OZUMALƐDƖYƐ 24
Kɛ Ɩyɛ Mɔɔ Yɛbɔ Yɛ Oyuwadɩ Munwala Egyima Yɩ Nwʋ Kakɛ a?
Nepal
Togo
Britain
Yɛ ahyɩhyɛdɩ ɩyɛ na ɩkyɛ Bayɩbʋlʋ nɩɩ awuuku nɩɩ nninyeni mvʋlɔ mbɩmmbɩɩ ɔlʋbɔ bela mɔɔ bɛádua bʋlɔ bela betiã ɔzʋlɔ. Yekyina na yesiyeziye Bulombunli Ayiyialɩyɛ Nniyia nɩɩ yɛ egyimayɛlɛ nnɩka. Na yɛbʋwa Bɛtɩlɩmaa nɩɩ odwokɔbadɛlɛlɛmaa abʋmɩ abʋmɩ, na akʋ̃ sʋ̃ yɛfa nninyeni yɛkɔ yɛbʋwa mmenii mɔɔ asianɩ ɩdʋ bɛ nɩ. Ebiye a ekeɣizia kɛɛ, ‘Nɩ kɛ ɩyɛ mɔɔ bɔbɔ ɔnwʋmɔ kakɛ a?’
Bɛále tayɩtɩ, ntɔ anzɛnyɩɩ kɔllɛhyɩnɩ yɛ. Ɩwɔ numɔ kɛɛ, ozukua mɔɔ yɛfa yɛbʋwa yɛ odwokɔba ɛlawulowɔlɛ egyima nɩ ɩdɩ kezile dɩyɛ, naasʋ̃ yɛázinziã ozukua. Ɔlʋbɔ yaalɛ mɔɔ idua nu nɩ, bɛhɛlɛlɩ wɔ yɛ Watchtower magezini mɔɔ nɩ ɩtɔ ɔzʋlɔ anwɩ̃ yɩ nu kɛɛ, yede yedi kɛɛ Gyehova igyĩ yɛ mɛda meti yɛ ahyɩhyɛdɩ “ilésinziã ozukua anzɛnyɩɩ yɛlɛ́pa mmenii kyɛbɛ kɛɛ bɔwʋwa yɛ”—na yɛlɛ́yɛlɩ ɔzɔ sʋ̃ kyɩ̃!—Matiyu 10:8.
Bɔzʋ̃ bɛ anhʋnlɩnɩ nu bɔbʋwa yɛ egyima azʋlɔtʋ yɩ nɩ a. Mmenii sʋ̃maa bɛanyɩ ideli yɛ Bayɩbʋlʋ ehilehilelɛ egyima yɩ nɩ nwʋ na bɔzʋ̃ bɛ ahʋnlɩnɩ nu bɔbʋwa. Dasɩvʋlɔmaa bɛzabɛ bɔzʋ̃ anyɩnlɩlelɛ nu bɛfa bɛ mmɩlɩ, bɛ anwʋnzɩzɩbɛ, bɛ ozukua, nɩɩ bɛ nninyeni mvʋlɔ bɔbʋwa ma bɛyɛ Nyamɩnlɩ yɩ apɛdɩ wɔ azɩlɛ yɩ dɩka bela. (1 Chronicles 29:9, NW) Wɔ yɛ Bulombunli Ayiyialɩyɛ Aliyia nu nɩɩ yɛ ayiyialɩyɛ azʋlɔtʋ yɩ tʋ nɩ, bɛfa fʋtʋlɔ nnɛka bɛtɩda ɛkɛnɩ na ama mmenii mɔɔ bɛpɛ kɛɛ bɔzʋ̃ bɛ ahʋnlɩnɩ nu bɔbʋwa nɩ, bɛayɛ ɔzɔ. Mbɔmɩ sʋ̃maa nɩ, ozukua mɔɔ bɛyɩ yɩ nɩ ɩzʋ̃ mmenii mɔɔ béni ozukua, dɩkɛ kunavʋlɔ baalɛ ehyinyianii be mɔɔ Gyisɛsɩ ɩhamvʋlɩ yɩ nɩ, ɩvalɩ ahapɛlɩba anwɩ̃ igualɩ asɔlɩ aliyia nɩ yɩ fʋtʋlɔ alɩka yɩ nu. (Luuku 21:1-4) Meti abiyela ɩkʋla ‘ɩtɩ ozukua mɔɔ inyia yɩ be itiã ahanlɩ’ na ɩava ɩama kɛmɔ “izunzu nwʋmɔ wɔ yɩ ahʋnlɩnɩ nu” nɩ.—1 Kɔlɛntɩmaa 16:2; 2 Kɔlɛntɩmaa 9:7.
Yede yedi kɛɛ, Gyehova ɩkɔhɔ ɔzʋlɔ ɩkɛhã mmenii mɔɔ bɛpɛ kɛɛ ‘bɛfa bɛ anwʋnyia bɛyɛ baaba bɛma yɩ’ nɩ bɛ ahʋnlɩnɩ, na bɛava bɛawʋwa Bulombunlililɛ egyima yɩ ama ɩapɛdɩ ɩayɛlɩ ɛkɛnɩ.—Luuku 16:9.
Mɩnla yɛɛ ɩma yɛ ahyɩhyɛdɩ yɩ nɩ ɩyɛ sʋnʋnkʋ̃ wɔ ɔzʋ̃mɩnlɛ azʋlɔtʋ yɩ nwʋ a?
Mɩnla ɔhʋanɩ zʋ yɛ yɛfa fʋtʋlɔ mɔɔ mmenii bɔzʋ̃ bɛ ahʋnlɩnɩ nu bɛyɩ yɩ nɩ yɛyɛ egyima a?