Mɩnla Anyɩnlɩlazʋ Yɛɛ Ɩwɔ Ɛkɛnɩ Ɩma Awuvʋlɔ a?

1. Mɩnla odwokɔba yɛɛ ɩwɔ ɛkɛnɩ ɩma awuvʋlɔ a?

Mmɩlɩ mɔɔ Gyisɛsɩ idwuli Bɛtani mɔɔ ibike Gyelusalamɩ nɩ, nɩ ɩ ɔhɔnwʋ Lazʋlɔsʋ iwu ma ili aɣile anla. Gyisɛsɩ ɩnɩ Lazʋlɔsʋ yi mmelima mmaalɛ, Maata nɩɩ Mɛɛlɩ bɔhɔlɩ dɩka mɔɔ beziyeli yɩ nɩ. Ɩákyɛ bela yɛɛ mmenii sʋ̃maa zɛ ɣayiyialɩ ɛkɛnɩ a. Tua kezimɔ Maata nɩɩ Mɛɛlɩ bɛanyɩ ileli mmɩlɩ mɔɔ Gyisɛsɩ idunwonli Lazʋlɔsʋ ɩɣalɩ nnwʋanlɩ nu ebiyekʋ̃ nwʋ mfonyini wɔ wʋ adwɩnɩ nu kila!​—Kɩnga Dwɔɔnʋ 11:21-24, 38-44.

Nɩ Maata izi odwokɔba mɔɔ ɩfalɩ awuvʋlɔ nwʋ dadaada. Na nɩ izi kɛɛ Gyehova ikodunwo awuvʋlɔ ma bɛkɛɣa nnwʋanlɩ nu dɔkʋ̃ wɔ azɩlɛ yɩ zʋ.​—Kɩnga Dwɔɔnʋ 11:24.

2. Mɩnla bʋwabɩlɛ yɛɛ awuvʋlɔ wɔ onumɔ a?

Bɛvalɩ ndɛdɛlɛ bɔwɔlɩ enii. (1 Kɔlɛntɩmaa 15:47) Sunzuma bela ɩ́da yɛ eniiwudo yɩ nu. Yɛdɩ nnwʋnlamɩ nu abɔdɩ, meti yɛ nnwʋnlamɩ yɩ fʋã bela iyiaki egyimayɛlɛ mmɩlɩ mɔɔ yewu nɩ. Sɛ yewu a, yɛ amɩyɛba yɩ sʋ̃ iwu, na yeti nu adwɩnɩ munwala sʋ̃ iminli. Meti mɔ bodunwonli Lazʋlɔsʋ nɩ, ɩákã hwɩɩ ɩfalɩ yɩ wulo mɔ iwuli nɩ nwʋ iluwakɛɛ awuvʋlɔ bézi dɩyɛ bela.​—Kɩnga Dwɔɔnʋ 11:11-14.

Asʋ̃ Gyehova ɩyɛ mmenii ayɛkʋa wɔ sɩnɩ nu wɔ bo owulo mɛda a? Iluwakɛɛ Bayɩbʋlʋ ikile kɛɛ awuvʋlɔ bézi dɩyɛ bela nɩ ti, Abɔnsamɩ sɩnɩ nu ehilehilelɛ nɩ ɩdɩ awohwi na ikua Nyamɩnlɩ idima nwʋ evinli. Gyehova ɩdɩ Nyamɩnlɩ mɔɔ ɩwɔ ɔlɔlɛ na ɩlɛ́ma mmenii bɔkɔnwʋ amanɩyɛ wɔ ɔzɔ ɔhʋanɩ yɩ zʋ kyɩ̃.​—Kɩnga 1 Dwɔɔnʋ 4:8.

Kilá vidiyo mɔɔ ise Mɩnla Bʋwabɩlɛ Yɛ Awuvulɔ Bɔwɔ Numɔ a?

3. Asʋ̃ awuvʋlɔ bɔkɔhʋla bɛnɩ yɛ kɛdɩndɛ a?

Awuvʋlɔ bɛáhʋla bɛtɩndɛ anzɛnyɩɩ bɛtɩ odwokɔ bela. (Psalm 115:17, NW) Awɔvʋlɔ tanɩ be wɔ ɛkɛnɩ mɔɔ bɛyɛ bɔnwʋ kɛɛ mmenii mɔɔ bowu, na ama bɛnɩ mmenii adɩndɛ. (Dwuudu 6) Gyehova ikyi kɛɛ yekeɣizia funli nwʋ anzɛnyɩɩ yɛnɩ funli kɛdɩndɛ.​—Kɩnga Deuteronomy 18:10, 11, NW.

4. Aninyiammɔ yɛɛ bekezia bɛkɛɣa nnwʋanlɩ nu a?

Mmenii mbɩmmbɩɩ mɔɔ bɔwu nɩ bekezia bɛkɛɣa nnwʋanlɩ nu wɔ azɩlɛ yɩ zʋ. Bokodunwo mmenii be po mɔɔ bɛyɛlɩ nninyeni tanɩ iluwakɛɛ nɩ bézi Nyamɩnlɩ nɩ ti.​—Kɩnga Egyima 24:15.

Mmenii mɔɔ bokodunwo bɛ nɩ bekenyia ɔnwʋmɔ ɔhʋanɩ bokozuma Nyamɩnlɩ ɩnwʋ nɔhʋanlɛ odwokɔ na bɛahile dedi wɔ Gyisɛsɩ ɩnu iluwa sutiye mɔɔ bɛkɛyɛ bɛkɛma yɩ nɩ zʋ. (Yikile 20:11-13) Mmenii mɔɔ bekezia bɛkɛɣa nnwʋanlɩ nu ebiyekʋ̃ na bɛkɛyɛ nninyeni baaba nɩ, bɔkɔhʋla bekenyia nnwʋanlɩ mɔɔ íni awielɩyɛ wɔ azɩlɛ yɩ zʋ.​—Kɩnga Dwɔɔnʋ 5:28, 29.

5. Mɩnla yɛɛ awudunwolɩyɛ nɩ ɩkã ɩfalɩ Gyehova ɩnwʋ ikile yɛ a?

Nyamɩnlɩ ɩzʋ̃manlɩ ɩ Ɣa nɩ ma ɩɣa iwuli ɩmanlɩ yɛ kɛmɔ ɩkɛyɛ a, awuvʋlɔ bekenyia anyɩnlɩlazʋ. Meti awudunwolɩyɛ nɩ ɩda Gyehova ɩlɔlɛ nɩɩ yɩ ngokɛnwʋnlɛ ali ikile yɛ. Sɛ awuvʋlɔ bɛba nnwʋanlɩ nu ebiyekʋ̃ a, aninyia dɩyɛ paa yɛɛ ɛkɛbɛyɩ kɛɛ ɔkɔnwʋ yɩ a?​—Kɩnga Dwɔɔnʋ 3:16; Wulomimaa 6:23.