NÍ KASEMI 38
O Bua Nɛ Jɔ Wami Nɛ Ji Nike Ní ɔ He
Akɛnɛ wa ngɛ wami mi he je ɔ, níhi fuu ngɛ nɛ wa ma nyɛ maa pee nɛ ma ha wɔ bua jɔmi. Ke waa kɛ nyagbahi ngɛ kpee po ɔ, ní komɛ ngɛ nɛ a haa nɛ wa bua jɔɔ ngɛ si himi mi. Mɛni wa maa pee kɛ tsɔɔ kaa wa bua jɔ wami nɛ ji nike ní ɔ he? Nɛ mɛni yi mi tomi titlii he je nɛ e sa nɛ waa pee jã a?
1. Mɛni he je nɛ e sa nɛ wa bua nɛ jɔ wami he ɔ?
E sa nɛ wa bua nɛ jɔ wami he ejakaa e ji nike ní nɛ se be nɛ́ je wa Tsɛ nɛ ngɛ suɔmi nɛ ji Yehowa a ngɔ. E mi lɛ “wami tsuo jeɔ kɛ baa,” ejakaa lɛ nɛ e bɔ wami. (La 36:9) “Lɛ nitsɛ nɛ e haa nihi tsuo wami kɛ mumi kɛ níhi tsuo.” (Ní Tsumi 17:25, 28) Yehowa ha wɔ níhi nɛ wa hia konɛ wa nyɛ nɛ waa hi wami mi. Se pi lɔ ɔ pɛ, e to ní nɛ ɔmɛ a he blɔ nya saminya konɛ wa ná bua jɔmi ngɛ si himi mi.—Kane Ní Tsumi 14:17.
2. Mɛni wa maa pee konɛ Yehowa nɛ na kaa wa bua jɔ wami nɛ ji nike ní nɛ e kɛ ha wɔ ɔ he?
Yehowa susuɔ o he kɛ je benɛ o yayo ngɔ o hɔ tɔɔ. David nɛ e ji Mawu sɔmɔlɔ ɔ de kɛ kɔ Yehowa he ngɛ sɔlemi ko nɛ́ e sɔle, nɛ́ Yehowa ha nɛ a ngma ngɛ e Munyu ɔ mi ɔ mi ke: “O hɛngmɛhi po na mi benɛ i ji muɔ loku ngɛ fɔmi kotoku mi ɔ.” (La 139:16, NW) O wami he jua wa wawɛɛ ha Yehowa. (Kane Mateo 10:29-31.) Enɛ ɔ he ɔ, ke nɔ ko je blɔ nɛ e po nɔ ko wami nɔ aloo e po lɛ nitsɛ e wami nɔ ɔ, e maa dɔ Yehowa wawɛɛ.a (2 Mose 20:13) Jehanɛ se hu ɔ, ke wa peeɔ níhi nɛ e kɛ wa wami maa wo oslaa mi, aloo wa pee we níhi nɛ maa po ni kpahi a wami he piɛ ɔ, e maa dɔ Yehowa. Ke wa hyɛɛ wa wami nɔ saminya, nɛ wa buɔ ni kpahi a wami ɔ, lɔ ɔ tsɔɔ kaa wa bua jɔ wami nɛ ji nike ní nɛ se be nɛ Yehowa kɛ dloo wɔ ɔ he.
MOO KASE BABAUU
Moo hyɛ ní komɛ nɛ o maa pee kɛ tsɔɔ kaa o bua jɔ wami nɛ ji nike ní ɔ he.
3. Moo hyɛ o nɔmlɔ tso ɔ kɛ o wami nɔ saminya
Kristofohi nɛ a jɔɔ a wami nɔ kɛ ha Yehowa a ngɔɔ a wami tsuo kɛ sɔmɔɔ lɛ. Akɛnɛ e sa nɛ Kristofohi nɛ a ‘ngɔ a nɔmlɔ tso ɔmɛ kɛ ha Mawu kaa afɔle nɛ ngɛ klɔuklɔu’ he je ɔ, e sa nɛ a hyɛ nɔ saminya. Nyɛɛ kane Roma Bi 12:1, 2, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni lɛ e sa nɛ e wo mo he wami konɛ o hyɛ o nɔmlɔ tso mi he wami nami nɔ saminya?
Mɛni blɔ komɛ a nɔ o ma nyɛ maa gu kɛ pee jã?
4. Moo pee níhi nɛ maa po o kɛ ni kpahi nyɛ he piɛ kɛ je plaami aloo gbenɔ he
Baiblo ɔ woɔ wɔ he wami kaa waa yu wa he ngɛ ní peepeehi nɛ a kɛ wa wami ma nyɛ maa wo oslaa mi ɔ he. Mo je VIDEO ɔ konɛ o na ní komɛ nɛ o ma nyɛ maa pee kɛ po o he piɛ.
Nyɛɛ kane Abɛ 22:3 ɔ, nɛ nyɛ susu blɔ nɔ nɛ o maa gu kɛ po o kɛ ni kpahi nyɛ he piɛ ɔ he . . .
ngɛ o we ɔ mi.
ngɛ o ní tsumi he ɔ.
ke o ngɛ o kpɔ mi gbɔlee.
ke o ngɛ lɔle mi aloo o ngɛ lɔle hɛɛe.
5. Moo po bi nɛ a fɔ we lɛ lolo ɔ wami he piɛ
David tsɔɔ kaa Yehowa susuɔ bimwɔyo nɛ e ngɛ wae ngɛ e nyɛ fɔmi kotoku mi ɔ he wawɛɛ. Nyɛɛ kane La 139:13-15, 17, nɛ nyɛ susu sane bimi nɛ ɔ he:
Ngɛ Yehowa hɛ mi ɔ, mɛni be nɛ nɔ ko wami jeɔ sisi, benɛ a ngɔ e hɔ aloo benɛ a fɔ lɛ?
Mlaa nɛ Yehowa wo blema Israel bi ɔmɛ ɔ po yohɔyo kɛ e bi nɛ ngɛ e mi mi ɔ he piɛ. Nyɛɛ kane 2 Mose 21:22, 23b ɔ ngɛ sisi ningma a mi nɛ nyɛ susu sane bimihi nɛ nyɛɛ se nɛ ɔmɛ a he:
Ke nɔ ko li e he be nɛ e pee nɔ́ ko nɛ́ ha nɛ bi nɛ e ngɛ muklii mi ɔ gbo ɔ, kɛ Yehowa naa nɔ ɔ ha kɛɛ?
Ke nɔ ko je blɔ nɛ e gbe bi nɛ e ngɛ muklii mi ɔ, kɛ Yehowa maa nu he ha kɛɛ?c
Kɛ o naa Yehowa susumi ngɛ sane nɛ ɔ he ɔ ha kɛɛ?
Eko ɔ, yo nɛ e buɔ wami kaa e he jua wa a po ma susu kaa nɔ́ pɛ nɛ e ma nyɛ maa pee ji kaa e ma je hɔ. Nyɛɛ kane Yesaya 41:10, nɛ nyɛ susu sane bimi nɛ ɔ he:
Ke a ngɛ yo ko nɔ nyɛe kaa e je hɔ ɔ, mɛnɔ nɛ e sa nɛ e bi nɛ e ye kɛ bua lɛ? Mɛni he je?
NI KOMƐ DEƆ KE: “Ke yo ko ngɔ hɔ nɛ e na kaa e maa pee nyagba ha lɛ ɔ, e ma nyɛ ma je.”
Mɛni ha nɛ o ná nɔ mi mami kaa Yehowa buɔ yohɔyo kɛ e bi nɛ e fɔ we lɛ lolo ɔ a wami kaa e he jua wa a?
NYA MWƆMI
Baiblo ɔ tsɔɔ kaa e sa nɛ wa ná bumi kɛ ha wami nɛ waa po he piɛ, ejakaa e ji nike ní nɛ Yehowa kɛ ha wɔ. Wɔ nitsɛmɛ wa wami kɛ ni kpahi a wami hu piɛɛ he.
Mi Nylɔmi
Mɛni he je nɛ adesa wami he jua wa ha Yehowa a?
Kɛ Yehowa nuɔ he ha kɛɛ ke nɔ ko je blɔ nɛ e po nɔ ko wami nɔ?
Mɛni he je nɛ o bua jɔ wami nɛ ji nike ní ɔ he ɔ?
NÍ KPAHI NƐ MAA YE BUA MO
Mɛni wa maa pee kɛ na Yehowa si ngɛ wami nɛ e kɛ dloo wɔ ɔ he?
Mo hla heto kɛ ha sane bimi nɛ ɔ: Anɛ ke yo ko je hɔ hyɛ ɔ, Mawu kɛ maa ke lɛ lo?
“Mɛni Baiblo ɔ De Ngɛ Hɔ Jemi He?” (Munyu nɛ ɔ ngɛ Intanɛti ɔ nɔ)
Moo hyɛ bɔ nɛ e sa kaa Mawu susumi ngɛ wami he ɔ nɛ ye bua wɔ nɛ waa hla hɛja jemi nɛ sa ha.
“Anɛ E Sa Kaa O Fiɛ Fiɛmihi Nɛ Ma Nyɛ Ma Ha Nɛ O Plaa Lo?” (O Hɛ Nɛ Tsɛ̃!, October 8, 2000)
Hyɛ bɔ nɛ Baiblo ɔ ma nyɛ maa ye bua nɔ ko nɛ e peeɔ lɛ kaa e gbe e he ɔ ha.
a Yehowa susuɔ nihi nɛ a kɔni mi jɔ̃ aloo a tsui ku ɔ a he wawɛɛ. (La 34:18) E le níhi nɛ haoɔ nihi, nɛ́ e haa nɛ a susuɔ kaa a maa gbe a he ɔ, nɛ e suɔ kaa e maa ye bua mɛ. Moo kane munyu nɛ ji “E Peeɔ Mi Kaa Ma Gbe Ye He—Anɛ Baiblo ɔ Ma Nyɛ Maa Ye Kɛ Bua Mi Lo?” nɛ ngɛ ní kasemi nɛ ɔ mi ngɛ Ní Kpahi Nɛ Maa Ye Bua Mo blɔ he ɔ, konɛ o na bɔ nɛ Yehowa ma nyɛ maa ye bua nihi ha konɛ a kua susumi nɛ ɔ.
b Sisi ningma: 2 Mose 21:22, 23, NW: “Ke nyumuhi ngɛ kunɔ nɔe nɛ a he ya si yohɔyo ko nɛ e fɔ be mi nɛ e sui e fɔmi be, se gbenɔ ko ji mi kɛ bɛ ɔ, nɔ nɛ e he si lɛ ɔ nɛ e wo hiɔ nɛ yo ɔ huno ɔ ma bɔ lɛ ɔ; é wo kɛ gu kojoli ɔmɛ a nɔ. Se ke gbenɔ ko je mi kɛ ba a, lɛɛ á ngɔ wami kɛ to wami nane mi.”
c Yehowa kɛ nihi nɛ a je hɔ hyɛ nɛ a pia a he ɔ a he yayami ɔ ma nyɛ maa ke mɛ, enɛ ɔ he ɔ, e sɛ kaa a he nile nɛ bu mɛ fɔ tsɔ̃. Ke o suɔ nɛ o le babauu ɔ, moo kane munyu nɛ yi ji, “Mɛni Baiblo ɔ De Ngɛ Hɔ Jemi He?” nɛ e ngɛ Ní Kpahi Nɛ Maa Ye Bua Mo blɔ he nɛ ngɛ ní kasemi nɛ ɔ mi ɔ.