“Ɩkɛma Mʋnlʋmmɔ Anwʋzɩzɩbɛ”

1. Wɔ ɔwɔkɩ nɩ, mɩnla ɔhʋanɩ zʋ yɛ Nyamɩnlɩ hyɛlɩ yɩ azʋ̃mɩvʋlɔ nɔhʋanlɛmaa ɛzɩzɩbɛ a?

NYAMƖNLƖ ODWOKƆ yɩ ta kã nɔhʋanlɛmaa bɔ nwʋ odwokɔ kɛɛ bɔwɔ dedi kezile. Naasʋ̃ ɩyɛ a be padi kolɔ. Kɛ ndianwʋ nɩ, nɩ itwu mmɩlɩ be a, Bulombunli Devidi tɩ nɣanlɩ kɛɛ ɩwɔ akɛnɣazɩzɩbɛ na “yɩ nwʋ yɛ sɩ kɛɛ file,” naasʋ̃ nɩ ɩyɛ a ‘bɔlɔ kã yɩ.’ (Ndw. 30:7) Nyamɩnlɩ yi sunzuma manlɩ Samɩsɩnɩ nyianlɩ akɛnɣazɩzɩbɛ, naasʋ̃ nɩ izi kɛɛ sɛ kɛ tumi mɔɔ Nyamɩnlɩ va manlɩ yɩ a, ankɩ ɩkɛyɛ mɛlɛkɛ dɩkɛɛ mmenii nɣalɩyɛ yɩ la. (Ndɛ. 14:​5, 6; 16:17) Gyehova yɛ ɩmanlɩ yɩ azʋ̃mɩvʋlɔ nɔhʋanlɛmaa eyimmɔ nyianlɩ akɛnɣazɩzɩbɛ a.

2. Mɩnla ti mɔɔ sʋ̃mavʋlɔ Pɔɔlʋ hanlɩ kɛɛ mmɩlɩ mɔ ɩyɛ bɛtɛɛ nɩ, nɩ banzɛmɔ yɩ nwʋ ɩyɛ yɩ ɛzɩzɩbɛ baaba a? (2 Kɔlɛntɩmaa 12:​9, 10)

² Sʋ̃mavʋlɔ Pɔɔlʋ leli dianlɩ numɔ kɛɛ nɩ ihyinyia Gyehova yɩ mmʋwalɩyɛ na ama ɩahʋla iagyina pindinyii. (Kɩnga 2 Kɔlɛntɩmaa 12:​9, 10.) Dɩkɛɛ Pɔɔlʋ nɩ, ye nu sʋ̃maa wɔ kɛnɩ mɔɔ adimakɛlɛ ididee yɛ. (Gal. 4:​13, 14) Nɩ ɩyɛ sʋ̃ a, ɩyɛ sɩ ɩma yɩ kɛɛ ɩkɛyɛ mɔɔ ɩtɩnɣɛ. (Wul. 7:​18, 19) Akʋ̃ sʋ̃ ɩyɛ a, nɩ adwɩnɩndwɩnɩ ɩdɔ yɩ zʋ na yi kunlu tuli mɔɔ ɩkɔhʋla ɩkɔdʋ yɩ nɩ nwʋ. (2 Kɔl. 1:​8, 9) Naasʋ̃ mmɩlɩ mɔ Pɔɔlʋ yɛlɩ mɛlɛkɛ nɩ, inyianlɩ anwʋzɩzɩbɛ. Mɩnla ɔhʋanɩ zʋ a? Gyehova ɩmanlɩ Pɔɔlʋ anwʋzɩzɩbɛ mɔɔ nɩ ihyinyia na ɩava iagyina yɩ ndwokɔzɩzɩbɛ munwa.

3. Mɩnla ndwokɔɣizialɛ yɛ yekozunzu nwʋmɔ wɔ dɩyɛzumanlɛ eyi nu a?

³ Gyehova bɔ anʋhʋba kɛɛ ɩkɛma amɩyɛ sʋ̃ anwʋzɩzɩbɛ na yɛava yeagyina pindinyii. (1 Pit. 5:10) Naasʋ̃ sɛ yɛátu agyiakɛ bela a, ɩ́dɩ dɩyɛ mɔɔ yɛ sa kɛhã anwʋzɩzɩbɛ eyi. Kɛ ndianwʋ nɩ, fa yɩ kɛɛ bɛva alɩyɛ be mɔɔ wʋ anyɩ deli nwʋmɔ paa bɛɣɩlɛ wʋ. Naasʋ̃ sɛ ekenyia zʋlɔ mfasʋ a, gyɩsɛ ɛfa wʋ sa tiã numɔ di ebiye. Ɔzɔ la sʋ̃ yɛ Gyehova iziyeziye yɩ nwʋ kɛɛ ɩkɛma anwʋzɩzɩbɛ yɛ a, naasʋ̃ gyɩsɛ yetu nwʋmɔ agyiakɛ ansaana yeanyia zʋlɔ mfasʋ. Mɩnla nninyeni yɛ Gyehova ɩva ɩma yɛ na ama yeanyia anwʋzɩzɩbɛ a? Na mɩnla yɛ ɩsɛ kɛɛ yɛyɛ na yeanyia ɔzɔ anwʋzɩzɩbɛ yɩ a? Yekenyia ndwokɔɣizialɛ eyimmɔ nwʋ munwalɩyɛ mmɩlɩ mɔ yesunzuu kezimɔ Gyehova wʋwalɩ mmenii asã be mɔɔ bɔwɔ Bayɩbʋlʋ nu ma benyianlɩ anwʋzɩzɩbɛ nɩ nwʋ nɩ. Bɔnlʋmmɔ yɛ lɛ nkɔmɩhyɛnii Dwona, Gyisɛsɩ yɩ maamɩ Mɛɛlɩ, yɛɛ sʋ̃mavʋlɔ Pɔɔlʋ. Akʋ̃ sʋ̃, yekehila kezimɔ Gyehova ɩkɔ zʋlɔ ɩhyɛ yɩ azʋ̃mɩvʋlɔ mɔɔ bɔwɔ kɛnɩ nnɛ nɩ ɛzɩzɩbɛ.

MPAYƖWƆLƐ NƖƖ WƲZAWƲ WƲ DƖYƐZUMANLƐ ƖKƆHƲLA ƖKƐMA EKEGYINA PINDINYII

4. Kɛ ɩkɛyɛ na yɛanyia anwʋzɩzɩbɛ wɔ Gyehova kɛ a?

⁴ Ɔhʋanɩ ɔkʋ̃ mɔɔ yeduwa zʋlɔ yenyia anwʋzɩzɩbɛ wɔ Gyehova kɛnɩ yɛ lɛ kɛɛ yɛkɔwɔ yɩ mpayɩ. Sɛ Gyehova tiye yɛ mpayɩwɔlɛ a, ɩkʋla ɩma yenyia ‘tumi kezile.’ (2 Kɔl. 4:7) Akʋ̃ sʋ̃, sɛ yɛkɩnga Bayɩbʋlʋ yɩ na yɛdwɩnɩndwɩnɩ nwʋmɔ a, sa ɩkʋla ɩma yenyia anwʋzɩzɩbɛ. (Ndw. 86:11) Gyehova yi odwokɔ mɔɔ ɩwɔ Bayɩbʋlʋ nu nɩ, tumi wɔ numɔ. (Hib. 4:12) Sɛ ɔbɔ Gyehova mpayɩ na ɛkɩnga yi Odwokɔ yɩ a, ekenyia anwʋzɩzɩbɛ mɔɔ ehyinyia na ama wʋagyina pindinyii, wʋahɔ zʋ wʋanyia anyɩnlɩlelɛ, anzɛnyɩɩ wʋali asɛdɩ be mɔɔ ɩyɛ sɩ nwʋ egyima. Bɛmá yehila kezimɔ Gyehova hyɛlɩ nkɔmɩhyɛnii Dwona ɛzɩzɩbɛ.

5. Mɩnla ti mɔɔ nɩ nkɔmɩhyɛnii Dwona ihyinyia akɛnɣazɩzɩbɛ a?

⁵ Nɩ nkɔmɩhyɛnii Dwona hyinyia akɛnɣazɩzɩbɛ. Iluwakɛɛ mmɩlɩ mɔ Gyehova valɩ egyimalilɛ be mɔɔ ɩyɛ sɩ ɩmanlɩ yɩ nɩ, iɣiandinli. Eyi ti ankɩ ɩka ɛgyɩkɩ̃ɩ̃ ma ɩ nɩɩ bɛzabɛ mɔɔ bɔwɔ ɛlɛnɩ yɩ nu munwatĩĩ bowuwu. Mmɩlɩ mɔ bɔdʋlɩ yɩ bedianlɩ ngyemvile yi nu nɩ, egyeni kezile be mɩnlɩ yɩ. Kɛ Dwona dɩlɩ nɣanlɩ izeli a? Asʋ̃ nɩ isunzu kɛɛ ikowu a? Ɩkɛyɛ kɛɛ Dwona yɩ adwɩnɩ duli vʋlalɩ.

6. Kɛmɔ Dwona 2:​1, 2, 7 kile nɩ, mmɩlɩ mɔ nɩ Dwona wɔ egyeni kezile yi kunlu nɩ, mɩnla yɛ ɩhyɛlɩ yɩ ɛzɩzɩbɛ a?

⁶ Mmɩlɩ mɔ nɩ Dwona wɔ egyeni yi kunlu nɩ, mɩnla yɛ ɩyɛlɩ mɔɔ ɩmanlɩ inyianlɩ anwʋzɩzɩbɛ a? Ɩwɔlɩ Gyehova mpayɩ. (Kɩnga Dwona 2:​1, 2, 7.) Ɩwɔ numɔ kɛɛ nɩ Dwona ɩyɛ Gyehova zʋ azʋ̃nzɩzɩbɛ dɩyɛ, naasʋ̃ mmɩlɩ mɔ inlunlɩ yɩ nwʋ na ɩzʋ̃ kãnwʋazɩ nu ɩwɔlɩ mpayɩ nɩ, nɩ izi kɛɛ Gyehova kediye yi. Dwona dwɩnɩndwɩnɩnlɩ Ɛhɛlɛlɛ Odwokɔ yɩ nwʋ. Sianti mɔɔ yɛkãã zɔ yɛ lɛ kɛɛ, wɔ yɩ mpayɩ mɔɔ ɩwɔ Dwona yi ti 2 yi nu nɩ, ɩvalɩ ndwokɔ abɔkɔ azʋlɔtʋ mɔɔ ɩwɔ Ndwomi buuku yi nu nɩ ilili egyima. (Kɛ ndianwʋ nɩ, fa Dwona 2:​2, 5 tindiã Ndwomi 69:1; 86:7 nwʋ.) Ɩda ali petee kɛɛ nɩ Dwona zi ɔzɔ ɛhɛlɛlɛ odwokɔ yɩ bʋwɔ. Na mmɩlɩ mɔ ɩdwɩnɩndwɩnlɩ nwʋmɔ wɔ yɩ amanɩyɛnwʋnlɛ yɩ nu nɩ, ɩdɩlɩ nɣanlɩ kɛɛ Gyehova kɔwʋwa yɩ. Gyehova leli Dwona na aɣinzi yi, egyima mɔɔ Gyehova ɩva iwulalɩ yɩ sa nɩ ileli idianlɩ numɔ kɛɛ ɩkɛyɛ.—Dwn. 2:10–3:4.

7-8. Mɩnla ɔhʋanɩ zʋ yɛ eliyema be mɔɔ ɩwɔ Taiwan nɩ nyianlɩ anwʋzɩzɩbɛ wɔ yɩ odwohilalɛ nu a?

⁷ Sɛ yeyiyiaa ndwokɔzɩzɩbɛ azʋlɔtʋ a, Dwona yi ndianwʋ yɩ kɔhʋla kɔwʋwa yɛ. Kɛ ndianwʋ nɩ, nɩ adimakɛlɛ be ididee eliyema be mɔɔ bɔfʋlɔ yɩ Zhimingb mɔɔ ɩda Taiwan nɩ. Akʋ̃ sʋ̃, iluwakɛɛ nɩ ɩsʋ̃mɩɩ Gyehova ti, nɩ yi mmusunwamaa botwodwu betiyia yɩ. Naasʋ̃ iluwa mpayɩwɔlɛ nɩɩ dɩyɛzumanlɛ zʋ inyianlɩ anwʋzɩzɩbɛ wɔ Gyehova kɛ. Ɩkã kɛɛ, “Ɩyɛ na sɛ miyiyiaa ndwokɔzɩzɩbɛ be a, adwɩnɩndwɩnɩ kʋla hyɛ mʋ zʋ nkʋ̃ʋ̃ ma mɩáhʋla musuma dɩyɛ po.” Naasʋ̃ ɩáma yi padi kolɔ. Ɩkã kɛɛ, “Ɩyɛ a, midi bɔmʋnlɩ mʋbɔ mpayɩ, akʋ̃ mitiye asafʋ ndwomi, ɩyɛ po a mʋtʋ ebiye wɔ mʋ konza tʋ kɔbʋmɩ kɛɛ mɩ ahʋnlɩnɩ kɔdɔ mu kunlu. Akʋ̃ mʋbɔ mɩ dɩyɛzumanlɛ yɩ tʋ.”

⁸ Zhiming nyianlɩ anwʋzɩzɩbɛ mɔɔ ɩkɛva ikegyina yi ndwokɔzɩzɩbɛ munwa iluwa yɩzayɩ yɩ dɩyɛzumanlɛ zʋ. Kɛ ndianwʋ nɩ, mmɩlɩ mɔ bɛyɛlɩ yɩ opilehyɛnɩ kezile be mɛda nɩ, nɛɛsɩ yɩ hanlɩ hileli yi kɛɛ, yi mmegyia nu nnwʋanlɩ mmʋwaba kɔkɔlɔ yɩ ɩhɔ azɩ. Meti, mɔɔ ɩkɛma yɩ nwʋ kɔdɔ yɩ ndɛndɛ nɩ, ɩsɛ kɛɛ bɛma mmegyia yɩ. Nunuma mɔɔ awulo kyɩ̃ a bɛkɛyɛ Zhiming opilehyɛnɩ nɩ, ɩɣɩnganlɩ eliyema baalɛ be mɔɔ nɩ bɛyɛ yɩ ɔzɔ opilehyɛnɩ kʋ̃ yɩ la be nɩ nwʋ odwokɔ. Ɩnwʋnlɩ kɛɛ nɩ eliyema baalɛ yɩ, yɩ mmegyia nu nnwʋanlɩ mmʋwaba kɔkɔlɔ yɩ ɩhɔ azɩ kʋlaa ɩdɛla yɩ dɩyɛ yɩ. Naasʋ̃ iáde mmegyia na yɩ nwʋ dɔlɩ yɩ sʋ̃. Ɔzɔ ozumanlɛnwʋnlɛ yɩ hyɛlɩ Zhiming ɛzɩzɩbɛ ma ɩhɔlɩ zʋlɔ ilili nɔhʋanlɛ.

9. Sɛ odwohilalɛ be ma wʋ padi golɔ a, mɩnla yɛ ɔkɔhʋla ɛkɛyɛ a? (Kila mfonyini yi sʋ̃.)

⁹ Sɛ eyiyiaa ndwokɔzɩzɩbɛ be a, ɩyɛ a adwɩnɩndwɩnɩ kʋla hyɛ wʋ zʋ nkʋ̃ʋ̃ ma wʋáhʋla bɔ mpayɩ po a? Anzɛnyɩɩ ɛtɩ nɣanlɩ kɛɛ éni anwʋzɩzɩbɛ mɔɔ ɛkɛva kozuma dɩyɛ a? Kakɛ kɛɛ Gyehova ɩtɩ wʋ bʋwabɩlɛ yɩ tʋ. Meti sɛ yɛákʋla yɛkã mɔɔ yɛpɛ kɛɛ yɛkã munwala wɔ yɛ mpayɩwɔlɛ nu po a, sa yɛkʋla yenyia anwʋlazʋ kɛɛ Gyehova ɩkɛva mɔɔ yehyinyia nɩ ɩkɛma yɛ. (Ɛfɩ. 3:20) Sɛ ɛtɩ nɣanlɩ kɛɛ ɛvɛ anzɛnyɩɩ wu padi golɔ meti ɔlɔ́kʋla okozuma dɩyɛ a, ebiye a sa ɔkʋla etiye Bayɩbʋlʋ anzɛnyɩɩ Bayɩbʋlʋ nwʋ awuuku mɔɔ bɛyɛ yɩ odiyo nɩ. Akʋ̃ sʋ̃, sɛ etiye ye ndwomi yi be anzɛnyɩɩ ekila vidiyo wɔ jw.org zʋ a, sa ɩkʋla ɩbʋwa wʋ. Sɛ yɛbɔ Gyehova mpayɩ na yɛpɩbɛ nwʋmɔ munwalɩyɛ wɔ awuuku azʋlɔtʋ mɔɔ ɩva ɩma yɛ nɩ nu a, ɩkɛma yekenyia anwʋzɩzɩbɛ.

WU MMELIYEMA KƆHƲLA KƐHYƐ WƲ ƐZƖZƖBƐ

10. Mɩnla ɔhʋanɩ zʋ yɛ ye mmeliyema Kilisinyiamaa bɛhyɛ yɛ ɛzɩzɩbɛ a?

¹⁰ Gyehova kɔhʋla koluwa ye mmeliyema zʋ kɛhyɛ yɛ ɛzɩzɩbɛ. Sa bɔkʋla “bɔbʋwa yɛ kezile baaba,” mmɩlɩ mɔ yeyiyiaa odwohilalɛ be anzɛnyɩɩ ɩyɛ sɩ kɛɛ yekeli asɛdɩ be nwʋ egyima nɩ. (Kol. 4:​10, 11) Yehyinyia yɛ ɔhɔnwʋmmɔ, titili wɔ yɛ “anwʋhyɩlɩyɛ mmɩlɩ nu.” (Ɛɣɛ. 17:17) Sɛ yɛ padi kolɔ a, ye mmeliyema kɔhʋla kɔwʋwa yɛ ma yekenyia mɔɔ yehyinyia, bɛkɛyɩkyɩ yɛ ɛɣɛɛlɛ, na bɛahyɛ yɛ ɛzɩzɩbɛ ma yɛahɔ zʋlɔ yɛava nɔhʋanlɛlilɛ yɛazʋ̃mɩ Gyehova. Bɛmá yehila kezimɔ Gyisɛsɩ yɩ maamɩ Mɛɛlɩ inyianlɩ ɛzɩzɩbɛhyɛlɛ wɔ mmenii mvʋlɔ bɛ kɛ.

11. Mɩnla ti mɔɔ nɩ Mɛɛlɩ hyinyia dedi a?

¹¹ Nɩ Mɛɛlɩ hyinyia dedi. Ebiye a, yɩ adwɩnɩ duli vʋlalɩ mmɩlɩ mɔ bɔvʋlɔ Gebila hanlɩ hileli yi kɛɛ ɩkɛɣɩnzɛ na ɩawʋ mmɩlɩ mɔ nɩ ilékyialɩ nɩ. Nɩ ɩlɛ́tɩdɩlɩ kuakula kyɩ̃, naasʋ̃ nɩ ɩsɛ kɛɛ ɩtɩdɩ kuakula mɔɔ ɩkɛɣa ɩkɛyɛ Mɛzaya yɩ nɩ. Akʋ̃ sʋ̃, nɩ ɩ nɩɩ benyia bela bɛlɛ́dalɩ kyɩ̃, meti nɩ kɛ ɩkɛyɛ na iahilehile numɔ iahile Dwosefi mɔɔ nɩ ibagyia yɩ nɩ kɛɛ ɩɣɩnzɛ a?—Lk. 1:​26-33.

12. Kɛmɔ Luuku 1:​39-45 kile nɩ, mɩnla ɔhʋanɩ zʋ yɛ Mɛɛlɩ nyianlɩ ɛzɩzɩbɛhyɛlɛ mɔɔ nɩ ihyinyia a?

¹² Kɛ ɩyɛlɩ mɔɔ Mɛɛlɩ nyianlɩ dedi mɔɔ nɩ ihyinyia ɩva ilili egyimalilɛ eyi mɔɔ nɩ ɩyɛ sɩ nɩ nwʋ egyima a? Ɩmanlɩ mmenii mvʋlɔ wʋwalɩ yɩ. Kɛ ndianwʋ nɩ, ɩhã ihileli Gebila kɛɛ, ɩhã egyimalilɛ fʋlɔ mɔɔ bɛva bowula yɩ sa nɩ nwʋ odwokɔ sʋ̃maa ihilé yi. (Lk. 1:34) Mɛyɩ mɛda pɛɛ nɩ, ɩhɔ igyelalɩ yɩ busunwanii Ɛlizabɛtɩ wɔ Dwudiyia “yɩ dɩka mɔɔ ɩyɛ avile nɩ.” Ɔzɔ egyelalɛ yɩ wʋwalɩ yɩ paa. Ɛlizabɛtɩ hyɛlɩ Mɛɛlɩ ɛzɩzɩbɛ na Gyehova yi sunzuma hanlɩ yɩ ma ɩhanlɩ nkɔmɩhyɛ odwokɔ be mɔɔ ɩhyɛ ɛzɩzɩbɛ ɩvalɩ Mɛɛlɩ yɩ ɣa mɔɔ ɩbawʋ yɩ nɩ nwʋ. (Kɩnga Luuku 1:​39-45.) Mɛɛlɩ hanlɩ kɛɛ Gyehova “ɩdɩnɣɛ yɩ abasa ɩyɛ nninyeni nɣezile.” (Lk. 1:​46-51) Gyehova luwalɩ Gebila nɩɩ Ɛlizabɛtɩ zʋ hyɛlɩ Mɛɛlɩ ɛzɩzɩbɛ.

13. Mmɩlɩ mɔ eliyema baalɛ be mɔɔ ɩwɔ Bolivia manlɩ yi mmeliyema wʋwalɩ yɩ nɩ, mɩnla mfasʋ yɛ inyianlɩ a?

¹³ Dɩkɛɛ Mɛɛlɩ nɩ, wʋzawʋ sʋ̃ sa ɔkʋla enyia ɛzɩzɩbɛhyɛlɛ wɔ wu mmeliyema dedimaa bɛ kɛ. Nɩ eliyema baalɛ Dasuri mɔɔ ɩwɔ Bolivia nɩ hyinyia ɛzɩzɩbɛhyɛlɛ yɩ be la. Mmɩlɩ mɔ adimakɛlɛ be mɔɔ yi munwa awudo íni kɛnɩ wɔlɩ yɩ papa na beleli yi bedianlɩ asʋpiti nɩ, ileli idianlɩ yɩ nwʋ zʋ kɛɛ ikehila yɩ. (1 Tim. 5:4) Naasʋ̃ nɩ ɩ́la azɩ. Ɩkã kɛɛ, “Mbɔmɩ sʋ̃maa nɩ, nɩ mɩtɩ nɣanlɩ kɛɛ mʋlɔ́kʋla mʋkɔhɔ zʋ mikehila yɩ.” Asʋ̃ ɩbɩbɛlɩ mmʋwalɩyɛ a? Ahyɛasɩ yɩ ɩáyɛ zɔ. Ɩhanlɩ kɛɛ, “Nɩ mɩábɛ kɛɛ mɩkɛha mmeliyema yɩ bɛ adwɩnɩ. Nɩ musunzu kɛɛ ‘Gyehova yɛ ɩkɔwʋwa mɩ ma mɩ sa kɛhã mmʋwalɩyɛ mɔɔ mihyinyia a.’ Mɩɣa mʋnwʋnlɩ kɛɛ sɛ mʋtwɩ̃ mʋ nwʋ wɔ mvʋlɔ nwʋ a, nɩ ɩdɩ kɛɛ mɔɔ mɩzamɩ nkʋ̃tɩnyɩɩ midii mɩ ɔhawʋ yɩ nwʋ egyima.” (Ɛɣɛ. 18:1) Dasuri zili pɔkɔ kɛɛ ɩkɛhã yɩ ɔhawʋ yɩ nwʋ odwokɔ ikehile yɩ ɔhɔnwʋmmɔ yɩ be. Ɩhanlɩ kɛɛ, “Mɔɔ mmeliyema yɩ yɛlɩ nɩ hyɛlɩ mɩ ɛzɩzɩbɛ baaba. Bɛvalɩ alɩyɛ bɛɣɩlɛlɩ mɩ wɔ asʋpiti kɛnɩ na bɛɣɩnganlɩ Bayɩbʋlʋ nu ndwokɔ bɛva bɛyɩkyɩlɩ mɩ ɛɣɛɛlɛ. Mɩɣa mʋnwʋnlɩ kɛɛ ɩlɛ́kalɩ mɩzamɩ nkʋ̃ nɩ, mɩ anyɩ leli baaba. Yɛla abusunwa kezile be nu mɔɔ numɔ maa beziyeziye bɔ nwʋ kɛɛ bɔkɔwʋwa yɛ, bɛkɛyɩkyɩ yɛ ɛɣɛɛlɛ na bɛahyɛ yɛ ɛzɩzɩbɛ ma yɛahɔ zʋ yɛazʋ̃mɩ Gyehova.”

14. Mɩnla ti mɔɔ ɩsɛ kɛɛ yede asafʋ nu mbanimbani bɔ mmʋwalɩyɛ yetiã nu a?

¹⁴ Gyehova duwa asafʋ nu mbanimbani bɔ zʋ ɩhyɛ yɛ ɛzɩzɩbɛ. Ɩva bɛ ɩma yɛ kɛɛ bɛhyɛ yɛ ɛzɩzɩbɛ na bɛma yɛ ahʋnlɩnɩ ɩdɔ ye kunlu. (Ayɩ. 32:​1, 2) Sɛ nninyeni hyɛ wʋ zʋ a, kã nwʋmɔ odwokɔ kile asafʋ nu mbanimbani. Sɛ bɛlɛ mmʋwalɩyɛ bɛmaa wʋ a, ɔzʋ̃ wʋ ahʋnlɩnɩ nu de tiã numɔ. Gyehova kɔhʋla koluwa asafʋ nu mbanimbani bɔ zʋ ɩkɛma ɛkɛyɛ sɩ.

EƔILE BE NWƲ ANYƖNLƖLAZƲ YƖ KƆHƲLA KƐHYƐ WƲ ƐZƖZƖBƐ

15. Mɩnla anyɩnlɩlazʋ yɛ ɩla Kilisinyiamaa bɛ ahʋnlɩnɩ zʋ a?

¹⁵ Bayɩbʋlʋ nu anʋhʋba nwʋ anyɩnlɩlazʋ mɔɔ yɛwɔ nɩ ɩkɔhʋla ɩkɛhyɛ yɛ ɛzɩzɩbɛ ma yɛkɔhɔlɩ zʋlɔ yɛkɔzʋ̃mɩ Gyehova. (Wul. 4:​3, 18-20) Kɛ Kilisinyiamaa nɩ, yɛwɔ anyɩnlɩlazʋ kɩnlɩma be kɛɛ, yɛkɔwʋwa azɩ daabaa wɔ paladayɩsɩ azɩlɛ yɩ zʋ anzɛnyɩɩ sʋlɔ. Yɛ anyɩnlɩlazʋ yɩ bʋwa yɛ ma yɛkʋla yekyina odwohilalɛ munwa, yɛkã odwokɔba yɩ, na yedi yɛ asɛdɩ mɔɔ yɛlɛ yɩ wɔ asafʋ yɩ nu nɩ nwʋ egyima. (1 Tɛs. 1:3) Ɔzɔ anyɩnlɩlazʋ kʋ̃ yɩ la hyɛlɩ sʋ̃mavʋlɔ Pɔɔlʋ ɛzɩzɩbɛ.

16. Mɩnla ti mɔɔ nɩ sʋ̃mavʋlɔ Pɔɔlʋ hyinyia anwʋzɩzɩbɛ a?

¹⁶ Nɩ Pɔɔlʋ hyinyia anwʋzɩzɩbɛ. Wɔ yɩ kɛlɛta mɔɔ ɩhɛlɛlɩ ɩhɔ ɩmanlɩ Kɔlɛntɩmaa yɩ nu nɩ, ɩvalɩ yɩ nwʋ idindianlɩ mmuwakɛ mɔɔ ɩyɛ mɛlɛkɛ nwʋ. Nɩ ‘bedide yi,’ ‘yɩ adwɩnɩ nu yɛ yɩ kʋnsɩnyɩɩ,’ ‘bɛyɛ yɩ atɩɩtɩɩ’ na ‘bepigyiabigyia yɩ bɔwɩlɩ azɩ.’ Ɩyɛ po a, nɩ yɩ nnwʋanlɩ ɩba ɩda asianɩ nu. (2 Kɔl. 4:​8-10) Pɔɔlʋ hɛlɛlɩ ndwokɔ eyimmɔ nɩ, nɩ ɩwɔ yɩ odwokɔbadɛlɛlɛ ɔhʋanɩdulɛ mɔɔ ɩtɔ zʋlɔ asã yɩ nu. Mmɩlɩ mɔ ɩhɛlɛlɩ ndwokɔ eyimmɔ mɛda nɩ, iyiyialɩ ndwokɔzɩzɩbɛ azʋlɔtʋ be sʋ̃. Basabasayɛlɛmaa dʋlɩ hyɛlɩ yɩ zʋ, bɛhyɩlɩ yɩ, yɩ ɛlɛnɩ wutuli wɔ ngyemvile nu, na bedianlɩ fiyiadɩ.

17. Kɛmɔ 2 Kɔlɛntɩmaa 4:​16-18 kile nɩ, mɩnla yɛ ɩhyɛlɩ Pɔɔlʋ ɛzɩzɩbɛ ma igyinanlɩ odwohilalɛ yi munwa a?

¹⁷ Pɔɔlʋ valɩ yɩ adwɩnɩ ziyeli yɩ anyɩnlɩlazʋ yɩ zʋ na ɩwʋwalɩ yɩ ma igyinanlɩ pindinyii. (Kɩnga 2 Kɔlɛntɩmaa 4:​16-18.) Ɩhanlɩ ihileli Kɔlɛntɩmaa nɩ kɛɛ, sɛ yi “eniiwudo yɩ ɩsɩkɛɛ po a,”ɩlɛ́ma ikogolɔ yi padi. Pɔɔlʋ valɩ yɩ adwɩnɩ ziyeli yɩ anyɩnlɩlazʋ yɩ zʋ. Anyɩnlɩlazʋ mɔɔ nɩ Pɔɔlʋ ɩwɔ kɛɛ ɩkɔwʋwa sʋlɔ nɩ, nɩ ɩtʋ bʋlɔ ɩma yɩ nkʋ̃ʋ̃ ma nɩ iziyeziye yɩ nwʋ kɛɛ ikegyina odwohilalɛ bela mɔɔ ikeyiyia nɩ munwa. Pɔɔlʋ dwɩnɩndwɩnɩnlɩ yɩ anyɩnlɩlazʋ yɩ nwʋ na ɩmanlɩ ‘inyianlɩ anwʋzɩzɩbɛ fʋlɔ eɣile ɔkʋ̃ bela.’

18. Mɩnla ɔhʋanɩ zʋ yɛ awudunwolɩyɛ nwʋ anyɩnlɩlazʋ yɩ hyɛlɩ Tihomir nɩɩ yɩ abusunwa yɩ ɛzɩzɩbɛ a?

¹⁸ Eɣile be nwʋ anyɩnlɩlazʋ yɩ hyɛlɩ eliyema be mɔɔ ɩwɔ Bulgaria mɔɔ bɔfʋlɔ yɩ Tihomir ɛzɩzɩbɛ. Alʋbɔ ɛgyɩkɩ̃ɩ̃ be mɔɔ idua numɔ nɩ, yɩ anlima benyia kuakula mɔɔ bɔfʋlɔ yɩ Zdravko wuli wɔ asɩdɛntɩ be nu. Eyi manlɩ alɔbɔ kezile hanlɩ Tihomir. Mɔɔ ɩkɛma bɛ ɛɣɛɛlɛ kɛyɩkyɩ nɩ, ɩ nɩɩ yɩ abusunwa yɩ bodualɩ kezimɔ awudunwolɩyɛ nɩ kɛyɛ nɩ nwʋ mfonyini. Ikilehile numɔ kɛɛ: “Kɛ ndianwʋ nɩ, yesunzu dɩka mɔɔ yekeyiyia Zdravko, alɩyɛ mɔɔ yɛkɛyɛ yɛkɛma yɩ, bɛzabɛ mɔɔ yɛkɔdʋ salɛ yɛkɔvʋlɔ bɛ ma bɛkɛɣa yɩ paati yɩ tʋ, nɩɩ mɔɔ yɛkɛhã yekehile yi falɩ awielɩyɛ mmɩlɩ yɩ nwʋ nɩ nwʋ.” Tihomir kã kɛɛ anyɩnlɩlazʋ eyi mɔɔ ɩ nɩɩ yɩ abusunwa bɛfa bɛ adwɩnɩ besiye zʋlɔ nɩ, ɩbʋwa bɛ ma bekyina pindinyii na bɔkɔ zʋlɔ bɛdɩkɛ kɔbʋmɩ kɛɛ Gyehova ikodunwo bɛ anlima yɩ.

19. Mɩnla yɛ ɔkɔhʋla kɛyɛ kɛva kɛhyɛ wʋ anyɩnlɩlazʋ nu ɛzɩzɩbɛ a? (Kila mfonyini yi sʋ̃.)

¹⁹ Kɛ ɩkɛyɛ na wʋahyɛ wʋ anyɩnlɩlazʋ yɩ nu ɛzɩzɩbɛ a? Kɛ ndianwʋ nɩ, sɛ wʋ anyɩnlɩlazʋ yɛ lɛ kɛɛ ɔkɔwʋwa azɩ daabaa wɔ azɩlɛ yɩ zʋ a, kɩnga mɔɔ Bayɩbʋlʋ yɩ kã falɩ paladayɩsɩ nwʋ na dwɩnɩndwɩnɩ kezimɔ ɛbɩlawɔlɛ kɛyɛ wɔ oyuwadɩ fʋlɔ yɩ nu nɩ nwʋ. (Ayɩ. 25:8; 32:​16-18) Tuá nwʋmɔ mfonyini kila kɛɛ ɔwɔ oyuwadɩ fʋlɔ yɩ nu. Aninyiammɔ yɛ ɔnwʋ bɛ a? Mɩnla yɛ ɛtɩ a? Na kɛ ɛtɩ nɣanlɩ ese a? Mɔɔ ɩkɔwʋwa wʋ ma ɔkɔnwʋ kezimɔ paladayɩsɩ kɛyɛ nɩ, kila mfonyini mɔɔ ɩwɔ yɛ awuuku azʋlɔtʋ yɩ nu anzɛnyɩɩ kila ndwomi nwʋ vidiyo dɩkɛɛ, Yɛ Sa Hã Azʋ̃nudwolɩyɛ! anzɛnyɩɩ Tuá Nwʋmɔ Mfonyini. Sɛ yɛkɔ zʋlɔ yɛdwɩnɩndwɩnɩ oyuwadɩ fʋlɔ yɩ nwʋ anyɩnlɩlazʋ yɩ nwʋ a, ɩkɛma yɛ ‘ɛyɛkɛ mɔɔ yɛtɩɩ nɩ ɩkɛyɛ ɛgyɩkɩ̃ɩ̃.’ (2 Kɔl. 4:17) Iluwa anyɩnlɩlazʋ mɔɔ Gyehova ɩva ɩma yɛ nɩ zʋ nɩ, ɩkɛma yɛkɛyɛ sɩ.

20. Sɛ yɛtɩ nɣanlɩ kɛɛ ye padi golɔ a, kɛ ɩkɛyɛ na yeanyia anwʋzɩzɩbɛ a?

²⁰ Sɛ yɛtɩ nɣanlɩ kɛɛ ye padi golɔ po a, ‘iluwa Nyamɩnlɩ zʋ nɩ yekenyia anwʋzɩzɩbɛ.’ (Ndw. 108:13) Gyehova ɩva nninyeni mɔɔ yehyinyia na ama yɛ sa ɩahã yɩ mmʋwalɩyɛ nɩ ɩma yɛ. Sɛ ehyinyia mmʋwalɩyɛ na wʋahʋla wʋali asɛdɩ be nwʋ egyima, wʋagyina odwohilalɛ be yi munwa, na wʋahɔ zʋ wʋanyia anyɩnlɩlelɛ a, ɔzʋ̃ wʋ ahʋnlɩnɩ nu bɔ Gyehova mpayɩ na duwa wʋzawʋ wʋ dɩyɛzumanlɛ zʋ pɩbɛ yɩ ɔhʋanɩhilelɛ. Ma wu mmeliyema dedimaa bɔwʋwa wʋ. Dé mmɩlɩ fa dwɩnɩndwɩnɩ eɣile be nwʋ anyɩnlɩlazʋ yɩ nwʋ. Na ‘Nyamɩnlɩ kɛva yɩ animinyiamɩ tumi nɩ ɩkɛma anwʋzɩzɩbɛ wʋ ama wʋahʋla wʋava abʋtalɩ nɩɩ anyɩnlɩlelɛ wʋagyina pindinyii wɔ dɩyɛ bela munwa.’—Kol. 1:11.