Gyisɛsɩ Ɩyɛlɩ Sutiye Eɣile Bela

Asʋ̃ ɩyɛ mɛlɛkɛ mmɩlɩ munwala kɛɛ ekediye wʋ awʋvʋlɔ a?— Ɩyɛ a, ɩyɛ ɛzɩzɩbɛ. Ezi kɛɛ Gyisɛsɩ ɩyɛlɩ sutiye ɩmanlɩ Gyehova nɩɩ yɩ awʋvʋlɔ munwala a?— Yɩ ndianwʋ nɩ ɩkɔhʋla ɩkɔwʋwa wʋ ma ɛkɛyɛ sutiye ɛkɛma wʋ awʋvʋlɔ mmɩlɩ po mɔɔ ɩyɛ ɛzɩzɩbɛ nɩ. Ma yezuma eyi ɩnwʋ dɩyɛ sʋ̃maa.

Ansaana Gyisɛsɩ ɩbaɣa azɩlɛ yɩ zʋ nɩ, nɩ ɩ nɩɩ yɩ Papa, Gyehova bɔwɔ sʋlɔ. Naasʋ̃ nɩ Gyisɛsɩ ɩwɔ awʋvʋlɔ sʋ̃ wɔ azɩlɛ yɩ zʋ. Be dima yɛ lɛ Dwosefi nɩɩ Mɛɛlɩ. Ezi kezimɔ bɛɣa bɛyɛlɩ yɩ awʋvʋlɔ a?—

Gyehova ɩyɩlɩ Gyisɛsɩ yɩ nnwʋanlɩ mɔɔ nɩ ɩlɛyɩ wɔ sʋlɔ nɩ, na ɩvalɩ ɩɣa iwulalɩ Mɛɛlɩ ikunlu kɛmɔ ɩkɛyɛ na bɛawʋ Gyisɛsɩ na ɩawʋwa azɩlɛ yɩ zʋ. Nɩ eyi ɩyɛ nnwʋánlɩ! Gyisɛsɩ inyinli wɔ Mɛɛlɩ yi kunlu dɩkɛ mɔɔ kuakula bela inyii wɔ yɩ maamɩ ikunlu nɩ la. Wɔ aziyianɩ ahɔnla yɩ mɛda nɩ, bɔwʋlɩ Gyisɛsɩ. Iluwa ɔhʋanɩ eyi zʋ yɛɛ Mɛɛlɩ nɩɩ yi hũ, Dwosefi, bɛɣa bɛyɛlɩ Gyisɛsɩ yɩ awʋvʋlɔ wɔ azɩlɛ yɩ zʋ a.

Mmɩlɩ mɔɔ Gyisɛsɩ inyianlɩ alʋbɔ 12 nɩ, ɩyɛlɩ dɩyɛ be mɔɔ nɩ ikile kezimɔ ɩdɔ yɩ Papa, Gyehova. Eyi izili wɔ mmɩlɩ mɔɔ Gyisɛsɩ nɩɩ yɩ abusunwa boduli ɔhʋanɩ tɩndɩnlɩ be bɔhɔlɩ Gyelusalamɩ kɛɛ bekeli Ahʋanɩnwʋmɔ awuwa nɩ. Mmɩlɩ mɔɔ nɩ besiaa bɔkɔhɔ awudo nɩ, nɩ Dwosefi nɩɩ Mɛɛlɩ bɛánwʋ Gyisɛsɩ. Ezi dɩka mɔɔ nɩ ɩwɔ a?—

Dwosefi nɩɩ Mɛɛlɩ bezialɩ ndɛndɛ bɛɣalɩ Gyelusalamɩ na bɛɣa bɛbɩbɛlɩ Gyisɛsɩ. Nɩ bɛ ɛɣɛɛlɛ ɩwɔ iluwakɛɛ nɩ bɛánwʋ Gyisɛsɩ. Naasʋ̃ aɣile asã mɛda nɩ, bɔnwʋnlɩ Gyisɛsɩ wɔ asɔlɩ aliyia nɩ nu! Ezi sianti mɔɔ nɩ Gyisɛsɩ ɩwɔ asɔlɩ aliyia nu nɩ a?— Iluwakɛɛ nɩ sa ɩkʋla isuma yɩ Papa, Gyehova ɩnwʋ dɩyɛ wɔ ɛkɛnɩ. Nɩ ɩdɔ Gyehova na nɩ ɩpɛyɩ kɛɛ isuma kezimɔ ɩkɔzɔ yɩ anyɩ. Mmɩlɩ po mɔɔ inyinli na ɩɣa ɩyɛlɩ ebani nɩ, Gyisɛsɩ idiyeli Gyehova eɣile bela. Gyisɛsɩ ɩyɛlɩ sutiye mmɩlɩ po mɔɔ nɩ ɩyɛ ɛzɩzɩbɛ ɩma yɩ, nɩɩ mmɩlɩ po mɔɔ ɩsɛ kɛɛ ɩnwʋ amanɩyɛ nɩ. Asʋ̃ Gyisɛsɩ ɩyɛlɩ sutiye ɩmanlɩ Dwosefi nɩɩ Mɛɛlɩ sʋ̃ a?— Nyɛ, Bayɩbʋlʋ yɩ ɩkã kɛɛ ɩyɛlɩ sutiye.

Mɩnla yɛ ɔkɔhʋla okozuma wɔ mɔɔ Gyisɛsɩ ɩyɛlɩ yi nu a?— Ɩsɛ kɛɛ ɛyɛ sutiye ma wʋ awʋvʋlɔ, mmɩlɩ po mɔɔ ɩyɛ ɛzɩzɩbɛ nɩ. Ɛkɛyɛ ɔzɔ a?—