OZUMALƐDƖYƐ 51
Ma Wʋ Ɛdɩndɛlɛ Ɩzɔ Gyehova Anyɩ
Gyehova wɔlɩ yɛ wɔ ɔhʋanɩ be zʋ mɔɔ ɩma yɛkʋla yɛtɩndɛ, na eyi dɩ akyɛdɩ sʋnʋnkʋ̃. Asʋ̃ kezimɔ yɛfa akyɛdɩ eyi yedi egyima nɩ nwʋ hyinyia yɩ a? Nwʋmɔ hyinyia yɩ paa! (Kɩnga Gyemisi 1:26.) Meti kɛ ɩkɛyɛ na kezimɔ yɛtɩndɛ nɩ ɩazɔ Gyehova anyɩ a?
1. Kɛ ɩkɛyɛ na yɛava akyɛdɩ eyi yɛali egyima bʋwɔ a?
Bayɩbʋlʋ kã kɛɛ “bezizí bɔ ɔhɔnwʋmmɔ bɛ kɛnɣa, na bɔwʋwá bɔ nwʋ nkʋ̃kʋ̃ nkʋ̃kʋ̃.” (1 Tɛsalonikamaa 5:11) Asʋ̃ ezi abiyemmɔ mɔɔ behyinyia ɛzɩzɩbɛhyɛlɛ a? Mɩnla yɛ ɔkɔhʋla kɛyɛ kɔwʋwa bɛ a? Ma bɔnwʋ yɩ kɛɛ ɔdwɩnɩ bɔ nwʋ. Ebiye a, dɩyɛ mɔɔ ɩma wʋ anyɩ deli bɔ nwʋ nɩ, sa ɔkʋla kã kile bɛ. Asʋ̃ ezi ɛhɛlɛlɛ odwokɔ be mɔɔ sa ɩkʋla ɩhyɛ abiye ɛzɩzɩbɛ a? Sʋ̃maa wɔ ɛkɛnɩ mɔɔ ɔkɔhʋla kɛva keli egyima. Kakɛ sʋ̃ kɛɛ, kezimɔ ɛkɛhã odwokɔ be nɩ kɔhʋla kɛhyɛ mvʋlɔ ɛzɩzɩbɛ paa. Meti eɣile bela bɔ mmɔdɩnɩ kɛɛ wʋ ɛdɩndɛlɛ kɛyɛ fɛ na ɩahyɛ ɛzɩzɩbɛ.—Ɛɣɛlɛwulɛ 15:1.
2. Mɩnla odwokɔ yɛ íni kɛɛ yɛkã a?
Bayɩbʋlʋ kã kɛɛ: “Máma odwokɔ tanɩ ɩzʋ̃ bo munwa nu ifinde.” (Kɩnga Ɛfɩsɛsɩmaa 4:29.) Eyi kile kɛɛ íni kɛɛ yɛkã ndwokɔ mbʋanlɩ mbʋanlɩ anzɛnyɩɩ ndwokɔ be mɔɔ ɩkɛma mvʋlɔ keli ɛyɛkɛ. Akʋ̃ sʋ̃, ɩsɛ kɛɛ yɛpʋ kɛɛ yɛkɛhã abiyemmɔ bɔ nwʋ ndwokɔ tanɩ anzɛnyɩɩ kɛɛ yɛkɛzɩkɛ be dima.—Kɩnga Ɛɣɛlɛwulɛ 16:28.
3. Mɩnla yɛ ɩkɔwʋwa yɛ ma yɛkɛdɩndɛ wɔ ɔhʋanɩ mɔɔ ɩhyɛ ɛzɩzɩbɛ zʋ a?
Mbɔmɩ sʋ̃maa nɩ ndwokɔ mɔɔ yɛkã nɩ da mɔɔ ɩwɔ yɛ ahʋnlɩnɩ nu nɩɩ nninyeni mɔɔ yɛdwɩnɩ nwʋmɔ nɩ ali. (Luuku 6:45) Meti ɩsɛ kɛɛ yesuma kezimɔ yɛkɛva yɛ adwɩnɩ yekeziye nninyeni mɔɔ ɩdɩ baaba, mɔɔ nwʋmɔ tɩ, mɔɔ ɩsɔ anyɩnlɩ nɩɩ mɔɔ bɛkamvʋ yɩ nɩ zʋ. (Fɩlɩpɩmaa 4:8) Sɛ yɛkɔhʋla yɛkɛva yɛ adwɩnɩ yekeziye nninyeni eyimmɔ zʋ a, ɩsɛ kɛɛ yekila nninyeni mɔɔ yɛfa yede yɛ anyɩ nɩɩ yɛ ɔhɔnwʋvalɛ bʋwɔ. (Ɛɣɛlɛwulɛ 13:20) Ɩkɛyɛ baaba sʋ̃ kɛɛ yɛkɔdwɩnɩ mɔɔ yɛpɛ kɛɛ yɛkã nɩɩ kezimɔ yɛkɛhã nwʋ ansaana yɛadɩndɛ. Sunzú kezimɔ ndwokɔ mɔɔ ɛkã nɩ kɔhʋla kɛhã mmenii mvʋlɔ nɩ nwʋ kila. Bayɩbʋlʋ kã kɛɛ: “Ndwokɔ mɔɔ bɛádwɩnɩ nwʋmɔ ansaana na bɛahã nɩ ɩdɩ kɛɛ afɩna mɔɔ ɩwʋwɔ, naasʋ̃ nɣɛlɛbɛvʋlɔ yɩ tavɩlɩma sa adimakɛlɛ.”—Ɛɣɛlɛwulɛ 12:18.
SUMÁ SƲ̃MAA
Sumá kezimɔ ɛkɛma wʋ ɛdɩndɛlɛ kɔzɔ Gyehova anyɩ na ɩahyɛ mmenii mvʋlɔ sʋ̃ ɛzɩzɩbɛ.
4. Kilá wʋ ɛdɩndɛlɛ bʋwɔ
Ɩyɛ a, ye munwala yɛkã ndwokɔ be mɔɔ aɣinzi yi, nɩ yenlu yɛ nwʋ. (Gyemisi 3:2) Kɩnga Galatiyiamaa 5:22, 23, na akʋ̃ bozunzú ndwokɔɣizialɛ eyimmɔ nwʋ:
Subanɩ eyimmɔ nu ɛhɩnla dɩyɛ yɛ sa ɔkʋla bɔ nwʋmɔ mpayɩ na ɩawʋwa ma wʋahila wʋ ɛdɩndɛlɛ bʋwɔ a? Mɩnla ɔhʋanɩ zʋ yɛ subanɩ eyi kɔhʋla kɔwʋwa wʋ a?
Kɩnga 1 Kɔlɛntɩmaa 15:33, na akʋ̃ bozunzú odwokɔɣizialɛ eyi nwʋ:
Mɩnla ɔhʋanɩ zʋ yɛ wʋ ɔhɔnwʋmmɔ nɩɩ nninyeni mɔɔ ɛfa de wʋ anyɩ nɩ ɩkɔhʋla kenyia wʋ ɛdɩndɛlɛ zʋ tumi a?
Mɩnla nninyeni yɛ ɩkɔhʋla ikenyia kezimɔ ɛtɩndɛ nɩ zʋ tumi a?
Kɩnga Odwokɔhanlɛvʋlɔ 3:1, 7, na akʋ̃ bozunzú odwokɔɣizialɛ eyi nwʋ:
Mɩnla mmɩlɩ yɛ ɩkɛyɛ baaba kɛɛ yɛkɛyɛ dinn anzɛnyɩɩ yɛkɛlɩkɛ na mmɩlɩ baaba nu yɛadɩndɛ a?
5. Kã mmenii mvʋlɔ nwʋ odwokɔba
Kɛ ɩkɛyɛ na yɛáwʋdʋlɩ mmenii mvʋlɔ anzɛnyɩɩ yɛáhanlɩ odwokɔ mɔɔ ɩkɛma bekeli ɛyɛkɛ a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
Wɔ vidiyo yi nu nɩ, nɩ aliyema nɩ kɩhã mmenii mvʋlɔ nwʋ ndwokɔ tanɩ. Mɩnla ti mɔɔ nɩ ɩpɛ kɛɛ iyiaki a?
Mɩnla yɛ ɩyɛlɩ mɔɔ ɩwʋwalɩ yɩ ma ɩzɩnzanlɩ a?
Kɩnga Odwokɔhanlɛvʋlɔ 7:16, na akʋ̃ bozunzú odwokɔɣizialɛ eyi nwʋ:
Sɛ ɩyɛ yɛ kɛɛ yɛhã abiye nwʋ odwokɔ tanɩ a, mɩnla yɛ ɩsɛ kɛɛ yɛkakɛ a?
Kɩnga Odwokɔhanlɛvʋlɔ 7:21, 22, na akʋ̃ bozunzú odwokɔɣizialɛ eyi nwʋ:
Sɛ abiye kɩhã wʋ nwʋ odwokɔ tanɩ a, mɩnla ɔhʋanɩ zʋ yɛ ɛhɛlɛlɛ odwokɔ eyi kɔwʋwa wʋ na wʋávalɩ ɛya a?
6. Ɛ nɩɩ wu mmusunwamaa bɛdɩndɛ wɔ ɔhʋanɩ kɩnlɩma zʋ
Sɛ yɛ nɩɩ ye mmusunwamaa tɩndɛɛ a, Gyehova pɛ kɛɛ yɛyɛ zɔ wɔ ɔlɔlɛ nɩɩ ɔhʋanɩ kɩnlɩma zʋ. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Mɩnla yɛ ɩkɔwʋwa wʋ ma ɛ nɩɩ wu mmusunwamaa kɛdɩndɛ wɔ ɔhʋanɩ kɩnlɩma zʋ a?
Kɩnga Ɛfɩsɛsɩmaa 4:31, 32, na akʋ̃ bozunzú odwokɔɣizialɛ eyi nwʋ:
Mɩnla ndwokɔ yɛ yɛkã a, ɩkɔhʋla kɛhyɛ ye mmusunwamaa ɛzɩzɩbɛ a?
Gyehova hanlɩ kezimɔ ɩtɩ nɣanlɩ wɔ yɩ Ɣa, Gyisɛsɩ nwʋ. Kɩnga Matiyu 17:5, na akʋ̃ bozunzú odwokɔɣizialɛ eyi nwʋ:
Mɩnla ɔhʋanɩ zʋ yɛ ɔkɔhʋla kozumazuma Gyehova mmɩlɩ mɔ ɛ nɩɩ wu mmusunwamaa tɩndɛɛ a?
Pɩbɛ́ ahʋanɩ mɔɔ okoluwa zʋ ɛkɛhamvʋ mvʋlɔ
ABIYEMMƆ BƐKÃ KƐƐ: “Mamɩ mɛyɩ ɔzɔ la yɛ mɩtɩndɛ a, wʋábɛ yɩ a ɩávalɩ mʋ nwʋ.”
Ɛ nɩɩ bɛ yɛ adwɩnɩ a? Mɩnla ti a?
YƖ DƆKƆWƆLƐ
Yɛ ɛdɩndɛlɛ kɔhʋla kɛhyɛ ebiyemmɔ ɛzɩzɩbɛ anzɛnyɩɩ ikebila bɛ. Meti ansaana yɛkɛdɩndɛ nɩ ɩsɛ kɛɛ yɛdwɩnɩ mɔɔ yɛkɛhã, mmɩlɩ mɔ yɛkɛhã nɩɩ kezimɔ yɛkɛhã yɩ nwʋ bʋwɔ.
Kɛ Okowuwa Ekeze a
Mɩnla ɔhʋanɩ zʋ yɛ yɛkɔhʋla yekoluwa ye munwa nu ndɛnɩ zʋ yɛkɛhyɛ mvʋlɔ ɛzɩzɩbɛ a?
Mɩnla ndwokɔ yɛ íni kɛɛ yɛkã a?
Mɩnla yɛ ɩkɔwʋwa yɛ ma yɛkɛdɩndɛ wɔ ɔhʋanɩ mɔɔ ɩhyɛ ɛzɩzɩbɛ zʋ a?
PƖBƐ́ SƲ̃MAA
Mɩnla yɛ ɩkɔwʋwa yɛ ma yɛkɛhã ndwokɔ mɔɔ ɩhyɛ mvʋlɔ ɛzɩzɩbɛ a?
Kilá mɔɔ ɩkɔwʋwa wʋ ma ɔkɔbʋ ɛdɩndɛlɛ evinli yɩ ɛhanlɛ
“Asʋ̃ Ɛdɩndɛlɛ Evinli Ɩdɩbɛ Anzɛnyɩɩ?” (Ndwokɔ mɔɔ ɩwɔ jw.org zʋ)
Kilá kezimɔ ɔkɔhwɩ̃ wʋ nwʋ wɔ ndwokɔlilɛ nwʋ.
Kilá kezimɔ Gyehova wʋwalɩ benyia be ma iyiakili ndwokɔ evinli ɩhanlɛ.
“Mʋwɔlɩ Yɩ Tʋ Mʋdwɩnɩndwɩnɩnlɩ Kezimɔ Nɩ Mɩ Ɛbɩlawɔlɛ Ɩsɩkɛ Nɩ Nwʋ” (Ɔwɩɛnɩlɛ Aɣanɩ, August 1, 2013)