Kɛ Ɩkɛyɛ Na Wʋahʋla Wʋaɣike Nyamɩnlɩ a?

1. Asʋ̃ Nyamɩnlɩ itiye mpayɩwɔlɛ munwala a?

Nyamɩnlɩ ɩtʋ salɛ ɩfɩlɛ mmenii azʋlɔtʋ munwala kɛɛ beɣike yɩ wɔ mpayɩwɔlɛ nu. (1 Dwɔɔnʋ 5:14) Naasʋ̃, kɛ mpayɩwɔlɛ munwala yɛɛ itiye anzɛnyɩɩ ide itiã nu a. Kɛ ndianwʋ nɩ, iádiye benyia mɔɔ ɩyɛ yɩ yɩ ayɛkʋa nɩ yɩ mpayɩwɔlɛ. (1 Pita 3:7) Akʋ̃ sʋ̃, mmɩlɩ mɔɔ Yizilayamaa bɔhɔlɩ ɔzʋlɔ bɛyɛlɩ tanɩ nɩ, iátiye bɛ mpayɩwɔlɛ. Ɩdɩ nɔhʋanlɛ paa kɛɛ, mpayɩwɔlɛ ɩdɩ ɔnwʋmɔ ɔhʋanɩ mɔɔ yenyia. Mɔɔ ɩkɩnla ɔnwʋmɔ nɩ, sɛ tanɩvʋlɔ inu ɩnwʋ a itiye yɩ mpayɩwɔlɛ.​—Kɩnga Isaiah 1:15, NW; Egyima 3:19.

Kilá vidiyo mɔɔ ise Asʋ̃ Nyamɩnlɩ Itiye Mpayɩwɔlɛ Munwala a?

2. Mɩnla ɔhʋanɩ zʋ yɛ ɩwɔ kɛɛ yɛbɔ mpayɩ a?

Mpayɩwɔlɛ ɩkɩnla yɛɛ ɔzʋ̃mɩnlɛ nwʋ, meti ɩsɛ kɛɛ yɛbɔ yɛ Wɔlɛvʋlɔ Gyehova yɩzayɩ nkʋ̃ kyeinyii mpayɩ. (Matiyu 4:10; 6:9) Akʋ̃ sʋ̃, kɛmɔ yɛáli munli nɩ ti, ɩsɛ kɛɛ yɛbɔ mpayɩ wɔ Gyisɛsɩ yi dima nu, sianti yɛ lɛ kɛɛ, mɛyɩ yɛɛ iwuli ɩmanlɩ yɛ tanɩ a. (Dwɔɔnʋ 14:6) Gyehova ɩábɛyɩ kɛɛ yekohwii mpayɩ yekogua yɛ tile nu anzɛnyɩɩ yɛkɛhɛlɛ na yɛahila zʋ yɛaɣɩnga. Ɩpɛyɩ kɛɛ yɛzʋ̃ yɛahʋnlɩnɩ nu yɛbɔ yɩ mpayɩ.​—Kɩnga Matiyu 6:7; Fɩlɩpɩmaa 4:6, 7.

Yɛ Wɔlɛvʋlɔ nɩ itiye mpayɩ mɔɔ yɛbɔ wɔ yɛ ti nu mɔɔ iavindeli ye munwa nɩ po. (1 Samuel 1:12, 13, NW) Ɩtʋ salɛ ɩfɩlɛ yɛ kɛɛ yɛwɔ yɩ mpayɩ mmɩlɩ bela nu, dɩ kɛɛ mmɩlɩ mɔɔ yedwodwu nwɔnɩ nɩɩ mmɩlɩ mɔɔ yɛkɛla, mmɩlɩ mɔɔ yɛbɛali aliyɛ nɩɩ mmɩlɩ mɔɔ yɛnwʋ amanɩyɛ be nɩ.​—Kɩnga 1 Pita 5:7; Matiyu 15:36.

3. Mɩnla ti mɔɔ Ahilisinyiamaa bɔbɔ numɔ beyiyia a?

Ɩáyɛ mɛlɛkɛ kɛɛ yekeɣike Nyamɩnlɩ, iluwakɛɛ mmenii mɔɔ yɛ nɩ bɛ da nɩ béni dedi wɔ Nyamɩnlɩ nɩɩ yɩ anʋhʋba mɔɔ ɩwɔ kɛɛ azʋ̃nudwolɩyɛ kɛɣa azɩlɛ zʋ nɩ nu. (2 Timoti 3:1, 4; 2 Pita 3:3, 13) Meti ihyinyia kɛɛ yɛnɩ yɛ ɔhɔnwʋmmɔ dedimaa yeyiyia numɔ na yɛazizi yɛ kɛnɣa nkʋ̃kʋ̃ nkʋ̃kʋ̃.​—Kɩnga Hibulumaa 10:24, 25.

Sɛ yɛnɩ mmenii mɔɔ bɔdɔ Nyamɩnlɩ nɩ fa ɔhɔnwʋ a, yɛɛ ɩkɔwʋwa yɛ ma yekeɣike Nyamɩnlɩ a. Gyehova Dasɩvʋlɔmaa bɛ ayiyialɩyɛ azʋlɔtʋ nɩ ɩbʋwa yɛ ma yenyia mvʋlɔ bɛ dedi zʋ mfasʋ.​—Kɩnga Wulomimaa 1:11, 12.

4. Kɛ ɩkɛyɛ na wʋahʋla wʋaɣike Nyamɩnlɩ a?

Sɛ ɔdwɩnɩdwɩnɩ nninyeni mɔɔ ozuma wɔ Gyehova Odwokɔ nɩ nwʋ a, ɩkɛma ekeɣike yɩ. Sunzu yɩ nyɛlɩyɛ, yɩ fʋlɔdulɛ nɩ yɩ anʋhʋba nwʋ. Mpayɩwɔlɛ nɩɩ nninyeni mɔɔ yɛdwɩnɩdwɩnɩ ɔnwʋmɔ bʋwɔ nɩ ɩkɔwʋwa yɛ ma yekehile Nyamɩnlɩ yɩ ɔlɔlɛ nɩ yɩ nɣɛlɛbɛ nwʋ anyɩnlɩzɔlɛ.​—Kɩnga 1 Timoti 4:15, 16.

Sɛ yɛkɔhʋla yekeɣike Nyamɩnlɩ a, nɩ ɩsɛ kɛɛ yɛfa yɛ nwʋ yetiã yɩ zʋ, ɩsɛ kɛɛ yede yɩ yedi. Naasʋ̃ dedi ɩdɩ kɛɛ dɩyɛ be mɔɔ nnwʋanlɩ wɔ numɔ, ihyinyia kɛɛ yɛanyɩ kɔ ɔnwʋmɔ. Sɛ yɛkɛma yɛanyɩ ɩkɔhɔlɩ yɛ dedi nwʋ a, ɩsɛ kɛɛ yɛkɔlɩ ɔzʋlɔ yesunzu nninyeni mɔɔ yɛ dedi igyĩ ɔzʋlɔ nɩ nwʋ.​—Kɩnga Matiyu 4:4; Hibulumaa 11:1, 6.

5. Mɩnla mfasʋ yɛ ekenyia wɔ Nyamɩnlɩ mɔɔ ekeɣike yɩ nɩ zʋ a?

Gyehova ɩdwɩnɩ mmenii mɔɔ bɔdɔ yɩ nɩ nwʋ. Sa ɩkʋla ɩbɔ bɔnwʋ banɩ wɔ dɩyɛ bela mɔɔ ɩkɔhʋla ɩkɛzɩkɛ bɛ dedi ɩnɩ bɛ anyɩnlɩlazʋ mɔɔ bɔwɔ kɛɛ bekenyia nnwʋanlɩ mɔɔ íni awielɩyɛ nɩ nwʋ. (Psalm 91:1, 2, 7-10, NW) Ɩbɔ yɛ kɔkɔ wɔ nyɛlɩyɛ mɔɔ ɩkɛva yɛ nnwʋanlɩ ikediã asianɩ nu nɩɩ mɔɔ ɩkɛzɩkɛ yɛ anyɩnlɩlelɛ nɩ nwʋ. Gyehova yɛɛ ikile ɔhʋanɩ baaba mɔɔ ɩsɛ kɛɛ yeduwa zʋ yɛbɔ yɛ ɛbɩla a.​—Kɩnga Gyemisi 1:25; 4:4, 8.