Beli Nɔhʋanlɛ Bɛma Bɔ Nwʋ Bɔ Nwʋ

Gyehova ɩpɛ kɛɛ ‘abiyela ɩkã nɔhʋanlɛ ikile yɩ ɔhɔnwʋ.’ (Ɛfɩsɛsɩmaa 4:25) Eyi nwʋ ihyinyia baaba wɔ wʋ agyiahʋnlɩ nu iluwakɛɛ, sɛ nɔhʋanlɛlilɛ íni agyiahʋnlɩ yɩ nu a, ɩlɛ́ma bekele bɔ nwʋ bekeli. Na bɔ nwʋ mɔɔ bekele bekeli nɩ sʋ̃ ɔnwʋmɔ ihyinyia paa na ama ɔlɔlɛ mɔɔ ɩwɔ bonu nɩ ianyi.

Nnɛ, nɔhʋanlɛlilɛ wɔ agyiahʋnlɩ nu nɩ nwʋ ɩɣa odwokɔ. Sɛ ɔkɔwɔ wʋ agyiahʋnlɩ nwʋ banɩ a, nɩ ɩsɛ kɛɛ esi wʋ kɛnɣa kɛɛ ɛkɛyɛ nninyeni anwɩ̃ be.

1 MA WƲ AGYIAHƲNLƖ NWƲ IHYINYIA WƲ BAABA

MƆ BAYƖBƲLƲ YƖ ƖKÃ: “Mʋnlʋmmɔ bɔnwʋ mɔɔ ɩdɩ baaba.” (Fɩlɩpɩmaa 1:10) Wʋ agyiahʋnlɩ nɩ ɩdɩ dɩyɛ ɔkʋ̃ be mɔɔ ɩdɩ baaba anzɛnyɩɩ ɔnwʋmɔ ihyinyia wɔ wʋ ɛbɩlawɔlɛ nu. Meti ɩsɛ kɛɛ ɛma ɔnwʋmɔ ihyinyia wʋ baaba.

Gyehova ɩpɛ kɛɛ ɛfa wʋ adwɩnɩ esiye wʋ yɩ anzɛnyɩɩ wu hũ zʋ, na ‘bɛale bɛ anyɩ’ bɛawɔ numɔ. (Ecclesiastes 9:9, NWT) Ɩma numɔ ɩla ɛkɛnɩ kɛɛ, íni kɛɛ obu wʋ anyɩ okua wu hũ anzɛnyɩɩ wʋ yɩ zʋ, mfomi, ɩsɛ kɛɛ bɛzabɛ anwɩ̃ nɩ bɛpɩbɛ ahʋanɩ mɔɔ bɛkɛma bonu bela yɩ anyɩ ikele. (1 Kɔlɛntɩmaa 10:24) Ma wʋ yɩ anzɛnyɩɩ wu hũ ɩdɩ nɣanlɩ kɛɛ yɩ nwʋ ihyinyia wʋ na wʋ anyɩ ɩsɔ yɩ sʋ̃.

MƆ ƆKƆHƲLA ƐKƐYƐ:

• Bɔwɔ mmɔdɩnɩ kɛɛ bɔkɔwɔ nu bɛkɛyɛ dɩyɛ, na benyia mmɩlɩ bɛma bɔ nwʋ bɔ nwʋ

• Mɩádwɩnɩ wʋzawʋ nkʋ̃tɩnyɩɩ wʋ nwʋ

2 BƆ́ WƲ AHƲNLƖNƖ NWƲ BANƖ

MƆ BAYƖBƲLƲ YƖ ƖKÃ: “Abiyela mɔɔ ikehila baalɛ, na yɩ ɛɣɛɛlɛ ɩkɔlɔ yɩ nɩ, nɩ ɩdʋ̃ agyiahʋnlɩ wɔ yɩ ahʋnlɩnɩ nu.” (Matiyu 5:28) Sɛ abiye ɩkɔ ɔzʋlɔ ɩdwɩnɩndwɩnɩ ɛbɩlazɩkɛlɛ nninyeni nwʋ a, nɩ ikile kɛɛ ilédi yɩ hũ anzɛnyɩɩ yɩ yɩ nɔhʋanlɛ.

Gyehova ɩkã ikile yɛ kɛɛ, ihyinyia kɛɛ yɛbɔ yɛ ahʋnlɩnɩ nwʋ banɩ. (Maakɩ 7:21-23) Sɛ yɛkɔhʋla yɛkɛyɛ eyi a, nɩ ihyinyia kɛɛ yɛbɔ yɛ anyɩ nwʋ banɩ. (Matiyu 5:29, 30) Suma ye nlabenyia Dwoobu mɔɔ ɩ nɩɩ yɩ anyɩ yɛlɩ nhyɩhyɛlɩyɛ kɛɛ, ilékila baalɛ ikenyia akɔnɔ ɩkɛma yɩ kyɩ̃ nɩ. (Job 31:1, NWT) Sí wʋ kɛnɣa kɛɛ elékila ɛbɩlazɩkɛlɛ nwʋ mfonyini bela kyɩ̃. Na bɔ mmɔdɩnɩ kɛɛ elényia enii fʋlɔ bela mɔɔ ɩ́dɩ wu hũ anzɛnyɩɩ wʋ yɩ nɩ ɩnwʋ akɔnɔ.

MƆ ƆKƆHƲLA ƐKƐYƐ:

• Ma abiyela nwʋ yɩ kɛɛ, wu hũ anzɛnyɩɩ wʋ yɩ nkʋ̃ʋ̃ la yɛ ɩkɔ a

• Sunzu wu hũ anzɛnyɩɩ wʋ yɩ yɩ nɣanlɩdɩlɛ nwʋ, na yɛ ndɛndɛ tualɩ ɔhɔnwʋvalɛ bela mɔɔ ɩha wu hũ anzɛnyɩɩ wʋ yɩ nɩ zʋ