Sianti Mɔɔ Yɛ Ntalɩwulalɛ Nɩɩ Yɛ Anwʋziyeziyelɛ Nwʋ Hyinyia

Ye munwatĩĩ yɛwɔ ntalɩ mɔɔ yɛ anyɩ deli nwʋmɔ nɩɩ kezimɔ yɛpɛ kɛɛ yesiyeziye yɛ nwʋ. Sɛ yɛfa Bayɩbʋlʋ nu egyinalɛzʋ-ndwokɔ yedi egyima a, ɩkɛma yekeziyeziye yɛ nwʋ kezimɔ yɛpɛ na mmɩlɩ kʋ̃ yɩ la sʋ̃ yɛazɔ Gyehova anyɩ. Má yezunzu egyinalɛzʋ-ndwokɔ eyi be nwʋ.

1. Mɩnla egyinalɛzʋ-ndwokɔ yɛ ɩkɔwʋwa yɛ wɔ yɛ anwʋziyeziyelɛ nɩɩ yɛ ntalɩwulalɛ nu a?

Ɩsɛ kɛɛ ‘yesiyeziye yɛ nwʋ bʋwɔ baaba’ na yɛma yɛ nwʋ tɩ yɛfa yekile kɛɛ yɛdɩ mmenii mɔɔ ‘yɛsʋ̃mɩ Nyamɩnlɩ.’ (1 Timoti 2:9, 10) Sunzú egyinalɛzʋ-ndwokɔ anla eyimmɔ nwʋ: (1) Ɩsɛ kɛɛ ‘yesiyeziye yɛ nwʋ bʋwɔ.’ Sɛ ɔkɔ asafʋ ayiyialɩyɛ tʋ a, ɔkɔnwʋ kɛɛ ɩsʋnɩ kezimɔ abiyela ziyeziye yɩ nwʋ, naasʋ̃ kezimɔ yesiyeziye yɛ nwʋ nɩɩ ye eɣinli nɩ da yɩ ali kɛɛ yɛwɔ annidi yɛma Nyamɩnlɩ mɔɔ yɛsʋ̃mɩ yɩ nɩ. (2) Ɩsɛ kɛɛ yɛma yɛ anwʋziyeziyelɛ yɛ mɔɔ ɩfata. Ikile kɛɛ, yelówula ntalɩ mɔɔ ɩkɛma yɛ nwʋ kogua ɛkɛnɩ mɔɔ ɩkɔhwɩnhwɩ̃ nna nwʋ akɔnɔ anzɛnyɩɩ abiyemmɔ bɛ adwɩnɩ ɩkɛɣa yɛ zʋ. (3) Ɩsɛ kɛɛ yɛma yɛ anyɩ da ɛkɛnɩ. Eyi kile kɛɛ, kɛ anwʋziyeziyelɛ nɩɩ ntalɩwulalɛ mɔɔ ɩkɛɣa zʋ bela yɛ ɩsɛ kɛɛ yedi yɩ mɛda a. (4) Ɩsɛ kɛɛ eɣile bela yɛma yɛ anwʋziyeziyelɛ da yɩ ali kɛɛ ‘yɛsʋ̃mɩ Nyamɩnlɩ’ na ama mmenii bɛanwʋ yɩ kɛɛ yɛsʋ̃mɩ nɔhʋanlɛ Nyamɩnlɩ yɩ.—1 Kɔlɛntɩmaa 10:31.

2. Sɛ yesiyeziyee yɛ nwʋ a, mɩnla ti mɔɔ ɩsɛ kɛɛ yɛdwɩnɩ ye mmeliyema dedimaa nwʋ a?

Ɩwɔ numɔ kɛɛ sa yɛkʋla yewula ntalɩ mɔɔ yɛpɛ dɩyɛ, naasʋ̃ ɩsɛ kɛɛ yɛdwɩnɩ kezimɔ yɛ anwʋziyeziyelɛ kɔhʋla kɛhã mmenii mvʋlɔ nɩ nwʋ. Yɛbɔ mmɔdɩnɩ kɛɛ yɛlɛ́yɛ dɩyɛ mɔɔ ikelile mmenii mvʋlɔ, mfomi yɛyɛ mɔɔ ɩkɛma yɛ ‘ɔhɔnwʋmmɔ bo kunlu ikodwoli yɛ nwʋ, ama be dedi ianyi.’—Kɩnga Wulomimaa 15:1, 2.

3. Kɛ ɩkɛyɛ na yɛama yɛ anwʋziyeziyelɛ ɩahwɩ̃ mmenii ma bɛazʋ̃mɩ Gyehova a?

Ɩwɔ numɔ kɛɛ yɛbɔ mmɔdɩnɩ kɛɛ yekeziyeziye yɛ nwʋ bʋwɔ wɔ dɩka bela dɩyɛ, naasʋ̃ sɛ yɛkɔɔ asafʋ ayiyialɩyɛ azʋlɔtʋ anzɛnyɩɩ dasɩlɛlilɛ a, ɩsɛ kɛɛ yekila yɛ anwʋziyeziyelɛ bʋwɔ paa. Yɛábɛ kɛɛ yɛ anwʋziyeziyelɛ ɩyɩ mmenii bɛ adwɩnɩ wɔ odwokɔba mɔɔ yɛkã nɩ zʋ. Mfomi kezimɔ yesiyeziye yɛ nwʋ nɩ, ɩsɛ kɛɛ ɩkã mmenii ma benyia ɛpɛ kɛɛ bokozuma nɔhʋanlɛ yɩ nɩ. Na ama “bɛanwʋ yɩ kɛɛ ehilehilelɛ nɩ mɔɔ ɩfalɩ Nyamɩnlɩ yɛ Nnwʋanlɩlelɛvʋlɔ nɩ nwʋ nɩ ɩdɩ baaba.”—Tayɩtɔsɩ 2:10.

SUMÁ SƲ̃MAA

4. Sɛ yesiyeziye yɛ nwʋ bʋwɔ a, ikile kɛɛ yebu Gyehova

Mɩnla ti mɔɔ nwʋmɔ hyinyia paa kɛɛ yesiyeziye yɛ nwʋ bʋwɔ a? Kɩnga Yikile 4:11, na akʋ̃ bozunzú ndwokɔɣizialɛ eyimmɔ nwʋ:

• Yɛdɩ Gyehova yɩ azʋ̃mɩvʋlɔ. Kɛ ɩsɛ kɛɛ eyi kã yɛ anwʋziyeziyelɛ ise a?

• Asʋ̃ osunzu kɛɛ, ɩsɛ kɛɛ yɛma kezimɔ yesiyeziye yɛ nwʋ yɛkɔ asafʋ ayiyialɩyɛ nɩɩ dasɩlɛlilɛ nɩ nwʋ hyinyia yɛ a? Mɩnla ti a?

5. Mɔɔ ɩkɔwʋwa yɛ ma yɛkɔnwʋ ntalɩ mɔɔ ɩsɛ kɛɛ yewula nɩɩ kezimɔ yekeziyeziye yɛ nwʋ

Yɩ́ VIDIYO nɩ.

VIDIYO: ‘Bɛyɛ́ Dɩyɛ Bela Bɛhyɛ Nyamɩnlɩ Animinyiamɩ’ (10:18)

Sɛ yɛ ntalɩ yɩ bʋlɔ yɛ sɩ o, sɛ yɩ bʋlɔ ɩáyɛ sɩ o, ɩsɛ kɛɛ ɩyɛ mɔɔ yɩ anyɩ tɩ na ɩfata dɩka bela mɔɔ yɛkɔhɔ nɩ. Kɩnga 1 Kɔlɛntɩmaa 10:24 nɩɩ 1 Timoti 2:9, 10. Na akʋ̃ bozunzú sianti mɔɔ íni kɛɛ yewula ntalɩ eyimmɔ nwʋ:

• Ntalɩ mɔɔ ɩyɛ evinli anzɛnyɩɩ ɩávata.

• Ntalɩ mɔɔ ɩkyɩkyɩ yɛ nwʋ, ɩma yɛ nwʋ kua ɛkɛ, anzɛnyɩɩ ɩtwɩnhwɩ̃ nna nwʋ akɔnɔ.

Ɩwɔ numɔ kɛɛ Kilisinyiamaa béni Mosisi mmɛla yɩ tʋ dɩyɛ, naasʋ̃ ɔzɔ mmɛla nɩ ɩma bɔnwʋ Gyehova yɩ adwɩnɩ wɔ nninyeni nwʋ. Kɩnga Ditilonɔmi 22:5, na akʋ̃ bozunzú odwokɔɣizialɛ eyi nwʋ:

• Ntalɩwulalɛ nɩɩ anwʋziyeziyelɛ be wɔ ɛkɛ mɔɔ ɩma mmenyia sɛlɩ mmaalɛ na mmaalɛ sʋ̃ sɛlɩ mmenyia. Mɩnla ti mɔɔ íni kɛɛ yesiyeziye yɛ nwʋ zɔ a?

Kɩnga 1 Kɔlɛntɩmaa 10:32, 33 nɩɩ 1 Dwɔɔnʋ 2:15, 16, na akʋ̃ bozunzú ndwokɔɣizialɛ eyimmɔ nwʋ:

• Ɩsɛ kɛɛ yekila kɛɛ yɛ anwʋziyeziyelɛ ilédide mmenii mɔɔ bɛda yɛ apaa yi nu nɩɩ asafʋ yi nu. Mɩnla ti a?

• Mɩnla ntalɩwulalɛ nɩɩ anwʋziyeziyelɛ yɛ idwu ɔzʋlɔ wɔ wʋ apaa yi nu a?

• Asʋ̃ ekila a, anwʋziyeziyelɛ eyi be wɔ ɛkɛnɩ mɔɔ ɩdɩbɛ ɩma Kilisinyianii a? Mɩnla ti a?

YƖ DƆKƆWƆLƐ

Sɛ yesiyeziye yɛ nwʋ bʋwɔ na yewula ntalɩ baaba a, ikile kɛɛ yebu Gyehova nɩɩ mmenii mvʋlɔ.

Kɛ Okowuwa Ekeze a?

• Mɩnla ti mɔɔ yɛ ntalɩwulalɛ nɩɩ yɛ anwʋziyeziyelɛ nwʋ hyinyia Gyehova a?

• Egyinalɛzʋ-ndwokɔ mɔɔ ɩkɔwʋwa yɛ ma yekeziyeziye yɛ nwʋ bʋwɔ nɩ, ebiye yɛ lɛ ɛhɩnla dɩyɛ a?

• Mɩnla ɔhʋanɩ zʋ yɛ kezimɔ yesiyeziye yɛ nwʋ nɩ ɩkɔhʋla kɛhã kezimɔ mmenii bu nɔhʋanlɛ ɔzʋ̃mɩnlɛ a?

PƖBƐ́ SƲ̃MAA

Kilá adwɩnɩ mɔɔ wʋ anwʋziyeziyelɛ kɔhʋla kɛma mmenii kenyia wɔ wʋ nwʋ.

“Kɛ Mɩ Anwʋziyeziyelɛ Ɩdɩ Ise a?” (Ndwokɔ mɔɔ ɩwɔ jw.org zʋ)

Kilá sianti mɔɔ ɩsɛ kɛɛ ɔdwɩnɩ nwʋmɔ bʋwɔ paa ansaana wʋayɛ tatuu wʋagua wʋ nwʋ.

“Mɩnla Yɛ Bayɩbʋlʋ Kã Falɩ Tatuu Nwʋ a?” (Ndwokɔ mɔɔ ɩwɔ jw.org zʋ)

Kilá egyinalɛzʋ-ndwokɔ be mɔɔ ɩkɔhʋla kɔwʋwa wʋ ma ekezi pɔkɔba.

“Asʋ̃ Wʋ Anwʋziyeziyelɛ Ɩhyɛ Gyehova Animinyiamɩ a?” (Ɔwɩɛnɩlɛ Aɣanɩ, September 2016)

Mɩnla ɔhʋanɩ zʋ yɛ baalɛ be nyianlɩ abiyemmɔ bɛ anwʋziyeziyelɛ nwʋ adwɩnɩba a?

“Anwʋziyeziyelɛ Nɩɩ Ntalɩwulalɛ Yɛ Nɩ Ididee Mɩ a” (Awake!, December 22, 2003)