Bʋwá Ma Ɔkʋ̃yɛlɛ Ɩwʋwá Asafʋ Yi Nu

Sɛ yɛ nɩɩ yɛ ɔhɔnwʋmmɔ dedimaa yiyia a, yɛtɩ nɣanlɩ kɛɛ Bulombunli Devidi la, ɩhanlɩ kɛɛ: “Kila kezimɔ ɩdɩyɛnɛ na ɩyɛ pɩkɛ kɛɛ mmeliyema kɔwɔ numɔ kɔwʋwa ɔkʋ̃yɛlɛ nu!” (Ndwomi 133:1) Ɔkʋ̃yɛlɛ mɔɔ ɩwɔ ye nu nɩ, ɩáɣa mbʋanlɩ. Ye nu bela mɔɔ ɩwɔ asafʋ yi nu nɩ bʋwa ma ɔzɔ ɔkʋ̃yɛlɛ nɩ kɔlɩ zʋlɔ bʋwa ɛkɛ.

1. Mɩnla yɛ ɩma Nyamɩnlɩ yi mmenii bɛyɛ sʋnʋnkʋ̃ a?

Sɛ ɔkɔ dɩyɛzumanlɛ wɔ manlɩ fʋlɔ zʋ a, ebiye a ɛlɛ́tɩ bɛ ndɛnɩ yɩ dɩyɛ, naasʋ̃ ɛlɛ́tɩ nɣanlɩ kɛɛ ɔdɔ numɔ. Mɩnla ti a? Iluwakɛɛ awuuku ɔkʋ̃ yɩ la yɛ ye munwala yɛfa yesuma Bayɩbʋlʋ yɩ a. Na yɛbɔ mmɔdɩnɩ kɛɛ yɛkɛla ɔlɔlɛ ali yekehile yɛ nwʋ yɛ nwʋ. Ɩávalɩ nwʋmɔ dɩka bela mɔɔ yɛwɔ nɩ, ye munwala ‘yɛbɔ Gyehova yi dima na yɛfa ɔkʋ̃yɛlɛ yɛsʋ̃mɩ yɩ.’—Zɛfanaya 3:9.

2. Mɩnla yɛ ɛkɛyɛ na ama ɔkʋ̃yɛlɛ ɩawʋwa asafʋ yi nu a?

“Bɔlʋlɔ́ bɔ nwʋ nkʋ̃kʋ̃ nkʋ̃kʋ̃ wɔ mʋnlʋmmɔ bɛ ahʋnlɩnɩ nu baaba.” (1 Pita 1:22) Kɛ ɛkɛyɛ na wʋava fʋlɔdulɛ eyi wʋayɛ egyima a? Kɛ ankɩ ɛkɛva wʋ adwɩnɩ keziye mvʋlɔ be sinidɔlɛ zʋ nɩ, fa wʋ adwɩnɩ siye bo subanɩba zʋ mfomi. Áma ɛ nɩɩ mmeliyema mɔɔ bɛ anyɩ deli nninyeni mɔɔ wʋ anyɩ deli nwʋ nkʋ̃ la bɔ, mfomi ɛ nɩɩ bɛzabɛ mɔɔ ɩsʋnɩ dɩka mɔɔ bɔzʋ̃ nɩɩ kezimɔ bɛdɩ nɩ sʋ̃ wɔ. Sɛ ɛlɛ mmenii be nwʋ adwɩnɩ mɔɔ ɩávata a, bɔ mmɔdɩnɩ tu yɩ tʋ.—Kɩnga 1 Pita 2:17.a

3. Sɛ odwokɔ be si wɔ ɛ nɩɩ wʋ anlima Kilisinyianii be avinli a, mɩnla yɛ ɛkɛyɛ a?

Ɩwɔ numɔ kɛɛ ɔkʋ̃yɛlɛ wɔ yɛ avinli dɩyɛ, naasʋ̃ tanɩ wɔ yɛ nwʋ. Ɩyɛ a, yɛkʋla yɛkã odwokɔ be anzɛnyɩɩ yɛyɛ dɩyɛ be mɔɔ ɩma ye mmeliyema di ɛyɛkɛ. Meti, Nyamɩnlɩ Odwokɔ kã kile yɛ kɛɛ,“sɛ abiye ɩlɛ yɩ ɔhɔnwʋ nwʋ ɛya a, ɩva ɩhyɛ yɩ. Mʋnlʋmmɔ bɛva tanɩ bɛhyɛ kɛmɔ Niibenyia ɩva mʋnlʋmmɔ bɛ tanɩ ɩhyɛ bɛ nɩ.” (Kɩnga Kolosiyiamaa 3:13.) Yɛyɛ tanɩ yetiyia Gyehova mbɔmɩ sʋ̃maa, naasʋ̃ ɩfa ɩkyɛ yɛ. Ɔzɔ ti Gyehova sʋ̃ ikilaa ɔhʋanɩ kɛɛ yɛkɛva ye mmeliyema bɛ tanɩ yɛkɛhyɛ bɛ. Sɛ ɔnwʋ kɛɛ ɛyɛ dɩyɛ be diyia wʋ anlima a, kɔ yɩ pɛ na beziyeziye odwokɔ yɩ.—Kɩnga Matiyu 5:23, 24.b

SUMÁ SƲ̃MAA

4. Bɔ mmɔdɩnɩ yɩ́ mmenii nwʋ adwɩnɩ mɔɔ ɩávata wɔ wu nu

Yɛdɔ ye mmeliyema munwala baaba paa. Naasʋ̃ ɩyɛ a, ɩyɛ sɩ kɛɛ yɛ nɩɩ bɛzabɛ mɔɔ ɩsʋnɩ dɩka mɔɔ bɔzʋ̃ anzɛnyɩɩ kezimɔ bɛdɩ nɩ kɔwɔ. Meti, mɩnla yɛ ɩkɔwʋwa yɛ na yeanyia abiyela nwʋ adwɩnɩba a? Kɩnga Egyima 10:34, 35, na akʋ̃ bozunzú ndwokɔɣizialɛ eyimmɔ nwʋ:

• Abiyela mɔɔ ɩpɛ kɛɛ ɩsʋ̃mɩ Gyehova nɩ, ide yi itiã nu ɩávalɩ nwʋmɔ dɩka mɔɔ enii kʋ̃ nɩ ɩzʋ̃. Kɛ ɛkɛyɛ na wʋazumazuma Gyehova wɔ eyi nu a?

• Wɔ wʋ apaa yi nu ɛkɛnɩ nɩ, mɩnla adwɩnɩ mɔɔ ɩávata yɛ mmenii lɛ wɔ mvʋlɔ nwʋ mɔɔ ɛpɛ kɛɛ ɔpʋ a?

Kɩnga 2 Kɔlɛntɩmaa 6:11-13, na akʋ̃ bozunzú odwokɔɣizialɛ eyi nwʋ:

• Mmeliyema mɔɔ ɩsʋnɩ dɩka mɔɔ bɔzʋ̃ nɩɩ kezimɔ bɛdɩ nɩ, kɛ ɛkɛyɛ na wʋaɣike bɛ a?

5. Fá tanɩ kyɛ na pɩbɛ́ azʋ̃nudwolɩyɛ

Gyehova ɩáyɛ tanɩ, meti iáhyinyia yɛ ɛkɛnɩ tanɩfakyɛ. Naasʋ̃ ɩfa amɩyɛ yɛ tanɩ ɩkyɛ yɛ eɣile bela. Kɩnga Ndwomi 86:5, na akʋ̃ bozunzú ndwokɔɣizialɛ eyimmɔ nwʋ:

• Mɩnla yɛ ɛhɛlɛlɛ odwokɔ eyi ɩma ɔnwʋ falɩ kezimɔ Gyehova fa tanɩ kyɛ nɩ nwʋ a?

• Ekila kezimɔ Gyehova fa tanɩ kyɛ nɩ a, kɛ ɩma ɛtɩ nɣanlɩ se a?

• Mɩnla nninyeni yɛ ɩkɔhʋla kɛzɩkɛ ɔkʋ̃yɛlɛ mɔɔ ɩwɔ yɛ nɩɩ ye mmeliyema avinli nɩ a?

Kɛ yɛkɛyɛ na yɛazumazuma Gyehova na ɔkʋ̃yɛlɛ ɩawʋwa yɛ nɩɩ ye mmeliyema avinli a? Kɩnga Ɛɣɛlɛwulɛ 19:11, na akʋ̃ bozunzú odwokɔɣizialɛ eyi nwʋ:

• Sɛ abiye yɛ dɩyɛ be tiyia wʋ ma ɛfa ɛya a, mɩnla yɛ ɛkɛyɛ na azʋ̃nudwolɩyɛ ɩahɔ zʋlɔ ɩawʋwa bɛ avinli a?

Ɩyɛ a yɛyɛ dɩyɛ be yetiyia ye mmeliyema, sɛ ɩba yɩ ɔzɔ a, mɩnla yɛ ɩsɛ kɛɛ yɛyɛ a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Sɛ Yɛpɩbɛ Azʋ̃nudwolɩyɛ a, Yenyia Nyilalɛ (6:01)

• Wɔ vidiyo yi nu nɩ, mɩnla yɛ eliyema baalɛ yɩ yɛlɩ va bɩbɛlɩ azʋ̃nudwolɩyɛ a?

6. Fá wʋ adwɩnɩ siye wʋ mmeliyema bo subanɩba zʋ

Sɛ yebike ye mmeliyema bʋwɔ a, yɛ yɛkɔnwʋ bo subanɩba nɩɩ be sinidɔlɛ a. Naasʋ̃ kɛ yɛkɛyɛ na yɛava yɛ adwɩnɩ yɛaziye bo subanɩba zʋ mfomi a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Má Wʋ Subanɩ Ɩyɛ Pɩkɛ! (5:10)

• Mɩnla yɛ ɩkɔwʋwa wʋ ma ɔkɔnwʋ subanɩba mɔɔ ɩwɔ wʋ mmeliyema nwʋ a?

Gyehova fa yɩ adwɩnɩ isiye ye subanɩba zʋ. Kɩnga 2 Mmɩlɩzʋdwokɔ 16:9a, na akʋ̃ bozunzú odwokɔɣizialɛ eyi nwʋ:

• Ye subanɩba mɔɔ Gyehova fa yɩ adwɩnɩ siye zʋ nɩ, kɛ ɩma ɛtɩ nɣanlɩ se a?

YƖ DƆKƆWƆLƐ

Sɛ yɛfa ye mmeliyema bɛ tanɩ yɛkyɛ bɛ na yɛda ɔlɔlɛ ali yekile bɛ a, ɩkɛma ɔkʋ̃yɛlɛ kɔwʋwa asafʋ yi nu.

Kɛ Okowuwa Ekeze a?

• Kɛ ɛkɛyɛ na wʋayɩ mmenii nwʋ adwɩnɩ mɔɔ ɩávata wɔ wu nu a?

• Sɛ odwokɔ be si wɔ ɛ nɩɩ wʋ anlima Kilisinyianii bɛ avinli a, mɩnla yɛ ɛkɛyɛ a?

• Mɩnla ti mɔɔ ɛpɛ kɛɛ osumazuma kezimɔ Gyehova fa tanɩ kyɛ nɩ a?

PƖBƐ́ SƲ̃MAA

Kilá kezimɔ Gyisɛsɩ yɩ ndianwʋ ɔkʋ̃ be kɔhʋla kɔwʋwa yɛ na ama yɛáwuwalɩ abiyemmɔ ndɛnɩ.

Yɩ́ Mbuna Yɩ (6:56)

Sɛ yɛtɩ nɣanlɩ kɛɛ mfʋmɩ yɩ ɩ́zʋ̃ amɩyɛ po a, asʋ̃ ɩsɛ kɛɛ yɛpa kyɛbɛ a?

“Kyɛbɛbalɛ—Dɩyɛ Mɔɔ Ɩfa Azʋ̃nudwolɩyɛ Ɩba” (Ɔwɩɛnɩlɛ Aɣanɩ, November 1, 2002)

Kilá kezimɔ abiyemmɔ bozuma kɛɛ bɛlɛ́yɛ anyunumihilalɛ mmɩlɩ mɔ bɛ nɩɩ mmenii di nɩ.

Áma Ekyina Mɔɔ Wʋ Anyɩ Nwʋ Yɩ Zʋ Obuwa Ndɛnɩ (5:06)

Kilá kezimɔ ɔkɔhʋla keziyeziye ɛ nɩɩ mvʋlɔ avinli odwokɔ na ama azʋ̃nudwolɩyɛ mɔɔ ɩwɔ asafʋ yi nu nɩ ɩázɩkɛlɩ.

“Beziyeziye Bɛ Avinli Ndwokɔ Wɔ Ɔlɔlɛ Nu” (Ɔwɩɛnɩlɛ Aɣanɩ, May 2016)