Kɛmɔ Bekeli Ndwokɔ Ɛzɩzɩbɛ Nwʋ Egyima

Mmɩlɩ mɔɔ ɛ nɩɩ wu hũ anzɛnyɩɩ wʋ yɩ bɔbɔ bɛ ɛbɩlawɔlɛ ɩtʋ nɩ, ndwokɔ ɛzɩzɩbɛ azʋlɔtʋ ikodwodwu. Eyi ɩkɔhʋla ikezizi iluwakɛɛ ɩsʋnɩ kezimɔ bonu bela ɩdwɩ, ɩtɩ nɣanlɩ, na ɩyɛ yɩ nninyeni wɔ ɛbɩlawɔlɛ nu. Ebiye a, ndwokɔ ɛzɩzɩbɛ be sʋ̃ ɩzʋ̃ dɩka fʋlɔ anzɛnyɩɩ dɩyɛ be mɔɔ bɛáhila yɩ ɔhʋanɩ nɩ ɩkɛɣa.

Ɩkɛyɛ mɛlɛkɛ kɛɛ okowu wʋ anyɩ okogua ndwokɔ ɛzɩzɩbɛ be zʋ, naasʋ̃ botu yɛɛ fʋlɔ wɔ Bayɩbʋlʋ yɩ nu kɛɛ yeli amɩyɛzayɛ ye ndwokɔ ɛzɩzɩbɛ nwʋ egyima. (Matiyu 5:23, 24) Sa enyia wʋ ndwokɔ ɛzɩzɩbɛ nɩ yi munwa awudo iluwa Bayɩbʋlʋ nu egyinalɛzʋ-ndwokɔ mɔɔ ɛkɛva ekeli egyima nɩ zʋ.

1 BOZUNZU ODWOKƆ ƐZƖZƖBƐ NƖ NWƲ

MƆ BAYƖBƲLƲ YƖ ƖKÃ: “Ɛdɩndɛlɛ wɔ . . . yɩ mmɩlɩ.” (Ecclesiastes 3:1, 7, NWT) Bɔwɔ mmɔdɩnɩ kɛɛ bekenyia mmɩlɩ bɔkɔwɔ odwokɔ ɛzɩzɩbɛ nɩ nwʋ nkɔmɔ. Ma wu hũ anzɛnyɩɩ wʋ yɩ ɩnwʋ kezimɔ ɛtɩ nɣanlɩ nɩɩ wʋ adwɩnɩ mɔɔ ɔwɔ wɔ odwokɔ ɛzɩzɩbɛ be nwʋ bʋwɔ. ‘Kã nɔhʋanlɛ’ kile wu hũ anzɛnyɩɩ wʋ yɩ eɣile bela. (Ɛfɩsɛsɩmaa 4:25) Sɛ ɛfa ɛya kezile po a, sí wʋ kɛnɣa kɛɛ ɔlɔ́tʋ wʋ sa. Munwalɩyɛ mɔɔ ɩdɩ bɔkɔɔ nɩ, ɩlɛ́ma nkɔmɔwɔlɛ ɩkɛlanɩ mbevile. —Proverbs 15:4; 26:20, NWT.

Sɛ wʋále odwokɔ be tiã numɔ po a, ma wʋ munwa nu odwokɔ ɩyɛ fɛlɛkʋ̃, máma wʋ ɛɣɛɛlɛ ifi kɛɛ ɛkɛla ɔlɔlɛ nɩɩ annidi ali ekehile wu hũ anzɛnyɩɩ wʋ yɩ. (Kolosiyiamaa 4:6) Bɔwɔ mmɔdɩnɩ kɛɛ bekeziyeziye ndwokɔ ɛzɩzɩbɛ nɩ ndɛndɛ zʋ la, máma beyiaki kɛɛ bɛ nɩɩ bɔ nwʋ kɛdɩndɛ.—Ɛfɩsɛsɩmaa 4:26.

MƆ ƆKƆHƲLA ƐKƐYƐ:

• Bɛyɩ́ mmɩlɩba be beziye ahanlɩ mɔɔ bɛkɛva bokozunzu ndwokɔ ɛzɩzɩbɛ nwʋ

• Sɛ itwu wʋ zʋ kɛɛ ekediye odwokɔ a, bɔ mmɔdɩnɩ kɛɛ olótudualɩ yi munwa zʋ. Sa wʋzawʋ sʋ̃ wʋ mmɩlɩ itwu ma ɛtɩndɛ

2 TIYE NA TƖ ƖTƲ

MƆ BAYƖBƲLƲ YƖ ƖKÃ: ‘Mʋnlʋmmɔ bɛvá mmeliyema ɔlɔlɛ bɔlʋlɔ́ bɔ nwʋ bɔ nwʋ nkʋ̃kʋ̃, na mʋnlʋmmɔ bɔwɔ́ mmɔdɩnɩ bɛbɩ bowú bɔ ɔhɔnwʋmmɔ baaba.’ (Wulomimaa 12:10) Kezimɔ etiye odwokɔ nɩ ɔnwʋmɔ ihyinyia baaba. Bɔ mmɔdɩnɩ kɛɛ ɛkɛdɩ wu hũ anzɛnyɩɩ wʋ yɩ yɩ adwɩnɩhilelɛ tʋ iluwa ‘ngokɛnwʋnlɛ . . . nɩɩ wʋ nwʋ azɩ mɔɔ ɛkɛhã’ nɩ zʋ. (1 Pita 3:8; Gyemisi 1:19) Áma ɛyɛ wʋ nwʋ kɛɛ etiye naasʋ̃ nɩ elétiye. Sɛ ɩkɛyɛ bʋwɔ a, fa mɔɔ ɛyɛɛ bela nɩ tiã ahanlɩ na yɛ azʋnlɩ ma wu hũ anzɛnyɩɩ wʋ yɩ, anzɛnyɩɩ siãã yɩ kɛɛ ɩma bozunzu ɔnwʋmɔ aɣinzi nɩ. Sɛ ɔnwʋ wu hũ anzɛnyɩɩ wʋ yɩ kɛɛ wʋ ɔhɔnwʋ mɔɔ ɛ nɩɩ yɛ egyima ɔkʋ̃ na mfomi ɩ́dɩ abiye mɔɔ ɛ nɩɩ besi ambile a, “ɩlɛ́ma ɛkɛva ɛya ndɛndɛ.”—Ecclesiastes 7:9, NWT.

MƆ ƆKƆHƲLA ƐKƐYƐ:

• Sɛ mɔɔ etiyee nɩ wʋ anyɩ iáleli ɔnwʋmɔ po a, kɔ ɔzʋlɔ yɛ azʋnlɩ tiye

• Tiye adwɩnɩ mɔɔ ɩwɔ odwokɔ mɔɔ ɩkãã nɩ yɩ mɛda. Yɛ wu hũ anzɛnyɩɩ wʋ yɩ yɩ nyɛlɩyɛ nɩɩ yɩ nnɩ ndwɩ

3 BELI ƆNWƲMƆ EGYIMA

MƆ BAYƖBƲLƲ YƖ ƖKÃ: “Mfasʋ wɔ egyima ɛzɩzɩbɛ bela zʋ, na munwanlɩyɛlɛ dɩyɛ, ɩfa anwʋhyɩlɩyɛ ɩba.” (Proverbs 14:23, NWT) Kɛ pɔkɔzilɛ baaba mɔɔ bekele bekediã numɔ la nɩ yɛ ihyinyia, mfomi, mɔɔ ihyinyia yɛ lɛ kɛɛ bekeli pɔkɔzilɛ bela mɔɔ bekezi nɩ nwʋ egyima. Eyi ikehyinyia egyima ɛzɩzɩbɛ nɩɩ mmɔdɩnɩwɔlɛ, naasʋ̃ ɔzʋlɔ wɔ mfasʋ. (Proverbs 10:4, NWT) Sɛ bɛyɛ egyima bɔbɔ numɔ a, sa “benyia akatuwa baaba” wɔ bɛ egyima ɛzɩzɩbɛ nɩ zʋ.—Ecclesiastes 4:9, NWT.

MƆ ƆKƆHƲLA ƐKƐYƐ:

• Bezi pɔkɔ wɔ ahʋanɩ pɔkyɩ̃ɩ̃ be mɔɔ bonu bela ikoluwa ɔzʋlɔ ikeli ndwokɔ ɛzɩzɩbɛ be nwʋ egyima

• Mmɩlɩ ɩkɔɔ ɔzʋlɔ nɩ, behila kezimɔ benyiaa anyunumihɔlɛ