi nɔ ke e he hia kaa ma pee jã lo?’ Ke wa nuɔ nɔ́ sisi be fɛɛ be ɔ, lɔ ɔ tsɔɔ kaa wa ngɛ Yehowa kɛ Yesu kasee wawɛɛ. Ke wa si fɔfɔɛ tsake ɔ, e sa nɛ waa nu sisi nɛ waa kplɛɛ nɔ. Tsakemi kaa jã a ma nyɛ ma ha nɛ waa kɛ nyagbahi nɛ wa hyɛ we blɔ maa kpe. Kaa nɔ hyɛmi nɔ́ ɔ, hiɔ ko ma nyɛ maa fia wɔ tlukaa. Aloo eko ɔ, ma nɛ wa ngɛ mi ɔ sika blɔ nya tomi ma tsake, loo ma nɔ yelɔ ɔ ma nyɛ maa pee tsakemi ko nɛ ma ha nɛ níhi a mi maa wa ha wɔ wawɛɛ. (Fiɛɛ. 9:11) Ke asafo ɔ tsɔɔ kaa wa ya sɔmɔ ngɛ he kpa loo a tsake wa ní tsumi ngɛ asafo ɔ mi ɔ, e ma nyɛ maa ka wa hemi kɛ yemi ɔ. Se wa ma nyɛ maa da si fɔfɔɛ fɛɛ si fɔfɔɛ nɛ waa kɛ maa kpe ɔ nya ke wa pee níhi eywiɛ nɛ nyɛɛ se nɛ ɔmɛ: (1) e sa nɛ waa kplɛɛ nɔ kaa wa si fɔfɔɛ tsake, (2) waa ngɔ wa juɛmi kɛ ma jɔɔmihi nɛ wa ma ná hwɔɔ se ɔ nɔ, (3) wa ná juɛmi nɛ da, nɛ (4) waa pee níhi kɛ ye bua ni kpahi. w23.07 21-22 ¶7-8

Benɛ Babilonbi ɔmɛ nu gbalɔ Daniel kɛ je Yerusalem kɛ ho he tsitsaa ya ngɛ Babilon ɔ, jamɛ a be ɔ mi ɔ, e ji niheyo wayoo. Se Babilon ma nikɔtɔma amɛ a bua jɔ Daniel he wawɛɛ. A na kaa ‘e he ngɛ fɛu, nɛ kpa ko be e he.’ Jehanɛ hu ɔ, e je weku ko nɛ nihi le mɛ wawɛɛ ɔ mi. (1 Sam. 16:7) Enɛ ɔ he ɔ, Babilon bi ɔmɛ tsɔse lɛ konɛ e sɔmɔ ngɛ matsɛ we ɔ mi. (Dan. 1:​3, 4, 6) Yehowa suɔ Daniel wawɛɛ akɛnɛ e ba e je mi saminya a he je. Ngɛ anɔkuale mi ɔ, benɛ Yehowa tu Daniel he munyu kaa e ji nɔ ko nɛ e yeɔ anɔkuale kaa Noa kɛ Hiob ɔ, jamɛ a be ɔ mi ɔ, eko ɔ, Daniel ye maa pee jeha 20 pɛ. Se Yehowa bu Daniel kaa e ji dalɔ kaa Noa kɛ Hiob nɛ a kɛ anɔkuale yemi sɔmɔ lɛ jehahi babauu ɔ. (1 Mose 5:32; 6:​9, 10; Hiob 42:​16, 17; Eze. 14:14) Jehanɛ hu ɔ, Yehowa ya nɔ nɛ e je suɔmi kpo kɛ tsɔɔ Daniel e wami be tsuo.—Dan. 10:​11, 19. w23.08 2 ¶1-2

Ke o ngɛ hlae nɛ o he we ko ɔ, o maa suɔ kaa o maa le nɔ́ fɛɛ nɔ́ nɛ ngɛ we nɛ o ngɛ hlae nɛ o he ɔ he, nɛ o na kɛ o hɛngmɛ hulɔ. Wɔ hu wa ma nyɛ maa pee nɔ́ ko kaa jã ke wa ngɛ Baiblo ɔ kanee loo wa ngɛ kasee. Ke o kaneɔ Baiblo ɔ kɛfokɛfo ɔ, eko ɔ, “Mawu sɛ gbi klɔuklɔu ɔmɛ a sisije ní ɔmɛ” pɛ nɛ o maa le. (Heb. 5:12) Kaa bɔ nɛ ke o yaa he we ko nɛ o maa suɔ kaa o maa sɛ we ɔ mi konɛ o le nɔ́ fɛɛ nɔ́ nɛ ngɛ mi ɔ, jã kɛ̃ nɛ e sa kaa o kase Baiblo ɔ konɛ o nu sisi saminya. Ke Baiblo ɔ de nɔ́ ko ngɛ ngmami ko mi ɔ, e sa nɛ waa hyɛ bɔ nɛ nɔ́ nɛ e de ɔ kɛ ngmami kpahi ngɛ tsakpa ha. Enɛ ɔ ji blɔ nɛ hi pe kulaa nɛ wa ma nyɛ maa gu nɔ kɛ kase Baiblo ɔ. Jehanɛ hu ɔ, moo bɔ mɔde kaa o maa nu níhi nɛ o heɔ yeɔ a sisi, kɛ nɔ́ he je nɛ o he jamɛ a ní ɔmɛ ye. Loko wa maa nu Baiblo ɔ sisi saminya a, e he hia nɛ waa kase Baiblo ɔ mi anɔkualehi nɛ a mi kuɔ ɔ. Bɔfo Paulo wo e nyɛmimɛ Kristofohi he wami kaa a kase Mawu Munyu ɔ saminya konɛ a nyɛ nɛ a nu anɔkuale ɔ mi “blimi kɛ e kami kɛ e hiɔwe yami kɛ e mi kuɔmi ɔ tsuo sisi saminya.” Kɛkɛ ɔ, lɔ ɔ ma ha nɛ a ‘sipoku maa ya zu mi nɛ a he maa wa’ ngɛ hemi kɛ yemi ɔ mi wawɛɛ. (Efe. 3:​14-19) E sa nɛ wɔ hu waa pee jã nɔuu. w23.10 18 ¶1-3

Baiblo ɔ tu nihi fuu nɛ a to a tsui si ɔ a he munyu. Ke o kɛ pee oti kaa o maa kase nimli nɛ ɔmɛ a he ní ɔ, e maa ye bua mo wawɛɛ. Kaa nɔ hyɛmi nɔ́ ɔ, e ngɛ mi kaa benɛ David ji niheyo ɔ, a pɔ lɛ nu kaa e ba ye matsɛ ngɛ Israel mohu lɛɛ, se e mlɛ jehahi babauu loko e nine su matsɛ yemi ɔ nɔ. Simeon kɛ Ana hu kɛ anɔkuale yemi sɔmɔ Yehowa nɛ a mlɛ Mesia nɛ Mawu wo si kaa e maa ba a. (Luka 2:​25, 36-38) Ke o ngɛ nimli nɛ ɔmɛ a he ní kasee ɔ, mo hla heto kɛ ha sane bimi nɛ ɔmɛ: Mɛni nɛ eko ɔ, e ye bua nɔ ɔ nɛ e nyɛ nɛ e to e tsui si? Kɛ e tsui si nɛ e to ɔ ye bua lɛ ha kɛɛ? Mɛni ma nyɛ ma pee kɛ kase lɛ? Jehanɛ hu ɔ, ke o kase nihi nɛ a nyɛ we nɛ a to a tsui si ɔ a he ní ɔ, o ma nyɛ ma ná he se. (1 Sam. 13:​8-14) O ma nyɛ ma bi o he ke: ‘Mɛni nɛ eko ɔ, e ha nɛ a nyɛ we nɛ a to a tsui si ɔ? Nɛ mɛni lɛ je mi kɛ ba?’ w23.08 25 ¶15

Bɔfo Petro ji nɔ ko nɛ e yeɔ anɔkuale. Lɔ ɔ he ɔ, e ha we nɛ nɔ́ ko nɔ́ ko nɛ tsi lɛ blɔ nɛ e kpa Yesu se nyɛɛmi. Kaa nɔ hyɛmi nɔ́ ɔ, ligbi ko ɔ, Yesu de nɔ́ ko nɛ e kaseli ɔmɛ nui sisi, se Petro pee nɔ́ ko nɛ tsɔɔ kaa e yeɔ anɔkuale. (Yoh. 6:68) A kpɛti nihi fuu tui a tsui si konɛ Yesu nɛ e tsɔɔ mɛ nɔ́ nɛ e de ɔ sisi, mohu ɔ, a kpa e se nyɛɛmi. Se Petro lɛɛ e pee we jã, e yɔse kaa Yesu pɛ ji nɔ nɛ ngɛ “neneene wami munyu ɔmɛ ɔ nɛ.” Yesu le kaa Petro kɛ bɔfo kpa amɛ ma kua lɛ. Se loloolo ɔ, Yesu ha nɛ Petro le kaa e ngɛ nɔ mi mami ngɛ e mi kaa e ma ba da e nane nɔ ekohu, nɛ e maa ya nɔ maa ye anɔkuale. (Luka 22:​31, 32) Yesu le kaa “mumi ɔ suɔ wawɛɛ, se he lo ɔ gbɔjɔ.” (Maak. 14:38) Enɛ ɔ he ɔ, benɛ Petro kua Yesu nɛ e tsɔɔ kaa e li lɛ ɔ se po ɔ, Yesu kɔni mi jɔ̃ we ngɛ e he. Benɛ a tle Yesu si se ɔ, e je e he kpo kɛ tsɔɔ Petro. E ngɛ heii kaa benɛ Yesu pee jã a, Petro pɛ lɛ ngɛ lejɛ ɔ. (Maak. 16:7; Luka 24:34; 1 Kor. 15:5) Hyɛ bɔ nɛ enɛ ɔ maa wo Petro nɛ e ngɛ aywilɛho yee ngɛ nɔ́ nɛ e pee ɔ he ɔ he wami ha! w23.09 22 ¶9-10

Mawu ngɔɔ nihi nɛ a náa hemi kɛ yemi ngɛ e mi ɔ a tɔmi kɛ keɔ mɛ. Akɛnɛ Yehowa ngɔɔ a tɔmihi kɛ keɔ mɛ kulaa he je ɔ, e be a tue gblae ngɛ he hu. (La 32:​1, 2) E naa nimli nɛ ɔmɛ kaa nihi nɛ piami ko be a he nɛ a ji dali ngɛ a hemi kɛ yemi ɔ he je. E ngɛ mi kaa a bu Abraham, David, kɛ Mawu sɔmɔli anɔkualetsɛmɛ kpahi kaa a ji dali mohu lɛɛ, se loloolo ɔ, a ji nihi nɛ a yi mluku. Se ngɛ a hemi kɛ yemi ɔ he je ɔ, Yehowa bu mɛ kaa nihi nɛ piami ko be a he, titli ke a kɛ mɛ to nihi nɛ a sɔmɔ we lɛ ɔ a he. (Efe. 2:12) Ngɛ sɛ womi nɛ bɔfo Paulo ngma a mi ɔ, e ha nɛ e pee heii kaa hemi kɛ yemi ji nɔ́ titli nɛ haa nɛ huɛ bɔmi kpakpa hiɔ nɔ ko kɛ Yehowa a kpɛti. Abraham kɛ David ji Mawu huɛmɛ ejakaa a ná hemi kɛ yemi ngɛ e mi. Wɔ hu wa ma nyɛ ma pee Mawu huɛ ke wa ná hemi kɛ yemi ngɛ e mi. w23.12 3 ¶6-7

Mwɔnɛ ɔ, Kristofohi tsuo ná he blɔ kɛ ngɛ Yehowa sɔmɔe, nɛ a ngɔɔ a be, a he wami kɛ a he lo nya níhi kɛ fĩɔ Mawu Matsɛ Yemi ɔ se. Ke waa kɛ wa nyɛmi tsuo sɔmɔ Yehowa a, lɔ ɔ tsɔɔ kaa wa bua jɔ he blɔ nɛ wa ná kɛ ngɛ lɛ sɔmɔe ɔ he. Bɔfo Paulo tu níhi nɛ a he hia nɛ e sa nɛ waa pee konɛ wa nyɛ nɛ wa sɔmɔ Mawu ɔ he munyu. (Heb. 10:​22-25) Ní nɛ ɔmɛ ekomɛ ji sɔlemi, fiɛɛmi ní tsumi ɔ, kɛ asafo mi kpehi nɛ wa maa ya. Jehanɛ hu ɔ, e sa nɛ waa wo wa sibi he wami “nɛ waa hi jã pee wawɛɛ nitsɛ be mi nɛ [wa] na kaa [Yehowa] ligbi ɔ ngɛ sue ɔ.” Benɛ e piɛ bɔɔ nɛ a maa gbe Kpo Jemi womi ɔ ngmami nya a, Yehowa bɔfo ko de ke: “[Nyɛ] ja Mawu!” Bɔfo ɔ ti munyu nɛ ɔ mi si enyɔ sɔuu. (Kpoj. 19:10; 22:9) Wa kase anɔkuale komɛ nɛ a mi kuɔ kɛ kɔ Yehowa mumi mi sɔlemi we ngua a he. E sɛ nɛ wa hɛ nɛ je anɔkuale nɛ ɔmɛ a nɔ gblegbleegble. Jehanɛ hu ɔ, e sa nɛ wa bua nɛ jɔ wawɛɛ kaa wa ná he blɔ kɛ ngɛ Yehowa sɔmɔe! w23.10 29 ¶17-18

Wɔ tsuo wa suɔ nɛ “waa ya nɔ nɛ waa suɔ wa sibi.” Se kɛ̃ ɔ, e he hia nɛ wa kai kaa Yesu bɔ wɔ kɔkɔ kaa “suɔmi nɛ nihi babauu ngɛ ɔ, nya maa jɔ.” (Mat. 24:12) Pi nɛ Yesu ngɛ tsɔɔe kaa e kaseli ɔmɛ a kpɛti nihi fuu be suɔmi kpo jee kɛ tsɔɔ a sibi hu. Mohu ɔ, e sa nɛ waa hyɛ saminya konɛ nihi nɛ a je we suɔmi kpo ngɛ Satan je nɛ ɔ mi ɔ a ní peepee nɛ ko ná wa nɔ he wami, nɛ́ lɔ ɔ nɛ ha nɛ wa kpa suɔmi kpo jemi kɛ tsɔɔ wa sibi. Be mi nɛ oti nɛ ɔ ngɛ wa juɛmi mi ɔ, nyɛ ha nɛ wa susu sane bimi nɛ he hia nɛ ɔ he: Mɛni maa ye bua wɔ nɛ waa le kaa wa suɔ wa nyɛmimɛ ɔmɛ wawɛɛ? Blɔ kake nɛ wa ma nyɛ maa gu nɔ kɛ le kaa suɔmi nɛ wa ngɛ ha wa sibi ɔ mi wa ji kaa wa maa hyɛ bɔ nɛ wa tsuɔ si fɔfɔɛ komɛ a he ní ha. (2 Kor. 8:8) Bɔfo Petro de nɔ́ ko kɛ kɔ enɛ ɔ he. E de ke: “Nɔ́ nɛ pe kulaa a, nyɛɛ suɔ nyɛ sibi wawɛɛ nitsɛ, ejakaa suɔmi haa yayami babauu nɔ.” (1 Pet. 4:8) Enɛ ɔ he ɔ, bɔ nɛ wa peeɔ wa ní ha ke wa nyɛmimɛ tɔ̃ wa nɔ ɔ maa ye bua wɔ nɛ waa le kaa suɔmi nɛ wa ngɛ ha mɛ ɔ mi wa loo e mi wɛ. w23.11 10-11 ¶12-13

Wa be nyɛe ma de ke waa kɛ Yesu fami nɛ kɔɔ suɔmi he ɔ ngɛ ní tsue, be mi nɛ wa jeɔ suɔmi kpo kɛ tsɔɔ ni pɔtɛɛ komɛ ngɛ asafo ɔ mi pɛ, se ni kpa amɛ lɛɛ wa pee we jã ha mɛ. Ngɛ anɔkuale mi ɔ, eko ɔ, wa maa hɛ kɛ su ni komɛ a he wawɛɛ pe ni kpahi kaa bɔ nɛ Yesu pee ɔ. (Yoh. 13:23; 20:2) Se kɛ̃ ɔ, bɔfo Petro kai wɔ kaa waa bɔ mɔde wawɛɛ nɛ waa “suɔ nyɛmimɛ a sane.” Enɛ ɔ tsɔɔ kaa e sa nɛ waa suɔ wa nyɛmimɛ ɔmɛ tsuo, ejakaa a piɛɛ Yehowa weku ɔ he. (1 Pet. 2:17) Petro wo wɔ he wami kaa ‘waa suɔ wa sibi wawɛɛ nitsɛ kɛ je wa tsui mi.’ (1 Pet. 1:22) Munyu nɛ ji waa suɔ wa sibi “wawɛɛ nitsɛ” ɔ tsɔɔ kaa e sa nɛ waa suɔ wa nyɛmimɛ ɔmɛ ke e he wa ha wɔ po kaa wa maa pee jã. Kaa nɔ hyɛmi nɔ́ ɔ, ngɔɔ lɛ kaa nyɛmi ko pee mo nɔdɔ nɔ́ ko. Mɛni o maa pee? Behi fuu ɔ, wa maa suɔ kaa wa maa pee lɛ nɔ́ ko kɛ to nane mi. Se Petro kase kɛ je Yesu ngɔ kaa Mawu bua jɔɛ jamɛ a ní peepee ɔ he kulaa. (Yoh. 18:​10, 11) Petro de ke: “Nyɛ ko ngɔ plaami kɛ to plaami nane mi, aloo jɛmi kɛ to jɛmi nane mi. Mohu ɔ, nyɛɛ ngɔ jɔɔmi kɛ to nane mi.” (1 Pet. 3:9) Ke wa suɔ wa nyɛmimɛ wawɛɛ ɔ, lɔ ɔ ma ha nɛ wa ma je mi mi jɔmi kpo kɛ tsɔɔ mɛ. w23.09 28-29 ¶9-11

Bɔ nɛ jokuɛwi waa mlamlaamla nɛ a ba peeɔ nikɔtɔmahi ɔ ngɛ nyakpɛ wawɛɛ. A gbo we dengme loko a waa. Se loko Kristofono ma nyɛ maa wa ngɛ mumi mi ɔ, ja e mia e hɛ mi. (1 Kor. 13:11; Heb. 6:1) Enɛ ɔ he ɔ, loko wa ma nyɛ maa su oti nɛ ɔ he ɔ, e sa nɛ wa ha nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa. Jehanɛ hu ɔ, wa hia Mawu mumi klɔuklɔu ɔ yemi kɛ buami konɛ wa nyɛ nɛ wa je suhi nɛ e bua jɔ he ɔ kpo, waa kase ní komɛ nɛ maa ye bua wɔ, nɛ wa dla wa he kɛ ha ní tsumihi nɛ a kɛ ma nyɛ maa wo wa dɛ hwɔɔ se. (Abɛ 1:5) Yehowa lɛ bɔ nyumuhi kɛ yihi tsuo. (1 Mose 1:27) Ngɛ anɔkuale mi ɔ, e slo bɔ nɛ nyumuhi a nɔmlɔ tso ngɛ ha, nɛ e slo bɔ nɛ yihi hu a nɔmlɔ tso ngɛ ha. Se kɛ̃ ɔ, nyumu kɛ yo je ekpa ngɛ a sibi a he ngɛ blɔ kpahi a nɔ hulɔ. Kaa nɔ hyɛmi nɔ́ ɔ, Yehowa ngɔ blɔ nya ní tsumi slɔɔtoslɔɔtohi kɛ wo a dɛ. Enɛ ɔ he ɔ, e he hia nɛ a ná su komɛ, nɛ a kase ní komɛ nɛ maa ye bua mɛ ngɛ si himi mi bɔ nɛ pee nɛ a ti nɔ fɛɛ nɔ nɛ e nyɛ nɛ e tsu e blɔ nya ní tsumihi.—1 Mose 2:18. w23.12 18 ¶1-2

Anɛ Yesu hu suɔ kaa nihi nɛ a ngɔ e Tsɛ ɔ biɛ nitsɛnitsɛ kɛ tsu ní lo? Ee. Eko ɔ, jami hɛ mi nyɛɛli komɛ susu kaa e sɛ nɛ a ngɔ Mawu biɛ nitsɛ kɛ tsɛ lɛ, ejakaa e ji nɔ buimi. Se Yesu ha we nɛ susumi nɛ ɔ nɛ dɛ ngmami ɔ nɔ ɔ nɛ tsi lɛ blɔ nɛ e ko wo e Tsɛ ɔ biɛ ɔ hɛ mi nyami. Mo susu nɔ́ nɛ ya nɔ benɛ Yesu tsa nyumu ko nɛ daimoniohi ngɛ lɛ haoe ngɛ Gerasene kpokpa a nɔ ɔ he nɛ o hyɛ. Ni ɔmɛ ye gbeye wawɛɛ nɛ a kpa Yesu pɛɛ kaa e je, enɛ ɔ he ɔ, Yesu je a ma a mi. (Maak. 5:​16, 17) Se loloolo ɔ, Yesu suɔ nɛ jamɛ a ni ɔmɛ nɛ a le Yehowa biɛ ɔ. Enɛ ɔ he ɔ, e de nyumu ɔ nɛ e tsa lɛ ɔ kaa e ya de nihi nɔ́ nɛ Yehowa pee ha lɛ ɔ, se pi nɔ́ nɛ lɛ Yesu ɔ pee ha lɛ ɔ. (Maak. 5:19) Mwɔnɛ hu ɔ, Yesu suɔ nɛ wa ha nɛ nihi nɛ a le e Tsɛ ɔ biɛ ɔ ngɛ je kɛ wɛ. (Mat. 24:14; 28:20) Ke wa pee wa blɔ fa mi nɔ́ ɔ, Yesu nɛ ji wa Matsɛ ɔ bua maa jɔ wawɛɛ. w24.02 10 ¶10

E ji jɔɔmi nɛ se be kaa wa piɛɛ Yehowa asafo ɔ he ngɛ nyagbe ligbi nɛ ɔmɛ a mi. E ngɛ mi kaa níhi ngɛ puɛe wawɛɛ mohu lɛɛ, se Yehowa ha wɔ nyɛmimɛ nyumuhi kɛ yihi konɛ a ye bua wɔ. (La 133:1) Yehowa yeɔ bua wɔ konɛ bua jɔmi nɛ hi wa weku ɔ mi. (Efe. 5:33–6:1) Jehanɛ hu ɔ, e haa wɔ nile kɛ juɛmi konɛ wa nyɛ nɛ waa da wa nyagba amɛ a nya nɛ wa bua nɛ jɔ. Ngɛ anɔkuale mi ɔ, e sa nɛ waa bɔ mɔde wawɛɛ konɛ wa nyɛ nɛ waa ya nɔ nɛ waa kɛ anɔkuale yemi nɛ sɔmɔ Yehowa. Mɛni he je? Ejakaa be komɛ ɔ, ni kpahi a ní peepee kɛ a munyu tutui ma nyɛ maa hao wɔ wawɛɛ. Jehanɛ se hu ɔ, wɔ nitsɛmɛ wa gbɔjɔmihi ma nyɛ ma ha nɛ wa kɔni mi nɛ jɔ̃, titli ke wa ngɛ mɔde bɔe kaa wa maa ye jamɛ a gbɔjɔmi ɔ nɔ se wa nyɛ we jã peemi. E sa nɛ waa ya nɔ nɛ wa sɔmɔ Yehowa (1) ke nyɛmi ko pee wɔ nɔdɔ nɔ́ ko, (2) ke o kɛ nyagbahi ngɛ kpee ngɛ o gba a mi, kɛ (3) ke wɔ nitsɛmɛ wa gbɔjɔmihi ha nɛ wa kɔni mi jɔ̃. w24.03 14 ¶1-2

Be komɛ ɔ, o maa nu nyɛmimɛ nyumuhi kɛ yihi a níhi a si kpamihi nɛ tsɔɔ bɔ nɛ a bli a sɔmɔmi ní tsumi ɔ mi ha. Eko ɔ, a ya Sukuu Kɛ Ha Matsɛ Yemi Sane Kpakpa Fiɛɛli ɔ eko, aloo a hia kɛ ya hehi nɛ fiɛɛli fuu a he hia ngɛ. Ke mo hu o ma nyɛ maa ngɔ oti nɛ ɔmɛ eko kɛ ma o hɛ mi ɔ, lɛɛ moo bɔ mɔde nɛ o pee jã. Yehowa we bi suɔ nɛ a bli a sɔmɔmi ní tsumi ɔ mi. (Níts. 16:9) Se ke o nyɛ we nɛ o pee jã amlɔ nɛ ɔ hu nɛɛ? Ke e ba jã a, ko susu kaa nihi nɛ a bli a sɔmɔmi ní tsumi ɔ mi ɔ, a nɔ kuɔ pe mo. Nɔ́ nɛ he hia ji kaa o maa ya nɔ ma fĩ si. (Mat. 10:22) O hɛ nɛ ko je nɔ kaa ke o nyɛ nɛ o pee nɔ́ nɛ o si himi maa ngmɛ mo blɔ kaa o pee ɔ, Yehowa bua maa jɔ. Enɛ ɔ ji nɔ́ ko nɛ he hia wawɛɛ nɛ o ma nyɛ maa pee konɛ o ya nɔ nɛ o nyɛɛ Yesu se ngɛ o baptisimi se.—La 26:1. w24.03 10 ¶11

Wa hiɔwe Tsɛ ɔ wo wɔ si kaa ke wa pee yayami ko nɛ wa pia wa he ɔ, e kɛ maa ke wɔ. (La 86:5) Enɛ ɔ he ɔ, ke wa tsake wa tsui niinɛ ngɛ yayami ko nɛ wa pee kɛ be ɔ he ɔ, wa ma nyɛ ma ná nɔ mi mami kaa Yehowa kɛ wa tɔmi ɔ ke wɔ. Mo kai kaa Yehowa nuɔ nɔ́ sisi nɛ e be kpɛii. E hyɛ we blɔ kaa waa pee nɔ́ nɛ wa be nyɛe maa pee. Ke waa kɛ wa nyɛmi tsuo pee nɔ́ ko kɛ ha Yehowa a, e bua jɔɔ he. Jehanɛ hu ɔ, o ma nyɛ ma susu nɔ hyɛmi níhi nɛ ngɛ Baiblo ɔ mi nɛ kɔɔ nihi nɛ a kɛ a tsui tsuo sɔmɔ Yehowa a he. Kaa nɔ hyɛmi nɔ́ ɔ, mo susu bɔfo Paulo he nɛ o hyɛ. E ngɔ e he wami tsuo kɛ tsu ní jehahi babauu nɛ e hia blɔ si tomi akpehi abɔ, nɛ e to asafohi fuu sisi. Se benɛ e si himi tsake nɛ e nyɛ we nɛ e tsu fiɛɛmi ní tsumi ɔ vii ɔ, anɛ Yehowa bua jɔɛ e he hu lo? Dɛbi. E ya nɔ nɛ e pee nɔ́ nɛ e ma nyɛ, nɛ Yehowa jɔɔ lɛ. (Níts. 28:​30, 31) Jã nɔuu kɛ̃ nɛ eko ɔ, be komɛ ɔ, wa si fɔfɔɛ ma nyɛ ma tsake nɛ wa be nyɛe maa pee babauu ha Yehowa kaa bɔ nɛ wa ngɛ hlae ɔ. Ke e ba jã a, o kɔni mi nɛ ko jɔ̃, ejakaa nɔ́ nɛ he hia Yehowa titli ji yi mi tomi he je nɛ wa ngɛ lɛ sɔmɔe. w24.03 27 ¶7, 9

Yesu sɔleɔ ha Yehowa be fɛɛ be, nɛ e kɛ pee nɔ hyɛmi nɔ́ kɛ ha e kaseli ɔmɛ konɛ a nyɛɛ se. Yesu sɔleɔ be fɛɛ be ngɛ e sɔmɔmi ní tsumi ɔ mi. Akɛnɛ nihi babauu hii e ngɔ be fɛɛ be nɛ e be deka he je ɔ, e to be kɛ ha sɔlemi. (Maak. 6:​31, 45, 46) E teɔ si mɔtu mla konɛ lɛ pɛ e ná be kɛ sɔle. Ligbi ko nɛ Yesu maa mwɔ yi mi kpɔ ko nɛ he hia a, e sɔle nyɔ ɔ mi tsuo. (Luka 6:​12, 13) Jehanɛ hu ɔ, gbɔkuɛ nɛ e nɔ jena Yesu ma gbo ɔ, e sɔle konɛ Yehowa nɛ ye bua lɛ nɛ e nyɛ nɛ e gbe e sɔmɔmi ní tsumi ɔ fã nɛ he wa a nya. (Mat. 26:​39, 42, 44) Yesu nɔ hyɛmi nɔ́ ɔ ha nɛ wa na kaa ke wa be deka po ɔ, e sa nɛ waa to be kɛ ha sɔlemi. Kaa bɔ nɛ Yesu pee ɔ, wɔ hu wa ma nyɛ maa to be nɛ wa kɛ sɔle. Wa ma nyɛ maa te si mɔtu mla nɛ waa pee jã, loo wa ma nyɛ waa pee jã gbɔkuɛ. Ke wa pee jã a, lɔ ɔ tsɔɔ kaa wa bua jɔ nike ní kpakpa nɛ ji sɔlemi nɛ Yehowa kɛ ha wɔ ɔ he. w23.05 3 ¶4-5

Munyu nɛ ji ‘plɛ ngɔ wo’ nɛ a kɛ tsu ní ngɛ mwɔnɛ ɔ ngmami ɔ mi ɔ sa kadimi wawɛɛ. Womi ko ngɔ Mawu suɔmi ɔ kɛ to pa nɛ ngɛ bee ɔ he. Nɔ́ he tomi nɔ́ nɛ ɔ tsɔɔ bɔ nɛ Yehowa suɔ nihi nɛ a pɔ mɛ nu ɔ wawɛɛ ha! Nihi nɛ a pɔ mɛ nu ɔ le kaa ‘Mawu suɔ mɛ.’ (Jud 1) Bɔfo Yohane tsɔɔ bɔ nɛ a nuɔ he ha. E ngma ke: “Nyɛɛ hyɛ suɔmi sɔuu nɛ Tsɛ ɔ ngɛ kɛ ha wɔ, kaa a ma tsɛ wɔ ke Mawu bimɛ!” (1 Yoh. 3:1) Anɛ nihi nɛ a pɔ mɛ nu ɔ pɛ lɛ Yehowa jeɔ suɔmi kpo kɛ tsɔɔ lo? Dɛbi. Yehowa suɔ wɔ tsuo. Mɛni ji nɔ́ ko nɛ pe kulaa nɛ Yehowa pee kɛ tsɔɔ kaa e suɔ wɔ? Lɔ ɔ ji kpɔmi nɔ́ ɔ nɛ́ e kɛ ha wɔ ɔ nɛ. Kɛ gu kpɔmi nɔ́ ɔ nɔ ɔ, Yehowa je suɔmi nɛ pe kulaa kpo kɛ tsɔɔ adesahi ngɛ je ɔ mi tsuo.—Yoh. 3:16; Rom. 5:8. w24.01 28 ¶9-10

Ngmami nɛ ɔ tsɔɔ nɔ́ ko nɛ ye bua David benɛ e ngɛ gbeye yee ɔ. E ngɛ mi kaa David wami ya je oslaa mi mohu lɛɛ, se e ya nɔ nɛ e pue e yi mi tɛ ngɛ níhi nɛ Yehowa maa pee ha lɛ hwɔɔ se ɔ he. David le kaa Yehowa ma kpɔ̃ lɛ ngɛ be nɛ sa mi, ejakaa Yehowa wo lɛ si kaa e ma ba ye matsɛ ngɛ Israel. (1 Sam. 16:​1, 13) Ngɛ anɔkuale mi ɔ, David le kaa ke Yehowa wo si ko ɔ, e maa ye nɔ pɛpɛɛpɛ. Mɛni nɛ Yehowa wo si kaa e maa pee ha mo? Wa hyɛ we blɔ kaa e maa tsi nyagbahi tsuo nɛ waa kɛ kpeɔ ɔ nya. Se kɛ̃ ɔ, wa le kaa nyagbahi tsuo nɛ waa kɛ ngɛ kpee amlɔ nɛ ɔ, be si hie ngɛ je ehe ɔ mi. (Yes. 25:​7-9) Wa Bɔlɔ ɔ ngɛ he wami wawɛɛ, enɛ ɔ he ɔ, e ma nyɛ ma tle nihi nɛ a gbo ɔ si, nɛ e ma tsa hiɔtsɛmɛ. Jehanɛ hu ɔ, e ma kpata nihi nɛ a teɔ si kɛ woɔ wɔ ɔ hɛ mi.—1 Yoh. 4:4. w24.01 6 ¶12-13

Mo pue o yi mi tɛ ngɛ o he nɔ jɔɔmi kɛ o baptisimi ɔ he. Akɛnɛ o suɔ nɛ o fĩ Yehowa se he je ɔ, o jɔɔ o he nɔ kɛ ha lɛ nɛ o ha nɛ a baptisi mo. Mo kai nɔ́ nɛ ye bua mo nɛ o ná nɔ mi mami kaa o na anɔkuale ɔ. O kase Yehowa he ní nɛ o ná bumi nɛ mi kuɔ kɛ ha lɛ, nɛ o ba suɔ lɛ kaa o hiɔwe Tsɛ. O ba ná hemi kɛ yemi, nɛ lɔ ɔ wo mo he wami nɛ o tsake o tsui. O kpa ní komɛ nɛ Yehowa sume ɔ peemi, nɛ o bɔni e suɔmi nya ní peemi. Benɛ o ba na kaa Mawu kɛ o tɔmihi ke mo ɔ, o bua jɔ saminya. (La 32: 2) O bɔni asafo mi kpehi yami, nɛ o kɛ nihi bɔni ní kpakpahi nɛ o kase ɔ he ní sɛɛmi. Nyagbenyagbe ɔ, o jɔɔ o he nɔ nɛ o ha nɛ a baptisi mo nɛ o ba pee Kristofono. Amlɔ nɛ ɔ, o ngɛ nyɛɛe ngɛ wami blɔ ɔ nɔ, nɛ o fia o pɛɛ si kaa o be nɔ jee gblegbleegble. (Mat. 7:​13, 14) Mo fĩ si nɛ o da si kpɛii, nɛ o ya nɔ nɛ o suɔ Yehowa nɛ o bu e mlaa amɛ tue. w23.07 17 ¶14; 19 ¶19

Ke o pue o yi mi tɛ ngɛ o he nɔ nɛ o jɔɔ kɛ ha Yehowa a he ɔ, e maa wo mo he wami nɛ o nyɛ nɛ o da ka fɛɛ ka nɛ o kɛ maa kpe ɔ nya. Kaa nɔ hyɛmi nɔ́ ɔ, anɛ o maa pee nɔ́ ko kɛ tsɔɔ kaa o ná nɔ ko yo loo nɔ ko huno he suɔmi lo? E ngɛ heii kaa o be jã pee, ejakaa o wo Yehowa si momo kaa o be nɔ́ ko nɛ e bua jɔɛ he ɔ pee kɔkɔɔkɔ. Ke o ha we nɛ akɔnɔ yaya nɛ he si ngɛ o mi ɔ, lɔ ɔ ma ha nɛ e he be wae ha mo kaa o maa hwu kɛ si akɔnɔ yaya. Enɛ ɔ ma ha nɛ o maa “yu o he” ngɛ “yiwutsotsɛmɛ a blɔ nɔ.” (Abɛ 4:​14, 15) Ke o pue o yi mi tɛ ngɛ Yesu nɔ hyɛmi nɔ́ ɔ he ɔ, e maa ye bua mo saminya. Yesu fia e pɛɛ si kaa e maa pee e Tsɛ ɔ suɔmi nya ní. Kaa bɔ nɛ Yesu pee ɔ, moo fia o pɛɛ si kaa mo hu o kɛ oya yemi ma kua níhi tsuo nɛ sɛ Mawu hɛ mi. (Mat. 4:10; Yoh. 8:29) Ngɛ anɔkuale mi ɔ, kahi kɛ haomihi nɛ waa kɛ kpeɔ ɔ haa nɛ wa náa he blɔ kɛ tsɔɔ kaa wa suɔ nɛ waa ya nɔ nɛ waa nyɛɛ Yesu se. Ke e ba jã a, o ma nyɛ ma ná nɔ mi mami kaa Yehowa maa ye bua mo. w24.03 9-10 ¶8-10