Fã 11 ɔ Nya Blimi Munyu

Fã nɛ ɔ tuɔ níhi nɛ ngɛ Mateo womi ɔ kɛ ya si Kpo Jemi womi ɔ mi ɔ he munyu. A fɔ Yesu kɛ wo weku nɛ a be nɔ́ ko tsɔ ɔ mi. Weku ɔ hi ma nyafii ko mi. Yesu kɛ e tsɛ nɛ e ji kapitɛ ɔ tsu ní. Yesu ji nɔ nɛ ma he adesahi a yi wami. Yehowa hla lɛ kaa Matsɛ ngɛ hiɔwe Matsɛ Yemi ɔ nya. Ke fɔlɔ ji mo ɔ, moo ye bua o bi ɔ konɛ e na kaa Yehowa je blɔ nɛ e hla weku nɛ Yesu je mi ɔ, kɛ he nɛ e hi kɛ wa a hulɔ. Ha nɛ e na bɔ nɛ Yehowa plɛ kɛ bu Yesu he ha konɛ Herode nɛ ko gbe lɛ. Ha nɛ e na hu kaa nɔ́ ko be nyɛe maa tsi Yehowa yi mi tomi nya. Ha nɛ e na blɔ nɔ nɛ Yehowa gu kɛ hla Yohane konɛ e dla blɔ ɔ kɛ fɔ si ha Yesu. Jehanɛ hu ɔ, moo tsɔɔ lɛ níhi nɛ Yesu pee ngɛ e jokuɛ mi kɛ tsɔɔ kaa e suɔ kaa e maa le Yehowa he níhi fuu.