Asʋ̃ Nyamɩnlɩ Yɛ Ɩwɔlɩ Abɔnsamɩ a?

Mɔɔ Bayɩbʋlʋ yɩ kã

Bayɩbʋlʋ yɩ ma yɛnwʋ kɛɛ, kɛ Nyamɩnlɩ yɛ ɩwɔlɩ Abɔnsamɩ a, mfomi ɩwɔlɩ bɔvʋlɔ be yɛ yɩzayɩ ɩɣa ɩyɛlɩ yɩ nwʋ Abɔnsamɩ a. Bayɩbʋlʋ yɩ kã Nyamɩnlɩ nwʋ odwokɔ kɛɛ: “Ɩyɛ yɩ dɩyɛ bela pɛpɛɛpɛ, iluwakɛɛ yɩ ahʋanɩ munwala ɩtɩnɣɛ. Ɩdɩ Nyamɩnlɩ nɔhʋanlɛvʋlɔ mɔɔ nnahɩlɩbɛ bela íni yi nu; ɩdɩ ɛdɩnɣɛlɛnii mɔɔ ibu ndɛnɩ mɔɔ ɩtɩnɣɛ.” (Ditilonɔmi 32:3-5) Eyi ma yɛnwʋ yɩ kɛɛ, mmɩlɩ be mɔɔ ɩɣa ɩzɩ̃ ɩhɔ nɩ, nɩ Setanɩ Abɔnsamɩ dɩ Nyamɩnlɩ yɩ awɔvʋlɔ bo nu ɔkʋ̃ mɔɔ idi munli na ɩtɩnɣɛ.

Wɔ Dwɔɔnʋ 8:44 nɩ, Gyisɛsɩ hanlɩ Abɔnsamɩ nwʋ odwokɔ kɛɛ “iádi nɔhʋanlɛ kyɩ̃,” eyi kile kɛɛ mmɩlɩ be, nɩ Setanɩ dɩ nɔhʋanlɛvʋlɔ na tanɩ bela íni yɩ nwʋ.

Meti kɛmɔ ɩdɩ wɔ Gyehova yɩ abɔdɩ mɔɔ bezi nɣɛlɛbɛ munwala bɔ ɔfʋã nu nɩ, nɩ bɔvʋlɔ mɔɔ ɩɣa ɩyɛlɩ Setanɩ yɩ sʋ̃ lɛ nwʋmɔ ɔhʋanɩ kɛɛ isi pɔkɔ wɔ baaba nɩɩ tanɩ nwʋ. Na kɛmɔ idwodwuli idiyialɩ Nyamɩnlɩ yi tumililɛ na ɩlahɩlɩlɩ agyiahʋnlɩmaa mɔɔ beli bɔmʋnlɩ yɩ ma belili yɩ mɛda nɩ, ɩɣa ɩyɛlɩ Setanɩ, mɔɔ ikile “Odwodwudiyialɛvʋlɔ.”—Gyɛnɛsɩsɩ 3:1-5; Yikile 12:9.