Paradeiso Ehe Ngɛ́ Zugba a Nɔ

HYƐ tso gagaaga amɛ, kɛ mɔmɔhi nɛ ngɛ fɛu, kɛ yoku gagaaga amɛ. Hiɛ ɔ be fɛu lo? Hyɛ bɔnɛ afugbɛ ɔ ngɛ ní yee ngɛ jokuɛ ɔ dɛ mi ha. Nɛ hyɛ jata amɛ kɛ okpɔngɔ ɔmɛ nɛ daa si ngɛ nga a nɔ. Anɛ o be suɔe kaa o hi we nɛ́ ngɛ he ko kaa kikɛ ɔ mi lo?

Mawu suɔ kaa o hi si ngɛ zugba a nɔ kɛ ya neneene ngɛ paradeiso mi. Nɛ e sume kaa haomi ko nɛ ba o nɔ nɛ o na nɔ́ kaa bɔnɛ nihi ngɛ nɔ́ nae mwɔnɛ ɔ. Baiblo ɔ si womi kɛ ha nihi nɛ maa hi paradeiso ehe ɔ mi ɔ ji nɛ ɔ nɛ: ‘Mawu kɛ mɛ maa hi si. Nɛ gbenɔ loo ya fomi loo nɔ́ nami ko be si hie hu. Ní momo ɔmɛ be kɛ ho.’

Yesu ma ha nɛ tsakemi nɛ ngɛ bua jɔmi nɛ ɔ maa ba mi. O le benɛ e maa pee enɛ ɔ lo? E maa pee enɛ ɔ be mi nɛ e je yayami peemi kɛ yayami peeli kɛ je zugba a nɔ. Mo kai kaa, benɛ Yesu ba hi zugba a nɔ ɔ, e tsa hiɔtsɛmɛ slɔɔtoslɔɔtohi, nɛ e tle nihi nɛ gbo po si. Yesu pee enɛ ɔ konɛ e kɛ tsɔɔ nɔ́ nɛ e maa pee ngɛ zugba a tsuo nɔ, ke e ba ye Matsɛ ngɛ Mawu matsɛ yemi ɔ mi.

Moo lɛɛ mo susu bɔnɛ si himi ɔ maa pee bua jɔmi ha ngɛ Paradeiso ehe ɔ mi ngɛ zugba a nɔ ɔ he nɛ o hyɛ! Yesu kɛ nihi nɛ e hla kɛ piɛɛ e he ɔ maa ye matsɛ ngɛ hiɔwe. Nɔ yeli nɛ ɔmɛ maa hyɛ nɔ tsuaa nɔ nɛ ngɛ zugba a nɔ ɔ nɔ, nɛ a ma ha nɛ́ a hi si ngɛ bua jɔmi mi. Ha nɛ waa hyɛ nɔ́ nɛ e sa kaa waa pee bɔnɛ pee nɛ wa ná nɔ mi mami kaa Mawu ma ha wɔ neneene wami ngɛ e paradeiso ehe ɔ mi.