OZUMALƐDƖYƐ 55
Bʋwá Wʋ Asafʋ Yɩ
Sɛ ɔkɔ oyuwadɩ dɩka bela a, mmenii abʋmɩ abʋmɩ sʋ̃maa yɛ bɛlɛ anyɩnlɩlelɛ bɔsʋ̃mɩɩ Gyehova wɔ asafʋ sʋ̃maa zɛ nu a. Bɛ anyɩ deli ɔhʋanɩhilelɛ nɩɩ ehilehilelɛ mɔɔ benyia nɩ nwʋ, na bɛfa ɛhyɩmɛ bɔbʋwa asafʋ yɩ ma ɩkɔ yɩ anyunu. Ɔzɔ yɛ ɛtɩ nɣanlɩ wɔ asafʋ mɔɔ ɔwɔ numɔ nɩ nwʋ a?
1. Mɩnla ɔhʋanɩ zʋ yɛ ɔkɔhʋla kɛva wʋ mmɩlɩ nɩɩ wʋ anwʋzɩzɩbɛ kɔwʋwa asafʋ yɩ a?
Ye munwatĩĩ yɛkɔhʋla yɛkɛyɛ dɩyɛ be yɛkɔwʋwa asafʋ mɔɔ yɛwɔ nu nɩ. Kɛ ndianwʋ nɩ, asʋ̃ abiyemmɔ wɔ wʋ asafʋ nu mɔɔ bɛ alʋbɔ hɔ anyunumi anzɛnyɩɩ bɔ nwʋ ɩba bɛ a? Asʋ̃ sa ɔkʋla bʋwa bɛ ma bɔkɔ dɩyɛzumanlɛ a? Anzɛnyɩɩ sa ɔkʋla yɛ nninyeni be, dɩkɛɛ ekeli kualɛ kɛma bɛ anzɛnyɩɩ ɔkɔwʋwa bɛ ma bekeziyeziye bɛ awudo a? (Kɩnga Gyemisi 1:27.) Sa yɛkʋla yɛbʋwa ma besiyeziye Kɩndɔm Hɔɔlʋ na bɛayɛ yɩ bʋwɔ sʋ̃. Kɛ abiye yɛ ɩhyɛ yɛ kɛɛ yɛyɛ egyima eyimmɔ a. Mfomi ɔlɔlɛ mɔɔ yɛwɔ yɛma Nyamɩnlɩ nɩɩ ye mmeliyema yɛ ɩma ‘yetu yɛ nwʋ yɛma’ a.—Ndwomi 110:3.
Dasɩvʋlɔmaa mɔɔ bonluma nɩ kɔhʋla kɔwʋwa asafʋ yɩ wɔ ahʋanɩ mvʋlɔ zʋ. Mmenyia mɔɔ bɛfata na bɛyɛ ndianwʋba nɩ kɔhʋla kɛvata kɛɛ asafʋ nu azʋ̃mɩvʋlɔ na aɣinzi yi bɛazʋ̃mɩ kɛɛ asafʋ nu mbanimbani. Mmeliyema mmenyia nɩɩ mmaalɛ munwala kɔhʋla kɔzʋ̃mɩ kɛɛ ɔhʋanɩbukolɛmaa na bɛava bɛawʋwa dasɩlɛlilɛ egyima yɩ. Ɔzɔ la yɛ abiyemmɔ sʋ̃ kɔhʋla kɔwʋwa ma bekegyinangyina nniyia mɔɔ yeyiyia wɔ numɔ yɛsʋ̃mɩ a. Na bo nu be sʋ̃ kɔhʋla kɔzʋ̃mɩ wɔ asafʋ azʋlɔtʋ mɔɔ behyinyia mmʋwalɩyɛ nu.
2. Mɩnla ɔhʋanɩ zʋ yɛ yɛkɔhʋla yɛkɛva ye ozukua nɩɩ yɛ anwʋnyiadɩ yɛkɔwʋwa asafʋ yɩ a?
Sa yɛkʋla “yɛfa yɛ anwʋnyiadɩ yɛhyɛ Gyehova animinyiamɩ.” (Ɛɣɛlɛwulɛ 3:9) Yɛ anyɩ deli nwʋmɔ paa kɛɛ yɛkɛva ye ozukua nɩɩ yɛ anwʋnyiadɩ yɛkɔwʋwa asafʋ mɔɔ yɛwɔ numɔ yɩ nɩɩ oyuwadɩ munwala dasɩlɛlilɛ egyima yɩ. (Kɩnga 2 Kɔlɛntɩmaa 9:7.) Fʋtʋlɔ mɔɔ yɛyɩ nɩ, bɛfa ebiye bɔbʋwa mmeliyema mɔɔ asianɩ ɩdʋ bɛ nɩ. Mmeliyema sʋ̃maa bɛta ‘bɛtɩ bo ozukua yɩ be betiã ahanlɩ’ na bɛava bɛayɩ fʋtʋlɔ. (Kɩnga 1 Kɔlɛntɩmaa 16:2.) Sa yɛkʋla yɛyɩ fʋtʋlɔ yekua fʋtʋlɔ nnɛka mɔɔ ɩwɔ dɩka mɔɔ yeyiyia numɔ yɛsʋ̃mɩ anzɛnyɩɩ intanɛtɩ zʋ wɔ donate.jw.org. Gyehova ma yɛ ɔnwʋmɔ ɔhʋanɩ mɔɔ sa yɛkʋla yɛfa ye ozukua nɩɩ yɛ anwʋnyiadɩ yɛbʋwa yɩ ɔzʋ̃mɩnlɛ. Sɛ yɛyɛ ɔzɔ a, nɩ yekilee kɛɛ yɛdɔ yɩ.
SUMÁ SƲ̃MAA
Kilá ɔhʋanɩ azʋlɔtʋ mɔɔ ɔkɔhʋla koluwa zʋ kɔwʋwa asafʋ yɩ.
3. Sa yɛkʋla yɛfa ye ozukua nɩɩ yɛ anwʋnyiadɩ yɛbʋwa
Gyehova nɩɩ Gyisɛsɩ anyɩ deli bɛzabɛ mɔɔ bɛyɩ bo kunlu bɛkyɛ dɩyɛ nɩ nwʋ. Kɛ ndianwʋ nɩ, Gyisɛsɩ hamvʋlɩ kunavʋlɔ be mɔɔ nɩ íni ebiye naasʋ̃ ɩwɔlɩ mmɔdɩnɩ kɛɛ ɩkɛyɩ fʋtʋlɔ nɩ. Kɩnga Luuku 21:1-4, na akʋ̃ bozunzú ndwokɔɣizialɛ eyimmɔ nwʋ:
Asʋ̃ ɩsɛ kɛɛ yɛfa ozukua kezile yɛyɩ fʋtʋlɔ ansaana ɩazɔ Gyehova anyɩ a?
Sɛ yɛzʋ̃ yɛ ahʋnlɩnɩ nu yɛyɩ fʋtʋlɔ a, kɛ ɩma Gyehova nɩɩ Gyisɛsɩ bɛtɩ nɣanlɩ bese a?
Sɛ ɛpɛ kɛɛ ɔnwʋ kezimɔ yɛfa yɛ fʋtʋlɔ yedi egyima a, yɩ́ VIDIYO nɩ. Na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Mɩnla ɔhʋanɩ zʋ yɛ bɛfa yɛ fʋtʋlɔ bɔbʋwa asafʋ mɔɔ ɩwɔ oyuwadɩ munwala a?
4. Sa yɛkʋla yetu yɛ nwʋ yɛma yɛbʋwa
Wɔ ɔwɔkɩ nɩ, Gyehova yɩ mmenii minyianlɩ bɔ nwʋ hilalɩ dɩka mɔɔ nɩ beyiyia numɔ bɔsʋ̃mɩ nɩ zʋ bʋwɔ. Naasʋ̃, nɩ kɛ ozukua nkʋ̃ la yɛ behyinyia na bɛava bɛayɛ eyi a. Kɩnga 2 Mmɩlɩzʋdwokɔ 34:9-11, na akʋ̃ bozunzú odwokɔɣizialɛ eyi nwʋ:
Mɩnla ɔhʋanɩ zʋ yɛ Yizilayanii bela wʋwalɩ ma behilalɩ Gyehova yi pika yɩ zʋ a?
Sɛ ɛpɛ kɛɛ ɔnwʋ kezimɔ Gyehova Dasɩvʋlɔmaa bɛlɛ ɔzɔ ɔwɔkɩ ndianwʋ yɩ bedii egyima a, yɩ́ VIDIYO nɩ. Na akʋ̃ bozunzu ndwokɔɣizialɛ eyimmɔ nwʋ.
Mɩnla ti mɔɔ ihyinyia kɛɛ yɛma yɛ Kɩndɔm Hɔɔlʋ ɛkɛnɩ tɩ na yɛyɛ nninyeni mɔɔ ɩzɩkɛ wɔ ɛkɛnɩ bʋwɔ a?
Mɩnla nninyeni yɛ ɔkɔhʋla kɛyɛ kɛva kɔwʋwa ɛkɛnɩ ziyeziyelɛ a?
5. Mmeliyema mmenyia kɔhʋla keminyia bɔ nwʋ na bɛava asɛdɩ bɛawula bɛ sa
Bayɩbʋlʋ hyɛ mmenyia mɔɔ bɔwɔ asafʋ yi nu ɛzɩzɩbɛ kɛɛ beminyiá bɔ nwʋ bɛyɛ mɔɔ bɔkɔhʋla bela bɔwʋwa asafʋ yɩ. Sɛ ɛpɛ kɛɛ ɔnwʋ nwʋmɔ ndianwʋ a, yɩ́ VIDIYO nɩ. Na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Wɔ vidiyo yi nu nɩ, mɩnla yɛ Ryan yɛlɩ na ama ɩahʋla ɩayɛ sʋ̃maa ɩawʋwa asafʋ yɩ a?
Bayɩbʋlʋ ma yɛnwʋ mɔɔ abiye yɛ a, ɩkɛma ɩkɛvata kɛɛ asafʋ nu sʋ̃mɩvʋlɔ anzɛnyɩɩ ebani. Kɩnga 1 Timoti 3:1-13, na akʋ̃ bozunzu ndwokɔɣizialɛ eyimmɔ nwʋ:
Mɩnla yɛ bekilaa ɔhʋanɩ kɛɛ mmeliyema mmenyia mɔɔ bɛpɛ kɛɛ bɛyɛ asafʋ nu azʋ̃mɩvʋlɔ nɩɩ mbanimbani bɛkɛyɛ a?
Mɩnla yɛ bekilaa ɔhʋanɩ kɛɛ yɩ abusunwamaa bɛkɛyɛ a?—Kilá nkyɩkyɛmi 4 nɩɩ 11.
Sɛ mmeliyema mmenyia bɔ mmɔdɩnɩ kɛɛ bokodwu ɔzɔ bʋtayɩ yɩ nwʋ a, kɛ ɩbʋwa asafʋ yɩ ise a?
EBIYE A, ABIYE IKEƔIZIA KƐƐ: “Ɛhɩnla dɩka yɛ Gyehova Dasɩvʋlɔmaa benyia ozukua bɛyɛ bɛ egyima yɩ a?”
Mɩnla yɛ ɛkɛhã a?
YƖ DƆKƆWƆLƐ
Mmɔdɩnɩ mɔɔ yɛbɔ kɛɛ yɛkɛva yɛ mmɩlɩ, yɛ anwʋzɩzɩbɛ, ye ozukua, nɩɩ yɛ anwʋnyiadɩ yɛkɔwʋwa asafʋ yɩ nɩ, Gyehova anyɩ sɔ yɩ baaba.
Kɛ Okowuwa Ekeze a?
Mɩnla ɔhʋanɩ zʋ yɛ yɛkɔhʋla yɛkɛva yɛ mmɩlɩ nɩɩ yɛ anwʋzɩzɩbɛ yɛkɔwʋwa asafʋ yɩ a?
Mɩnla ɔhʋanɩ zʋ yɛ yɛkɔhʋla yɛkɛva ye ozukua nɩɩ yɛ anwʋnyiadɩ yɛkɔwʋwa asafʋ yɩ a?
Mɩnla nninyeni yɛ ɛpɛ kɛɛ ɛyɛ fa bʋwa asafʋ yɩ a?
PƖBƐ́ SƲ̃MAA
Kilá sianti mɔɔ Nyamɩnlɩ iáhila ɔhʋanɩ kɛɛ yɩ azʋ̃mɩvʋlɔ koduwa tayɩtɩ dɔkʋ̃ nɩ.
“Mɩnla Yɛ Bayɩbʋlʋ Kã Falɩ Tayɩtɩ Duwalɛ Nwʋ a?” (Ndwokɔ mɔɔ ɩwɔ jw.org zʋ)
Bayɩbʋlʋ yɩ fa egyima azʋlɔtʋ be iwula mmenyia mɔɔ bonluma nɩ bɛ sa. Na sɛ nwʋmɔ ba hyinyia kɛɛ baalɛ mɔɔ inluma di ɔzɔ egyima yɩ sʋ̃ ɛ?
“Kezimɔ Tiyɛlɛ Nhyɩhyɛlɩyɛ Nɩ Yɛ Egyima Wɔ Asafʋ Yɩ Nu” (Ɔwɩɛnɩlɛ Aɣanɩ, February 2021)
Kilá kezimɔ Dasɩvʋlɔmaa be bɔzʋ̃ akɛnɣazɩzɩbɛ nu bɛfa nninyeni bɔbɔ afɔlɩ na ama bɛahʋla bɛava awuuku bɛahɔ bɛama bɔ ɔhɔnwʋmmɔ dedimaa.
Kilá kezimɔ ɔhʋanɩ mɔɔ yeduwa ɔzʋlɔ yenyia ozukua yɛyɛ ye egyima nɩ dɩ sʋnʋnkʋ̃ wɔ ɔzʋ̃mɩnlɛ nɣalɩyɛ nɩ mmɔ nwʋ.