DƖYƐZUMANLƐ 14

Ndwokɔ Aditili Mɔɔ Bɛma Ɩda Ali

Ɛhɛlɛlɛ odwokɔ mɔɔ bɔhwɩ̃ adwɩnɩ beziye zʋ

Hibulumaa 8:1

MƆ ƖSƐ KƐƐ ƐYƐ: Bʋwá wʋ ediyelɛmaa nɩ ma beli wʋ ndɛnɩ nɩ mɛda, na kilé kezimɔ odwokɔ titili ɔkʋ̃ bela ɩ nɩɩ wʋ ndɛnɩ yɩ bʋtayɩ nɩɩ odwokɔtile nɩ iyiyia.

KEZIMƆ ƐKƐYƐ YƖ:

Fá bʋtayɩ be siye wʋ anyɩ zʋ. Nwʋ́ sianti mɔɔ ɛkɛmaa ndɛnɩ nɩ. Asʋ̃ ɛlɛ ɛda odwokɔ be ali, ɛlɛ ekilehile nɔhʋanlɛ odwokɔ be nu ma bekele bekediã nu, anzɛnyɩɩ ɛlɛ ɛhyɛ wʋ ediyelɛmaa nɩ ɛzɩzɩbɛ a? Akʋ̃ siyeziye wʋ nwʋ wɔ ɔzɔ ɔhʋanɩ yɩ zʋ. Bɔ́ mmɔdɩnɩ kɛɛ wʋ ndwokɔ aditili nɩ munwala ɩkɔwʋwa wʋ ma okodwu wʋ bʋtayɩ nɩ nwʋ.

Biziá wʋ nwʋ kɛɛ: ‘Mɩnla ndwokɔɣizialɛ yɛ ebiye a, mɩ ediyelɛmaa nɩ bɛlɛ yɩ wɔ odwokɔtile nɩ nwʋ a? Mɩnla dɩyɛ yɛ bɛále betiã nu wɔ nwʋmɔ a? Mɩnla ɔhʋanɩ zʋ yɛ bɛkɛla ndwokɔɣizialɛ anzɛnyɩɩ mɔɔ bɛále betiã numɔ nɩ ali a?’ Akʋ̃ hyɩhyɛ́ wʋ ndwokɔ nɩ wɔ ɔzɔ ɔhʋanɩ yɩ zʋ la na ama wʋ ediyelɛmaa nɩ bɛahʋla bɛali wʋ mɛda, bɛadɩ wu odwokɔ nɩ tʋ, na bɛale bɛadiã nu.
Sí wʋ ndɛnɩ nɩ yɩ odwokɔtile nɩ zʋ owudo. Twɩ̃ adwɩnɩ siye wʋ ndɛnɩ yɩ odwokɔtile nɩ zʋ mbɔmɩ sʋ̃maa wɔ wʋ ndɛnɩ yɩ nu, iluwa ndwokɔ abɔkɔ mɔɔ ɩwɔ wʋ ndɛnɩ yɩ odwokɔtile nɩ nu mɔɔ ekezi ɔzʋlɔ dɔkʋ̃ nɩ zʋ.
Má wʋ ndwokɔ aditili nɩ nu ɩla ɛkɛ na ɩyɛ nzikalɛ. Yɩ́ ndwokɔ aditili mɔ ɩ nɩɩ wʋ odwokɔtile nɩ iyiyia la mɔɔ ɔkɔhʋla ekehilehile numɔ bʋwɔ wɔ mmɩlɩ mɔ bɛva bɛma wʋ nɩ nu. Áma ɛfa ndwokɔ aditili sʋ̃maa, má odwokɔ titili bela ɩla ali bʋwɔ, sɛ ɛkã odwokɔ titili ɔkʋ̃ bela a kyiná, na kilehile odwokɔ titili nɩ nu nkʋ̃kʋ̃ nkʋ̃kʋ̃ ma numɔ ɩla ɛkɛnɩ.

Sa ɔkʋla ɛda wʋ ndwokɔ aditili nɩ ali wɔ wʋ ndɛnɩ yɩ tʋwɔlɛ na ɩawʋwa wʋ ediyelɛmaa nɩ ma bɛali wʋ ndɛnɩ nɩ mɛda. Ɔkɔhʋla sʋ̃ ɔkɔwʋwɔ ndwokɔ aditili nɩ zʋ dɔkʋ̃ wɔ wʋ ndɛnɩ yɩ awielɩyɛ na ama wʋ ediyelɛmaa nɩ bɛahakɛ.