Awielɩyɛ Ndwokɔ
1. Mɔɔ ɩma yɛnwʋ Babilɔnʋ Kezile nɩ
Kɛ ɩyɛ mɔɔ yɛnwʋ kɛɛ ‘Babilɔnʋ kezile’ nɩ igyĩ ɛkɛnɩ ɩma awohwi ɔzʋ̃mɩnlɛ munwala a? (Yikile 17:5) Sunzú ndwokɔ eyimmɔ nwʋ:
Ɩwɔ oyuwadɩ dɩka bela. Bɛkã Babilɔnʋ kezile nwʋ odwokɔ kɛɛ, ɩda “mmenii mɔɔ bɔzʋ̃ abusunwa bela nu” nɩɩ “amanlɩ bela” nu zʋ. “Ikila oyuwadɩ awulombunli nɩ mmɔ bɔ zʋ.”—Yikile 17:15, 18.
Ɩ́dɩ aɣanɩ anzɛnyɩɩ kualɛlilɛ nhyɩhyɛlɩyɛ. Bɛlɛ́sɩkɛ “Azɩlɛ yɩ zʋ awulombunli” nɩɩ “Agualɛlilɛmaa” bɛkɛhɩnla yɩ nwʋ.—Yikile 18:9, 15.
Ɩzɩkɛ Nyamɩnlɩ yi dima. Bɔfʋlɛ yɩ kɛɛ adwomanlɩwɔlɛnii iluwakɛɛ ɩva yɩ nwʋ ɩwɔ aɣanɩ azʋlɔtʋ kezimɔ ikenyia ozukua nɩɩ mmʋwalɩyɛ mvʋlɔ. (Yikile 17:1, 2) Ɩlahɩlɩlahɩlɩ mmenii mɔɔ bɔwɔ azɩlɛ yɩ zʋ nɩ. Na iluwa mɛyɩ ti mmenii sʋ̃maa zɛ bowuwu.—Yikile 18:23, 24.
Siá kɔ ozumalɛdɩyɛ 13 nkyɩkyɛmi 6
2. Eɣile sina yɛ Mɛzaya nɩ ɩkɛɣa a?
Bayɩbʋlʋ ɩhanlɩ idianlɩ ɛkɛnɩ kɛɛ, alapɛnɩ 69 itwu a yɛ Mɛzaya nɩ ɩkɛɣa.—Kɩnga Danɩyɛlɩ 9:25.
Mɩnla mmɩlɩ yɛ alapɛnɩ 69 nɩ ɩwɔlɩ yɩ tʋ a? Ɩwɔlɩ yɩ tʋ wɔ 455 A.Y.M. nu. Ɔzɔ mmɩlɩ yɩ, Amɩladʋ Nehɛmaya ɩɣalɩ Gyelusalamɩ twonwa yi nu ɩɣa “ɩyɩkyɩlɩ ma iziyeli yɩ dadampɔ nu.”—Danɩyɛlɩ 9:25; Nehɛmaya 2:1, 5-8.
Alapɛnɩ 69 nɩ, ilili mmɩlɩ tɩndɩnlɩ ana? Wɔ Bayɩbʋlʋ nkɔmɩhyɛ be nu nɩ, eɣile ɔkʋ̃ igyɩ̃ ɛkɛnɩ ma ɔlʋbɔ ɔkʋ̃. (Nɔmɛsɩ 14:34; Izikɩyɛlɩ 4:6) Meti dapɛnɩ ɔkʋ̃ bela igyĩ ɛkɛnɩ ma alʋbɔ asunwa. Wɔ nkɔmɩhyɛ eyi nu nɩ, alapɛnɩ 69 ɩdɩ alʋbɔ 483 (69 x 7).
Mɩnla mmɩlɩ yɛ alapɛnɩ 69 nɩ ɩɣalɩ awielɩyɛ a? Sɛ yetinyia alʋbɔ 483 ɔzʋmɩ ɔlʋbɔ 455 A.Y.M. nu a, ɩfa yɛ ɩba ɔlʋbɔ 29 Y.M. nu.a Ɔzɔ ɔlʋbɔ yɩ pɛpɛɛpɛ yɛ bonlumanlɩ Gyisɛsɩ ma ɩɣa ɩyɛlɩ Mɛzaya a!—Luuku 3:1, 2, 21, 22.
Siá kɔ ozumalɛdɩyɛ 15 nkyɩkyɛmi 5
3. Mmegyia Mɔɔ Bɛfa Bedi Egyima Wɔ Awudoyɛlɛyɛ Nu
Awudoyɛlɛ be wɔ ɛkɛnɩ a, bɛfa enii mɔɔ yɩ nwʋ ɩba yɩ nɩ mmegyia bedi egyima wɔ nu. Ebiye yɛ lɛ mmegyia mɔɔ bɔtwɩ̃ bɛma enii fʋlɔ anzɛnyɩɩ enii kʋ̃ nɩ yɩzayɩ mmegyia mɔɔ bɔtwɩ̃ besiye ɛkɛnɩ na aɣinzi yi bɛava bɛali egyima wɔ yɩ opilehyɛnɩyɛlɛ nu. Kilisinyiamaa bɛále awudoyɛlɛ mɔɔ ɩdɩ ɔzɔ betiã numɔ.—Ditilonɔmi 15:23.
Numɔ be sʋ̃ wɔ ɛkɛnɩ a, ebiye a sa yɛkʋla yede yetiã nu. Dɩkɛɛ mmegyia mɔɔ bɔtwɩ̃ bɛfa bɛyɛ ɛbɩbɛlɛnu, hemodialysis, hemodilution, cell-salvage anzɛnyɩɩ heart-lung bypass mahyini mɔɔ bɛfa bedi egyima wɔ opilehyɛnɩyɛlɛ nu. Ɩsɛ kɛɛ Kilisinyianii bela isi pɔkɔ wɔ kezimɔ bɛkɛva yɩ mmegyia bekeli egyima wɔ mmɩlɩ mɔ bɛyɛɛ yɩ opilehyɛnɩ, bɛyɛɛ yɩ eniiwudo nu ɛbɩbɛlɛnu, anzɛnyɩɩ bogua zʋ bɛyɛɛ yɩ awudo be nɩ. Ɩsʋnɩ ɔhʋanɩ mɔɔ dɔkɩta bela koluwa ɔzʋlɔ kɛyɛ eyi. Ansaana Kilisinyianii be kele kediã nu kɛɛ bɛyɛ́ yɩ opilehyɛnɩ, bɛbɩbɛ́ yɩ eniiwudo nu anzɛnyɩɩ bɛyɛ́ yɩ awudo be nɩ, ɩsɛ kɛɛ ɩpɩbɛ ɔhʋanɩ pɔkyɩɩ mɔɔ bokoluwa ɔzʋlɔ bɛkɛva yɩ mmegyia bekeli egyima nɩ nu bʋwɔ. Sunzú ndwokɔɣizialɛ eyimmɔ nwʋ:
Na sɛ bɛyɛɛ opilehyɛnɩ mɩ na bɔtwɩ̃ mi mmegyia boduwa mahyini nu na ilésia kɛɣa keli mɩ eniiwudo yi nu wɔ ɛkɛnɩ la sʋ̃ ɛ? Asʋ̃ mi ti ɔwʋwaba kɛma ɔhʋanɩ mɩ ma mukowu mmegyia eyi kɛɛ ɩlanwʋ la ɩwɔ mu nu mɔɔ iléhyinyia kɛɛ “bokodwonwɔ bokogua azɩ” a?—Ditilonɔmi 12:23, 24.
Sɛ bɛyɛɛ opilehyɛnɩ mɩ na bɔtwɩ̃ mi mmegyia yɩ be besiye ahanlɩ na besiyeziye (bɛfa awudo bɔfʋla nu) ansaana iazia ɩaɣa mɩ eniiwudo yi nu sʋ̃ ɛ? Asʋ̃ mi ti ɔwʋwaba mɔɔ mɩva Bayɩbʋlʋ mɩdɩdɩ yɩ nɩ kɛma mikele awudoyɛlɛ mɔɔ ɩdɩ ɔzɔ nɩ mikediã nu a?
Siá kɔ ozumalɛdɩyɛ 39 nkyɩkyɛmi 3
4. Agyiahʋnlɩ Mɔɔ Bɛtɩdɩ Numɔ
Bayɩbʋlʋ kã kɛɛ íni kɛɛ agyiahʋnlɩmaa bɛtɩdɩ nu, na ɩma ɩda ali petee kɛɛ sɛ bɛtɩdɩ nu a, íni kɛɛ bɔkɔ bekyia abiye fʋlɔ. (1 Kɔlɛntɩmaa 7:10, 11, NWT) Naasʋ̃, iluwa bʋwabɩlɛ azʋlɔtʋ be ti Kilisinyiamaa be zi pɔkɔ kɛɛ bɛkɛdɩdɩ bɛ agyiahʋnlɩ nu.
Mmɩlɩ mɔ abiye hyɛda kɛɛ ilékila yɩ abusunwa: Ohunɛ be kɔhʋla kɔbʋ kɛɛ ikehila yɩ abusunwa na ɩma ɩyɛ ɩsɩ kɛɛ bekenyia ozukua bɔkɔdɔ alɩyɛ po.—1 Timoti 5:8.
Mmɩlɩ mɔ abiye yɩ nwʋkãvʋlɔ ɩyɛ yɩ ayɛkwa: Abiye yɛ yɩ nwʋkãvʋlɔ ayɛkwa nkʋ̃ʋ̃ ma yɩ nnwʋanlɩ kʋla ba da asianɩ nu.—Galatiyiamaa 5:19-21.
Mmɩlɩ mɔ abiye ɩyɛɛ mɔɔ ɩkɔhʋla bela kɛɛ ɩkɛzɩkɛ yɩ nwʋkãvʋlɔ nɩɩ Gyehova bɛ avinli ɔhɔnwʋvalɛ: Ebiye a, abiye kɛyɛ dɩyɛ be ma ɩkɛyɛ sɩ kɛɛ yɩ nwʋkãvʋlɔ kɔzʋ̃mɩ Gyehova.—Egyima 5:29.
5. Ɔlʋbɔlilɛ Azʋlɔtʋ
Kilisinyiamaa bɛáva bɔ nwʋ bowula ɔlʋbɔlilɛ azʋlɔtʋ mɔɔ ɩázɔ Gyehova anyɩ nu. Naasʋ̃ wɔ bʋwabɩlɛ azʋlɔtʋ be nu nɩ, ɩsɛ kɛɛ Kilisinyianii bela fa yi ti ɔwʋwaba mɔɔ ɩva Bayɩbʋlʋ ɩdɩdɩ yɩ nɩ isi nwʋmɔ pɔkɔ. Sunzú ndianwʋ eyimmɔ nwʋ kila.
Mmɩlɩ mɔ abiye ɩva ɔlʋbɔlilɛ be nwʋ ezemanlɛ izema wʋ. Sa ɔkʋla de ɔzʋlɔ kɛɛ, “Mɩla asɩ.” Sɛ enii kʋ̃ nɩ pɛ kɛɛ ɩnwʋ sianti mɔɔ wʋáva wʋ nwʋ wula ɔzɔ ɔlʋbɔlilɛ yi nu a, sa ɔkʋla kile numɔ kile yɩ.
Mmɩlɩ mɔ wʋ nwʋkãvʋlɔ mɔɔ ɩ́dɩ Gyehova Dasɩvʋlɔ dʋ salɛ vʋlɔ wʋ kɛɛ, ɛ nɩɩ yi mmusunwamaa bɔwɔ numɔ beli alɩyɛ mmɩlɩ mɔ bedii ɔlʋbɔ be. Sɛ wu ti ɔwʋwaba kɛma wʋ ɔhʋanɩ ma ɔkɔhɔ a, ansaana bɔkɔhɔ nɩ, sa ɔkʋla kilehile numɔ kile yɩ kɛɛ sɛ ɔlʋbɔlilɛ yɩ nwʋ amannɩ be ɩkɔlɩɩ zʋ a, ɛlɛ́fa wʋ nwʋ kowula nu.
Mmɩlɩ mɔ wu egyima nu ebani ma bonɔsʋ wʋ wɔ ɔlʋbɔlilɛ mmɩlɩ be nu. Asʋ̃ íni kɛɛ ede bonɔsʋ yɩ a? Kɛ ɔzɔ ankasa. Sa ɔkʋla bizia wʋ nwʋ kɛɛ, ‘Asʋ̃ ɔlʋbɔlilɛ yɩ ti yɛ ɩlɛ bonɔsʋ ɩmaa wʋ a, anzɛnyɩɩ ɩlɛ ikilee wu egyima ɛzɩzɩbɛ mɔɔ ɛyɛlɩ nwʋ anyɩnlɩzɔlɔ kɛkɛ?’
Mmɩlɩ mɔ abiye hyɛ dɩyɛ wʋ wɔ ɔlʋbɔlilɛ mmɩlɩ nu. Ebiye a enii kʋ̃ nɩ kɛhã kɛɛ: “Mizi kɛɛ wʋáli ɔlʋbɔ eyi, naasʋ̃ mɩpɛ kɛɛ mɩkyɛ dɩyɛ wʋ.” Ebiye a, ɩpɛ kɛɛ ɩda kunlumiba ali ikile wʋ la. Anzɛnyɩɩ ekila a, ɩpɛ kɛɛ itwe wʋ dedi ikila, anzɛnyɩɩ ɩpɛ kɛɛ ɛfa wʋ nwʋ wula ɔlʋbɔlilɛ yi nu a? Sɛ osunzu nwʋmɔ wie a, wʋzawʋ yɛ ekezi pɔkɔ kɛɛ ekele akyɛdɩ nɩ anzɛnyɩɩ eléde a. Wɔ dɩyɛ bela nu nɩ, ɩsɛ kɛɛ yesi pɔkɔ mɔɔ ɩlɛ́ma yɛ adwɩnɩ kowu yɛ fɔ na yɛali nɔhʋanlɛ yɛama Gyehova.—Egyima 23:1.
Siá kɔ ozumalɛdɩyɛ 44 nkyɩkyɛmi 1
6. Adimakɛlɛ Mɔɔ Ɩyɛ Nsanɩ
Iluwakɛɛ yɛdɔ mmenii ti, ɩsɛ kɛɛ yekila yɛ nwʋ bʋwɔ paa kɛɛ yɛlɛ́fa adimakɛlɛ mɔɔ ɩyɛ nsanɩ yɛkɛzanɩ abiye. Meti sɛ yezi kɛɛ yenyia adimakɛlɛ mɔɔ ɩyɛ nsanɩ anzɛnyɩɩ yɛ adwɩnɩ ɩyɛ yɛ kɛɛ yenyia ebiye, na ɩkɔhʋla ɩkɛzanɩ mmenii mvʋlɔ a, mɛyɩ nɩ ɩsɛ kɛɛ yekila yɛ nwʋ bʋwɔ baaba paa. Yɛyɛ yɛ dɩyɛ wɔ ɔzɔ ɔhʋanɩ yɩ zʋ iluwakɛɛ Bayɩbʋlʋ kã kɛɛ: “Dɔ wʋ ɔhɔnwʋ kɛɛ wʋzawʋ wʋ nwʋ.”—Wulomimaa 13:8-10.
Kɛ ɩkɛyɛ na abiye mɔɔ inyia adimakɛlɛ mɔɔ ɩyɛ nsanɩ iahile kɛɛ ɩdɔ mmenii mvʋlɔ a? Íni kɛɛ ɩsʋzɔ mmenii nu, ɩtɔ abiye yɩ nwʋ anzɛnyɩɩ ifo abiye yi munwa nwʋ. Sɛ ɩba yɩ kɛɛ abiyemmɔ bɛátʋ salɛ bɔfʋlɔ yɩ ma ɩba bɛ awudo iluwakɛɛ bɛpɛ kɛɛ bɔbɔ bɛ abusunwa nwʋ banɩ nɩ ti a, íni kɛɛ idi nwʋmɔ ɛyɛkɛ. Ansaana ikonluma nɩ, ɩsɛ kɛɛ ɩkã yɩ adimakɛlɛ yɩ nwʋ odwokɔ ikile mbanimbani avinli nkitanwʋlilɛvʋlɔ nɩ na bɛayɛ nhyɩhyɛlɩyɛ mɔɔ ɩkɔwɔ bɛzabɛ mɔɔ bɛbanluma nɩ bɔ nwʋ banɩ. Sɛ ɩ nɩɩ abiye mɔɔ ɩwɔ adimakɛlɛ mɔɔ ɩyɛ nsanɩ wɔ kyɩ̃, anzɛnyɩɩ ɩda dɩka mɔɔ adimakɛlɛ mɔɔ ɩyɛ nsanɩ wɔ kɛnɩ a, ɩsɛ kɛɛ ɩzʋ̃ yɩ ahʋnlɩnɩ nu ɩkɔ ɩyɛ yɩ mmegyia nu ɛbɩbɛlɛnu ansaana ɩ nɩɩ abiye ɩayɛ nhyɩhyɛlɩyɛ kɛɛ bekyiaa. Sɛ ɩyɛ ɔzɔ a ikile kɛɛ, ɩdɔ mmenii mvʋlɔ na ‘ɩádwɩnɩ yɩzayɩ nkʋ̃ yɩ bʋwɔyɛlɛ nwʋ, na ɩdwɩnɩ yɩ ɔhɔnwʋmmɔ sʋ̃ bɛ yɛ dɩyɛ nwʋ.’—Fɩlɩpɩmaa 2:4.
Siá kɔ ozumalɛdɩyɛ 56 nkyɩkyɛmi 2
7. Egyima Nɩɩ Mmɛla Nu Ndwokɔ
Mɔɔ ɩkɛyɛ na egyima nɩɩ ozukua nwʋ nhyɩhyɛlɩyɛ mɔɔ yɛ nɩɩ mmenii mvʋlɔ yɛ nɩ ɩlɛ́fa ɔhawʋ bela ɩkɛɣa aɣinzi nɩ ti, ɩsɛ kɛɛ yɛfa yekua ahɛlɛta zʋ. Sɛ ɩdɩ yɛ anlima Kilisinyianii po a, ɩsɛ kɛɛ yɛyɛ zɔ. (Gyɛlɩmaya 32:9-12) Naasʋ̃, akasakasa kɔhʋla kɛɣa Kilisinyiamaa bɛ avinli wɔ ozukua nɩɩ ndwokɔ mvʋlɔ nwʋ. Sɛ ɩba yɩ zɔ a, ɩsɛ kɛɛ bɛzabɛ mɔɔ odwokɔ yɩ falɩ bɔ nwʋ nɩ la besiyeziye odwokɔ yɩ ndɛndɛ zʋ wɔ azʋ̃nudwolɩyɛ nu.
Naasʋ̃ mɩnla ɔhʋanɩ zʋ yɛ ɩsɛ kɛɛ yesiyeziye ndwokɔ mɔɔ anyɩnlɩbʋlʋ wɔ numɔ dɩkɛɛ apoowɔlɛ nɩɩ ndwokɔ mɔɔ bɛkã betiã abiye zʋ a? (Kɩnga Matiyu 18:15-17.) Gyisɛsɩ hileli ɔhʋanɩ asã mɔɔ yɛkɔhʋla yekoluwa zʋ yekeziyeziye ndwokɔ:
Bɔwɔ́ mmɔdɩnɩ kɛɛ bɛzabɛ bekeziyeziye bɛ avinli odwokɔ. Kilá nkyɩkyɛmi 15.
Sɛ ɩáyɛ bʋwɔ a, fa enii ɔkʋ̃ anzɛnyɩɩ mmenii anwɩ̃ mɔɔ bɔ nwʋ ɩwʋkwa wɔ asafʋ yi nu ma bɔhɔ beyiaki wʋ.—Kilá nkyɩkyɛmi 16.
Sɛ bɛákʋla besiyeziye odwokɔ yɩ a, mɛyɩ ɩsɛ kɛɛ ɛkã nwʋmɔ odwokɔ ekile asafʋ nu mbanimbani.—Kilá nkyɩkyɛmi 17.
Mbɔmɩ sʋ̃maa nɩ, ɩlɛ́yɛ baaba kɛɛ yɛ nɩɩ ye mmeliyema kɔhɔ kɔɔtʋ iluwakɛɛ sa ɩma bɛkã Gyehova nɩɩ yɩ ahyɩhyɛdɩ nɩ nwʋ odwokɔ tanɩ. (1 Kɔlɛntɩmaa 6:1-8) Naasʋ̃, ndwokɔ be wɔ ɛkɛnɩ mɔɔ ɩsɛ kɛɛ bɛkã yɩ wɔ kɔɔtʋ: agyiahʋnlɩyiakilɛ, abiye mɔɔ ɩsɛ kɛɛ ikila yɩ nnwuakula, ozukua mɔɔ kɔɔtʋ ɩhyɛ abiye ma ituwa ɩma yɩ nwʋkãvʋlɔ mɔɔ ɩ nɩɩ yɩ yiaki agyiahʋnlɩ, insurance ozukua mɔɔ botuwa bɛma abiye, ozukua mɔɔ botuwa bɛma abiye mmɩlɩ mɔ egyima be igu anzɛnyɩɩ wɩɩlɩ nwʋ odwokɔ. Sɛ Kilisinyianii be fa ndwokɔ mɔɔ ɩdɩdɩ zɛ kɔ kɔɔtʋ na besiyeziye yɩ wɔ azʋ̃nudwolɩyɛ nu a, nɩ ilóbuli Bayɩbʋlʋ mmɛla bela zʋ.
Na sɛ ɩfalɩ tanɩ kezile be dɩkɛɛ mmɔnadʋlɛ, nnwuakula mɔɔ bɛkɛtɛkɛtɛ bɛ (child abuse), mmenii mɔɔ bɛyɛ bɛ ayɛkwa, awulo nɣezileyɛlɛ, anzɛnyɩɩ awulilɛ na Kilisinyianii be kɔ bɔ aɣanɩ mbanimbani amanɩyɛ a, ilóbuli Bayɩbʋlʋ mmɛla bela zʋ.
a Ɔzʋmɩ ɔlʋbɔ 455 A.Y.M. nu kɔbʋmɩ ɔlʋbɔ 1 A.Y.M. nu nɩ ɩdɩ alʋbɔ 454. Ɔzʋmɩ ɔlʋbɔ 1 A.Y.M. nu kɔbʋmɩ ɔlʋbɔ 1 Y.M. nu nɩ ɩdɩ ɔlʋbɔ ɔkʋ̃. Na ɔzʋmɩ ɔlʋbɔ 1 Y.M. nu kɔbʋmɩ ɔlʋbɔ 29 Y.M. nu nɩ ɩdɩ alʋbɔ 28. Yɛkã eyi munwala yɛbɔ nu a, yenyia alʋbɔ 483.