December

Anɛ Yehowa ngɛ he wami nɛ e kɛ ma tle nihi nɛ a gbo ɔ si lo? Ee, ejakaa lɛ ji “Ope ɔ” nɛ. (Kpoj. 1:8) E ngɛ he wami nɛ e kɛ maa ye wa he nyɛli tsuo nɛ gbenɔ hu piɛɛ he ɔ nɔ kunimi. (1 Kor. 15:26) Nɔ́ kpa ko hu he je nɛ wa ma nyɛ ma ná nɔ mi mami kaa Mawu ma tle nihi nɛ a gbo ɔ si ji kaa e hɛ ji nɔ́ nɔ. E tsɛɔ dodoe ɔmɛ eko fɛɛ eko kɛ e biɛ. (Yes. 40:26) Jehanɛ hu ɔ, e kaiɔ nihi nɛ a gbo ɔ. (Hiob 14:13; Luka 20:38) E ma nyɛ ma kai ní nyafinyafihi ngɛ nihi nɛ a gbo ɔ a he. Ní nɛ ɔmɛ ekomɛ ji bɔ nɛ a ngɛ ha, bɔ nɛ a peeɔ a ní ha, níhi a si kpami nɛ a ngɛ, kɛ níhi nɛ ngɛ a juɛmi mi loko a gbo ɔ. Ngɛ anɔkuale mi ɔ, wa ma nyɛ ma he si nɛ Yehowa wo kaa e ma tle nihi nɛ a gbo ɔ si kɛ ba wami mi ɔ maa ye, ejakaa wa le kaa e suɔ nɛ e pee jã, nɛ e ngɛ he wami nɛ e kɛ maa pee jã hulɔ. Mo susu nɔ́ kpa ko hu he je nɛ wa ma nyɛ ma he ye kaa Mawu ma tle nihi nɛ a gbo ɔ si ɔ he nɛ o hyɛ: Yehowa tle ni komɛ si kɛ be momo. Blema a, e ha Yesu kɛ nyumuhi anɔkualetsɛmɛ komɛ he wami nɛ a kɛ tle nihi nɛ a gbo ɔ si. w23.04 9-10 ¶7-9

Ke waa kɛ hɛ si kami tsu ní nɛ wa je mi mi jɔmi kpo ɔ, eko ɔ, nihi maa suɔ kaa a maa bu wɔ tue, nɛ waa kɛ mɛ ma nyɛ ma tsa ní sɛɛmi ɔ nɔ. Se ke nɔ ko suɔ nɛ e kɛ wɔ nɛ sã nya loo e ye wa he fɛu ɔ, e sɛ nɛ wa tsa ní sɛɛmi ɔ nɔ. (Abɛ 26:4) Se eko ɔ, tsa pi nɔ fɛɛ nɔ nɛ e maa pee jã, ni komɛ ma nyɛ maa bu wɔ tue. Ngɛ anɔkuale mi ɔ, ke wa he jɔ ɔ, wa ma ná he se wawɛɛ. Moo sɔle kɛ ha Yehowa nɛ e ha mo he wami nɛ o hia a, konɛ o ya nɔ nɛ o he nɛ jɔ. Ke o pee jã nɛ nihi bi mo wa hemi kɛ yemi ɔ he sane loo a te si kɛ wo mo ɔ, o ma nyɛ maa je mi mi jɔmi mi kɛ ha mɛ heto. Mo kai kaa ke o kɛ nɔ ko kpa we gbi ngɛ níhi a he, se o he jɔ ɔ, lɔ ɔ be hae nɛ nyɛɛ sã nya. Nɛ ke o je mi mi jɔmi kɛ bumi mi kɛ ha nihi heto ɔ, lɔ ɔ ma nyɛ ma ha nɛ nihi nɛ o fiɛɛɔ kɛ haa mɛ ɔ a ti ni komɛ nɛ a tsake juɛmi nɛ a hɛɛ ngɛ wa he, kɛ susumi nɛ a hɛɛ ngɛ Baiblo ɔ mi anɔkuale ɔ hu he. Be fɛɛ be ɔ, ‘moo pee klaalo kaa o maa fã’ anɔkuale ɔ he, se e sa nɛ o “pee jã kɛ he jɔmi kɛ bumi nɛ mi kuɔ.” (1 Pet. 3:15) Ngɛ anɔkuale mi ɔ, ke o he jɔ ɔ, lɔ ɔ tsɔɔ we kaa o gbɔjɔ! w23.09 19 ¶18-19

Wa ma susu ní eywiɛ komɛ nɛ wa ma nyɛ maa pee kɛ tsɔɔ kaa wa toɔ wa tsui si ɔ he. Kekleekle ɔ, nɔ nɛ toɔ e tsui si ɔ mi mi fu we mla. Ke nihi wo e mi mi la a, e peeɔ kpoo, nɛ e pee we mɛ nɔ́ ko kɛ to nane mi. Jehanɛ hu ɔ, ke e hao po ɔ, e kɛ nihi hiɔ si saminya. (2 Mose 34:6) Enyɔne ɔ, nɔ nɛ toɔ e tsui si ɔ peeɔ kpoo kɛ mlɛɔ. Ke e ngɛ nɔ́ ko blɔ hyɛe nɛ nɔ́ ɔ bɛ mi be kɛkɛɛ po ɔ, e pee we lɛ tai, nɛ e mi mi fu we hulɔ. (Mat. 18:​26, 27) Etɛne ɔ, nɔ nɛ toɔ e tsui si ɔ susuɔ níhi a he saminya loko e peeɔ nɔ́ ko.Ke nɔ ko nɛ e toɔ e tsui si ɔ ngɛ ní tsumi ko nɛ e he hia nɛ e sa nɛ e tsu ɔ, e pee we lɛ kɛfokɛfo konɛ e gbe nya mla. Mohu ɔ, e náa be bɔ nɛ sa nɛ e toɔ ní tsumi ɔ he blɔ nya, lɔ ɔ se ɔ, e náa tsui nɛ e tsuɔ lɛ saminya. Eywiɛne, nɔ nɛ toɔ e tsui si ɔ bɔɔ mɔde nɛ e daa kahi a nya, nɛ e tui níhi a he munyu nyanyaanya. Nɔ nɛ toɔ e tsui si ɔ, bɔɔ mɔde nɛ e yaa nɔ nɛ e fĩɔ si nɛ e náa juɛmi nɛ da ngɛ níhi a he. (Kol. 1:11) Akɛnɛ wa ji Yehowa we bi he je ɔ, e he hia nɛ waa to wa tsui si ngɛ si fɔfɔɛ nɛ ɔmɛ tsuo a mi. w23.08 20-21 ¶3-6

Nɔ́ titli he je nɛ e sa nɛ waa po wa okadi peemi tsui ɔ he piɛ ji kaa Yehowa hyɛɔ wa tsui mi. Enɛ ɔ tsɔɔ kaa e naa níhi nɛ ni kpahi be nyɛe maa na ngɛ wa he, nɛ e le bɔ nɛ wa ngɛ ha tutuutu. Ke wa susuɔ ga womi nɛ Yehowa kɛ haa wɔ nɛ ma ha nɛ wa ná neneene wami ɔ he ɔ, e bua maa jɔ wa he wawɛɛ. (Yoh. 4:14) Ke wa pee jã a, waa kɛ wa he be je mi bami yaya mi woe, nɛ lakpa munyuhi nɛ je Satan kɛ yiwutsotsɛmɛ a ngɔ ɔ hu be wa nɔ he wami náe. (1 Yoh. 5:​18, 19) Ke wa ngɛ hɛe kɛ ngɛ Yehowa he sue ɔ, suɔmi kɛ bumi nɛ wa ngɛ ha lɛ ɔ mi maa wa wawɛɛ. Akɛnɛ wa suɔ wa Tsɛ ɔ, nɛ wa sume nɛ waa pee nɔ́ ko nɛ maa dɔ lɛ he je ɔ, wa be suɔe kaa wa ma susu nɔ́ yayami ko he. Nyɛmiyo ko nɛ a tsɛɛ lɛ ke Marta nɛ e je Croatia nɛ e kɛ ajuama bɔmi he ka kpe ɔ de ke: “E he wa ha mi wawɛɛ kaa ma susu níhi a he saminya nɛ ma hwu kɛ si akɔnɔ yayahi. Se akɛnɛ i yeɔ Yehowa gbeye he je ɔ, lɔ ɔ po ye he piɛ.” Ngɛ mɛni blɔ nɔ? Marta tsɔɔ kaa e pueɔ e yi mi tɛ ngɛ haomi nɛ e kɛ ma nyɛ maa kpe ke ji kaa e kɛ e he wo je mi bami yaya mi ɔ he. Wɔ hu wa ma nyɛ maa pee jã nɔuu. w23.06 20-21 ¶3-4

Yesu le kaa Yehowa yi mi tomi ji kaa e ma tsɔ e biɛ ɔ nɛ a gbe he guɛ ɔ he kulaa. Enɛ ɔ he je nɛ wa Nyɔmtsɛ ɔ tsɔɔ e se nyɛɛli ɔmɛ kaa a sɔle ke: “Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ.” (Mat. 6:9) Yesu le kaa sane nɛ ɔ ji sane ko nɛ he hia adebɔ níhi tsuo. Nɔ ko nɔ ko be nɛ e tsɔ Yehowa biɛ ɔ he kaa bɔ nɛ Yesu pee ɔ. Se benɛ a nu Yesu ɔ, mɛni munyu nɛ e he nyɛli ɔmɛ po kɛ fɔ e nɔ? A tsɔɔ kaa e gbe Mawu biɛ ɔ he guɛ! Ngɛ anɔkuale mi ɔ, Yesu nu he kaa munyu nɛ a po kɛ fɔ e nɔ kaa e gbe e Tsɛ ɔ biɛ klɔuklɔu ɔ he guɛ ɔ ji yayami nɛ pe kulaa. E dɔ lɛ wawɛɛ kaa a maa bu lɛ fɔ nɛ a kojo lɛ ngɛ enɛ ɔ he. Eko ɔ, enɛ ɔ ji nɔ́ titli nɛ ha nɛ Yesu ‘hao wawɛɛ’ benɛ e piɛ bɔɔ nɛ a maa nu lɛ ɔ nɛ.—Luka 22:​41-44. w24.02 11 ¶11

Ngɛ wami he fo ɔ nɛ wa ngɛ tue ɔ mi ɔ, e sa nɛ waa suɔ Yehowa kɛ Yesu pe bɔ nɛ wa suɔ wa weku li po. (Mat. 10:37) Se enɛ ɔ tsɔɔ we kaa waa ngmɛɛ wa weku blɔ nya ní tsumihi a he kɛ fɔ si. Ngɛ anɔkuale mi ɔ, loko wa ma nyɛ maa sa Mawu kɛ Kristo hɛ mi ɔ, ja wa tsu wa blɔ nya ní tsumi ngɛ wa weku ɔ mi. (1 Tim. 5:​4, 8) Ke wa pee jã a, wa bua maa jɔ wawɛɛ. Yehowa le kaa ke nyumu kɛ yo je suɔmi kpo kɛ tsɔɔ a sibi, nɛ fɔli hu je suɔmi kpo kɛ tsɔɔ a bimɛ nɛ a tsɔse mɛ, nɛ bimɛ ɔmɛ hu je bumi kpo kɛ tsɔɔ a fɔli ɔ, bua jɔmi maa hi weku ɔ mi wawɛɛ. (Efe. 5:33; 6:​1, 4) Ke o ji huno, loo yogbayo loo bi ɔ, yaa nɔ nɛ o kɛ Baiblo mi ga womi nɛ tsu ní. Koo pee nɔ́ nɛ moo o susu kaa e da, loo nɔ́ nɛ nihi nɛ a ngɛ he nɛ o ngɛ ɔ peeɔ, loo nɔ́ nɛ ní leli tsɔɔ kaa e sa nɛ o pee. Mohu ɔ, moo kase wa womi ɔmɛ saminya. Ke o pee jã a, o maa na bɔ nɛ o kɛ Baiblo sisi tomi mlaahi ma tsu ní ha. w23.08 28 ¶6-7

E sa nɛ yo nɛ e ji Kristofo no ɔ nɛ e kase ní komɛ nɛ maa ye bua lɛ ngɛ e si himi mi. Ní nɛ ɔmɛ nɛ e maa kase ngɛ e jokuɛwi a si ɔ maa ye bua lɛ ngɛ e si himi mi tsuo. Mo susu ní komɛ nɛ o ma nyɛ maa pee ɔ he nɛ o hyɛ. Kaa nɔ hyɛmi nɔ́ ɔ, moo kase ní kanemi kɛ ní ngmami saminya. Ngɛ he komɛ ɔ, nihi susuɔ kaa e he hia we nɛ yihi nɛ a kase ní kanemi kɛ ní ngmami. Se kɛ̃ ɔ, e he hia wawɛɛ nɛ Kristofohi tsuo nɛ a le ní kanemi kɛ ní ngmami. (1 Tim. 4:13) Enɛ ɔ he ɔ, moo bɔ mɔde nɛ o kase ní kanemi kɛ ní ngmami saminya. Ke o pee jã a, kɛ o ma ná he se ha kɛɛ? E maa ye bua mo konɛ o ná ní tsumi. Jehanɛ hu ɔ, e he be wae ha mo kaa o maa kase Baiblo ɔ saminya nɛ o tsɔɔ ni kpahi hulɔ. Nɔ́ nɛ pe kulaa a, ke o kaneɔ Baiblo ɔ nɛ o pueɔ o yi mi tɛ ngɛ he ɔ, e ma ha nɛ o maa hɛ kɛ su Yehowa he wawɛɛ.—1 Tim. 4:15. w23.12 20 ¶10-11

Mo bi Yehowa nɛ e ye bua mo konɛ o yu o he ngɛ ka he. Akɛnɛ wa ji adesahi nɛ wa yi mluku he je ɔ, e sa nɛ be fɛɛ be ɔ, waa hwu kɛ si níhi nɛ ma nyɛ ma ha nɛ waa pee nɔ́ nɛ dɛ. Satan ngɛ mɔde bɔe wawɛɛ konɛ e ha nɛ e he nɛ wa ha wɔ kaa wa maa pee jã. Blɔ kake nɛ Satan guɔ nɔ konɛ e kɛ puɛ wa susumi ji hɛja jemi nɛ sɛ. Hɛja jemi kaa jã a ma nyɛ ma ha nɛ wa susu ní yayahi a he. Susumi yayahi ma nyɛ ma ha nɛ wa he be tsɔe ngɛ Yehowa hɛ mi, nɛ wa ma nyɛ maa pee yayami nɛ hɛdɔ ngɛ he po. (Maak. 7:​21-23; Yak. 1:​14, 15) Wa hia Yehowa yemi kɛ buami konɛ wa nyɛ nɛ waa hwu kɛ si kahi nɛ waa pee e suɔmi nya ní. Yesu tu munyu nɛ nyɛɛ se nɛ ɔ ngɛ sɔlemi he nɔ hyɛmi nɔ́ ɔ mi. E de ke: “Koo ngɔ wɔ kɛ ya ka mi, mohu ɔ, mo je wɔ kɛ je nɔ yayami ɔ dɛ mi.” (Mat. 6:13) Yehowa suɔ nɛ e ye bua wɔ, se e sa nɛ wa bi lɛ kekle. Jehanɛ hu ɔ, e sa nɛ wa tsu wa sɔlemi ɔ nya ní. w23.05 6-7 ¶15-17

Ke huno ɔ kɛ yo ɔ ha nɛ huɛ bɔmi kpakpa ngɛ a kɛ Yehowa a kpɛti ɔ, lɔ ɔ haa nɛ a kɛ Yehowa ga womi ɔmɛ ɔ tsuɔ ní. Enɛ ɔ yeɔ buaa mɛ konɛ a nyɛ nɛ a yu a he ngɛ nyagbahi nɛ ma nyɛ ma puɛ suɔmi nɛ ngɛ a kpɛti ɔ he, loo a nyɛ nɛ a da nya. Nihi nɛ huɛ bɔmi kpakpa ngɛ a kɛ Yehowa a kpɛti ɔ bɔɔ mɔde hu kaa a maa kase lɛ nɛ a je su kpakpahi nɛ e ngɛ ɔ kpo. Su nɛ ɔmɛ ekomɛ ji, mi mi jɔmi, tsui si tomi, kɛ tɔmi nɛ a kɛ maa ke. (Efe. 4:32–5:1) Ke nihi nɛ a sɛ gba si himi mi ɔ jeɔ su nɛ ɔmɛ kpo ɔ, e he be wae kaa suɔmi nɛ ngɛ a kpɛti ɔ mi maa wa. Nyɛmiyo ko nɛ a tsɛɛ lɛ ke Lena nɛ e sɛ gba si himi mi jeha 25 kɛ se ji nɛ ɔ de ke: “E he wɛ kulaa kaa o ma je suɔmi kɛ bumi kpo kɛ tsɔɔ nɔ ko nɛ e suɔ Yehowa.” Mo susu Baiblo mi nɔ hyɛmi nɔ́ nɛ ɔ he nɛ o hyɛ. Benɛ e he ba hia nɛ Yehowa nɛ hla nihi nɛ a maa pee Mesia a nɛ maa ba a fɔli ɔ, e hla Yosef kɛ Maria kɛ je David weku ɔ mi. Mɛni he je? Ejakaa huɛ bɔmi kpakpa ngɛ mɛ ni enyɔ ɔmɛ tsuo a kɛ Yehowa a kpɛti, nɛ Yehowa hu le kaa a maa ngɔ e sɔmɔmi kɛ ye kekleekle blɔ he ngɛ a gba si himi ɔ mi. w23.05 21 ¶3-4

E ngɛ mi kaa wa Hɛ Mi Nyɛɛlɔ nɛ ji Yesu ɔ ye mluku mohu lɛɛ, se nihi nɛ e guɔ a nɔ kɛ nyɛɛɔ asafo ɔ hɛ mi ngɛ zugba a nɔ ɔ yi mluku. Enɛ ɔ he ɔ, e he ma nyɛ maa wa ha wɔ kaa wa maa bu mɛ tue, titli ɔ, ke a de wɔ ke waa pee nɔ́ ko nɛ wa sume kaa wa maa pee. Be ko ɔ, e he wa kɛ ha bɔfo Petro kaa e maa bu tue. Benɛ bɔfo ko de Petro kaa e ye lohwe komɛ nɛ a he tsɔ we ngɛ Mose Mlaa a nya a, e kua, pi si kake, se si etɛ sɔuu! (Níts. 10:​9-16) Mɛni he je? Ejakaa e nui blɔ tsɔɔmi ehe nɛ a kɛ ha lɛ ɔ sisi. Se bɔfo Paulo lɛɛ benɛ nyumu nikɔtɔmahi nɛ a ji Kristofohi nɛ a ngɛ Yerusalem ɔ de lɛ kaa e ngɔ nyumuhi eywiɛ kɛ piɛɛ e he kɛ ya sɔlemi we ɔ, nɛ a ya tsu a he ngɛ Mlaa nya kɛ tsɔɔ kaa nɔ́ nɛ a ngɛ dee ngɛ e he ɔ be mi ɔ, e bu tue. Paulo le kaa Kristofohi be Mlaa a sisi hu, nɛ e pee we nɔ́ yaya ko hulɔ, se kɛ̃ ɔ, “e nɔ jena a, Paulo ngɔ nyumu ɔmɛ nɛ e kɛ mɛ ya tsukɔ a he ngɛ kusumi nya.” (Níts. 21:​23, 24, 26) Akɛnɛ Paulo bu tue he je ɔ, lɔ ɔ ngɔ kake peemi kɛ ba nyɛmimɛ ɔmɛ a kpɛti.—Rom. 14:​19, 21. w23.10 10 ¶15-16

Eko ɔ, o be susue kaa gbeye yemi ji su ko nɛ he hia nɛ ma nyɛ maa ye bua. Se e sa nɛ nihi nɛ a suɔ nɛ huɛ bɔmi kpakpa nɛ hi a kɛ Yehowa a kpɛti ɔ nɛ a ‘ye lɛ gbeye.’ Wa ngɛ Yehowa sɔmɔe be kɛkɛɛ ji nɛ ɔ jio, kpaako wa bɔni lɛ sɔmɔmi jio, e sa nɛ wɔ tsuo waa ya nɔ nɛ wa je bumi nɛ mi kuɔ kpo kɛ tsɔɔ lɛ. Ke a ke waa ye Mawu gbeye ɔ, mɛni e tsɔɔ? Nɔ nɛ yeɔ Yehowa gbeye ngɛ blɔ nɛ da nɔ ɔ, suɔ lɛ wawɛɛ nɛ e pee we nɔ́ ko nɛ ma puɛ huɛ bɔmi nɛ ngɛ e kɛ lɛ a kpɛti ɔ. Yesu je jamɛ a “Mawu gbeye yemi ɔ” kpo. (Heb. 5:7) Yesu le kaa Yehowa ma nyɛ maa gbla e tue, se pi lɔ ɔ ji yi mi tomi titli he je nɛ e ye lɛ gbeye. (Yes. 11:​2, 3) Mohu ɔ, e je suɔmi nɛ mi kuɔ kpo kɛ tsɔɔ lɛ nɛ e bu lɛ tue. (Yoh. 14:​21, 31) Kaa bɔ nɛ Yesu pee ɔ, wɔ hu wa jeɔ bumi nɛ mi kuɔ kpo kɛ tsɔɔ Yehowa ejakaa e ngɛ suɔmi, e ngɛ nile, e yeɔ dami sane, nɛ e ngɛ he wami wawɛɛ. Jehanɛ se hu ɔ, wa le kaa Yehowa suɔ wɔ, nɛ bɔ nɛ wa peeɔ wa ní ha ngɛ e blɔ tsɔɔmi he ɔ haa nɛ e bua jɔɔ loo e haoɔ. Ke wa bu Yehowa tue ɔ, e bua maa jɔ, nɛ ke wa bui lɛ tue hu ɔ, e maa dɔ lɛ wawɛɛ.—La 78:41; Abɛ 27:11. w23.06 14 ¶1-2; 15 ¶5

Benɛ Matsɛ Uzia bɔni matsɛ yemi nɛ e matsɛ yemi ɔ ba he si ɔ, e hɛ je nɔ kaa Yehowa nɛ ngɛ lɛ ye buae nɛ níhi ngɛ nɔ yae saminya ngɛ e si himi mi. Mɛni wa ma nyɛ maa kase ngɛ mi? E sa nɛ wa kai kaa jɔɔmihi kɛ he blɔhi nɛ wa ná a je Yehowa ngɔ. E sɛ nɛ waa fĩa ngɛ níhi nɛ wa nyɛ pee ɔ he, mohu ɔ, e sa nɛ waa ngɔ yi jemi ɔ kɛ ha Yehowa. (1 Kor. 4:7) E sa nɛ waa ba wa he si nɛ wa kai kaa yayami ngɛ wa he, lɔ ɔ he ɔ, wa hia tsɔsemi. Nyɛminyumu ko nɛ e ye jeha 60 kɛ se ɔ de ke: “Ke ni kpahi na ye gbɔjɔmi komɛ ɔ, i ha we nɛ lɔ ɔ nɛ jɔ̃ ye kɔni mi. Ke a tsɔse mi ngɛ tɔmi ko nɛ i tɔ̃ ɔ he ɔ, i bɔɔ mɔde kaa ma pee tsakemihi oya nɔuu konɛ ma ya ye hɛ mi ngɛ Yehowa sɔmɔmi mi.” Ngɛ anɔkuale mi ɔ, ke wa yeɔ Yehowa gbeye, nɛ wa baa wa he si ɔ, wa ma ná bua jɔmi nitsɛnitsɛ ngɛ si himi mi.—Abɛ 22:4. w23.09 10 ¶10-11

E he ba hia nɛ Kristofohi nɛ a hi si ngɛ kaseli ɔmɛ a be ɔ mi ɔ nɛ a fĩ si wawɛɛ. E ngɛ mi kaa adesahi tsuo kɛ nyagbahi kpeɔ mohu lɛɛ, se Kristofohi nɛ ɔmɛ kɛ nyagba kpa komɛ kpe akɛnɛ a ba pee Kristofohi ɔ he je. A kpɛti nihi fuu kɛ si temi kɛ womi kpe. Pi Yuda jami hɛ mi nyɛɛli kɛ Roma nɔ yeli ɔmɛ pɛ nɛ a te si kɛ wo Kristofohi nɛ ɔmɛ, mohu ɔ mɛ nitsɛmɛ a weku li po te si kɛ wo mɛ. (Mat. 10:21) Ngɛ asafo ɔ mi hu ɔ, be komɛ ɔ, e ma bi nɛ a hwu kɛ si hemi kɛ yemi kuali konɛ a tsɔɔmi ɔmɛ nɛ ko ná a nɔ he wami. (Níts. 20:​29, 30) Se loloolo ɔ, Kristofohi nɛ ɔmɛ fĩ si wawɛɛ. (Kpoj. 2:3) Ngɛ mɛni blɔ nɔ? E ngɛ heii kaa a susu nɔ hyɛmi ní komɛ nɛ ngɛ Baiblo ɔ mi nɛ kɔɔ si fimi he ɔ he. Nɔ hyɛmi ní nɛ ɔmɛ eko ji Hiob sane ɔ. (Yak. 5:​10, 11) Jehanɛ hu ɔ, a sɔle konɛ Yehowa nɛ wo mɛ he wami. (Níts. 4:​29-31) Nɛ a ngɔ a juɛmi kɛ ma jɔɔmihi nɛ a ma ná ke a ya nɔ nɛ a fĩ si ɔ nɔ. (Níts. 5:41) Ke wa kase nɔ hyɛmi níhi nɛ kɔɔ si fimi he ngɛ Mawu Munyu ɔ kɛ wa womi ɔmɛ a mi nɛ wa pue wa yi mi tɛ ngɛ he ɔ, wɔ hu wa ma nyɛ ma fĩ si jã nɔuu. w23.07 3 ¶5-6

Yehowa kɛ Yesu a kɔni mi be jɔ̃e ngɛ wa he gblegbleegble. Benɛ bɔfo Petro kua Yesu se ɔ, e he ba hia nɛ e mwɔ yi mi kpɔ ko ngɛ e si himi mi. Anɛ e maa hla kaa e ma kpa Yesu se nyɛɛmi aloo e maa ya nɔ maa pee Yesu kaselɔ? Yesu sɔle ha Yehowa momo, nɛ e de lɛ kaa e ye bua Petro konɛ e hemi kɛ yemi ɔ mi nɛ ko gbɔjɔ. Yesu tu jamɛ a sɔlemi ɔ he munyu kɛ tsɔɔ Petro, nɛ e ha nɛ e le kaa e ngɛ nɔ mi mami ngɛ e mi kaa pee se ɔ, e ma ba wo e nyɛmimɛ ɔmɛ he wami. (Luka 22:​31, 32) Ngɛ anɔkuale mi ɔ, be fɛɛ be nɛ Petro ma kai Yesu munyu nɛ ɔmɛ ɔ, e maa wo lɛ he wami wawɛɛ! Ke e biɔ nɛ waa mwɔ yi mi kpɔ ko nɛ he hia wawɛɛ ngɛ wa si himi mi ɔ, Yehowa ma nyɛ maa gu nɔ hyɛli nɛ a susuɔ wa he ɔ a nɔ kɛ wo wɔ he wami konɛ waa ya nɔ nɛ waa ye anɔkuale. (Efe. 4:​8, 11) Wa ba na kaa Yehowa ha Petro kɛ bɔfo kpa amɛ a he lo nya hiami níhi, nɛ jã nɔuu kɛ̃ nɛ e ma ha wɔ wa he lo nya hiami níhi ke wɔ hu wa ngɔ fiɛɛmi ní tsumi ɔ kɛ ye kekle blɔ he ngɛ wa si himi mi. w23.09 24-25 ¶14-15

Ke wa pee ní kpakpahi kɛ ha nihi ɔ, Yehowa naa. Ke a ji ní nyafinyafihi po ɔ, e naa lɛ kaa afɔle ko nɛ he hia wawɛɛ, aloo hiɔ ko nɛ e hɛɛ wɔ nɛ e maa wo. Ke o sɔmɔ kaa asafo mi sɔmɔlɔ loo nɔkɔtɔma hyɛ ɔ, Yehowa kaiɔ ní tsumi nɛ o tsu kɛ be ɔ, nɛ e le kaa suɔmi lɛ ha nɛ o pee jã. (1 Kor. 15:58) Jehanɛ hu ɔ, e naa suɔmi nɛ o jeɔ kpo be fɛɛ be ɔ. Yehowa suɔ nɛ wɔ tsuo waa ya nɔ nɛ waa suɔ lɛ, nɛ waa suɔ ni kpahi hu wawɛɛ. Wa ma nyɛ ma ha nɛ suɔmi nɛ wa ngɛ kɛ ha Yehowa a mi nɛ wa. Nɛ wa ma nyɛ maa pee jã kɛ gu e Munyu ɔ nɛ wa maa kase nɛ wa ma pue wa yi mi tɛ ngɛ he, nɛ wa maa sɔle ha lɛ be fɛɛ be ɔ nɔ. Jehanɛ hu ɔ, wa ma nyɛ ma ha nɛ suɔmi nɛ wa ngɛ kɛ ha wa nyɛmimɛ Kristofohi ɔ mi nɛ wa kɛ gu ní pɔtɛɛ komɛ nɛ wa maa pee kɛ ye bua mɛ ɔ nɔ. Ke suɔmi nɛ wa ngɛ ɔ mi ngɛ wae ɔ, lɔ ɔ maa ye bua wɔ nɛ wa maa hɛ kɛ su Yehowa kɛ wa nyɛmimɛ ɔmɛ a he wawɛɛ. Jehanɛ se hu ɔ, wa ma ná huɛ bɔmi nɛ ngɛ waa kɛ Yehowa kɛ ni kpahi a kpɛti ɔ he se kɛ maa ya neneene! w23.07 10 ¶11; 11 ¶13; 13 ¶18

E sa nɛ Kristofono fɛɛ Kristofono nɛ mwɔ e yi mi kpɔ ngɛ hiɔ tsami he. Ke nɔ ko ngɛ yi mi kpɔ mwɔe ngɛ hiɔ tsami he ɔ, e sa nɛ e ngɔ Baiblo mlaahi nɛ tsɔɔ kaa waa yu wa he ngɛ muɔ kɛ mumi yayamihi a he ɔ kɛ tsu ní. (Níts. 15:20; Gal. 5:​19, 20) Se ngɛ ní kpahi a mi lɛɛ, wa ti nɔ fɛɛ nɔ maa mwɔ e yi mi kpɔ ngɛ he. Eko ɔ, wa maa nu he kaa hiɔ tsami blɔ nɔ tomi komɛ hi loo a hí. Se kɛ̃ ɔ, e sa nɛ waa le kaa wa nyɛmimɛ ɔmɛ ngɛ he blɔ nɛ a mwɔɔ a yi mi kpɔ ngɛ hiɔ tsami blɔ nɔ tomi nɛ a suɔ ɔ he. Enɛ ɔ he ɔ, e sa nɛ wa ha nɛ oti nɛ ɔmɛ nɛ hi wa juɛmi mi. (1) Mawu Matsɛ Yemi ɔ pɛ lɛ ma nyɛ ma tsa adesahi, nɛ e po hiɔ se kulaa. (Yes. 33:24) (2) E sa nɛ wa ti nɔ fɛɛ nɔ nɛ “e ná nɔ mi mami nɛ pi si” ngɛ nɔ́ nɛ maa hi ha lɛ ɔ he. (Rom. 14:5) (3) Wa kojo we ni kpahi ngɛ yi mi kpɔhi nɛ a mwɔɔ ɔ he, nɛ wa pee we nɔ́ ko nɛ maa tɔ̃tɔ̃ a nane hulɔ. (Rom. 14:13) (4) Kristofohi jeɔ suɔmi kpo nɛ a le kaa kake peemi nɛ maa hi asafo ɔ mi ɔ he hia wawɛɛ pe nɛ a kɛ a susumihi maa nyɛ ni kpahi a nɔ.—Rom. 14:​15, 19, 20. w23.07 24 ¶15

Anɛ o bua jɔ huɛ bɔmi gbagbanii nɛ ngɛ o kɛ Yehowa nyɛ kpɛti ɔ he lo? E ngɛ heii kaa o bua jɔ he! Kɛ je blema tɔɔ ɔ, nihi fuu a bua jɔ huɛ bɔmi kpakpa nɛ ngɛ a kɛ Yehowa a kpɛti ɔ he. (La 104:​33, 34) Nihi fuu ngɔ níhi kɛ sã afɔle konɛ a nyɛ nɛ a sɔmɔ Yehowa. Jã nɔuu kɛ̃ nɛ e ji ngɛ nihi nɛ a ngɔ a he kɛ ha nɛ a sɔmɔ kaa Nazirbi loo nihi nɛ a jɔɔ a he nɔ ɔ blɔ fa mi. Nazirbi ɔmɛ ji Israelbi nɛ a ngɛ kã nɛ a ngɔ níhi kɛ sã afɔle konɛ a nyɛ nɛ a sɔmɔ Yehowa ngɛ blɔ klɛdɛɛ nɔ. Ngɛ Mose Mlaa a nya a, ke nyumu loo yo ko suɔ nɛ e kã Yehowa kita klɛdɛɛ ko konɛ e sɔmɔ lɛ kaa Nazirno kɛ ya si be ko ɔ, e ma nyɛ maa pee jã. (4 Mose 6:​1, 2) Ke Israelno ko kã kita kaa e ma sɔmɔ kaa Nazirno ɔ, e he hia nɛ e kɛ blɔ tsɔɔmi komɛ nɛ tsu ní, be mi nɛ Israelbi kpa amɛ lɛɛ a be jã pee. Mɛni he je nɛ Israelno ko maa hla kaa e ma sɔmɔ kaa Nazirno ɔ? Ke Israelno ko ná suɔmi nɛ mi wa kɛ ha Yehowa nɛ e hɛ sa ní kpakpahi nɛ Yehowa pee kɛ ha lɛ ɔ, lɔ ɔ ma nyɛ maa wo lɛ he wami konɛ e pee jã.—5 Mose 6:5; 16:17. w24.02 14 ¶1-2

Baiblo ɔ pɔɔ “anɔkuale yemi” loo “suɔmi nɛ se pui” ɔ he munyu tumi, nɛ lɔ ɔ tsɔɔ suɔmi nɛ mi wa nɛ Mawu ngɛ kɛ ha e sɔmɔli. Jehanɛ hu ɔ, e tsɔɔ suɔmi nɛ Mawu sɔmɔli jeɔ kpo kɛ tsɔɔ a sibi kɛ anɔkuale nɛ a yeɔ a sibi ɔ. (2 Sam. 9:​6, 7) Benɛ be ngɛ mi puee ɔ, wa yaa nɔ nɛ wa yeɔ anɔkuale. Mo susu bɔ nɛ enɛ ɔ ba mi ngɛ Daniel blɔ fa mi ha a he nɛ o hyɛ. Ngɛ Daniel si himi mi tsuo ɔ, e kɛ si fɔfɔɛhi fuu kpe nɛ biɔ nɛ e tsɔɔ kaa e maa ye Yehowa anɔkuale loo e be lɛ anɔkuale yee. Se benɛ e ye jeha 90 kɛ se ɔ, e kɛ ka ko nɛ nya wa kpe. Nihi nɛ a sɔmɔɔ ngɛ matsɛ we ɔ sume Daniel sane kulaa, nɛ a be bumi ko kɛ ha e Mawu ɔ. Enɛ ɔ ha nɛ a to ga kaa a maa gbe Daniel. A ha nɛ matsɛ ɔ kɛ e nine wo Mlaa ko sisi, nɛ mlaa nɛ ɔ ka Daniel anɔkuale yemi ɔ. Enɛ ɔ ma bi nɛ e hla kaa e maa ye matsɛ ɔ anɔkuale loo e maa ye Mawu anɔkuale. Nɔ́ nɛ a ngɛ hlae nɛ Daniel nɛ pee pɛ ji kaa e fĩ mlaa nɛ matsɛ ɔ wo ɔ se konɛ e ko sɔle ha Yehowa ligbi 30. Se Daniel pee we jã.—Dan. 6:​12-15, 20-22. w23.08 5 ¶10-12

Yehowa suɔ nɛ waa ya nɔ nɛ wa je suɔmi kpo kɛ tsɔɔ wa nyɛmimɛ ɔmɛ. Ke wa nyɛmi ko je su yaya ko kpo kɛ tsɔɔ wɔ ɔ, e sa nɛ wa ná nɔ mi mami kaa pi nɛ e je blɔ kaa e maa pee nɔ́ ko nɛ maa dɔ wɔ. E sa nɛ wa kai kaa wa nyɛmi ɔ ngɛ mɔde bɔe kaa e maa pee Yehowa suɔmi nya ní. (Abɛ 12:18) Yehowa suɔ e sɔmɔli anɔkualetsɛmɛ ɔmɛ ngɛ a gbɔjɔmi ɔmɛ tsuo se. Ke wa pee nɔ́ ko nɛ dɛ po ɔ, e yaa nɔ nɛ e kɛ wɔ peeɔ e huɛmɛ, nɛ e mi mi fu we wɔ. (La 103:9) Enɛ ɔ he ɔ, e sa nɛ waa kase lɛ nɛ wɔ hu waa ngɔ nihi a tɔmihi kɛ ke mɛ! (Efe. 4:32–5:1) Mo kai hu kaa akɛnɛ e be kɛe nɛ níhi a blɔ nya tomi yaya nɛ ɔ maa ba nyagbe he je ɔ, e sa nɛ waa hɛ kɛ su wa nyɛmimɛ ɔmɛ a he wawɛɛ. E sa nɛ waa hyɛ blɔ kaa a maa wa wɔ yi mi wawɛɛ. E ma nyɛ maa ba kaa a maa wo wɔ tsu ngɛ wa hemi kɛ yemi ɔ he je. Ke e ba jã a, wa maa hia wa nyɛmimɛ ɔmɛ wawɛɛ pe be ko nɛ be ɔ po.—Abɛ 17:17. w24.03 15-16 ¶6-7

Baiblo ɔ tu nihewi kɛ yihewi komɛ nɛ a hɛ kɛ su Yehowa he ɔ a he munyu. Akɛnɛ Yehowa kplɛɛ a nɔ he je ɔ, lɔ ɔ ha nɛ a ná bua jɔmi. Nihewi nɛ ɔmɛ a kpɛti nɔ kake ji David. Benɛ David wɛ ɔ, e hla kaa e maa pee Mawu huɛ, nɛ pee se ɔ, e ba pee matsɛ nɛ yeɔ anɔkuale. (1 Ma. 3:6; 9:​4, 5; 14:8) Ke o kase David he sane ɔ, e nɔ hyɛmi nɔ́ ɔ maa ye bua mo konɛ o ya nɔ nɛ o kɛ anɔkuale yemi nɛ sɔmɔ Yehowa. Jehanɛ hu ɔ, o ma nyɛ maa kase babauu kɛ kɔ Maako loo Timoteo he. A bɔni Yehowa sɔmɔmi benɛ a wɛ kulaa, nɛ a ya nɔ nɛ a kɛ anɔkuale yemi sɔmɔ lɛ. Akɛnɛ a hla kaa a ma sɔmɔ Yehowa he je ɔ, a ha nɛ Yehowa bua jɔ. Bɔ nɛ o maa ba o je mi ha amlɔ nɛ ɔ, maa tsɔɔ bɔ nɛ o si himi ma ji ha hwɔɔ se. Ke o ngɔ o hɛ kɛ fɔ Yehowa nɔ, se pi mo nitsɛ o nɔ ɔ, Yehowa maa tsɔɔ mo blɔ. (Abɛ 20:24) Lɔ ɔ ma ha nɛ o bua maa jɔ, nɛ o tsui maa nɔ o mi. Mo kai kaa Yehowa bua jɔ nɔ́ nɛ o nyɛɔ peeɔ kɛ haa lɛ ɔ he. Nɔ́ nɛ hi pe kulaa nɛ o ma nyɛ maa ngɔ o wami kɛ pee ji nɛ o ma sɔmɔ wa Tsɛ nɛ ngɛ suɔmi nɛ ji Yehowa a. w23.09 13 ¶18-19

Bɔfo Paulo le kaa e nyɛmimɛ Kristofo ɔmɛ yi mluku. Kaa nɔ hyɛmi nɔ́ ɔ, benɛ ni komɛ nɛ a ngɛ asafo ɔ mi ɔ kɛ Paulo kpe ɔ, a he we yi kaa e ba pee kaselɔ. (Níts. 9:26) Pee se ɔ, ni komɛ tu e he munyu yaya konɛ a kɛ puɛ e biɛ. (2 Kor. 10:10) Paulo na kaa asafo mi nɔkɔtɔma ko mwɔ yi mi kpɔ ko nɛ ma nyɛ maa tɔ̃tɔ̃ ni kpahi a nane. (Gal. 2:​11, 12) Jehanɛ hu ɔ, Maako nɛ e ji Paulo huɛ nɛ nyu bi ngɛ e kɛ lɛ a kpɛti ɔ pee Paulo nɔ́ ko nɛ dɔ lɛ wawɛɛ. (Níts. 15:​37, 38) Jinɛ Paulo ko nyɛ da ní nɛ ɔmɛ a nɔ nɛ e kɛ nihi nɛ a tɔ̃ e nɔ ɔ ko kpa bɔmi kulaa. Se kɛ̃ ɔ, e ya nɔ nɛ e ná e nyɛmimɛ ɔmɛ a he juɛmi nɛ da, nɛ e kɛ anɔkuale yemi sɔmɔ Yehowa. Mɛni lɛ ye bua Paulo nɛ e pee jã a? Paulo suɔ e nyɛmimɛ ɔmɛ wawɛɛ. Suɔmi nɛ Paulo ngɛ kɛ ha ni kpahi ɔ ye bua lɛ nɛ e kɛ e juɛmi mɛ a gbɔjɔmi ɔmɛ a nɔ, mohu ɔ, e kɛ e juɛmi ma su kpakpahi nɛ a ngɛ ɔ nɔ. Jehanɛ se hu ɔ, suɔmi ye bua Paulo nɛ e pee nɔ́ nɛ wa mwɔnɛ ɔ ngmami ɔ de ɔ. w24.03 15 ¶4-5

Sanehi fuu ngɛ Baiblo ɔ mi nɛ tsɔɔ se nami nɛ ngɛ he jɔmi he. Mo susu Isak nɔ hyɛmi nɔ́ ɔ he nɛ o hyɛ. Benɛ e ya to si ngɛ Filistibi ɔmɛ a zugba a nɔ ngɛ Gera a, e kpɔ mi bimɛ ɔmɛ a hɛ kɔ̃ e nɔ nɛ a tsi vuhi tsuo nɛ e papaa sɔmɔli ɔmɛ tsua a. E ngɛ mi kaa Isak ngɛ he blɔ nɛ e kɛ mɛ sãa nya loo e kɛ mɛ nɔɔ kunɔ mohu lɛɛ, se e pee we jã, mohu ɔ, e hia kɛ je lejɛ ɔ kɛ ho he tsitsaa ya, nɛ e ya tsua vu kpahi. (1 Mose 26:​12-18) Se Filistibi ɔmɛ tsɔɔ kaa jamɛ a vu ɔmɛ hu ji a níhi. Ngɛ enɛ ɔ tsuo se ɔ, Isak tsu si fɔfɔɛ ɔ he ní ngɛ tue mi jɔmi mi. (1 Mose 26:​19-25) Mɛni ye bua Isak nɛ e he jɔ be mi nɛ ni ɔmɛ bɔ mɔde kaa a maa wo e mi mi la po ɔ? E ngɛ heii kaa e kase e fɔli ɔmɛ a nɔ hyɛmi nɔ́ ɔ. E kase babauu kɛ je bɔ nɛ Abraham kɛ nihi hi si ngɛ tue mi jɔmi mi ha a mi. Jehanɛ hu ɔ, e kase bɔ nɛ Sara “ngɛ kpoo nɛ e he jɔ” ha a.—1 Pet. 3:​4-6; 1 Mose 21:​22-34. w23.09 15 ¶4

Yehowa tsɔ e Bi tɛte ɔ kɛ ba zugba a nɔ konɛ e ba tsɔɔ nihi Matsɛ Yemi ɔ he ní, nɛ e ngɔ e wami kɛ ha kaa kpɔmi nɔ́ nɛ e kɛ je wɔ kɛ je yayami kɛ gbenɔ dɛ mi. Lɔ ɔ se ɔ, Yehowa tle Yesu si nɛ e kpale kɛ ho hiɔwe ya konɛ e ya ye Matsɛ ngɛ Mawu Matsɛ Yemi ɔ mi. Munyuyi titli nɛ ngɛ Baiblo ɔ mi ji kaa Yehowa maa wo e biɛ ɔ nguɔ. E maa pee enɛ ɔ be mi nɛ e ma tsu e yi mi tomi nɛ kɔɔ zugba a he ɔ he ní kɛ́ gu e Matsɛ Yemi nɛ Kristo ji e nya Matsɛ ɔ nɔ. Yehowa yi mi tomi ɔ be tsakee gblegbleegble. E ma nɔ mi kaa e ma tsu e yi mi tomi ɔ he ní kokooko. (Yes. 46:10; Heb. 6:​17, 18) Ngɛ be nɛ sa mi ɔ, Yehowa ma ha nɛ zugba a ma plɛ pee paradeiso, nɛ Adam kɛ Hawa a sisi bimɛ nɛ a ye mluku, nɛ a peeɔ nɔ́ nɛ da a ji nihi nɛ a maa hi nɔ “kɛ maa ya neneene.” (La 22:26) Se tsa pi yi mi tomi nɛ ɔ he ní pɛ nɛ Yehowa ma tsu. E ma ha nɛ adebɔ níhi tsuo nɛ a ngɛ hiɔwe kɛ zugba a nɔ ɔ maa pee kake kɛ sɔmɔ lɛ hulɔ. Kɛkɛ ɔ, adesahi tsuo maa je a tsui mi kɛ bu lɛ tue kaa lɛ ji je ɔ tsuo Nɔ Yelɔ. (Efe. 1:​8-11) Anɛ blɔ nɔ nɛ Yehowa gu kɛ ngɛ e yi mi tomi ɔ he ní tsue ɔ pee we mo nyakpɛ lo? w23.10 20 ¶7-8

Benɛ Yudabi nɛ a je Babilon ɔ ya su Yerusalem ɔ, e kɛ we kulaa nɛ a kɛ haomihi bɔni kpemi. A nyɛ we nɛ a hyɛ a weku ɔmɛ a nɔ saminya, ni komɛ bɔni basabasa peemi ngɛ Persia Nɔ Yemi ɔ mi hulɔ, nɛ mahi nɛ a bɔle Yuda bi ɔmɛ ɔ te si kɛ wo mɛ. Enɛ ɔ ha nɛ e he wa ha Yudabi ɔmɛ a kpɛti ni komɛ kaa a maa ngɔ a juɛmi kɛ ma Yehowa sɔlemi we ɔ nɛ a maa ma ekohu ɔ nɔ. Enɛ ɔ he ɔ, Yehowa tsɔ gbali enyɔ nɛ ji, Hagai kɛ Zakaria konɛ a ya ye bua Yudabi ɔmɛ nɛ a kɛ kã nɛ bɔni Yehowa sɔmɔmi ekohu. Ngɛ anɔkuale mi ɔ, ní tsumi nɛ gbali nɛ ɔmɛ tsu ɔ wo yiblii wawɛɛ. (Hag. 1:1; Zak. 1:1) Se maa pee jeha 50 se ɔ, e he ba hia kaa a wo Yudabi ɔmɛ nɛ a je Babilon kɛ ba a he wami wawɛɛ ekohu. Ezra nɛ ji womi ngmalɔ nɛ e he be ɔ je Babilon kɛ ba Yerusalem konɛ e ba wo Mawu we bi he wami konɛ a ngɔ Yehowa jami kɛ ye kekleekle blɔ he ngɛ a si himi mi. (Ezra 7:​1, 6) Gbami nɛ Hagai kɛ Zakaria gba a ye bua Mawu we bi blema nɛ a ngɔ a hɛ kɛ fɔ Yehowa nɔ be mi nɛ nihi te si kɛ wo mɛ. Jã kɛ̃ nɛ mwɔnɛ ɔ hu ɔ, gbami nɛ ɔmɛ ma nyɛ maa ye bua wɔ konɛ wa ná nɔ mi mami kaa ke waa kɛ haomihi ngɛ kpee po ɔ, Yehowa maa ye bua wɔ.—Abɛ 22:19. w23.11 14-15 ¶2-3

Mɛni blɔ nɔ wa maa gu kɛ je suɔmi kpo kɛ tsɔɔ wa nyɛmimɛ ɔmɛ? Blɔ kake nɛ wa maa gu nɔ kɛ pee jã ji kaa wa maa wo a bua? Wa ma nyɛ maa ‘ya nɔ maa wo wa nyɛmimɛ ɔmɛ a bua’ ke wa mi mi sãa wɔ ngɛ a he. (1 Tɛs. 4:18) Mɛni maa ye bua wɔ konɛ suɔmi nɛ wa ngɛ kɛ ha wa sibi ɔ mi nɛ wa wawɛɛ? Lɔ ɔ ji nɛ́ wa maa ngɔ wa nyɛmimɛ ɔmɛ a tɔmihi kɛ ke mɛ, ke e he wa ha wɔ kaa wa maa pee jã po. Mɛni he je nɛ amlɔ nɛ ɔ ji be nɛ e he hia wawɛɛ kaa waa suɔ wa nyɛmimɛ ɔmɛ ɔ? Petro tsɔɔ nɔ́ he je nɛ e he hia kaa waa pee jã. E de ke: “Níhi tsuo a nyagbe su haa. Enɛ ɔ he ɔ, . . . nyɛɛ suɔ nyɛ sibi wawɛɛ nitsɛ.” (1 Pet. 4:​7, 8) Be mi nɛ Satan je yaya nɛ ɔ ma nyagbe ɔ, mɛni wa ma nyɛ maa hyɛ blɔ? Yesu de e se nyɛɛli ɔmɛ ke: “Ye biɛ ɔ he je ɔ, je ma amɛ tsuo maa nyɛ nyɛ.” (Mat. 24:9) Akɛnɛ nihi nyɛɔ wɔ he je ɔ, e sa nɛ waa ya nɔ nɛ waa pee kake. Ke wa suɔ wa nyɛmimɛ ɔmɛ ɔ, Satan be nyɛe ma puɛ kake peemi nɛ ngɛ wa kpɛti ɔ.—Filip. 2:​1, 2. w23.11 13 ¶18-19

Anɔkualehi nɛ ngɛ Mawu Munyu ɔ mi ɔ ngɛ he wami wawɛɛ. Ke wa tsɔɔ nihi anɔkualehi nɛ kɔɔ Yehowa he, kɛ nɔ tutuutu nɛ e ji ɔ, wa yɔseɔ nɔ́ ko nɛ ngɛ nyakpɛ. Mɛni ji lɔ ɔ? Lɔ ɔ ji kaa nihi ba leɔ kaa Satan ji lakpatsɛ, nɛ a naa wa hiɔwe Tsɛ ɔ su kpakpa amɛ nɛ e ngɛ ɔ. Ke a ba le kaa Yehowa ji nɔ ko nɛ ngɛ he wami nɛ se be ɔ, a tsui nɔɔ a mi. (Yes. 40:26) A náa nɔ mi mami kaa Yehowa yeɔ dami sane. (5 Mose 32:4) A kaseɔ níhi babauu kɛ kɔɔ Yehowa nile nɛ se be ɔ he. (Yes. 55:9; Rom. 11:33) Jehanɛ hu ɔ, ke a ba le kaa Yehowa su titli ji suɔmi ɔ, lɔ ɔ woɔ a bua wawɛɛ. (1 Yoh. 4:8) Be mi nɛ a ngɛ hɛe kɛ ngɛ Yehowa he sue ɔ, jã nɔuu kɛ̃ nɛ hɛ kɛ nɔ fɔmi nɛ a ngɛ kaa a maa hi si kɛ ya neneene ɔ hu mi waa. E ji he blɔ ngua nɛ wa ná kaa wa maa ye bua nihi konɛ a hɛ kɛ su wa hiɔwe Tsɛ ɔ he! Ke wa pee jã a, Yehowa maa na wɔ kaa ‘wa piɛɛ e he kɛ ngɛ ní tsue.’—1 Kor. 3:5. w24.02 12 ¶15

Ke a kɛ mo ngɛ Baiblo ɔ kasee loo o fɔli nɛ a ji Odasefohi ɔ lɛ a ngɛ mo tsɔsee ɔ, anɛ o ngɛ he susue kaa o ma ha nɛ a baptisi mo lo? Ke jã a, lɛɛ e ji oti kpakpa nɛ o kɛ ma o hɛ mi! Se loko a maa baptisi mo ɔ, e ma bi nɛ o jɔɔ o he nɔ kɛ ha Yehowa. Kɛ o ma plɛ kɛ jɔɔ o he nɔ kɛ ha Yehowa ha kɛɛ? Lɔ ɔ ji kaa o maa sɔle nɛ o wo lɛ si kaa o ma ja lɛ pɛ, nɛ o maa ngɔ e suɔmi nya ní peemi kɛ ye kekle blɔ he ngɛ o si himi mi. Jã nɛ o maa pee ɔ tsɔɔ kaa o ngɛ Yehowa si woe kaa o maa ya nɔ maa suɔ lɛ “kɛ o tsui tsuo kɛ o susuma tsuo kɛ o juɛmi tsuo kɛ o he wami tsuo.” (Maak. 12:30) He nɔ jɔɔmi ji nɔ́ ko nɛ o maa pee ngɛ laami mi, o kɛ Yehowa pɛ. Se baptisimi lɛɛ, o maa pee ngɛ ma hɛ mi, e haa nɛ ni kpahi naa kaa o jɔɔ o he nɔ kɛ ha Yehowa momo. Ke o jɔɔ o he nɔ kɛ ha Yehowa a, e tsɔɔ kaa o kã kita ko nɛ hɛdɔ ngɛ he, nɛ Yehowa hyɛɔ blɔ kaa o maa ye jamɛ a kita a nɔ.—Fiɛɛ. 5:4. w24.03 2 ¶2; 3 ¶5

Gba si himi ko be nɛ nyagba be mi. Baiblo ɔ ha nɛ e pee heii kaa nihi nɛ a sɛ gba si himi mi ɔ “maa na amanehlu ngɛ a he lo ɔ mi.” (1 Kor. 7:28) Mɛni he je? Ejakaa ni enyɔ ɔmɛ nɛ a sɛ gba si himi mi ɔ tsuo yi mluku, nɛ e slo a ti nɔ fɛɛ nɔ kɛ e su, níhi nɛ e bua jɔ he, kɛ níhi nɛ e bua jɔɛ he. Jehanɛ hu ɔ, e slo he nɛ a tsɔse a kpɛti nɔ fɛɛ nɔ ngɛ. Ke be ngɛ mi pue ɔ, a ma nyɛ ma yɔse su ko ngɛ a sibi he nɛ a li loko ji a sɛ gba si himi mi. Ní nɛ ɔmɛ tsuo ma nyɛ maa ngɔ nyagba kɛ ba. Ke nyagba ko ba a, e sɛ nɛ a pia a sibi, mohu ɔ, e sa nɛ a kai kaa mɛ tsuo a tɔ̃ɔ, lɔ ɔ he ɔ, e sa nɛ a pee kake kɛ tsu nyagba a he ní. Ke a kɛ nyagbahi ngɛ kpee ɔ, a ma nyɛ maa nu he kaa a je a sibi a he be bɔɔ loo a po gba a mi kulaa. Ke a je a sibi a he be bɔɔ aloo a po gba a mi po ɔ, anɛ lɔ ɔ tsɔɔ kaa a ma ná bua jɔmi lo? Dɛbi. Yehowa suɔ kaa hunomɛ kɛ yigbayihi nɛ a ya nɔ nɛ a kɛ a sibi nɛ hi si ke a kpɛti nɔ kake ha nɛ níhi a mi wa kɛ ha e he piɛɛlɔ ɔ po. w24.03 16 ¶8; 17 ¶11

Benɛ o jɔɔ o he nɔ kɛ ha Yehowa nɛ a baptisi mo se ɔ, hɛ nɔ kami nɛ o ngɛ kaa o maa si hi si kɛ ya neneene paradeiso ɔ mi wa. O ba le Yehowa nɛ o ná suɔmi nɛ mi wa kɛ ha lɛ. (Heb. 5:13–6:1) Eko ɔ, munyu nɛ ngɛ Roma Bi 5:​2-4 ɔ ba mi ngɛ o blɔ fa mi. O kɛ amanehlu slɔɔtoslɔɔtohi kpe nɛ o nyɛ nɛ o fĩ si, nɛ Yehowa ha nɛ o na kaa e bua jɔ o he. Akɛnɛ o ba le kaa Yehowa suɔ mo, nɛ e kplɛɛ o nɔ he je ɔ, amlɔ nɛ ɔ, o ngɛ yi mi tomi kpakpa he je nɛ e sa kaa o mlɛ kɛ ya si benɛ e si womi ɔmɛ maa ba mi. O hɛ kɛ nɔ fɔmi ɔ mi ba wa wawɛɛ pe sa a. E ba pee nɔ́ nitsɛ kɛ ha mo, nɛ e ná o nɔ he wami wawɛɛ. E haa nɛ o kɛ o weku mi bimɛ ɔmɛ hiɔ si saminya, o mwɔɔ yi mi kpɔhi nɛ da, nɛ o kɛ o be hu tsuɔ ní saminya. Bɔfo Paulo tsɔɔ oti kpa ko nɛ he hia nɛ kɔɔ hɛ kɛ nɔ fɔmi nɛ o ba ná benɛ Mawu kplɛɛ o nɔ ɔ se ɔ. E ma nɔ mi kɛ ha mo kaa o hɛ kɛ nɔ fɔmi ɔ maa ba mi kokooko.—Rom. 15:13. w23.12 12-13 ¶16-19

Ke waa kɛ kahi ngɛ kpee ɔ, e haa nɛ bɔ nɛ wa nuɔ níhi a he ha, bɔ nɛ wa susuɔ níhi a he ha, kɛ bɔ nɛ wa peeɔ wa ní ha a tsakeɔ. Kaa bɔ nɛ ke kɔɔhiɔ nɛ nya wa ngɛ fiae nɛ oslɔke kpaa mele kɛ yaa kɛ baa a, jã nɔuu kɛ̃ nɛ ke waa kɛ haomihi ngɛ kpee ɔ, wa náa he numi slɔɔtoslɔɔtohi. Mɛni Yehowa peeɔ kɛ yeɔ buaa wɔ ke bɔ nɛ wa nuɔ he ha a ha nɛ wa ngɛ haoe tsɔ ɔ? Yehowa wo si kaa e maa wo wɔ he wami. Ke kɔɔhiɔ nɛ nya wa ngɛ fiae ngɛ wo ɔ nɔ ɔ, oslɔke kuɔ kɛ náa mele ɔ, nɛ e haa nɛ mele ɔ kpaa. Enɛ ɔ he ɔ, bɔ nɛ pee nɛ mele ɔ nɛ e nyɛ nɛ e da oslɔke ɔ nya a, a pee ní komɛ ngɛ mele ɔ sisi hiɛ kɛ hiɛ. Ní nɛ ɔmɛ yeɔ buaa mele ɔ nɛ e kpa we tsɔ, nɛ e haa nɛ nihi nɛ a ngɛ mele ɔ mi ɔ hiɔ slɔkee nɛ a ya suɔ he nɛ a yaa a. Se kɛ̃ ɔ, loko ní nɛ ɔmɛ nɛ a pee kɛ wo mele ɔ sisi hiɛ kɛ hiɛ ɔ ma tsu ní saminya a, ja mele ɔ ngɛ nyɛɛe. Jã nɔuu kɛ̃ nɛ Yehowa hu maa wo wɔ he wami ke wa ya nɔ nɛ waa kɛ anɔkuale yemi sɔmɔ lɛ ngɛ haomi behi a mi. w24.01 22 ¶7-8

Ke o ngɛ gbeye yee ɔ, mo bi o he ke, ‘Mɛni Yehowa pee ha mi be ko nɛ be?’ Lɔ ɔ se ɔ, mo pue o yi mi tɛ ngɛ e nibɔ ní ɔmɛ a he. Kaa nɔ hyɛmi nɔ́ ɔ, e ngɛ mi kaa Yehowa bɔɛ lohwe pɛlitsɛmɛ kɛ mɔmɔhi ngɛ e subai nɔ, nɛ a be nyɛe ma ja lɛ mohu lɛɛ, se e hyɛɛ a nɔ. Ke wa ‘to bɔ nɛ Yehowa hyɛɛ a nɔ ha a he hɛ saminya’ a, e ma ha nɛ wa ná hɛ kɛ nɔ fɔmi nɛ mi wa kaa Yehowa maa hyɛ wa nɔ. (Mat. 6:​25-32) Jehanɛ hu ɔ, mo susu nɔ́ nɛ Yehowa pee ha e sɔmɔli ɔ he nɛ o hyɛ. O ma nyɛ maa kane nɔ ko nɛ e je hemi kɛ yemi nɛ mi wa kpo ɔ he sane ngɛ Baiblo ɔ mi, aloo o ma nyɛ maa kane Yehowa sɔmɔli nɛ a ngɛ mwɔnɛ ɔ a níhi a si kpamihi. Jehanɛ hu ɔ, mo pue o yi mi tɛ ngɛ bɔ nɛ Yehowa plɛ kɛ hyɛ o nɔ ha be ko nɛ be ɔ he. Mɛni Yehowa pee kɛ ye bua mo nɛ o ba na anɔkuale ɔ? (Yoh. 6:44) Mɛni blɔhi a nɔ nɛ e gu kɛ ha o sɔlemihi a heto? (1 Yoh. 5:14) Mɛni blɔ nɔ nɛ o ngɛ Yesu kpɔmi afɔle sami ɔ he se náe daa ligbi ngɛ o si himi mi?—Efe. 1:7; Heb. 4:​14-16. w24.01 4 ¶6; 7 ¶17