Kezimɔ Awohwi Ɔzʋ̃mɩnlɛ Ɩzɩkɛ Nyamɩnlɩ Yi Dima

Sɛ Nyamɩnlɩ ɩdɩ ɔlɔlɛ dɩyɛ a, mɛyɩ nɩ mɩnla ti mɔɔ ɔzʋ̃mɩnlɛ azʋlɔtʋ mɔɔ bekile kɛɛ bɔsʋ̃mɩ yɩ nɩ, bɛfa bɔ nwʋ bowula nyɛlɩyɛ tanɩ sʋ̃maa zɛ nu a? Yetuaa yɩ sini a, ɔzʋ̃mɩnlɛ eyimmɔ bɛdɩ awohwi ɔzʋ̃mɩnlɛ, bɛsɩkɛ Nyamɩnlɩ yi dima. Mɩnla ɔhʋanɩ zʋ yɛ bɛzɩkɛ yi dima a? Kɛ ɩtɩ nɣanlɩ wɔ nwʋmɔ ise a? Na mɩnla yɛ ɩkɛyɛ wɔ nwʋmɔ a?

1. Mɩnla ɔhʋanɩ zʋ yɛ awohwi ɔzʋ̃mɩnlɛ boluwa bɛ ehilehilelɛ zʋ bɛzɩkɛ Nyamɩnlɩ yi dima?

Awohwi ɔzʋ̃mɩnlɛ ‘bɛzɩnza nɔhʋanlɛ mɔɔ ɩfalɩ Nyamɩnlɩ nwʋ nɩ, na bele awohwi bediã numɔ.’ (Wulomimaa 1:​25) Kɛ ndianwʋ nɩ, ɔzʋ̃mɩnlɛ sʋ̃maa wɔ ɛkɛnɩ mɔɔ bɛáhilehile be mmenii Nyamɩnlɩ yi dima. Naasʋ̃ Bayɩbʋlʋ yɩ ɩkã kɛɛ ɩsɛ kɛɛ yɛfa Nyamɩnlɩ yi dima yɛfʋlɔ yɩ. (Wulomimaa 10:​13, 14) Nyamɩnlɩzʋ̃mɩnlɛ nu mbanimbani be bɛkã kɛɛ odwokɔ tanɩ be isi a, ɩdɩ Nyamɩnlɩ yɩ pɛ. Naasʋ̃ eyi ɩdɩ awohwi. Kɛ Nyamɩnlɩ yɛ ɩma nninyeni tanɩ isizi a. (Kɩnga Gyemisi 1:13.) Aɣɛlɛbɔdwokɔ yɛ lɛ kɛɛ, awohwi eyimmɔ ɩma mmenii sʋ̃maa bɔhwɩ̃ bɔ nwʋ wɔ Nyamɩnlɩ nwʋ.

2. Mɩnla ɔhʋanɩ zʋ yɛ awohwi ɔzʋ̃mɩnlɛ boluwa bɛ nyɛlɩyɛ zʋ bɛzɩkɛ Nyamɩnlɩ yi dima?

Awohwi ɔzʋ̃mɩnlɛ bɛ nɩɩ mmenii iáli yɩ bʋwɔ kɛmɔ Gyehova ɩyɛ nɩ. Bayɩbʋlʋ ɩkã kɛɛ awohwi ɔzʋ̃mɩnlɛ “yɩ tanɩ ɩzʋnɩ ɩma idwu sʋlɔ.” (Yikile 18:5) Alʋbɔ sʋ̃maa ɛdɩ yɛ awohwi ɔzʋ̃mɩnlɛ bɛva bɔ nwʋ bowulawula manlɩwulɛ ndwokɔ nɩɩ kʋnɛ nu a, na bohũhũ mmenii anzɛnyɩɩ bele bediã numɔ ma bohũhũ mmenii sʋ̃maa zɛ. Nyamɩnlɩzʋ̃mɩnlɛ nu mbanimbani sʋ̃maa bɛzɩza anwʋnyia sʋ̃maa bɔwɔ bɛ kɛnɣa na be mmenii yɛ bɛma botuwa nwʋmɔ kakɛ a. Bɛ nyɛlɩyɛ eyi ɩda yɩ ali kɛɛ bɛzabɛ bézi Nyamɩnlɩ na bɛahã po kɛɛ bɛkãã yɩ nwʋ nɔhʋanlɛ odwokɔ.​—Kɩnga 1 Dwɔɔnʋ 4:8.

3. Kɛ Nyamɩnlɩ ɩtɩ nɣanlɩ wɔ awohwi ɔzʋ̃mɩnlɛ nwʋ ise a?

Sɛ nninyeni mɔɔ awohwi ɔzʋ̃mɩnlɛmaa bɛyɛ nɩ ɩma ɛfa ɛya a, ekila a, kɛ Gyehova ɩtɩ nɣanlɩ wɔ nwʋmɔ ise a? Ɩdɔ mmenii, na ɩva awohwi ɔzʋ̃mɩnlɛ nu mbanimbani mɔɔ bɛsɩkɛɛ yi dima na bɛ nɩɩ bɛ asɔlɩmaa iáli yɩ bʋwɔ nɩ nwʋ ɛya. Ɩwɔ anʋhʋba kɛɛ bɛkɛzɩkɛ awohwi ɔzʋ̃mɩnlɛ na “bɔlɔ́nwʋ yɩ ebiyekʋ̃.” (Yikile 18:​21) Ɩlɛ́kyɛ, Nyamɩnlɩ ɩkɛzɩkɛ awohwi ɔzʋ̃mɩnlɛ munwatĩĩ.​—Yikile 18:8.

SUMÁ SƲ̃MAA

4. Nyamɩnlɩ iále ɔzʋ̃mɩnlɛ munwatĩĩ itiã numɔ

Mmenii sʋ̃maa bede bedi kɛɛ ɔzʋ̃mɩnlɛ munwala ɩdɩ kɛɛ ɔhʋanɩ sʋ̃maa mɔɔ ɩfa yɛ ɩkɔ Nyamɩnlɩ yɩ pɛ. Naasʋ̃ eyi ɩdɩ nɔhʋanlɛ a? Kɩnga Matiyu 7:​13, 14, na akʋ̃ bozunzú odwokɔɣizialɛ eyi nwʋ:

• Ɔhʋanɩ mɔɔ ɩkɔ nnwʋanlɩ nu nɩ, kɛ Bayɩbʋlʋ ɩka nwʋmɔ odwokɔ ise a?

Yɩ́ Vidiyo nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Asʋ̃ Nyamɩnlɩ Ide Ɔzʋ̃mɩnlɛ Azʋlɔtʋ Nɩ Munwala Itiã Numɔ a? ​—Yɩ Ɔfʋ̃a Be (3:22)

• Asʋ̃ Bayɩbʋlʋ yɩ ɩkã kɛɛ Nyamɩnlɩ ide ɔzʋ̃mɩnlɛ munwala itiã numɔ a?

5. Awohwi ɔzʋ̃mɩnlɛ nu mbanimbani bɛála Nyamɩnlɩ yɩ ɔlɔlɛ ali

Awohwi ɔzʋ̃mɩnlɛ ɩzɩkɛ Nyamɩnlɩ yi dima wɔ ɔhʋanɩ sʋ̃maa zʋ. Ɔhʋanɩ ɔkʋ̃ mɔɔ ɩdɩbɛ kʋlaa mɔɔ boduwa ɔzʋlɔ bɛyɛ ɔzɔ yɛ lɛ kʋnɛ mɔɔ bɛfa bɔ nwʋ bowulawula numɔ nɩ. Yɩ́ VIDIYO nɩ, na kila nwʋmɔ ndianwʋ ɔkʋ̃. Akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.

VIDIYO: Mɔɔ Asɔlɩ Azʋlɔtʋ Bɛyɛlɩ Wɔ Oyuwadɩ Kʋnɛ II Yi Nu (2:22)

• Mɩnla yɛ asɔlɩ sʋ̃maa bɛyɛlɩ wɔ Oyuwadɩ Kʋnɛ II yi nu a?

• Mɔɔ bɛyɛlɩ nɩ, kɛ ɛtɩ nɣanlɩ wɔ nwʋmɔ ese a?

Kɩnga Dwɔɔnʋ 13:​34, 35 nɩɩ 17:​16. Akʋ̃ bozunzú ndwokɔɣizialɛ eyimmɔ nwʋ:

• Sɛ ɔzʋ̃mɩnlɛ azʋlɔtʋ bɛfa bɔ nwʋ bowula kʋnɛ nu a, kɛ Gyehova ɩtɩ nɣanlɩ ise a?

• Nninyeni tanɩ sʋ̃maa mɔɔ isizi nɩ, ebiye ɩzʋ̃ awohwi ɔzʋ̃mɩnlɛ. Mɩnla ɔhʋanɩ zʋ yɛ ɔnwʋ kɛɛ ɔzʋ̃mɩnlɛ azʋlɔtʋ nɩ bɛála Nyamɩnlɩ yɩ ɔlɔlɛ ali a?

6. Nyamɩnlɩ ɩpɛ kɛɛ ide mmenii wɔ awohwi ɔzʋ̃mɩnlɛ nu

Kɩnga Yikile 18:​4,a na akʋ̃ bozunzú odwokɔɣizialɛ eyi nwʋ:

• Sikalɛyɩ mɔɔ ɔnwʋ yɩ kɛɛ Nyamɩnlɩ ɩpɛ kɛɛ ide mmenii wɔ awohwi ɔzʋ̃mɩnlɛ nu nɩ, kɛ ɩma ɛtɩ nɣanlɩ ese a?

7. Kɔ́ ɔzʋlɔ suma nɔhʋanlɛ Nyamɩnlɩ yɩ nwʋ dɩyɛ

Asʋ̃ ɩsɛ kɛɛ kezimɔ awohwi ɔzʋ̃mɩnlɛmaa bɛyɛ bɛ dɩyɛ nɩ ɩsɩnza adwɩnɩ mɔɔ ɛlɛ wɔ Nyamɩnlɩ nwʋ a? Fa yɩ kɛɛ ɛzɩlɛ be yɩ anyɩ iáleli yɩ ɣa be yɩ subanɩ nwʋ, idu fʋlɔ yɩ mbɔmɩ sʋ̃maa naasʋ̃ kuakula yɩ iádiye. Sɛ kuakula yɩ ɩzʋ̃ awudo ɩyɩ yɩ nwʋ ɩkɔ ɩbɔ ɛbɩla tanɩ na odwokɔ be ɩtʋ yɩ a, mɩnla ti mɔɔ ɩlɛ́yɛ baaba kɛɛ yɛkɛva nwʋmɔ ɔzʋnɩ yekediã ɛzɩlɛ yɩ zʋ a?

• Asʋ̃ ɩsɛ kɛɛ yɛfa ɔzʋnɩ yetiã Gyehova zʋ na yeyiaki kɛɛ yekozuma yɩ nwʋ dɩyɛ iluwa awohwi ɔzʋ̃mɩnlɛmaa bɛ nyɛlɩyɛ ti a?

YƖ DƆKƆWƆLƐ

Awohwi ɔzʋ̃mɩnlɛ iluwa bɛ ehilehilelɛ nɩɩ bɛ nyɛlɩyɛ tanɩ zʋ bɛzɩkɛ Nyamɩnlɩ yi dima. Nyamɩnlɩ ɩkɛzɩkɛ awohwi ɔzʋ̃mɩnlɛ.

Kɛ Okowuwa Ekeze a?

• Mɔɔ awohwi ɔzʋ̃mɩnlɛmaa bekilehile nɩɩ mɔɔ bɛyɛ nɩ, kɛ ɛtɩ nɣanlɩ wɔ nwʋmɔ ese a?

• Kɛ Gyehova ɩtɩ nɣanlɩ ise wɔ awohwi ɔzʋ̃mɩnlɛ nwʋ a?

• Mɩnla dɩyɛ yɛ Nyamɩnlɩ ɩkɛva ɩkɛyɛ awohwi ɔzʋ̃mɩnlɛ a?

PƖBƐ́ SƲ̃MAA

Sumá ahʋanɩ anwɩ̃ mɔɔ ɔzʋ̃mɩnlɛ sʋ̃maa boduwa ɔzʋlɔ bɛyɛ dɩyɛ mɔɔ ɩázɔ Nyamɩnlɩ yɩ anyɩ.

“Asʋ̃ Ɔzʋ̃mɩnlɛ Munwatĩĩ Ɩdɩ Ɔkʋ̃ a? Na Yi Munwala Ɩtwɩ̃ Yɛ Ibike Nyamɩnlɩ Anzɛnyɩɩ?” (Ndwokɔ mɔɔ ɩwɔ jw.org zʋ)

Mɩnla ti mɔɔ Gyehova ɩpɛ kɛɛ yɛ nɩɩ mmenii mvʋlɔ bɔ numɔ sʋ̃mɩ yɩ a?

“Asʋ̃ Ihyinyia Kɛɛ Ɛkɛva Wʋ Nwʋ Okowula Ɔzʋ̃mɩnlɛ Pɔkyɩɩ Be Nu Anzɛnyɩɩ?” (Ndwokɔ mɔɔ ɩwɔ jw.org zʋ)

Nɩ nninyeni be mɔɔ ɩkɔlɩ ɔzʋlɔ wɔ ɔsɔfʋ be yɩ asɔlɩ nu nɩ idide yi. Naasʋ̃ ɩáma eyi isi yɩ ɔhʋanɩ kɛɛ ikozuma Nyamɩnlɩ yɩ nwʋ nɔhʋanlɛ odwokɔ.

“Mɔɔ Ɩmanlɩ Ɔsɔfʋ Be Iyiakili Yɩ Asɔlɩ” (Awake!, February 2015)

Alʋbɔ sʋ̃maa ɛdɩ yɛ ɔzʋ̃mɩnlɛ azʋlɔtʋ bɛhã awohwi ndwokɔ bediã Nyamɩnlɩ zʋ ma ɩyɛ kɛɛ mɔɔ yi ti nu yɛ sɩ na ɩádwɩnɩ yɛ nwʋ a. Sumá nɔhʋanlɛ ndwokɔ mɔɔ ɩfalɩ ɔzɔ awohwi yɩ numɔ asã nwʋ.

“Awohwi Ndwokɔ Mɔɔ Ɩáma Enii Ɩkʋla Ibike Nyamɩnlɩ” (Ɔwɩɛnɩlɛ Aɣanɩ, November 1, 2013)