Sa Ɔkʋla Bʋwa Wʋ Abusunwa Ma Benyia Anyɩnlɩlelɛ Sʋ̃maa

Gyehova pɛ kɛɛ mmusunwa bɛ anyɩ de. (Ndw 127:3-5; Odw 9:9; 11:9) Naasʋ̃, oyuwadɩ eyi nu atɩɩtɩɩ nɩɩ ye mmusunwamaa be sinidɔlɛ kɔhʋla kɛzɩkɛ yɛ anyɩnlɩlelɛ. Mɩnla yɛ abusunwa yɩ nu enii bela kɔhʋla kɛyɛ na ama anyɩnlɩlelɛ ɩaɣa abusunwa yɩ nu a?

Ohunɛ di yɩ yɩ nni. (1Pit 3:7) Inyia mmɩlɩ ɩma yɩ. Ɩábɩbɛ mɔɔ ɩbʋlʋ yɩ yɩ anwʋzɩzɩbɛ zʋ na ikile anyɩnlɩzɔlɛ wɔ mɔɔ ɩyɛ ɩma yɩ nɩɩ mɔɔ ɩyɛ ɩma bɛ abusunwa yɩ nɩ nwʋ. (Kol 3:15) Ɩda ɔlɔlɛ ali ikile yi na ɩyɩ yɩ ayɛlɛ.—Ɛɣɛ 31:28, 31.

Ɛyɩlɛ pɩbɛ ahʋanɩ azʋlɔtʋ mɔɔ ikoluwa zʋ ɩkɔwʋwa yi hũ. (Ɛɣɛ 31:12) Ɩkã yɩ nwʋ azɩ ɩma yi hũ na ɩ nɩɩ yɩ bɔ numɔ yɛ dɩyɛ. (Kol 3:18) Ɩ nɩɩ yi hũ tɩndɛ wɔ annidi ɔhʋanɩ zʋ na ɩkã yɩ nwʋ odwokɔba ikile mmenii mvʋlɔ.—Ɛɣɛ 31:26.

Awʋvʋlɔ nyia mmɩlɩ ma bo nnwuakula. (Dit 6:6, 7) Bɛkã bekile bɛ kɛɛ bɔdɔ bɛ. (Mt 3:17) Sɛ bɛtɩnyɩaa bɛ a, bɛyɛ yɩ wɔ ɔlɔlɛ nɩɩ nɣɛlɛbɛ ɔhʋanɩ zʋ.—Ɛfɩ 6:4.

Nnwuakula fa annidi ma bɛ awʋvʋlɔ na bɛyɛ sutiye bɛma bɛ. (Ɛɣɛ 23:22) Bɛma bɛ awʋvʋlɔ nwʋ bɛ nɣanlɩdɩlɛ nɩɩ bo nzunzunlɩyɛ. Bede bɛ awʋvʋlɔ bɛ ɛdɩnyɩanlɛ betiã nu na bobu bɛ.—Ɛɣɛ 19:20.

KILÁ VIDIYO MƆƆ BƐYƐ YƖ DƖLAMA MƆƆ ISE NYIÁ ANYƖNLƖLELƐ WƆ WƲ ABUSUNWA NU, NA AKƲ̃ YƖ ODWOKƆƔIZIALƐ EYI YƖ MUNWA:

Mɩnla yɛ bo nu bela yɛlɩ ma anyɩnlɩlelɛ ɣalɩ abusunwa yɩ nu a?