Asʋ̃ Kyakyadʋlɛ Dɩ Tanɩ a?

Mɔɔ Bayɩbʋlʋ yɩ kã

Ɩwɔ numɔ, Bayɩbʋlʋ yɩ ɩáhã kyakyadʋlɛ nwʋ ndwokɔ sʋ̃maa dɩyɛ, naasʋ̃ Bayɩbʋlʋ nu ndwokɔ azʋlɔtʋ be wɔ kɛnɩ mɔɔ ɩma yɛnwʋ kɛɛ Nyamɩnlɩ bu kyakyadʋlɛ kɛɛ ɩdɩ tanɩ.​—Ɛfɩsɛsɩmaa 5:17.a

• Anyɩnlɩbʋlʋ yɛ ɩma mmenii tʋ kyakya a, na subanɩ eyi sʋ̃ mɛyɩ Nyamɩnlɩ kyi donwuu. (1 Kɔlɛntɩmaa 6:9, 10; Ɛfɩsɛsɩmaa 5:3, 5) Sɛ mmenii tʋʋ kyakya a, mɔɔ bekila yɩ ɔhʋanɩ yɛ lɛ kɛɛ ɔkʋ̃ keli nkugu na ama bɛ sa ɩahã yi ozukua nɩ, naasʋ̃ Bayɩbʋlʋ yɩ tɩndɛ tiyia abiye mɔɔ yɩ anyɩ bʋlʋ yɩ ɔhɔnwʋ yɩ dɩyɛ.​—Ɛkɩsadɔsʋ 20:17; Wulomimaa 7:7; 13:9, 10.

• Sɛ ozukua ɛgyɩkɩ̃ɩ̃ be yɛ ɛfa tʋ kyakya po a, ngyɩkɩ̃ɩ̃ ngyɩkɩ̃ɩ̃ la sa ɩkʋla ɩma wʋ anyɩ bʋlʋ ozukua, na eyi kɔhʋla kɛma ekeyiyia ɔhawʋ sʋ̃maa.​—1 Timoti 6:9, 10.

• Mbɔmɩ sʋ̃maa nɩ, kyakyadʋlɛmaa fa bɔ nwʋ tiã azunzuma ndwokɔlilɛ nɩɩ dedi mbʋanlɩ mbʋanlɩ zʋ. Naasʋ̃ Nyamɩnlɩ nwʋ́ ɔzɔ nyɛlɩyɛ nɩ kɛɛ ɩdɩ awʋzʋmɩzʋ̃mɩnlɛ na ɩ nɩɩ yɩ apɛdɩ iáyiyia.​—Ayɩzaya 65:11.

• Bayɩbʋlʋ yɩ hyɛ yɛ ɛzɩzɩbɛ kɛɛ yɛyɛ́ egyima ɛzɩzɩbɛ mfomi tɛla kɛɛ yɛkɛma yɛ anyɩ kɔwʋlʋ kɛɛ yekenyia debe wɔ dɩyɛ mɔɔ yɛáfɛlɩ nwʋmɔ nu. (Odwokɔhanlɛvʋlɔ 2:24; Ɛfɩsɛsɩmaa 4:28) Bɛzabɛ mɔɔ bɛlɛ Bayɩbʋlʋ ɛhɛlɛlɛdwokɔ eyimmɔ bɛyɛɛ egyima nɩ, ‘bɛyɛ egyima mɔɔ ɩkɛma bɛ sa ɩkɔhɔ bo munwa nwʋ eɣile bela.’​—2 Tɛsalonikamaa 3:10, 12.

• Kyakyadʋlɛ kɔhʋla kɛma yekozũ asikanɩ, Bayɩbʋlʋ tɩndɛ tiyia subanɩ eyi.​—Galatiyiamaa 5:26.