Moo Fiɛɛ Kɛ Esɔ Yemi!
1. Mɛni ji Paulo ga womi nɛ hia kaa wa susu he saminya ngɛ wa be nɛ ɔ mi?
1 “Yaa nɔ nɛ o fiɛɛ sɛgbi ɔ be tsuaa be.” (2 Tim. 4:2) Mɛni heje Paulo ga womi nɛ ɔ he hia wawɛɛ ngɛ wa be nɛ ɔ mi? Mɛni blɔ nɔ munyu nɛ ɔ ma nyɛ maa sa waa kɛ ni kpahi wa wami he?
2. Mɛni heje nɛ e sa kaa wa hla nihi nɛ nui sane kpakpa a lolo ɔ fitsofitso?
2 E Kɔɔ Nimli A Wami He: Nimli ayɔhi babauu ngɛ je ɔ mi nɛ a nui sane kpakpa nɛ ma ha nɛ a ná yi wami hemi ɔ lolo. (Rom. 10:13-15; 1 Tim. 4:16) Wa ngɛ tsui kpakpatsɛmɛ fuu nae ngɛ zugba kpɔhi nɛ wa pɔɔ a mi nítsumi ɔ mi. Ke wa ya zugba kpɔ ɔ mi ligbi kpa loo be kpa mi ngɛ ligbi ɔ mi ɔ, eko ɔ, wa ma ya na nɔ kpa. Nihi nɛ wa ma hla fitsofitso kaa kikɛ ɔ ma ha wɔ he nile kpakpa nɛ wa be nɔ ko muɔ he fɔ yee.—Níts. 20:26.
3. Mɛni blɔ nɔ waa kɛ wa be ma nyɛ ma tsu ní ngɛ nile mi ke wa ya fiɛɛmi?
3 Kekle jeha lafa a mi Kristofoli kɛ si temi kɛ womi nɛ nya wa kpe mohu, se kɛ̃ a ‘ha Yerusalem hyi tɔ kɛ a tsɔɔmi ɔ.’ (Níts. 5:28) Anɛ wɔ hu wa mwɔ wa yi mi kpɔ kaa wa maa ‘ye odase kɛ pi si lo’? (Níts. 10:42) Ke wa ya fiɛɛmi ɔ, anɛ waa kɛ wa be tsuɔ ní ngɛ nile mi lo? Ke nɔ nɛ waa kɛ lɛ ngɛ nyɛɛe ɔ ngɛ nɔ ko si bie ɔ, anɛ waa suu nihi nɛ ngɛ bee ɔ a he konɛ waa kɛ mɛ nɛ sɛɛ ní lo?
4. Mɛni blɔ nɔ fiɛɛmi nɛ wa maa fiɛɛ be tsuaa be ɔ maa ye bua wɔ konɛ waa hwɔɔ daa?
4 E Haa Nɛ Wa Hɛ Hii Wa He Nɔ: Akɛnɛ je nɛ ɔ nyagbe ɔ su si ta heje ɔ, e sa kaa wa hɛ nɛ hi wa he nɔ, nɛ waa hwɔɔ daa. (1 Tes. 5:1-6) Ke waa kɛ nihi sɛɛɔ Matsɛ Yemi hɛ nɔ kami nɛ wa ngɛ ɔ he ní be tsuaa be ɔ, e be hae nɛ je nɛ ɔ mi ní ɔmɛ ma he wa tsui. (Luka 21:34-36) Mohu ɔ, Yehowa ligbi ɔ ‘blɔ nɛ wa maa hyɛ’ daa a, maa wo wɔ he wami konɛ wa tsu fiɛɛmi nítsumi nɛ ma he nihi a yi wami ɔ babauu.—2 Pet. 3:11, 12.
5. Mɛni blɔ nɔ bumi nɛ wa ngɛ ha wami ɔ woɔ wɔ he wami ngɛ fiɛɛmi nítsumi ɔ mi?
5 Ke wa fiɛɛ kɛ esɔ yemi ɔ, wa ngɛ tsɔɔe kaa wa buu wami kaa bɔnɛ Yehowa buu wami ɔ: “E sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui.” (2 Pet. 3:9; Ezek. 33:11) Nyɛ ha nɛ waa mwɔ wa yi mi kpɔ kaa wa maa fiɛɛ kɛ tsɔɔ nihi babauu nɛ wa ma nyɛ ngɛ wa zugba kpɔ ɔ mi, konɛ e pee yi jemi ha Yehowa!—La 109:30.