Mmɩnlantɩyɛ Nɩɩ Nɣɛdɛkɛ—Bɛhã Bɛ Ahʋnlɩnɩ Nu Odwokɔ Behile Bɛ Awɔvʋlɔ

Mɩnla ti mɔɔ ɩsɛ kɛɛ ɛkã mɔɔ ɩwɔ wʋ ahʋnlɩnɩ nu munwala ekile wʋ awʋvʋlɔ a? (Ɛɣɛ 23:26) Sianti yɛ lɛ kɛɛ ɩdɩ bɛ asɛdɩ kɛɛ bekehila wʋ na bɛahile ɔhʋanɩ wʋ. (Ndw 127:3, 4) Sɛ wʋákã mɔɔ ɩwɔ wʋ ahʋnlɩnɩ nu anzɛnyɩɩ mɔɔ idide wʋ nɩ ekile bɛ a, ɩkɛyɛ sɩ kɛɛ bɔkɔwʋwa wʋ. Dɔkʋ̃ sʋ̃, elényia ozumalɛnwʋnlɛ mɔɔ benyia wɔ ɛbɩlawɔlɛ nu nɩ zʋ mfasʋ. Asʋ̃ dɩyɛ bela yɛ ɩsɛ kɛɛ ɛkã nwʋmɔ odwokɔ ekile bɛ a? Kɛ eɣile bela yɛ ɩdɩ ɔzɔ a, naasʋ̃ kila na wʋálahɩlɩlɩ bɛ.—Ɛɣɛ 3:32.

Kɛ ɛkɛyɛ na ɛ nɩɩ wʋ awʋvʋlɔ awɔ nkɔmmɔ a? Pɩbɛ mmɩlɩ mɔ ɩkɛyɛ baaba ɩkɛma bo munwala. Sɛ ɛpɛ sʋ̃ a, sa ɔkʋla ɛkɛlɛ kezimɔ ɛtɩ nɣanlɩ wɔ kɛlɛta zʋ ɛma bo nu ɔkʋ̃. Na sɛ bɛpɛ kɛɛ bɛ nɩɩ wʋ sunzu odwokɔ be mɔɔ wʋ anyɩ iáleli nwʋmɔ sʋ̃ ɛ? Kakɛ kɛɛ bɛpɛ kɛɛ bɔbʋwa wʋ. Nwʋ́ bɛ kɛɛ wʋ ɔhɔnwʋmmɔ na kɛ wʋ adamvʋlɔ a. Mmɔdɩnɩ mɔɔ ɔkɔwɔ ɛkɛhã mɔɔ ɩwɔ wʋ ahʋnlɩnɩ nu munwala ekehile bɛ nɩ, ekenyia ɔzʋlɔ mfasʋ wɔ wʋ nnwʋanlɩ eɣile munwala na ekenyia nwʋanlɩ mɔɔ íni awielɩyɛ sʋ̃.—Ɛɣɛ 4:10-12.

KILÁ VIDIYO MƆƆ ISE MƲ NNWUAKULA MMƖLƖ NU—KƐ ƖKƐYƐ NA MƖ NƖƖ MƖ AWƲVƲLƆ YƐAWƆ NKƆMMƆ A? NA AKƲ̃ YƖ NDWOKƆƔIZIALƐ EYIMMƆ BO MUNWA:

• 

  Mɩnla subanɩ yɛ Esther nɩɩ Partik bɛɣa bɔnwʋnlɩ kɛɛ nɩ bɛlɛ a?

• 

  Mɩnla yɛ ɔkɔhʋla okozuma wɔ Gyisɛsɩ yɩ ndianwʋ yi nu a?

• 

  Mɩnla yɛ wʋ awʋvʋlɔ bɛyɛ mɔɔ ɩma ɔnwʋ kɛɛ bɔdwɩnɩ wʋ nwʋ a?

• 

  Mɩnla Bayɩbʋlʋ nu egyinanlɛzʋ-ndwʋkɔ yɛ ɩkɔhʋla ɩkɔwʋwa wʋ ma ɛ nɩɩ wʋ awʋvʋlɔ bɔkɔwɔ nkɔmmɔ a?