NÍ KASEMI 22
Mɛni Blɔ Nɔ O Maa Gu Kɛ Fiɛɛ Sane Kpakpa a?
Benɛ o ngɛ Baiblo ɔ mi anɔkuale ɔmɛ kasee ɔ, eko ɔ, o ma de ke, ‘E sa nɛ nɔ fɛɛ nɔ nɛ nu munyu nɛ ɔ!’ E ji anɔkuale, e sa nɛ nɔ fɛɛ nɔ nɛ nu! Se eko ɔ, o maa ye gbeye kaa o ma de ni kpahi níhi nɛ o kase ɔ. Enɛ ɔ he ɔ, wa maa kase blɔ nɔ nɛ o maa gu kɛ ye gbeye yemi nɛ ɔ nɔ ɔ he ní, konɛ o kɛ bua jɔmi nɛ de nihi sane kpakpa nɛ ngɛ Baiblo ɔ mi ɔ.
1. Mɛni blɔ nɔ o maa gu kɛ de nihi nɛ́ o le mɛ ɔ níhi nɛ o kase ɔ?
Yesu kaseli ɔmɛ de ke: “Wa be nyɛe ma kpa níhi nɛ wa na kɛ níhi nɛ wa nu ɔ he munyu tumi.” (Ní Tsumi 4:20) A bua jɔ níhi nɛ a kase ngɛ Yesu ngɔ ɔ he wawɛɛ, enɛ ɔ he ɔ, a suɔ nɛ a de nɔ fɛɛ nɔ. Anɛ mo hu o nuɔ he jã lo? Ke jã a, lɛɛ mo hla he blɔhi nɛ́ o kɛ ma de o weku li kɛ o huɛmɛ níhi nɛ o kase ɔ. Ke o ná he blɔ ɔ, o kɛ mɛ nɛ tu munyu ngɛ bumi mi.—Kane Kolose Bi 4:6.
Blɔ komɛ nɛ o ma nyɛ maa gu a nɔ kɛ je sisi
Ke o kɛ o weku li ngɛ ní sɛɛe ɔ, moo tu nɔ́ ko nɛ o kase ngɛ Baiblo ɔ mi ɔ he munyu. O ma nyɛ maa je sisi kɛ munyu nɛ ɔ: “I kase nɔ́ ko nɛ ngɛ bua jɔmi otsi nɛ ɔ.”
O kɛ o huɛ ko nɛ e be he wami aloo e ngɛ yeyeeye pee ɔ nɛ susu ngmami ko nɛ woɔ nɔ he wami ɔ he.
Ke nihi nɛ o kɛ tsuɔ ní ɔ bi mo ke, ‘kɛ otsi ɔ ya nɔ kɛɛ?’ ɔ, moo ngɔ he blɔ ɔ kɛ de mɛ nɔ́ ko nɛ o kase ngɛ Baiblo ɔ mi aloo ngɛ asafo mi kpe sisi.
Moo tsɔɔ o huɛmɛ ɔmɛ jw.org wɛbsaiti ɔ.
Ke a kɛ mo ma Baiblo ɔ kasemi ɔ, moo fɔ ni kpahi nine nɛ a ba piɛɛ o he kɛ kase, aloo moo tsɔɔ mɛ blɔ nɔ nɛ a maa gu kɛ bi ngɛ jw.org ɔ nɔ nɛ́ a kɛ mɛ nɛ ba kase Baiblo ɔ.
2. Mɛni he je nɛ e he hia wawɛɛ kaa o maa piɛɛ asafo ɔ he kɛ ya fiɛɛmi ɔ?
Tsa pi nihi nɛ Yesu kaseli ɔmɛ le ɔ pɛ nɛ a fiɛɛ sane kpakpa a kɛ ha. Yesu “tsɔ mɛ enyɔɔnyɔ kɛ sɛ e hlami kɛ ya ma fɛɛ ma” mi konɛ a ya fiɛɛ. (Luka 10:1) Fiɛɛmi nɛ a pee kake kɛ fiɛɛ ɔ ha nɛ nihi babauu ná he blɔ kɛ bu sane kpakpa a tue. Akɛnɛ kaseli ɔmɛ pee kake kɛ fiɛɛ he je ɔ, a ná bua jɔmi babauu. (Luka 10:17) Anɛ mo hu o kɛ ma nyɛ maa pee oti kaa o maa piɛɛ asafo ɔ he kɛ ya fiɛɛmi lo?
MOO KASE BABAUU
Moo kase blɔ nɔ nɛ o maa gu kɛ ye gbeye yemi nɔ nɛ́ o ná bua jɔmi nɛ ngɛ sane kpakpa a fiɛɛmi mi ɔ eko.
3. Yehowa maa piɛɛ o he
Ni komɛ nɛ a suɔ nɛ a fiɛɛ ɔ ma nyɛ maa ye gbeye ngɛ bɔ nɛ nihi maa na mɛ ha, aloo bɔ nɛ nihi maa pee a ní ha a he.
Anɛ o yeɔ gbeye kaa o ma de ni kpahi níhi nɛ o kase ɔ lo? Mɛni he je?
Mo je VIDEO ɔ, nɛ nyɛ susu sane bimi nɛ ɔ he.
Kɛ niheyo ɔ kɛ yihewi ɔmɛ ngɛ video ɔ mi ɔ plɛ kɛ ye a gbeye yemi ɔ nɔ ha kɛɛ?
Nyɛɛ kane Yesaya 41:10, nɛ nyɛ susu sane bimi nɛ ɔ he:
Mɛni he je nɛ e sa nɛ o sɔle ke o ngɛ gbeye yee kaa o maa fiɛɛ ɔ?
Anɛ o le lo?
Yehowa Odasefohi fuu ngɛ nɛ be ko nɛ be ɔ, a susu kaa a be nyɛe maa fiɛɛ sane kpakpa a. Kaa nɔ hyɛmi nɔ́ ɔ, Sergey ji nɔ ko nɛ e susu kaa se nami be e he, nɛ e yeɔ ha lɛ kaa e kɛ ni kpahi maa sɛɛ ní. Se kɛ̃ ɔ, e ba kase Baiblo ɔ. E de ke: “E ngɛ mi kaa i ye gbeye mohu lɛɛ, se kɛ̃ ɔ, i kɛ nihi bɔni nɔ́ nɛ i ngɛ kasee ɔ he ní sɛɛmi. E pee mi nyakpɛ kaa níhi nɛ i kase ngɛ Baiblo ɔ mi, nɛ́ i kɛ ni kpahi sɛɛ he ní ɔ ha nɛ i ná kã wawɛɛ, nɛ ye nɔ gbagba te. Enɛ ɔ nɛ i pee ɔ wo ye hemi kɛ yemi ɔ mi he wami.”
4. Mo je bumi kpo
Ke o ngɛ sane kpakpa a fiɛɛe ɔ, ko susu nɔ́ nɛ o ma de ɔ pɛ he, mohu ɔ, mo susu bɔ nɛ o ma de lɛ ha a hu he. Nyɛɛ kane 2 Timoteo 2:24 kɛ 1 Petro 3:15 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Kɛ o kɛ ngmami nɛ ɔmɛ ma tsu ní ha kɛɛ ke o kɛ nihi ngɛ ní sɛɛe kɛ kɔ Baiblo ɔ he?
Pi o weku li kɛ o huɛmɛ tsuo nɛ a maa kplɛɛ nɔ́ nɛ o ma de mɛ ɔ nɔ. Ke e ba lɛ jã a, mɛni o ma nyɛ maa pee? Nɛ mɛni e sɛ nɛ o pee?
Mɛni he je nɛ e sa nɛ o bi sanehi nɛ ma ha nɛ nihi nɛ a susu a yi mi mohu pe nɛ o ma de mɛ nɔ́ nɛ e sa nɛ a he ye ɔ?
5. Sane kpakpa a nɛ o maa fiɛɛ ɔ ma ha nɛ o ná bua jɔmi
Yehowa lɛ e kɛ sane kpakpa fiɛɛmi ní tsumi ɔ wo Yesu dɛ. Kɛ Yesu na ní tsumi nɛ ɔ ha kɛɛ? Nyɛɛ kane Yohane 4:34 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Niye ní kpakpa haa nɛ wa hiɔ wami mi, nɛ e haa nɛ wa bua jɔɔ. Mɛni he je nɛ Yesu ngɔ Mawu suɔmi nya ní peemi, nɛ́ sane kpakpa a fiɛɛmi hu piɛɛ he ɔ kɛ to ní yemi he ɔ?
Ngɛ mɛni blɔhi a nɔ nɛ sane kpakpa a nɛ o maa fiɛɛ ɔ ma ha nɛ o ná bua jɔmi?
Ga Womi
Ngɛ otsi ɔ mi kpe ɔ sisi ɔ, moo hyɛ kaa mɛni ji ní komɛ nɛ o ma nyɛ maa kase nɛ maa ye bua mo konɛ o nyɛ nɛ o kɛ nihi nɛ je ní sɛɛmi sisi.
Mo de nɔ nɛ e kɛ mo kaseɔ Baiblo ɔ nɛ e tsɔɔ mo nɔ́ nɛ o maa pee konɛ a ha mo sukuu bi a ní tsumi ngɛ otsi ɔ mi kpe ɔ mi ɔ eko. Enɛ ɔ maa ye bua mo konɛ o nyɛ nɛ o dla o he nɛ o kɛ ni kpahi nɛ sɛɛ nɔ́ nɛ o ngɛ kasee ɔ he ní.
Moo ngɔ munyu nɛ ngɛ “Ni Komɛ Deɔ Ke” loo “Nɔ Ko Ma Bi Ke” blɔ he nɛ ngɛ womi nɛ ɔ mi ɔ kɛ dla o he konɛ o le blɔ nɔ nɛ o maa gu kɛ ha sanehi nɛ nihi pɔɔ bimi, kɛ níhi nɛ a deɔ kɛ tsiɔ ní sɛɛmi nya a heto ha.
NƆ KO MA BI KE: “Kɛ níhi ngɛ nɔ yae kɛɛ?”
Mɛni blɔ nɔ nɛ o maa gu konɛ o kɛ he blɔ nɛ ɔ nɛ de nɔ ɔ nɔ́ nɛ o kase ngɛ o Baiblo mi ní kasemi ɔ mi?
NYA MWƆMI
Sane kpakpa fiɛɛmi ní tsumi ɔ haa nɔ bua jɔmi. Eko ɔ, o ma susu kaa e he wa, se ke o nyɛ nɛ o je sisi ɔ, o maa na kaa e he wɛ kulaa.
Mi Nylɔmi
Mɛni he je nɛ e sa nɛ o fiɛɛ sane kpakpa a kɛ ha ni kpahi ɔ?
Mɛni blɔ nɔ nɛ o maa gu kɛ je bumi kpo ke o ngɛ fiɛɛe?
Ke o yeɔ gbeye kaa o maa fiɛɛ ɔ, kɛ o ma plɛ kɛ ye gbeye yemi ɔ nɔ ha kɛɛ?
NÍ KPAHI NƐ MAA YE BUA MO
Moo kase blɔ kpiti eywiɛ komɛ a nɔ nɛ o ma nyɛ maa gu nɛ o kɛ jw.org kaadi ɔ ma tsu ní kɛ fiɛɛ sane kpakpa a.
Moo kase su eywiɛ komɛ nɛ maa ye bua mo konɛ o nyɛ nɛ o fiɛɛ sane kpakpa a.
“Anɛ O Pee Klaalo Kaa O Maa Pee Wo Hɛlɔ Nɛ E Hɛɛ Nimli Lo?” (Hwɔɔmi Mɔ, September 2020)
Moo hyɛ bɔ nɛ nɔ hyɛmi nɔ́ ko nɛ ngɛ Baiblo ɔ mi ɔ ma nyɛ maa ye bua wɔ ha nɛ wa ná kã kɛ fiɛɛ sane kpakpa a ke wa ji jokuɛwi po.
Moo kase blɔ nɔ nɛ o maa gu nɛ́ o kɛ o weku li nɛ a kase we Yehowa he ní ɔ maa sɛɛ ní kɛ kɔ Baiblo ɔ he.
“Bɔ Nɛ Wa Maa Pee Kɛ Su Wa Weku Li Nɛ A He We Yi ɔ A Tsui He” (Hwɔɔmi Mɔ, March 15, 2014)