OZUMALƐDƖYƐ 02
Bayɩbʋlʋ Yɩ Ɩma Yenyia Anyɩnlɩlazʋ
Mmenii mɔɔ bɔwɔ oyuwadɩ munwala nɩ beyiyiaa ndwokɔ ɛzɩzɩbɛ mɔɔ ɩma bɛ ɛɣɛɛlɛ ɩbɔ, adwɩnɩndwɩnɩ ɩhyɛ bɔ zʋ, na bɛtɩ ɛyɛkɛ po. Asʋ̃ dɩyɛ be izi wɔ wʋ ɛbɩlawɔlɛ nu ma ɛdɩ nɣanlɩ ɔzɔ kyɩ̃ a? Ebiye a wʋzawʋ wʋ adimakɛlɛ be anzɛnyɩɩ wʋ dɔvʋlɔ be mɔɔ iwu nɩ ɩma ɛtɩɩ ɛyɛkɛ. Ebiye a ekeɣizia wʋ nwʋ kɛɛ, ‘Asʋ̃ nninyeni ɩkɛyɛ bʋwɔ eɣile be a?’ Bayɩbʋlʋ yɩ ɩma ɔzɔ odwokɔɣizialɛ yɩ nwʋ munwalɩyɛ mɔɔ ɩma yɛ ahʋnlɩnɩ ɩtɔ ye kunlu.
1. Mɩnla ɔhʋanɩ zʋ yɛ Bayɩbʋlʋ yɩ ɩma yenyia anyɩnlɩlazʋ a?
Bayɩbʋlʋ ikilehile sianti mɔɔ yeyiyiaa ndwokɔ ɛzɩzɩbɛ sʋ̃maa nɩ nu, isia sʋ̃ ikilehile yɛ kɛɛ, ɩlɛ́kyɛ bela bɛkɛyɩ ɔzɔ ndwokɔ ɛzɩzɩbɛ munwatĩĩ wɔ ɛkɛnɩ. Bayɩbʋlʋ yɩ anʋhʋba mɔɔ ɩfalɩ “eɣile be” nwʋ nɩ sa ɩkʋla ɩma enyia “anyɩnlɩlazʋ”. (Kɩnga Gyɛlɩmaya 29:11, 12.) Anʋhʋba eyimmɔ bʋwa yɛ ma yekyina ye ndwokɔ ɛzɩzɩbɛ munwa, ɩma yenyia nninyeni nwʋ adwɩnɩba, na akʋ̃ sʋ̃ ɩkɛma yekenyia anyɩnlɩlelɛ wɔ nnɛ nɩɩ daabaa.
2. Eɣile be mɔɔ Bayɩbʋlʋ yɩ ɩbɔ nwʋmɔ anʋhʋba nɩ, kɛ ɩdɩ ise a?
Bayɩbʋlʋ yɩ ɩkã “eɣile be” nwʋ odwokɔ kɛɛ “owulo íni ɛkɛnɩ ebiyekʋ̃, ɛyɛkɛ nɩɩ mmʋnlɩ bénɩ ɛkɛnɩ ebiyekʋ̃, ozunɛ íni ɛkɛnɩ ebiyekʋ̃.” (Kɩnga Yikile 21:4.) Ehyinyia, nsisi, adimakɛlɛ, nɩɩ owulo mɔɔ ɩma mmenii tɩ nɣanlɩ kɛɛ béni anyɩnlɩlazʋ bela wɔ nnɛ nɩ, yɩ munwatĩĩ ikodua numɔ. Bayɩbʋlʋ yɩ ɩbɔ anʋhʋba kɛɛ mmenii kenyia anyɩnlɩlelɛ daabaa wɔ Paladayɩsɩ azɩlɛ yɩ zʋ.
3. Kɛ ɩkɛyɛ na wʋanyia anwʋlazʋ wɔ Bayɩbʋlʋ yɩ anʋhʋba azʋlɔtʋ nɩ nu a?
Mmenii sʋ̃maa bɛ anyɩ ɩla kɛɛ nninyeni ɩkɛzɩnza ɩkɛyɛ baaba, naasʋ̃ bɛáhʋla bɔnwʋ yɩ kɛɛ sɛ bɛ anyɩnlɩlazʋ yɩ ɩkɛɣa numɔ po a. Bayɩbʋlʋ yɩ anʋhʋba azʋlɔtʋ nɩ mɛyɩ sa ɩba numɔ. Sɛ ‘eɣile bela yekila ɛhɛlɛlɛ nɩ nu’ a, sa ɩkʋla ɩma yɛ anwʋlazʋ ɩyɛ kezi wɔ mɔɔ ɩkã nɩ nu. (Egyima 17:11) Mmɩlɩ mɔ osumaa Bayɩbʋlʋ yɩ nɩ, sa wʋzawʋ ɔkʋla esi pɔkɔ kɛɛ ekele mɔɔ ɩkã ɩfalɩ eɣile be nwʋ nɩ ekeli.
SUMÁ SƲ̃MAA
Dwɩnɩndwɩnɩ nninyeni be mɔɔ Bayɩbʋlʋ ɩbɔ anʋhʋba kɛɛ ɩkɛɣa wɔ eɣile be nɩ nwʋ. Kilá kezimɔ anyɩnlɩlazʋ mɔɔ Bayɩbʋlʋ ɩfa ɩma nɩ ɩbʋwaa abiyemmɔ wɔ nnɛ.
4. Bayɩbʋlʋ nɩ ɩma yenyia anyɩnlɩlazʋ kɛɛ yɛkɔhʋla yɛkɔwʋwa azɩ eɣile bela mɔɔ amanɩyɛnwʋnlɛ bela ɩáhɩnla nwʋ
Kilá Bayɩbʋlʋ nu anʋhʋba azʋlɔtʋ eyimmɔ. Numɔ ɛhɩnla dɩyɛ yɛ wʋ anyɩ ideli nwʋmɔ paa? Mɩnla ti a?
Kɩnga Bayɩbʋlʋ nu ndwokɔ mɔɔ bɔhwɩ̃ adwɩnɩ beziye ɔzʋlɔ wɔ ɔzɔ anʋhʋba azʋlɔtʋ yɩ nwʋ nɩ, na bozunzú ndwokɔɣizialɛ eɣimmɔ nwʋ:
Asʋ̃ ɛtɩ nɣanlɩ kɛɛ, ɔkɔhʋla ekenyia Bayɩbʋlʋ nu ndwokɔ eyimmɔ zʋ mfasʋ a? Ekila a, wʋ mmusunwamaa nɩɩ wʋ ɔhɔnwʋmmɔ sʋ̃ bɔkɔhʋla bekenyia ɔzʋlɔ mfasʋ a?
Tuá nwʋmɔ mfonyini kila kɛɛ ɛda oyuwadɩ be mɔɔ
ABIYELA ÍNI ƐKƐNƖ MƆƆ . . . |
ABIYELA . . . |
|---|---|
|
|
|
|
|
|
|
|
|
|
5. Bayɩbʋlʋ yɩ anʋhʋba azʋlɔtʋ nɩ ɩkɔhʋla ɩkɔwʋwa wʋ
Mmenii sʋ̃maa bɛ padi igolɔ anzɛnyɩɩ bɛva ɛya iluwa ndwokɔ ɛzɩzɩbɛ mɔɔ idua bɔ nwʋ iyiyia nɩ ti. Abiyemmɔ bɔ mmɔdɩnɩ kɛɛ bɛkɛzɩnza nninyeni nu ma ɩkɛyɛ baaba. Kilá kezimɔ Bayɩbʋlʋ yɩ anʋhʋba mɔɔ mɛyɩ yɛ lɛ kɛɛ, nninyeni ɩkɛyɛ bʋwɔ nɩ ɩbʋwaa mmenii wɔ nnɛ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.
Wɔ vidiyo yi nu nɩ, mɩnla ndwokɔ yɛ nɩ ɩhaa Rafika a?
Nsisi mɔɔ nɩ ɩnwʋ yɩ nɩ, yɩ tʋ iátu, naasʋ̃ kɛ Bayɩbʋlʋ nɩ ɩwʋwalɩ yɩ izeli a?
Eɣile be nwʋ anyɩnlɩlazʋ mɔɔ Bayɩbʋlʋ ɩfa ɩma yɛ nɩ, ɩkɔhʋla ɩkɔwʋwa yɛ ma yekegyina ye ndwokɔ ɛzɩzɩbɛ munwa na yeanyia anyɩnlɩlelɛ wɔ nnɛ. Kɩnga Ɛɣɛlɛwulɛ 17:22 nɩɩ Wulomimaa 12:12, na bozunzú ndwokɔɣizialɛ eyimmɔ nwʋ:
Ekila a, sɛ ede mɔɔ Bayɩbʋlʋ ɩkã ɩfalɩ eɣile be nwʋ nɩ edi a, ɩkɔwʋwa wʋ wɔ nnɛ a? Mɩnla ti a?
ABIYEMMƆ BƐKÃ KƐƐ: “Bayɩbʋlʋ yɩ anʋhʋba azʋlɔtʋ mɔɔ ɩfalɩ eɣile be nwʋ nɩ, ɩlɔ́kʋla ɩkɛyɛ nɔhʋanlɛ.”
Ekila a, mɩnla ti mɔɔ ihyinyia kɛɛ wʋzawʋ ɛpɩbɛlɩ numɔ a?
YƖ DƆKƆWƆLƐ
Bayɩbʋlʋ nɩ ɩma yenyia anyɩnlɩlazʋ na ɩbʋwa yɛ ma yekyina ye ndwokɔ ɛzɩzɩbɛ munwa, iluwa eɣile be mɔɔ ɩyɛ anyɩnlɩlelɛ nwʋ anʋhʋba azʋlɔtʋ mɔɔ ɩbɔ nɩ zʋ.
Kɛ Okowuwa Ekeze a?
Mɩnla ti mɔɔ mmenii hyinyia anyɩnlɩlazʋ a?
Mɩnla yɛ Bayɩbʋlʋ ɩkã ɩfalɩ eɣile be nwʋ a?
Sɛ enyia eɣile be nwʋ anyɩnlɩlazʋ a, kɛ ɩkɔwʋwa wʋ ikeze wɔ nnɛ a?
PƖBƐ́ SƲ̃MAA
Sumá kezimɔ anyɩnlɩlazʋ ɩkɔhʋla ɩkɔwʋwa wʋ mmɩlɩ mɔ eyiyiaa ndwokɔ ɛzɩzɩbɛ nɩ.
Kilá kezimɔ eɣile be nwʋ anyɩnlɩlazʋ ɩkɔhʋla ɩkɔwʋwa bɛzabɛ mɔɔ bɔwɔ adimakɛlɛ mɔɔ yɩ tʋ iádu kyɩ̃ nɩ.
Sɛ ekilaa ndwomi mɔɔ bɛyɛ yɩ vidiyo eyi a, tuá nwʋmɔ mfonyini kɛɛ ɛ nɩɩ wʋ abusunwa bede bɛ anyɩ wɔ Paladayɩsɩ mɔɔ Bayɩbʋlʋ ɩbɔ nwʋmɔ anʋhʋba nɩ nu.
Kɩnga kezimɔ abiye mɔɔ nɩ ɩpɩɩ kɛɛ nninyeni ɩkɔhɔ bʋwɔ wɔ oyuwadɩ nɩ, yɩ ɛbɩlawɔlɛ ɩzɩnzanlɩ mmɩlɩ mɔ ɩɣa izumanlɩ eɣile be nwʋ anyɩnlɩlazʋ mɔɔ ɩwɔ Bayɩbʋlʋ nu nɩ.
“Sikalɛpɛyɩ Mɩádɩ Nɣanlɩ Kɛɛ Ɩsɛ Kɛɛ Mɩsɩnza Oyuwadɩ” (Ɔwɩɛnɩlɛ Aɣanɩ, July 1, 2013)