Ezekiel
30 Kɛkɛ nɛ Yehowa kɛ mi tu munyu ekohu nɛ e de mi ke: 2 “Nɔmlɔ bi, moo gba nɛ o de ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“‘Nyɛ fo ya, ligbi ɔ ma!’
3 Ligbi ɔ su si ta, ee, Yehowa ligbi ɔ su ta.
E maa pee bɔkuhi a ligbi, ligbi nɛ a to fɔ si ha je ma amɛ.
4 A maa hia klaate ngɛ Egipt nɔ, nɛ ke nihi gbo pue si ngɛ Egipt ɔ, gbeye maa nu Etiopiabi ɔmɛ;
A ngɔ ní babauu nɛ e ngɛ ɔ kɛ je, nɛ a ku e sisi tomi ɔmɛ kɛ pue si.
5 Etiopia, Put, Lud kɛ nihi nɛ a je ma kpa amɛ a mi ɔ tsuo,*
Kɛ Kub, kɛ zugba a nɔ bi ɔmɛ tsuo nɛ a so ɔ,*
Mɛ tsuo a ma gbo ngɛ klaate nya.”’
6 Nɔ́ nɛ Yehowa de ji nɛ ɔ nɛ:
‘Nihi nɛ a fĩ Egipt se ɔ hu ma gbo,
Nɛ a maa ba e he wami nɛ e kɛ woɔ e he nɔ ɔ si.’
“‘A kɛ klaate maa gbe mɛ tsuo ngɛ zugba a nɔ, kɛ je Migdol kɛ ya si Siene,’ Nyɔmtsɛ Matsɛ Yehowa lɛ de. 7 ‘A maa pee ma doku pe kulaa, nɛ a ma kpata e ma amɛ a hɛ mi pɛsɛpɛsɛ. 8 Ke i slɛ la ngɛ Egipt, nɛ nihi tsuo nɛ a kɛ lɛ pee kake ɔ a hɛ mi kpata a, a ma ná le kaa imi ji Yehowa. 9 Jamɛ a ligbi ɔ, ma tsɔ tsɔli kɛ mele konɛ a ya ha nɛ Etiopiabi nɛ a heɔ a he yeɔ ɔ, a he nɛ kpokpo; gbeye maa nu mɛ ngɛ Egipt haomi ligbi ɔ nɔ, ejakaa e maa ba kokooko.’
10 Nɔ́ nɛ Nyɔmtsɛ Matsɛ Yehowa de ji nɛ ɔ: ‘Ma gu Babilon Matsɛ Nebukadnezar* nine nɔ kɛ ha nɛ Egipt asafo kuu babauu ɔ tsuo nɛ ta. 11 E kɛ e tabuli ɔmɛ, nɛ ji nihi nɛ a yi mi wa pe kulaa nɛ́ a ngɛ je ma amɛ a mi ɔ maa ba nɛ a ma ba kpata zugba a hɛ mi. A maa hia a klaate ɔmɛ kɛ wo Egipt he, nɛ a ma ha nɛ zugba a nɔ ma hyi tɔ kɛ gbogboehi. 12 Ma ha nɛ Nilo nyu dɔ ɔmɛ maa pee kaa zugba gbigbli, nɛ ma jua zugba a kɛ ha yiwutsotsɛmɛ. Ma ha nɛ nibwɔhi ma puɛ zugba a kɛ nɔ́ fɛɛ nɔ́ nɛ ngɛ mi ɔ, nɛ e maa fɔ si gu. Imi Yehowa nitsɛ lɛ i de.’
13 “Nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘Ma kpata amagahi nɛ i hiɔ* ɔ a hɛ mi, nɛ ma je amagahi nɛ a he be se nami ɔ kɛ je Nof.* A be ganɔ ko nae hu nɛ e je Egipt zugba a nɔ, nɛ ma ha nɛ gbeye maa ba Egipt zugba a nɔ. 14 Ma ha nɛ Patros maa pee ma doku, nɛ ma mɛ Zoan he la nɛ ma gbla No* tue. 15 Ma plɛ ye mi mi fumi ɔ kɛ pue Sin, nɛ ji Egipt he piɛ pomi he ɔ nɔ, nɛ ma kpata nihi nɛ a ngɛ No ɔ a hɛ mi. 16 Ma slɛ la ngɛ Egipt; nɛ gbeye maa nu Sinbi ɔmɛ, nɛ a maa ywia No gbogbo ɔmɛ, nɛ a ma ba tua Nof* piani katakata! 17 A kɛ klaate ma kpata nihewi ɔmɛ nɛ a ngɛ On* kɛ Pibeset ɔ a hɛ mi, nɛ a maa nuu ma a mi bi ɔmɛ kɛ ho nyɔguɛ tso mi ya. 18 Ke i ku Egipt kuɛpã tso ɔmɛ ngɛ Tapanhes ɔ, diblii maa wo ngɛ lejɛ ɔ. E he wami nɛ e kɛ woɔ e he nɔ ɔ se maa po, bɔku maa ha e nɔ nɛ a maa ngɔ e ma a mi bi ɔmɛ kɛ ho nyɔguɛ tso mi ya. 19 Ma gbla Egipt tue nɛ a ma ná maa le kaa imi ji Yehowa.’”
20 Ngɛ jeha 11 ɔ we kekleekle nyɔhiɔ ɔ we ligbi kpaagone ɔ nɔ ɔ, Yehowa kɛ mi tu munyu nɛ e de mi ke: 21 “Nɔmlɔ bi, i ku Egipt matsɛ Farao kɔni; a be fĩe konɛ e tsa aloo a kɛ nɔ́ ko be lɛ blaae nɛ a fĩ konɛ he wami nɛ e ba mi ekohu bɔ nɛ e ma nyɛ kɛ wo klaate nɔ.”
22 “Enɛ ɔ he ɔ, nɔ́ nɛ Nyɔmtsɛ Matsɛ Yehowa de ji nɛ ɔ: ‘I kɛ Egipt matsɛ Farao ná, nɛ ma ku e kɔni ɔmɛ, nɔ́ nɛ ngɛ he wami kɛ nɔ́ nɛ ku momo ɔ, nɛ ma ha nɛ klaate ɔ maa je e dɛ kɛ nɔ si. 23 Kɛkɛ ɔ, ma gbɛ Egiptbi ɔmɛ kɛ fĩa je ma amɛ a mi, nɛ ma fiee mɛ kɛ ho zugba amɛ a nɔ ya. 24 Ma wo Babilon matsɛ ɔ kɔni mi he wami,* nɛ ma ngɔ ye klaate ɔ kɛ wo e dɛ mi, nɛ ma ku Farao kɔni ɔmɛ, nɛ e ma kɛmɛ wawɛɛ ngɛ e hɛ mi* kaa nɔ ko nɛ e ngɛ gboe. 25 Ma wo Babilon matsɛ ɔ kɔni mi he wami, se Farao kɔni mi maa jɔ; nɛ ke i kɛ ye klaate ɔ wo Babilon matsɛ ɔ dɛ mi nɛ e wo nɔ ngɛ Egipt zugba a nɔ ɔ, a ma ná le kaa imi ji Yehowa. 26 Ma gbɛ Egiptbi ɔmɛ kɛ fĩa je ma amɛ a mi, nɛ ma fiee mɛ kɛ ho zugba amɛ a nɔ ya, nɛ a ma ná le kaa imi ji Yehowa.’”