Mɩnla Mfasʋ Yɛɛ Yenyia Wɔ Bayɩbʋlʋ Nu Egyinalɛzʋ-Ndwokɔ Zʋ a?

1. Mɩnla ti mɔ yehyinyia ɔhʋanɩhilelɛ a?

Yɛ Wɔlɛvʋlɔ nɩ izi nɣɛlɛbɛ ɩtɛla yɛ. Kɛ Ɛzɩlɛ mɔɔ ɩwɔ ɔlɔlɛ nɩ, ɩdwɩnɩ yɛ nwʋ. Akʋ̃ sʋ̃ ɩábɔ yɛ kɛɛ yɛhwɩ̃ yɛnwʋ wɔ ɩnwʋ na yɛva amɩyɛzayɛ yɛadwɩnɩ yɛwɔ yɛ ɛbɩla. (Jeremiah 10:23, NW) Kɛmɔ nnwuakula behyinyia bɛ awʋvʋlɔ ɔhʋanɩhilelɛ nɩ, ɔzɔ sʋ̃ la yɛ ye munwatĩĩ yehyinyia Nyamɩnlɩ yɩ ɔhʋanɩhilelɛ a. (Isaiah 48:17, 18, NW) Yenyia ɔhʋanɩhilelɛ wɔ Bayɩbʋlʋ nu egyinalɛzʋ-ndwokɔ mɔɔ ɩdɩ akyɛdɩ mɔɔ ɩzʋ Nyamɩnlɩ yɩ ɛkɛnɩ.​—Kɩnga 2 Timoti 3:16.

Gyehova yɩ mmɛla nɩɩ yɩ egyinalɛzʋ-ndwokɔ ikehile yɛ ɔhʋanɩ ba mɔɔ yɛkɔwɔ yɛ ɛbɩla nnɛ nɩɩ kezimɔ yekenyia akatuwa mɔɔ íni awielɩyɛ wɔ eɣile be. Iluwakɛɛ Gyehova yɛɛ ɩwɔlɩ yɛ ti, ɩdɩ yɩ ɔhʋanɩ zʋ kɛɛ yekehile anyɩnlɩzɔlɛ wɔ yɩ ɔhʋanɩhilelɛ nwʋ na yɛava anyɩnlɩlelɛ ialili ɔzʋlɔ.​—Kɩnga Wulomimaa 15:4; Yikile 4:11.

2. Mɩnla yɛ lɛ Bayɩbʋlʋ nu egyinalɛzʋ-ndwokɔ a?

Bayɩbʋlʋ nu egyinalɛzʋ-ndwokɔ ɩdɩ odwokɔ nɔhʋanlɛ mɔɔ ɩla ɛkɛnɩ dada mɔɔ ɩázɩnza. Naasʋ̃ mmɛla mɛyɩ, bɛfa bedi egyima wɔ mmɩlɩ pɔkyɩ̃ɩ̃ be nu. (Egyima 15:29) Ɩsɛ kɛɛ yɛfa yɛ adwɩnɩ tumi nɩ yɛyɛ egyima na yɛtɩ kezimɔ egyinalɛzʋ-odwokɔ be yɛ egyima wɔ mmɩlɩ pɔkyɩ̃ɩ̃ be nu. (2 Pita 3:1) Kɛ ndianwʋ nɩ, Bayɩbʋlʋ ikilehile yɛɛ kɛɛ nnwʋanlɩ ɩdɩ akyɛdɩ mɔɔ ɩzʋ̃ Nyamɩnlɩ yɩ ɛkɛnɩ. Ɔzɔ egyinalɛzʋ-odwokɔ nɩ ɩkɔhʋla ɩkɔwʋwa yɛ wɔ egyima nu, wɔ awudo nɩɩ mmɩlɩ mɔɔ yetu ɔhʋanɩ. Sɛ yɛkakɛ odwokɔ nɔhʋanlɛ mɔɔ mɛyɩ yɛ lɛ kɛɛ, nnwʋanlɩ ɩdɩ akyɛdɩ nɩ a, ɩlɛ́ma yɛkava yɛzayɛ anzɛnyɩɩ abiye yɩ nnwʋanlɩ yɛkediã asianɩ nu.​—Kɩnga Egyima 17:28.

3. Egyinalɛzʋ-ndwokɔ anwɩ̃ ɛhɩnla dɩyɛ yɛɛ ɔnwʋmɔ ihyinyia?

Gyisɛsɩ ɩhanlɩ egyinalɛzʋ-ndwokɔ anwɩ̃ be mɔɔ ɔnwʋmɔ ihyinyia nwʋ ndwokɔ. Mɔɔ ili bɔmʋnlɩ nɩ, ɩda sianti mɔɔ yɛwɔ nnwʋanlɩ nu mɔɔ mɛyɩ yɛ lɛ kɛɛ—yɛkɔnwʋ Nyamɩnlɩ, yɛkɔlɔ yɩ, na yɛazʋ̃mɩ yɩ wɔ nɔhʋanlɛ nu ali. Ɩsɛ kɛɛ yesunzu ɔzɔ egyinalɛzʋ-odwokɔ mɔɔ ili bɔmʋnlɩ eyi nwʋ wɔ yɛ pɔkɔzilɛ bela nu. (Proverbs 3:6, NW) Mmenii mɔɔ bɛfa Bayɩbʋlʋ egyinalɛzʋ-odwokɔ bɔbɔ bɛ ɛbɩla nɩ, bɛnɩ Nyamɩnlɩ nyia ɔhɔnwʋvalɛ, anyɩnlɩlelɛ baaba, nɩɩ nnwʋanlɩ mɔɔ íni awielɩyɛ.​—Kɩnga Matiyu 22:36-38.

Egyinalɛzʋ-odwokɔ mɔɔ ɩtɔ ɔzʋlɔ anwɩ̃ nɩ ɩkɔhʋla ɩkɛma yɛnɩ mvʋlɔ yɛkɔwʋwa wɔ azʋ̃nudwolɩyɛ nu. (1 Kɔlɛntɩmaa 13:4-7) Sɛ yɛkɔhʋla yɛkɛva ɔzɔ egyinalɛzʋ-odwokɔ mɔɔ ɩtɔ ɔzʋlɔ anwɩ̃ yɛkɛyɛ egyima bʋwɔ a, ɩsɛ kɛɛ yesuma ɔhʋanɩ mɔɔ Nyamɩnlɩ ɩnɩ mmenii di.​—Kɩnga Matiyu 7:12; 22:39, 40.

4. Mɩnla mfasʋ yɛ yenyia wɔ Bayɩbʋlʋ nu egyinalɛzʋ-ndwokɔ zʋ a?

Bayɩbʋlʋ nu egyinalɛzʋ-ndwokɔ be ikile kezimɔ mmusunwa kɛyɛ ɔkʋ̃ wɔ ɔlɔlɛ nu. (Kolosiyiamaa 3:12-14) Nyamɩnlɩ Odwokɔ sʋ̃ ɩbɔ mmusunwa nwʋ banɩ iluwa egyinalɛzʋ-ndwokɔ fʋlɔ mɔɔ ikilehile kɛɛ​—ɩsɛ kɛɛ agyiahʋnlɩ ɩbʋwa ɛkɛnɩ eɣile bela.​—Kɩnga Matiyu 19:5.

Sɛ yɛfa Bayɩbʋlʋ nu egyinalɛzʋ-ndwokɔ yedi egyima a, ɩkɛma yɛkɔwɔ yɛ nnwʋnlamɩ fʋã nu nɩɩ yɛ nɣanlɩdɩlɛ nwʋ banɩ. Kɛ ndianwʋ nɩ, egyima nu ebani bela ɩanyɩ ideli egyimayɛlɛmaa mɔɔ bɛfa Bayɩbʋlʋ yɩ egyinalɛzʋ-ndwokɔ mɔɔ ɩfalɩ nɔhʋanlɛlilɛ nɩɩ mmɔdɩnɩwɔlɛ wɔ egyima nwʋ bedi egyima nɩ. (2 Tɛsalonikamaa 3:7-9; Hibulumaa 13:18) Nyamɩnlɩ yɩ Odwokɔ sʋ̃ ikilehile yɛɛ ma yɛ anyɩ ɩsɔ mɔɔ yɛwɔ, ɩma yɛnwʋ yɩ kɛɛ ɔhɔnwʋvalɛ ba mɔɔ yɛnɩ Gyehova kenyia nɩ, ihyinyia ɩtɛla nnwʋnlamɩ fʋã nu nninyeni.​—Kɩnga Matiyu 6:24, 25, 33; 1 Timoti 6:8-10.

Bayɩbʋlʋ nu egyinalɛzʋ-ndwokɔ mɔɔ yɛkɛva yɛkɛyɛ egyima nɩ ɩkɛma yekenyia pɔkɔdɩlɛ baaba. (Proverbs 14:30; 22:24, 25, NW) Kɛ ndianwʋ nɩ, Nyamɩnlɩ yɩ mmɛla mɔɔ ɩfalɩ nzanyialɛ nwʋ mɔɔ yɛkɛva yɛkɛyɛ egyima nɩ ɩkɔhʋla ɩkɔwɔ yɛ nwʋ banɩ wɔ adimakɛlɛ mɔɔ ɩyɛ ɛyɛlɛ nɩɩ asianɩ azʋlɔtʋ nwʋ. (Wulomimaa 13:13) Gyehova ɩma yɛ ɔnwʋmɔ ɔhʋanɩ kɛɛ yɛnlʋ nzã, naasʋ íni kɛɛ ɩbʋlʋ ɔzʋlɔ. (Psalm 104:15, NW; 1 Kɔlɛntɩmaa 6:10) Kɛ yɛ nyɛlɩyɛ nkʋ̃ʋ̃ la yɛɛ Nyamɩnlɩ yɩ mmɛla ikilehile yɛ ma yenyia ɔzʋlɔ mfasʋ a, mfomi ɩbɔ yɛadwɩnɩ sʋ̃ nwʋ banɩ. (Psalm 119:97-100, NW) Kɛ mfasʋ mɔɔ nɔhʋanlɛ Ahilisinyiamaa bɛpɛ bɛkɛma bɔnwʋ ti yɛɛ bedi Nyamɩnlɩ yɩ ɔhʋanɩhilelɛ zʋ a, mfomi bɛyɛ ɔzɔ bɛfa bɛhyɛ Gyehova animinyiamɩ.​—Kɩnga Matiyu 5:14-16.