OZUMALƐDƖYƐ 49
Kɛ Ɩkɛyɛ Na Wʋ Abusunwa Bɛ Anyɩ Iale a?—Ɔfʋã 1
Agyiahʋnlɩmaa mvʋlɔ kila ɔhʋanɩ kɛɛ anyɩnlɩlelɛ mɔɔ benyianlɩ mmɩlɩ mɔ begyialɩ nɩ kɔwʋwa ɛkɛnɩ daabaa. Na sa ɩkʋla ɩyɛ bʋwɔ sʋ̃. Kilisinyiamaa agyiahʋnlɩmaa mɔɔ begyia bɛhyɛ na bɔbɔ mmɔdɩnɩ kɛɛ bɛkɛva Bayɩbʋlʋ nu fʋlɔdulɛ bɛkɛyɛ egyima nɩ, bezi kɛɛ eyi kɔhʋla kɛyɛ bʋwɔ.
1. Mɩnla fʋlɔdulɛ yɛ Bayɩbʋlʋ fa ma ohunɛmaa a?
Gyehova ɩyɩ ohunɛ kɛɛ ɩyɛ abusunwa yi ti. (Kɩnga Ɛfɩsɛsɩmaa 5:23.) Gyehova ikilaa ɔhʋanɩ kɛɛ, ohunɛ kezizi abɔkɔ mɔɔ ɩkɔwʋwa abusunwa yɩ. Bayɩbʋlʋ tu ohunɛmaa fʋlɔ kɛɛ: “bɔlɔ́ bɛ yɩ mmɔ.” (Kɩnga Ɛfɩsɛsɩmaa 5:25) Kɛ eyi kile a? Ohunɛ mɔɔ ɩdɔ yɩ yɩ nɩ da annidi ali kile yɩ wɔ awudo nɩɩ bagua nu. Ɩbɔ yɩ nwʋ banɩ, ɩma yɩ anyɩ de na ɩbɔ mmɔdɩnɩ kɛɛ ɩkɛva mɔɔ ihyinyia nɩ ɩkɛma yɩ. (1 Timoti 5:8) Mɔɔ ihyinyia paa nɩ, ɩbʋwa yɩ ma ɩ nɩɩ Gyehova nyia abusunwawɔlɛ mɔɔ numɔ yɛ sɩ. (Matiyu 4:4) Kɛ ndianwʋ nɩ, sa ɩkʋla ɩ nɩɩ yɩ yɩ bɔ mpayɩ na bɛkɩnga Bayɩbʋlʋ yɩ. Sɛ ohunɛ ɩzʋ̃ ɔlɔlɛ nu ikila yɩ yɩ bʋwɔ a, ɩbɔ ɩ nɩɩ Gyehova ɔhɔnwʋvalɛ nwʋ banɩ.—Kɩnga 1 Pita 3:7.
2. Mɩnla fʋlɔdulɛ yɛ Bayɩbʋlʋ fa ma ɛyɩlɛmaa a?
Nyamɩnlɩ Odwokɔ kã kɛɛ, ɩsɛ kɛɛ “ɛyɩlɛ bela sʋ̃ idi yi hũ nni.” (Ɛfɩsɛsɩmaa 5:33) Kɛ ɩkɛyɛ eyi ikeze a? Sa ɩkʋla ɩfa yɩ adwɩnɩ isiye subanɩba mɔɔ yi hũ wɔ nɩɩ mmɔdɩnɩ mɔɔ ɩbɔɔ kɛɛ ikehila mɛyɩ nɩɩ nnwuakula yɩ zʋ. Akʋ̃ sʋ̃, sɛ ikyina yɩ pɔkɔzilɛ mɛda na ɩ nɩɩ yɩ tɩndɛ wɔ annidi ɔhʋanɩ zʋ na ɩkã yɩ nwʋ odwokɔba ɩávalɩ nwʋmɔ kɛɛ ɩ́dɩ Gyehova yɩ sʋ̃mɩvʋlɔ a, ikehile kɛɛ idi yi nni.
3. Kɛ ɩkɛyɛ na agyiahʋnlɩmaa bɛahyɛ bɛ agyiahʋnlɩ nu ɛzɩzɩbɛ a?
Bayɩbʋlʋ kã agyiahʋnlɩmaa nwʋ odwokɔ kɛɛ: ‘Bɛzabɛ anwɩ̃ nɩ bɛkɛyɛ nnwʋnlamɩ ɔkʋ̃.’ (Matiyu 19:5) Eyi ikile kɛɛ ɩsɛ kɛɛ bɔbɔ mmɔdɩnɩ bɔkʋ̃ betiyia dɩyɛ bela mɔɔ ɩkɔhʋla ɩkɛma bɛ avinli kɛdɩdɩ nɩ. Sɛ eyi kɛyɛ bʋwɔ a, ɩsɛ kɛɛ benyia mmɩlɩ bɛma bɔ nwʋ, na bɔzʋ̃ bɛ ahʋnlɩnɩ nu bɛda mɔɔ ɩwɔ bɛ adwɩnɩ nu nɩɩ kezimɔ bɛtɩ nɣanlɩ nɩ ali bekile bɔ nwʋ bɔ nwʋ. Sɛ bɛyɩ Gyehova besiye ahanlɩ a, bɛáma enii anzɛnyɩɩ dɩyɛ fʋlɔ bela nwʋ hyinyia bɛ tɛla bɔ nwʋkãvʋlɔ. Bo nu bela kila bʋwɔ paa kɛɛ ɩlɛ́fa yɩ nwʋ ikowulawula abiye mɔɔ ɩ́dɩ yɩ nwʋkãvʋlɔ.
SUMÁ SƲ̃MAA
Kilá Bayɩbʋlʋ nu egyinalɛzʋ-ndwokɔ mɔɔ ɩkɔhʋla kɛhyɛ wʋ agyiahʋnlɩ nu ɛzɩzɩbɛ.
4. Ohunɛmaa—bɔlɔ́ bɛ yɩ mmɔ na behila bɛ bʋwɔ
Bayɩbʋlʋ kã kɛɛ ɩwɔ kɛɛ “ohunɛmaa bɔdɔ bɛ yɩ mmɔ kɛɛ bɛzabɛ be eniiwudo nɩ.” (Ɛfɩsɛsɩmaa 5:28, 29) Kɛ eyi yɩ tʋ kile a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Mɩnla nninyeni yɛ ohunɛ be kɔhʋla kɛyɛ na ɩava iahile kɛɛ ɩdɔ yɩ yɩ na ɩdwɩnɩ yɩ nwʋ a?
Kɩnga Kolosiyiamaa 3:12, na akʋ̃ bozunzú odwokɔɣizialɛ eyi nwʋ:
Kɛ ɩkɛyɛ na ohunɛ be ɩala subanɩ eyimmɔ ali wɔ yɩ agyiahʋnlɩ nu a?
5. Ɛyɩlɛmaa—bɔlɔ́ bo hũ mmɔ na belí bɛ nni
Bayɩbʋlʋ hyɛ ɛyɩlɛ ɛzɩzɩbɛ kɛɛ ilí yi hũ nni, kɛ yi hũ sʋ̃mɩ Gyehova anzɛnyɩɩ ɩázʋ̃mɩ yɩ nɩ. Kɩnga 1 Pita 3:1, 2, na akʋ̃ bozunzú ndwokɔɣizialɛ eyimmɔ nwʋ:
Sɛ ɔwɔ ohunɛ mɔɔ ɩ́dɩ dedinii a, pɩlazunɛ bela íni nwʋmɔ kɛɛ ɛkɛbɛ kɛɛ ɩkɔzʋ̃mɩ Gyehova. Ekila a, mɩnla yɛ ɩkɔwʋwa paa a, ɩdɩ Bayɩbʋlʋ mɔɔ ɛkɛva kobunwabunwa yɩ anzɛnyɩɩ subanɩba nɩɩ annidi mɔɔ ɛkɛla yɩ ali kehile yɩ nɩ a? Mɩnla ti a?
Ɩdɩ baaba kɛɛ ohunɛmaa nɩɩ ɛyɩlɛmaa bɔkɔwɔ numɔ bekezi pɔkɔ. Naasʋ̃ kɛ mmɩlɩ munwala yɛ ɛyɩlɛ be ɩ nɩɩ yi hũ kɛyɛ adwɩnɩ a. Sɛ ɩba yɩ zɔ a, ɩzʋ̃ abʋtalɩ nɩɩ annidi nu ikehile yɩ adwɩnɩ, naasʋ̃ ɩsɛ kɛɛ ɩkakɛ kɛɛ yi hũ yɛ Gyehova ɩva iwula yɩ sa kɛɛ izí pɔkɔ mɔɔ ɩkɔwʋwa abusunwa yɩ a. Ɩsɛ kɛɛ ɩyɛ mɔɔ ɩkɔhʋla bela ikyina yi hũ yɩ pɔkɔzilɛ mɛda. Sɛ ɩyɛ zɔ a, ɩkɛma abiyela anyɩ kele wɔ abusunwa yi nu. Kɩnga 1 Pita 3:3-5, na akʋ̃ bozunzú odwokɔɣizialɛ eyi nwʋ:
Sɛ ɛyɩlɛ be di yi hũ nni a, kɛ ɩma Gyehova tɩ nɣanlɩ ise a?
6. Sa ɔkʋla di wʋ agyiahʋnlɩ nu ndwokɔzɩzɩbɛ zʋ
Agyiahʋnlɩ bela íni ɛkɛnɩ mɔɔ idi munli. Meti ɩsɛ kɛɛ agyiahʋnlɩmaa bɔ numɔ di bo ndwokɔzɩzɩbɛ nwʋ egyima. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
Wɔ vidiyo yi nu nɩ, mɩnla yɛ nɩ ikile kɛɛ agyiahʋnlɩmaa nɩ bɛ avinli ɩtɩdɩɩ a?
Mɩnla yɛ bɛyɛlɩ bɛva bɛhyɛlɩ bɛ agyiahʋnlɩ yi nu ɛzɩzɩbɛ a?
Kɩnga 1 Kɔlɛntɩmaa 10:24 nɩɩ Kolosiyiamaa 3:13. Sɛ bɛkɩnga ɛhɛlɛlɛ ndwokɔ eyi nu bela bowie a, bozunzú odwokɔɣizialɛ eyi nwʋ:
Mɩnla ɔhʋanɩ zʋ yɛ fʋlɔdulɛ eyi ɩkɔhʋla ɩkɛhyɛ agyiahʋnlɩ nu ɛzɩzɩbɛ a?
Bayɩbʋlʋ kã kɛɛ yewú yɛ nwʋ yɛ nwʋ. Kɛ yekowu abiye nɩ kile kɛɛ yɛ nɩɩ yɩ keli wɔ kunlumiba nɩɩ annidi ɔhʋanɩ zʋ. Kɩnga Wulomimaa 12:10, na akʋ̃ bozunzú ndwokɔɣizialɛ eyimmɔ nwʋ:
Asʋ̃ ɩsɛ kɛɛ ohunɛ anzɛnyɩɩ ɛyɩlɛ be ɩdɩkɛ kɛɛ yɩ nwʋkãvʋlɔ kowu yi ansaana mɛyɩ sʋ̃ iahile kɛɛ ibu yi a? Mɩnla ti a?
ABIYEMMƆ BƐKÃ KƐƐ: “Anyɩnlɩlelɛ mɔɔ yegyialɩ fʋlɔ yɩ yenyianlɩ nɩ, kakɩ ɩdɩ ɩhɔ.”
Kɛ ɩkɛyɛ na wʋama bɛanwʋ yɩ kɛɛ Bayɩbʋlʋ yɩ ɩkɔhʋla ɩkɔwʋwa bɛ a?
YƖ DƆKƆWƆLƐ
Sɛ ohunɛ nɩɩ ɛyɩlɛ bɔdɔ bɔ nwʋ, bobu bɔ nwʋ na bɛfa Bayɩbʋlʋ nu egyinalɛzʋ-ndwokɔ bɛyɛ egyima a, sa bɛ anyɩ kʋla de.
Kɛ Okowuwa Ekeze a?
Kɛ ɩkɛyɛ na ohunɛ ɩawʋwa ma yɩ agyiahʋnlɩ nu ɩayɛ anyɩnlɩlelɛ a?
Kɛ ɩkɛyɛ na ɛyɩlɛ ɩawʋwa ma yɩ agyiahʋnlɩ nu ɩayɛ anyɩnlɩlelɛ a?
Sɛ egyia a, Bayɩbʋlʋ egyinalɛzʋ-odwokɔ ɛhɩnla dɩyɛ yɛ ɩkɔhʋla kɛhyɛ wʋ agyiahʋnlɩ nu ɛzɩzɩbɛ a?
PƖBƐ́ SƲ̃MAA
Kilá nninyeni be mɔɔ ɩkɔhʋla kɔwʋwa wʋ ma wʋ abusunwa yi nu kɛyɛ anyɩnlɩlelɛ.
Kilá ndwomi mɔɔ bɛyɛ yɩ vidiyo eyi, na ɔkɔnwʋ kɛɛ mfasʋ wɔ ɔzʋlɔ kɛɛ ɛkɛva Nyamɩnlɩ yɩ fʋlɔdulɛ kɛyɛ egyima wɔ wʋ agyiahʋnlɩ nu.
Kilá mɔɔ sɛ ɛyɩlɛ be yɛ a, ikile kɛɛ ɩkã yɩ nwʋ azɩ iwula yi hũ yi tiyɛlɛ tʋ.
Kɛ ɩyɛlɩ mɔɔ agyiahʋnlɩmaa be lili ndwokɔzɩzɩbɛ nɣezile nɩɩ agyiahʋnlɩyiakilɛ nwʋ egyima?