Bekwame gebruik van die Uitvoering van God se wil- brosjure
1 ’n Hoogtepunt van verlede jaar se “Goddelike Vrede”-Streekbyeenkoms was die uitreiking van die brosjure Jehovah se Getuies—Verenig in die uitvoering van God se wil wêreldwyd. Hierdie brosjure is uitgegee om ons Bybelstudente te help om vertroud te raak met die enigste sigbare organisasie wat Jehovah vandag gebruik om sy wil uit te voer.
2 Die Genootskap stel al baie jare lank voor dat ons aan die einde van elke Bybelstudie ’n paar minute inruim om ten minste een kenmerk of aspek van die moderne teokratiese organisasie te bespreek. Op hierdie manier sal nuwe belangstellendes die betekenis en waarde van die Bybelwaarhede wat hulle leer makliker waardeer. Hierdie nuwe brosjure met sy baie kleurillustrasies behoort uiters waardevol te wees vir sulke leersame besprekings.
HOE OM DIT TE GEBRUIK
3 Die brosjure bevat 15 hofies, van “Ons wil help” tot “Verenig in die uitvoering van God se wil”. Daar is genoeg inligting onder party van die hofies vir ’n paar besprekings. Neem die tyd om al die teksverwysings saam met die Bybelstudent te lees. Jy sal ’n paar hersieningsvrae aan die einde van die meeste van hierdie afdelings vind. Dit kan goed benut word om die hoofgedagtes te beklemtoon. Onthou egter dat die besprekings kort moet wees en nie die materiaal wat in die Bybelstudie self bespreek is, moet oorskadu nie.
4 Raak vertroud met die brosjure. Dra jou persoonlike eksemplaar saam met jou in die veldbediening. Hoewel dit nie deel van hierdie maand se aanbod is nie, kan geleenthede opduik om dit in die huis-tot-huiswerk te gebruik. Opregte mense wat ons teëkom, het moontlik valse bewerings oor Jehovah se Getuies gehoor, en die brosjure kan gebruik word om hulle misvattings oor ons werk en geloof reg te stel. Die belangrikste gebruik van hierdie brosjure is egter dat dit aan die einde van ’n Bybelstudie as grondslag vir besprekings oor die organisasie kan dien.
5 Een gedeelte van die brosjure bespreek “Vergaderinge om tot liefde en goeie werke aan te spoor”. Jy kan hierdie informasie gebruik om die belangrikheid van Christenvergaderinge te beklemtoon en die student aan te spoor om dit gereeld by te woon. Wanneer jy die Gemeentelike Boekstudie bespreek, kan jy verduidelik hoe dit gehou word en die publikasie wat op die oomblik bestudeer word vir die student wys. Aangesien die Gemeentelike Boekstudies so gehou word dat daar genoeg tyd is om al die teksverwysings te lees, behoort dit selfs vir nuwe studente maklik te wees om by te bly en aan die studie deel te neem deur tekste te lees en kommentaar te lewer as hulle wil. Aangesien die groepe klein is, word almal die geleentheid gebied om deel te neem en mekaar te leer ken.
6 Hoe bevoorreg is ons tog om te lewe in hierdie tyd van die einde wanneer Jehovah ware aanbidding onder sy uitverkorenes hier op aarde herstel het. Miljoene erken die leiding van die geesgesalfde volgelinge van Christus en begin nou sê: “Ons wil met julle saamgaan, want ons het gehoor dat God met julle is” (Sag. 8:23). Die Uitvoering van God se wil-brosjure is nog ’n tydige instrument wat ons kan gebruik om hierdie nuwe belangstellendes te help om steeds vooruitgang te maak namate hulle waardering vir Jehovah se moderne teokratiese organisasie toeneem. Laat ons dit goed benut om nuwe belangstellendes na Jehovah se organisasie te rig.