Mɩnla Ti Mɔɔ Kilisinyianɩ Nsɔlɩ Nsɔlɩ Azʋlɔtʋ Wɔ Kɛ a?
Mɔɔ Bayɩbʋlʋ yɩ kã
Mmenii sʋ̃maa gyina Gyisɛsɩ yɩ ehilehilelɛ zʋ bɛdɩ “Kilisinyianɩ” nsɔlɩ nsɔlɩ sʋ̃maa zɛ. Naasʋ̃ Bayɩbʋlʋ yɩ ma yɛnwʋ kɛɛ nɔhʋanlɛ Kilisinyianɩ ɔzʋ̃mɩnlɛ ɔkʋ̃ pɛ la wɔ ɩwɔ kɛ a. Kila sianti asã ti mɔɔ yɛkãã zɔ nɩ.
Gyisɛsɩ hanlɩ kɛɛ ihilehileli “nɔhʋanlɛ nɩ” na Kilisinyiamaa mɔɔ beli bɔmʋnlɩ yɩ sʋ̃ hanlɩ kɛɛ bɔ ɔzʋ̃mɩnlɛ yɛ ɩdɩ “nɔhʋanlɛ” a. (Dwɔɔnʋ 8:32; 2 Pita 2:2; 2 Dwɔɔnʋ 4; 3 Dwɔɔnʋ 3) Ndwokɔ eyimmɔ kile kɛɛ bɛzabɛ mɔɔ bɛtɩ nsɔlɩ nsɔlɩ mɔɔ ɩ nɩɩ Gyisɛsɩ yɩ ehilehilelɛ iáyiyia nɩ bɛ́dɩ nɔhʋanlɛ Kilisinyianɩ.
Bayɩbʋlʋ yɩ kã kɛɛ, ɩsɛ kɛɛ Kilisinyiamaa ‘bɛmá bo munwatĩĩ bo munwa sɛlɩ bɔ nwʋ.’ (1 Kɔlɛntɩmaa 1:10) Naasʋ̃, Kilisinyianɩ nsɔlɩ nsɔlɩ sʋ̃maa bo munwa ɩázɛlɩ bɔ nwʋ wɔ ehilehilelɛ azʋlɔtʋ mɔɔ ɩma abiye yɛ Kilisinyianii ankasa nɩ nwʋ. Eyi kile kɛɛ ɔzɔ nsɔlɩ nsɔlɩ nɩ bɛáli nɔhʋanlɛ.—1 Pita 2:21.
Gyisɛsɩ hyɛlɩ nkɔmɩ kɛɛ, mmenii sʋ̃maa kɛhã kɛɛ bɛdɩ Kilisinyiamaa naasʋ̃ belédi yɩ ahyɛdɩ zʋ na ɩkɔbʋ ɔzɔ mmenii nɩ. (Matiyu 7:21-23; Luuku 6:46) Nyamɩnlɩ ɔzʋ̃mɩnlɛ nu mbanimbani be sʋ̃ pɩbɛ bɛzabɛ bʋwɔyɛlɛ na bɛdahɩlɩ dahɩlɩ mmenii sʋ̃maa na bɛava bɛanyia bɔ nwʋ. (Matiyu 7:15) Naasʋ̃, mbiyemmɔ sʋ̃ pɛ kɛɛ bɛyɛ Kilisinyiamaa iluwakɛɛ ɩma bɛtɩ ehilehile mɔɔ bɛpɛ kɛɛ bɛtɩ na kɛ mɔɔ Bayɩbʋlʋ nɩ kilehile nɩ a.—2 Timoti 4:3, 4.
Gyisɛsɩ yɩ ndianwʋ mɔɔ ɩfalɩ atʋkʋ nɩɩ ndibe nwʋ nɩ, ɩhanlɩ kɛɛ (ɔvʋakɩlɛmaa) kodwodwu kediyia nɔhʋanlɛ Kilisinyianɩ ɔzʋ̃mɩnlɛ. (Matiyu 13:24-30, 36-43) Wɔ mmɩlɩ tɩndɩnlɩ be nu nɩ, na nɩ yɛlɔ́kʋla yɛkɔnwʋ sʋnʋnkʋ̃ mɔɔ ɩwɔ nɔhʋanlɛ Kilisinyiamaa nɩɩ awohwizʋ̃mɩnlɛ bɛ avinli. Kɛmɔ Gyisɛsɩ hanlɩ nɩ, wɔ adʋwavʋlɔ yɩ bo owulo mɛda nɩ, ɔvʋakɩlɛmaa hɔlɩ bɛ anyunu. (Egyima 20:29, 30) Kɛmɔ awohwi ehilehilelɛ gua azʋlɔtʋ nɩ, ɔzʋ̃mɩnlɛ azʋlɔtʋ mɔɔ bɔfʋlɔ bɔ nwʋ Kilisinyiamaa nɩ “bɔhwɩ̃ bɔ nwʋ wɔ nɔhʋanlɛ yɩ nwʋ.”—2 Timoti 2:18, New World Translation.
Gyisɛsɩ zialɩ hanlɩ kɛɛ ngyɩkɩ̃ɩ̃ ngyɩkɩ̃ɩ̃ la yɛkɔnwʋ sʋnʋnkʋ̃ mɔɔ ɩwɔ nɔhʋanlɛ Kilisinyiamaa nɩɩ awohwizʋ̃mɩnlɛmaa bɛ avinli. Na ɩɣa numɔ wɔ yɛ mmɩlɩ eyi nu, wɔ “oyuwadɩ yɩ awielɩyɛ” yɩ nu.—Matiyu 13:30, 39.