Egyima Mɔɔ “Sʋ̃mɩvʋlɔ Nɔhʋanlɛvʋlɔ Nɩ Mɔɔ Izi Nɣɛlɛbɛ Nɩ” Ɩyɛ

Gyisɛsɩ yɛ ɩdɩ Kilisinyianɩ asafʋ yi ti a. (Ɛfɩsɛsɩmaa 5:23) Nnɛ, Gyisɛsɩ ɩzʋ̃ sʋlɔ ikile yɩ mmɛdalilɛmaa ɔhʋanɩ iluwa “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ” nɩ zʋ. (Kɩnga Matiyu 24:45.) Gyisɛsɩ Kɩlayɩsɩ yɩzayɩ yɛ ɩyɩlɩ “sʋ̃mɩvʋlɔ” yɩ a, meti ɩwɔ tumi ɛgyɩkɩ̃ɩ̃ naasʋ̃ ɩlanwʋ la ɩdɩ Kɩlayɩsɩ yɩ akɛlɛ na ɩsʋ̃mɩ Kɩlayɩsɩ yɩ mmenlima yɩ. Aninyia yɛ lɛ sʋ̃mɩvʋlɔ eyi a? Mɩnla ɔhʋanɩ zʋ yɛ sʋ̃mɩvʋlɔ nɩ kila yɛ zʋ a?

1. Aninyia yɛ lɛ “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ a”?

Ɔzʋmɩ ɔwɔkɩ munwala Gyehova duwa benyia ɔkʋ̃ anzɛnyɩɩ mmenyia okuwu ɛgyɩkɩ̃ɩ̃ be zʋ yɛ ɩfa ɔhʋanɩhilelɛ ɩma yɩ mmenii a. (Malaki 2:7; Hibulumaa 1:1) Wɔ Gyisɛsɩ yɩ owulo mɛda nɩ, asʋ̃mavʋlɔ nɩɩ mbanimbani mɔɔ bɔwɔ Gyelusalamɩ yɛ nɩ bɛfa ɔhʋanɩhilelɛ bɛma Gyisɛsɩ yɩ mmɛdalilɛmaa nɩ a. (Egyima 15:2) Nnɛ sʋ̃, iluwa mbanimbani okuwu ɛgyɩkɩ̃ɩ̃ be mɔɔ bɔnlʋmmɔ yɛ lɛ Gyehova Dasɩvʋlɔmaa bɔ Ɔhʋanɩhilelɛ Okuwu nɩ zʋ yɛ ɩfa sunzuma ɔfʋã nu alɩyɛ nɩɩ dasɩlɛlilɛ yɩ nwʋ ɔhʋanɩhilelɛ ɩma a. Okuwu eyi yɛ lɛ ‘sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ mɔɔ [Gyisɛsɩ] ɩvalɩ yɩ kɛɛ ihilá azʋ̃mɩvʋlɔ mɔɔ bɛha n’ɩ bɔ zʋ’ a. (Matiyu 24:45) Ɔhʋanɩhilelɛ Okuwu yi nu maa munwala bɛdɩ Kilisinyiamaa mɔɔ bɛva sunzuma nwanzanwanza bɔvɔ ngɔlɔ bɛ, na bɛ anyɩ ɩla kɛɛ sɛ bowu a, bɔkɔhɔ bɛkɛhɩnla Kɩlayɩsɩ nwʋ ma bekeli dɩyɛ wɔ sʋlɔ.

2. Mɩnla sunzuma ɔfʋã nu alɩyɛ yɛ sʋ̃mɩvʋlɔ nɔhʋanlɛvʋlɔ nɩ ɩfa ɩma a?

Gyisɛsɩ ɩhanlɩ kɛɛ sʋ̃mɩvʋlɔ nɔhʋanlɛvʋlɔ nɩ “ɩvá [yɩ ɔhɔnwʋmmɔ Kilisinyiamaa] bɛ kyɛfʋã alɩyɛ ɩma bɛ wɔ mmɩlɩ mɔ ɩsɛ nu.” (Matiyu 24:45) Kɛmɔ sɛ yedi alɩyɛ a, ɩbʋwa ma yenyia pɔkɔdɩlɛ baaba na yɛ nwʋ yɛ sɩ nɩ, ɔzɔ la sʋ̃ yɛ sunzuma ɔfʋã nu alɩyɛ mɔɔ mɛyɩ yɛ lɛ ɔhʋanɩhilelɛ mɔɔ ɩzʋ̃ Nyamɩnlɩ Odwokɔ yi nu nɩ, ɩma yenyia anwʋzɩzɩbɛ mɔɔ yɛkɛva yekeli Gyehova nɔhʋanlɛ na yɛayɛ egyima mɔɔ Gyisɛsɩ ɩva iwula yɛ sa nɩ a. (1 Timoti 4:6) Yɛ sa kã sunzuma ɔfʋã nu alɩyɛ yɩ be wɔ dɩyɛzumanlɛ, ayiyialɩyɛ azʋlɔtʋ yɛɛ Bayɩbʋlʋ nwʋ awuuku nɩɩ vidiyo nu, na eyi bʋwa yɛ ma yɛtɩ Nyamɩnlɩ yɩ apɛdɩ tʋ na yɛhyɛ yɛ nɩɩ yɩ ɔhɔnwʋvalɛ yi nu ɛzɩzɩbɛ.

SUMÁ SƲ̃MAA

3. Ɩsɛ kɛɛ Gyehova yɩ mmenii bɛfa ɔkʋ̃yɛlɛ bɛyɛ egyima

Iluwa Gyisɛsɩ yɩ ɔhʋanɩhilelɛ zʋ nɩ, Ɔhʋanɩhilelɛ Okuwu yi kila kɛɛ Gyehova Dasɩvʋlɔmaa bɛkɛyɛ be egyima pɛpɛɛpɛ mɔɔ nhyɩhyɛlɩyɛ la nwʋmɔ. Gyisɛsɩ iluwalɩ ɔhʋanɩ mɔɔ ɩdɩ zɔ zʋ ihileli ɔwɔkɩ Kilisinyiamaa nɩ ɔhʋanɩ. Yɩ́ VIDIYO nɩ.

VIDIYO: Gyehova Ɩma Yi Mmenii Bɛyɛ Ɔkʋ̃ (6:18)

Kɩnga 1 Kɔlɛntɩmaa 14:33, 40, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ ɛhɛlɛlɛ odwokɔ eyi ɩma yɛnwʋ kɛɛ, Gyehova pɛ kɛɛ yɩ Dasɩvʋlɔmaa bɛyɛ bɛ dɩyɛ bela pɛpɛɛpɛ mɔɔ nhyɩhyɛlɩyɛ la nwʋmɔ a?

4. Sʋ̃mɩvʋlɔ nɔhʋanlɛvʋlɔ nɩ yɛ ikila yɛ dasɩlɛlilɛ egyima yɩ zʋ a

Dasɩlɛlilɛ egyima yɩ yɛ ɩdɩ egyima mɔɔ nwʋmɔ hyinyia paa mɔɔ ɔwɔkɩ Kilisinyiamaa nɩ yɛlɩ a. Kɩnga Egyima 8:14, 25, na akʋ̃ bozunzú ndwokɔɣizialɛ eyimmɔ nwʋ:

• Wɔ ɔwɔkɩ Kilisinyiamaa bɛ mmɩlɩ zʋ nɩ, aninyiammɔ yɛ nɩ bɛfa ɔhʋanɩhilelɛ bɛma wɔ dasɩlɛlilɛ egyima yɩ nwʋ a?

• Mmɩlɩ mɔ asʋ̃mavʋlɔ nɩ bɛvalɩ ɔhʋanɩhilelɛ bɛmanlɩ Pita nɩɩ Dwɔɔnʋ nɩ, kɛ bɛyɛlɩ bɛ dɩyɛ bezeli a?

Dasɩlɛlilɛ egyima yɩ yɛ ɩdɩ egyima mɔɔ nwʋmɔ hyinyia paa mɔɔ Ɔhʋanɩhilelɛ Okuwu yi kila zʋ a. Yɩ́ VIDIYO nɩ.

VIDIYO: Dasɩlɛlilɛ Egyima Yɩ Nwʋ Hyinyia Bɛ (1:24)

Gyisɛsɩ zili kezimɔ dasɩlɛlilɛ egyima yɩ nwʋ hyinyia nɩ zʋ wudo. Kɩnga Maakɩ 13:10, na akʋ̃ bozunzú ndwokɔɣizialɛ eyimmɔ nwʋ:

• Mɩnla ti mɔɔ dasɩlɛlilɛ egyima yɩ nwʋ hyinyia Ɔhʋanɩhilelɛ Okuwu yɩ a?

• Mɩnla ti mɔɔ yehyinyia “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ” bɔ ɔhʋanɩhilelɛ na ama yɛahʋla yɛayɛ dasɩlɛlilɛ egyima yɩ wɔ oyuwadɩ munwala a?

5. Sʋ̃mɩvʋlɔ nɔhʋanlɛvʋlɔ nɩ yɛ ɩfa ɔhʋanɩhilelɛ ɩma a

Ɔhʋanɩhilelɛ Okuwu yɩ yɛ ɩfa ɔhʋanɩhilelɛ ɩma Kilisinyiamaa mɔɔ bɔwɔ oyuwadɩ munwala a. Kɛ ɩyɛ mɔɔ ɩnwʋ ɔhʋanɩhilelɛ pɔkyɩɩ mɔɔ ɩsɛ kɛɛ ɩfa ɩma a? Kilá kezimɔ ɔhʋanɩhilelɛ okuwu mɔɔ nɩ ɩwɔ ɔwɔkɩ Kilisinyiamaa bɛ mmɩlɩ zʋ nɩ yɛlɩ ɔzɔ. Kɩnga Egyima 15:1, 2, na akʋ̃ bozunzú ndwokɔɣizialɛ eyimmɔ nwʋ:

• Mɩnla yɛ ɩvalɩ pɩlazunɛ kezile ɩɣalɩ ɔwɔkɩ Kilisinyiamaa be bɛ avinli a?

• Aninyiammɔ bɛ ɛkɛnɩ yɛ Pɔɔlʋ, Banabasɩ, nɩɩ mmenii nɣalɩyɛ nɩ bɔhɔ beleli ɔhʋanɩhilelɛ a?

Kɩnga Egyima 15:12-18, 23-29, na akʋ̃ bozunzú odwokɔɣizialɛ eyi nwʋ:

• Ansaana bekezi pɔkɔ nɩ, mɩnla yɛ ɔwɔkɩ ɔhʋanɩhilelɛ okuwu yi bɛyɛlɩ bɛva bɛbɩbɛlɩ Nyamɩnlɩ yɩ ɔhʋanɩhilelɛ wɔ odwokɔ yɩ nwʋ a?—Kilá nkyɩkyɛmi 12, 15, nɩɩ 28.

Kɩnga Egyima 15:30, 31 nɩɩ 16:4, 5, na akʋ̃ bozunzú ndwokɔɣizialɛ eyimmɔ nwʋ:

• Mɩnla yɛ ɔwɔkɩ Kilisinyiamaa nɩ bɛyɛlɩ wɔ ɔhʋanɩhilelɛ okuwu yi bɔ ɔhʋanɩhilelɛ yɩ nwʋ a?

• Mɩnla ɔhʋanɩ zʋ yɛ Gyehova iyilalɩ sutiye mɔɔ bɛyɛlɩ nɩ zʋ a?

Kɩnga 2 Timoti 3:16 nɩɩ Gyemisi 1:5, na akʋ̃ bozunzú odwokɔɣizialɛ eyi nwʋ:

• Nnɛ sʋ̃ sɛ Ɔhʋanɩhilelɛ Okuwu yi besii pɔkɔ a, ɛhɩnla dɩka yɛ bɛpɩbɛ ɔhʋanɩhilelɛ a?

YƖ DƆKƆWƆLƐ

Ɔhʋanɩhilelɛ Okuwu yi yɛ lɛ “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ a.” Mɛyɩ yɛ Kɩlayɩsɩ ɩyɩ yɩ kɛɛ ɩva ɔhʋanɩhilelɛ nɩɩ sunzuma ɔfʋã nu alɩyɛ ɩma Kilisinyiamaa wɔ oyuwadɩ dɩka bela a.

Kɛ Okowuwa Ekeze a?

• Aninyia yɛ ɩyɩlɩ “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ” a?

• Mɩnla ɔhʋanɩ zʋ yɛ Ɔhʋanɩhilelɛ Okuwu nɩ kila yɛ zʋ a?

• Ede di kɛɛ Ɔhʋanɩhilelɛ Okuwu nɩ yɛ lɛ “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ” a?

PƖBƐ́ SƲ̃MAA

Kilá kezimɔ Ɔhʋanɩhilelɛ Okuwu nɩ ɩyɛ yɩ egyima pɛpɛɛpɛ mɔɔ nhyɩhyɛlɩyɛ la nwʋmɔ.

“Mɩnla Yɛ Lɛ Gyehova Dasɩvʋlɔmaa Bɔ Ɔhʋanɩhilelɛ Okuwu Nɩ a?” (Ndwokɔ mɔɔ ɩwɔ jw.org zʋ)

Kilá kezimɔ Ɔhʋanɩhilelɛ Okuwu nɩ ɩma yɛ sa kã sunzuma ɔfʋã nu alɩyɛ mɔɔ yɛkʋla yɛfa yɛ nwʋ yetiã ɔzʋlɔ.

Yɛyɛ Awuuku Mɔɔ Numɔ Ndwokɔ Dɩ Nɔhʋanlɛ (17:18)

Egyima mɔɔ Gyisɛsɩ ɩva iwula Ɔhʋanɩhilelɛ Okuwu yi nu maa bɛ sa nɩ, kɛ bɛtɩ nɣanlɩ wɔ nwʋmɔ bese a?

Ɔnwʋmɔ Ɔhʋanɩ Mɔɔ Ɩla Yɛ Ahʋnlɩnɩ Zʋ (7:04)

Mɩnla ɔhʋanɩ zʋ yɛ dɩyɛzumanlɛ nɩɩ ayiyialɩyɛ azʋlɔtʋ mɔɔ yɛkɔ nɩ da yɩ ali kɛɛ Gyehova yɛ ikilee Ɔhʋanɩhilelɛ Okuwu yi ɔhʋanɩ a?

Gyehova Ikilehilee Yɩ Mmenii (9:39)