Dwɩnɩndwɩnɩ Ozumalɛdɩyɛ Aditili Mɔɔ Ɩwɔ Numɔ Nɩ Nwʋ

Asʋ̃ ozuma debe ma mɛyɩ mɛda pɛɛ nɩ, nɩ wʋáhakɛ mɔɔ ozumanlɩ nɩ a? Ɩyɛ a eyi be tʋ ye munwala. Mɩnla yɛ ɩkɔwʋwa wʋ a? Dwɩnɩndwɩnɩ ndwokɔ aditili mɔɔ ɩwɔ numɔ nɩ nwʋ.

Sɛ osumaa dɩyɛ a, ɩyɛ a kyina ɛgyɩkɩ̃ɩ̃ na dwɩnɩndwɩnɩ ozumalɛdɩyɛ mɔɔ ɩwɔ numɔ nɩ nwʋ. Ɔzɔ yɛ sʋ̃mavʋlɔ Pɔɔlʋ hanlɩ hileli mmenii mɔɔ nɩ bɛkɛɣɩnga yɩ kɛlɛta yɩ nɩ kɛɛ bɛyɛ́ a. Ɩhanlɩ kɛɛ: “Odwokɔ eyi munwatĩĩ mɔɔ yɛkãã yɩ, yɩ pɔkɔ titili yɛ lɛ kɛɛ.” (Hib. 8:1) Ɩyɛlɩ zɔ ɩva ɩwʋwalɩ bɛ ma bɛdɩlɩ odwokɔ mɔɔ nɩ ɩkãã nɩ tʋ, nɩɩ kezimɔ ɩfalɩ yi odwokɔtile yi nwʋ.

Sɛ osuma dɩyɛ owie a, sa ɔkʋla fa mmɩlɩ ɛgyɩkɩ̃ɩ̃, kɛyɛ miniti bunlu ɔdwɩnɩndwɩnɩ ozumalɛdɩyɛ titili mɔɔ enyianlɩ nɩ nwʋ. Sɛ wʋáhakɛ a, sia kila ndwokɔ adile ngyɩkɩ̃ɩ̃ ngyɩkɩ̃ɩ̃ yɩ anzɛnyɩɩ ndwokɔ mɔɔ ili bɔmʋnlɩ wɔ nkyɩkyɛmi bela nu nɩ na ɩkɔwʋwa wʋ ma ɛkɛhakɛ. Sɛ osuma dɩyɛ fʋlɔ be a, bɔ mmɔdɩnɩ kɛɛ ɛkɛva wʋzawʋ wʋ ndwokɔ kehilehile numɔ. Sɛ ɔdwɩnɩndwɩnɩ ozumalɛdɩyɛ aditili mɔɔ ɩwɔ numɔ nɩ nwʋ a, ɩkɔwʋwa wʋ ma ɛkɛhakɛ na wʋanwʋ kezimɔ ɛkɛva kɛyɛ egyima wɔ wʋ ɛbɩlawɔlɛ nu.